Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Thaum uas raug ntau tus nug, nug txog peb txoj kev ntseeg lossis nug tej lo lus nug kom ua rau peb teb yuam kev peb yuav ua li cas? Tswv Yexus muaj lub tswv yim ntse los teb cov neeg uas tuaj nug nws. Tsis tas li ntawd, Tswv Yexus tseem rov qab nug lawv dua, saib lawv puas nkag siab txog qhov tseeb nyob hauv Vajluskub. Nyob hauv Tswv Yexus peb muaj txhua lo lus teb los nthuav tawm peb txoj kev ntseeg.

Hnub no, yog hnub 25/03/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Helen Ryser Smith dhau ntawm Zaj kawm NUG TUS TSWV

“Tsis muaj leej twb teb tau Tswv Yexus ib los li. Txij li hnub ntawd los, tsis muajleejtwg kam nug Yexus li lawm.” (Mathais 22:46).

Tomqab cov neeg Falixais lawv nrhiav kev ua rau kom Yexus yuam kev los ntawm nug saib puas tas yuav them se rau Xixas, Vajluskub sau ntxiv txog zaj xwm txheej uas cov neeg Xadukais lawv tuaj nrhiav kev ua nyuaj rau Tswv Yexus. Ntawm no yog pawg neeg tsis ntseeg txoj kev sawv hauv qhov tuag rov qab los yog li lawv thiaj nug Tswv Yexus tias yog muaj ib tug neeg yuav 7 tus pojniam, ces tomqab sawv rov qab los tus pog ntawd yog leej twg tus pojniam.

Kuv pom zoo heev txog txoj kev uas Tswv Yexus teb cov neeg uas xav cuab kom Tswv Yexus yuam kev. Hnub ntawd yog hnub uas Tswv Yexus qhia rau cov neeg Xadukais ib zaj kawm txog ntuj ceebtsheej. Tswv Yexus hais nyob hauv Mathais 22:29 tias:
“Nej xav yuam kev lawm! Rau qhov nej tsis totaub Vajtswv Txojlus thiab tsis paub Vajtswv lub hwjchim”.
Tswv Yexus pab kom lawv nkag siab txog txoj kev sawv hauv qhov tuag rov qab los thiab txhais lub ntsiab meej meej tias lawv tsis muaj txoj kev sib yuav nyob saum ntuj ceebtsheej. Yog li lawv txoj kev khuab xeeb tsis muaj nqis.

“Thaum cov neeg uas tuag lawm sawv rov qab los, lawv yuav zoo ib yam li cov timtswv uas nyob saum ntuj ceebtsheej, lawv tsis yuav pojniam tsis yuav txiv lawm. Nej tsis tau nyeem zaj uas Vajtswv tsa cov neeg tuag sawv rov qab los los? Vajtswv twb qhia rau nej lawm hais tias, ‘Kuv yog Anplahas tus Vajtswv, Ixaj tus Vajtswv thiab Yakhauj tus Vajtswv.’ Vajtswv tsis yog cov neeg tuag tus Vajtswv, tiamsis yog cov neeg ciaj tus Vajtswv

Tseeb tiag kuv xav pom cov neeg Xadukais lub ntsej muag lub sijhawm ntawd. Vim tom qab hnov Tswv Yexus hais li ntawd cov pej xeem xav tsis thoob rau tej Tswv Yexus qhia (nqe 33). Tswv Yexus nkag siab zoo cov neeg Yudais phau Vajluskub thiab Tswv Yexus nthuav tawm Vajtswv qhov tseeb muaj sia rau lawv.
Tas zaj xwm txheej rov qab hais ntxiv txog tus cov neeg Falixais, yog ib ceg kev ntseeg txawv kuj tuaj nug Tswv Yexus. Muaj ib tug pov thawj hlo qhia Mauxes kevcai nug Tswv Yexus txog nqe kevcai tseem ceeb tshaj plaws nyob hauv kevcai (nqe 36). Kuv xav tias Tswv Yexus yuav teb lo lus nug no yooj yim xwb.
Tswv Yexus teb tias: “Hlub tus Tswv uas yog nej tus Vajtswv kom kawg siab kawg ntsws, kawg plab kawg plawv thiab kawg nej lub dag lub zog.’ Nqe no thiaj yog nqe uas tseemceeb dua ntais. Thiab nqe ob uas tseemceeb hais li no hais tias: ‘Hlub koj tej kwvtij zejzog ib yam li koj hlub koj lub cev”

Tswv Yexus hais ntxiv rau lawv hauv nqe 40 tias: “Mauxes txoj Kevcai thiab cov cev Vajtswv lus tej lus qhia puavleej nyob tagnrho hauv ob nqe no”
Tas Tswv Yexus nug cov neeg Falixais nyob hauv nqe 42 tias: “

Ntseeg tias Tswv Yexus paub ua ntej tias lawv yuav teb li cas yog li Tswv Yexus thiaj nug lawv ob lo lus nug ntxiv kom lawv teb tsis tau: “Nej xav li cas txog tus Mexiyas? Nws yog leejtwg tus tub? ” Lawv teb hais tias, “Nws yog Daviv tus tub”

Tomqab hnov Tswv Yexus nug li ntawd lawv lub ntsej muag xav tsis thoob. Tseeb tiag, nqe 46 sau meej meej txog qhov uas lawv teb tsis tau Tswv Yexus ib los thiab txij thaum ntawd los tsis muaj leej twg xav nug Tswv Yexus ib lo lus twg ntxiv lawm.

Cov neeg Falixais lawv teb tsis tau lo lus nug uas Tswv Yexus nug lawv.
Dhau ntawm zaj xwm txheej no, kuv ua Vajtswv tsaug vim Vajtswv pub Vajluskub yog phau ntawd uas muaj ntau yam muaj nqis pub rau peb. ua Vajtswv tsaug vim Vajtswv pub Vaj Ntsujplig los txhawb, los pab thiab qhia rau peb paub thiab nkag siab txog qhov tseeb nyob hauv Vajluskub. Kuv tus kheej los nco Vajtswv tshav ntuj thiab tsuas xav kom tau zaum ntawm Tswv Yexus kotaw mloog nws qhia ib yam li pog Malis tau ua nyob hauv Lukas 10:39 xwb.

Thov caw nrog kuv peb thov Vajtswv ua ke.
Tswv Yexus thov koj pab kom kuv ncaj ncees kawm koj txojlus kom kuv loj hlob hauv txoj kev ntseeg thiab txoj kev paub koj. Thov pab kom kuv npaj txhij los teb lwm tus tej lus khuab xeeb txog koj thiab koj tej lus. Kuv thov hauv Tswv Yexus Khetos lub npe. Amees.

Cov kwv tij txhua tus, qhov tseeb nyob hauv Vajtswv txojlus yuav tso peb dim, coj peb mus nyob rau hauv qhov tseeb hauv Vajtswv. Cia li xav txog Vajtswv txojlus nruab hnub hmo ntuj, ua zoo ua raws li txhua nqe uas Vajtswv qhia kom peb ua lub neej ncaj ncees raws li Vajtswv txoj kev. Txhob cia tib neeg tej tswv yim ua rau peb ua xyem xyav rau Vajtswv tiamsis cia li mus nyob ze Vajtswv, nrhiav Vajtswv thiab txais yuav
Vajtswv ua tus coj kev hauv txhua yam.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.