Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Yuav ua li cas kom peb thiaj sawv khov kho hauv Vajtswv thaum tej kev sim siab hauv lub neej no tshwm tuaj raug? Yuav ua li cas thiaj yuav tawg paj txi txiv rau Vajtswv, ua lub neej haum Vajtswv siab? Vajtswv qhia rau peb paub txog tej yam uas tshwmsim tawm sab nraud puav leej yog tshwm hauv peb lub siab tuaj. Yog li peb yuav tau tshuaj peb lub siab, xyuas saib peb lub siab tab tom zoo li cas.

Hnub no, yog hnub 20/03/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Lorie Hartshorn dhau ntawm Zaj kawm TSHUAJ LUB SIAB

“Cov noob nplej uas poob rau ntawm qhov av zoo, piv txog Vajtswv Txojlus uas neeg hnov thiab lawv khaws tej lus ntawd cia rau hauv lawv lub siab. Lawv lub neej thiaj tawg paj txi txiv: muaj qee hnab txi tau peb caug lub, muaj qee hnab txi tau rau caum lub thiab muaj qee hnab txi tau ib puas lub.” (Malakaus 4:20).

Kuv txiv raug mob ntawm nws lub plawv thiab yuav tau nqa rau ib lub máy pab nws lub plawv tau ob thiv. Qhov ntawd ua rau kuv txiv hnov tsis zoo nyob thiab tsis zoo pes tsawg txawm li los yawg yeej ris rawv lub máy ntawd thaum uas cov kws tshuaj lawv tshuaj kuv txiv lub plawv thiab nrhiav txoj kev phim los kho kom zoo.

Qhov no ua rau kuv xav txog qhov uas peb yuav tau tshuaj peb lub siab pub rau Vajtswv. Nyob hauv Malakaus tshooj 4, Tswv Yexus tham rau cov thwjtim mloog txog plaub hom av. Nyob hauv zaj lus piv txwv no, Tswv Yexus tham txog ib tug neeg tawm mus tseb noob thiab cov noob ntawd poob mus rau plaub hom av sib txawv. Lub noob nyob hauv zaj xwm txheej no yog Vajtswv txojlus. Tsis paub Vajtswv txojlus puas nyob rau hauv cov neeg mloog lub hlwb thiab lub siab kom hloov pauv lawv lub neej? Lossis lawv yuav tso tes mus lossis hnov qab tej uas lawv twb kawm tau lawm? Koj txais Vajtswv tej lus zoo li cas?
Cov noob poob rau hauv plaub hom av: muaj ib txhia poob ntawm tej tog kev, ib txhia poob saum pob zeb, ib txhia poob hauv qhov pos, ib txhia poob rau ntawm thaj av zoo. Hauv qab no yog lo lus nug tseg rau koj nres thiab xav saib koj yog hom av twg. Koj lub siab zoo li cas thaum uas koj mloog Vajtswv tej lus?

Thaum mloog lossis nyeem Vajtswv tej lus koj coj tus cwjpwm zoo li cas?

Mloog Vajtswv txojlus tiamsis yeej tsis ua li cas rau yus.

Mloog thiab thaum pib txais yuav Vajtswv tej lus tiamsis thaum raug sim siab tuaj koj tsis ntseeg Vajtswv tej lus ntxiv lawm.

Mloog Vajtswv txojlus tiamsis tseem muaj kev txhawj nyob rau hauv lub neej thiab ntshaw ntau yam tseem ceeb dua.

Mloog Vajtswv txojlus, txais yuav qhov tseeb ntawd thiab cim nco rau hauv lub siab lub hlwb txog Vajtswv tej lus kom hloov pauv koj lub siab.

Yog li thaum koj mloog Vajtswv tejlus koj lub siab yog lub twg nyob rau hauv plaub yam no? Ncaj ncees rau Vajtswv thiab yus tus kheej. Koj lub siab pub rau Vajtswv tej lus poob rau yam av twg? Cia siab tias koj yuav yog hom av plaub – mloog Vajtswv tejlus thiab txi tau txiv ntau vim koj lub siab txais yuav Vajtswv tej lus. Tswv Yexus twb hais txog tej paj txiv thaum hnov Vajtswv tejlus tau sau nyob hauv Malakaus 4:20:
“Cov noob nplej uas poob rau ntawm qhov av zoo, piv txog Vajtswv Txojlus uas neeg hnov thiab lawv khaws tej lus ntawd cia rau hauv lawv lub siab. Lawv lub neej thiaj tawg paj txi txiv: muaj qee hnab txi tau peb caug lub, muaj qee hnab txi tau rau caum lub thiab muaj qee hnab txi tau ib puas lub.”

Vajtswv txojlus qhia rau peb paub tias los ntawm txoj kev qhib siab, zoo siab txais yuav thiab mloog Vajtswv tejlus yog lub tswv yim pab kom peb ua tau lub neej tawg paj txi txiv zoo. Vajtswv txojlus nyob hauv Kalatias 5:22-23 hais txog qhov uas yuav ua tau ua lub neej kom txi Vaj Ntsujplig tej txiv nyob hauv yus lub siab:
“Tiamsis Vaj Ntsujplig yuav ua rau neeg muaj lub siab sib hlub, zoo siab, nyob kaj siab lug, ua siab ntev, muaj lub siab dawb siab zoo, zoo siab hlo pab lwm tus, ua siab ncaj, tsis khavtheeb thiab paub tswj yus lub siab. Yeej tsis muaj ib txoj kevcai yuav txwv tej no hlo li.”

Thov caw nrog kuv peb thov Vajtswv ua ke
Ua Vajtswv tsaug vim Koj pub koj tejlus rau peb nyeem, peb kawm, peb xav thiab ua raws li ntawd kom peb txais tau tej koob hmoov koj pub. Thov Vajtswv koj ua rau kom kuv muaj lub siab mos muag txais yuav qhov tseeb uas yog koj tejlus thiab tawg paj txi txiv zoo. Thov kom koj tejlus hloov pauv kuv lub siab, pab kom kuv tiv dhau tej kev txhawj xeeb hauv lub neej no vam khom Vajtswv kom kuv sawv khov kho hauv kuv txoj kev ntseeg. Kuv thov hauv Tswv Yexus Khetos lub npe. Amees.

Cov kwv tij txhua tus, qhov uas peb mus kuaj peb lub zog ntawm sab ntsujplig tseem ceeb heev rau peb cov ntseeg Vajtswv. Kom peb thiaj txi tau txiv tsis tu pub rau Vajtswv peb yuav tau tu peb lub siab kom npaj txhij los txais yuav Vajtswv tejlus. Thawj qhov haujlwm hauv hnub yog peb tseg sijhawm los nyeem, los kawm, los xav thiab ua raws li Vajtswv tejlus. Muab koj lub neej fij rau Vajtswv cia Vajtswv siv kom tawg paj txi txiv zoo pub rau Nws.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.