Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Nyob hauv txoj kev phomsij ho muaj qhov kev cia siab, thiab thaum nyob hauv txoj kev tsaus ntuj yog lub sijhawm peb cheem tsum qhov kaj tshaj plaws. Tswv Yexus yog qhov kaj thiab yog qhov tseeb pub rau ntiajteb. Vajtswv tseg lub sijhawm thiab lub caijnyoog rau peb lees txim thiab ntseeg Nws. Txawm yog thaum uas txomnyem tshaj plaws los peb yeej nrhiav tau txoj kev kaj siab thiab muaj kev cia siab thaum muaj Vajtswv nrog peb nyob.

Hnub no, yog hnub 21/03/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Bruce C. Swaffield dhau ntawm Zaj kawm QHOV KAJ CI HAUV QHOV TSAUS NTUJ

“Kuv yog qhov kaj rau neeg ntiajteb. Tus uas raws kuv qab yuav tsis taug txojkev uas tsaus ntuj nti, tiamsis nws yuav tau lub neej tshav ntuj nrig.” (Yauhas 8:12)

Xov xwm ntiajteb tshaj tawm ntau qhov teeb meem txaus ntshai ua rau peb txhawj. Yam uas peb yuav tau ua yog khiav mus cuag Vajtswv thov kom Nws pub zog rau peb muaj kev nkag siab txog txoj kev cia siab nyob hauv Nws. Nyob hauv txhua yam. Peb yuav tau pheeb kom ruaj rau ntawm Vajtswv zoo li zaj nkauj hu tias “Kuv tus ntsujplig pheeb rau ntawm Yexus” tau Edward Mote sau nrog lub ntsiab lus li no: “Txawm yog thaum txoj kev tsaus ntuj pos nti txhua qhov, los kuv txiav txim siab sawv khov kho rau ntawm txoj koob hmoov Vajtswv pub. Txawm yog yuav ntsib cua daj cua dub, kuv txiav txim siab pheeb rau ntawm tus tswg tso siab. Pheeb rau ntawm Yexus uas yog lub pob zeb. Lwm qhov chaw cuag li ploj tas. Lwm qhov tsuas zoo li tej qhov mlos xwb.”

Yog ib tug ntseeg Vajtswv peb yuav tau ua raws li Vajtswv tej lus ci Nws qhov pom kev rau hauv lub ntiajteb uas tsaus ntuj nti no. Tiamsis dab ntxwgnyoog niaj hnub nrhiav kev tav peb tsis pub kom ci Vajtswv qhov kaj thiab qhov tseeb rau lub ntiajteb no. Txawm yog kev tsov rog, kab mob, sib ntaus sib tua, dej nyab, toj pob, kub nyhiab ua rau tsheej txhiab tus tib neeg tuag lawm los yeej muaj txoj kev cia siab tseg rau tib neeg. Ntawd yog txoj kev cia siab tseg rau cov neeg uas raug kev puas tsuaj. Ntawd kuj yog txoj kev cia siab tseg rau cov neeg nyob hauv txoj kev txomnyem. Tsis tas li ntawd, kuj yog txoj kev cia siab tseg rau tus uas xav kom tau kho zoo thiab tau txhawb zog. Ntawd kuj yog txoj kev cia siab rau peb cov uas xav kom tau txoj kev kaj siab. Ntau zaug ntawd kuj yog txoj kev cia siab tseg rau cov neeg uas xav ua pauj.

Tej zaug peb yuav nug Vajtswv tias vim li cas Vajtswv ho cia txoj kev tsaus ntuj thiab lub sijhawm phem li no tshwm txhua qhov? Vim li cas Vajtswv tsis tav kom txhob pub muaj neeg phem muab lwm tus tua pov tseg thiab tsis pub lawv pov foob pob? Vim li cas Vajtswv ho cia dab ntxwgnyoog ua haujlwm rau ub rau no thiab txais tau txoj kev muaj yeej zoo li ntawd?

Tiamsis yog xav li no ces yuam kev lawm. Dab ntxwgnyoog tsis yog tus muaj yeej vim Vajtswv txojlus nyob hauv Vajluskub qhia rau peb paub tias Vajtswv yog tus muaj yeej thaum kawg thiab Vajtswv yuav kav mus ib txhis lub ntiajteb no. Vajtswv yog tus uas kov yeej txhua lub caijnyoog. Vajtswv yog tus hais li ntawd tau 2000 xyoo dhau los tom qab peb hnub Tswv Yexus sawv hauv qhov tuag rov qab los thaum nws tuag thiab muab faus cia. Tej zaug Malis, Mathas, Yauhas thiab ntau tus kuj nug lo lus nug uas niaj hnub nim no peb nug: “Vajtswv nyob qhov twg lub sijhawm zoo li ntawd? Vim li cas Vajtswv ho tsis tav kom hloov pauv lub sijhawm ntawd?”

Tiamsis tseeb tiag Vajtswv twb nqes tes ua haujlwm lawm. Vajtswv yog tus ua rau kom Tswv Yexus sawv hauv qhov tuag rov qab los thiab ua rau Tswv Yexus sawv los thiab pub txoj kev cawmdim rau tus uas txais yuav Nws nyob rau txhua tiam. Twb yog Vajtswv txoj kev hlub tsis hloov pauv ntawd yeej tseem ruaj khov los txog hnub no. Vajtswv twb npaj txhij txoj kev cawm dim tseg rau tus uas ntseeg tus Cawm Seej thiab kuj yog tus uas coj qhov kaj los pub rau lawv. Muaj ib tug tub txawg txhais Vajluskub sau tias: “Yexus Khetos yog qhov kaj rau lub ntiajteb. Vajtswv yog qhov kaj thiab Yexus Khetos yog tus sawv cev rau tus Vajtswv uas qhov muag ntsia tsis pom. Lub hnub ci pom kev rau tag nrho lub ntiajteb no. Thiab Yexus Khetos yog qhov kaj tseg rau ntiajteb. Tseeb tiag yog tsis muaj qhov kaj ces tag nrho lub ntiajteb no puav leej nyob hauv qhov tsaus ntuj. Vim li ntawd, thaum Tswv Yexus tuag ces Nws thiaj coj qhov pom kev los rau lub ntiajteb” raws li Vajtswv txojlus tau sau nyob hauv Yauhas 8:12-16.

Peb yuav tsum yog tus uas dhau los ua qhov kaj ci pom kev rau lub ntiajteb no. Peb tsis nrog cov neeg ua haujlwm phem nyob ib tog thiab ua nplooj Tswv Yexus qhov kaj zoo kawg nkaus pub rau ntiajteb. Ntseeg tias thaum peb nyob hauv Vajtswv ces peb yuav txais tau kev hlub thiab kev cia siab ntawm Vajtswv.

Thov caw nrog kuv peb thov Vajtswv ua ke.
Ua Vajtswv tsaug vim koj tau pub qhov pom kev ci rau kuv nyob hauv txhua lub caijnyoog txawm yog txomnyem lossis quaj ntsuag. Thov Vajtswv pab kom kuv ua lub neej ua ib tug tim khawv pub rau koj thiab ci qhov pom kev rau txhua tus ib ncig kom los ntawm qhov pom kev ntawd lawv tsis nyob hauv txoj kev tsaus ntuj ntawm txoj kev txhaum tiamsis tau Leej Txiv saum ntuj qhov pom kev ci rau lawv. Kuv thov hauv Tswv Yexus Khetos lub npe. Amees.

Cov kwv tij txhua tus Vajtswv lub homphiaj nyob siab tshaj tib neeg txoj kev nkag siab. Vajtswv coj txoj kev kaj siab, kev cia siab thiab txojsia ib txhis txawm yog yuav nyob rau lub caijnyoog twg. Yog li txhob ua poob txoj kev cia siab raws li tib neeg ntsia tiamsis saib txhua yam raws li Vajtswv tau saib. Ci Vajtswv qhov pom kev ntawd los ntawm txoj kev ntseeg, muaj tus cwjpwm nco Vajtswv tshav ntuj, nco Vajtswv txoj kev hlub thiab tshua txog txhua tus thaum uas lawv txomnyem thiab tag kev cia siab.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.