Peb txhua tus puav leej xav kom yus muaj ib lub neej kaj siab lug, txav deb tej kev tu siab thiab kev tsis sib haum. Tiamsis txoj kev ntseeg Vajtswv yeej tsis tab pov yuav muaj lub neej zoo – tiamsis nws yog ib ntsus kev tsov rog tsis so ntawm sab ntsujplig. Nrog tus Tswv mus tsis yog nres tos mag ntaus, tiamsis yog sawv tsees hauv tej teeb meem, tuav lub siab ncaj ncees hauv tej kev sim siab thiab ua siab tawv thaum lub ntiajteb xav ntaus kom peb swb. Yeej paub tias tsis muaj leej twg tawm hauv tshav rog los es yuav tsis muaj qhov txhab. Tiamsis twb yog tej qhov txhab ntawd yog qhov pov thawj qhia paub tias peb twb tau ua rog thiab kov yeej lawm!

Hnub no, yog hnub 26/07/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Jennifer E. Jones dhau ntawm Zaj kawm TEJ QHOV TXHAB TOM QAB KEV TSOV ROG

Vajluskub: “Txojkev ntseeg piv ib yam li neeg sib tw khiav. Koj yuav tsum sib zog khiav kom kawg koj lub zog, koj thiaj li tau txojsia uas ntev mus ibtxhis uas Vajtswv hu koj los yuav, rau qhov koj twb lees tabmeeg rau ntau leej” (I Timautes 6:12).

Tus tub txawg Chuck Palahniuk tau sau tias: “Yuav ua li cas koj thiaj yuav nkag siab tau koj tus kheej yog tias koj tsis tau muaj ib zaum twg sib ntaus? Kuv tsis xav tuag uas yog tsis muaj ib lub qhov txhab twg…”

Tag kis no kuv xav txog lub ntsiab ntawm ib ntsus kev tsov rog yog li cas tiag. Yog cov poj niam, sib ntaus tsis yog ib lub cim “ntawm txoj kev loj hlob” zoo li cov txiv neej. Tiamsis, kuv twb tau sib ntaus nrog cov nus thaum peb tseem yau, yog li kuv kuj nkag siab qee yam.

Feem ntau sawv daws puav leej thooj yim tias: ib ntsus kev tsov rog uas yog muaj ib sab tiv xwb ces yeej tsis yog sib ntaus. Ntawm tsuas yog mag ntaus xwb. Tus muaj zog ntaus tus uas tsis muaj zog npaum li nws. Ib txoj kev sib ntaus tiag tiag yuav tsum yog koj ntaus kuv, kuv ntaus koj – tus no ntaus rig, tus tom tiv thaiv.
Qhov uas tuav rawv txoj kev ntseeg kuj ib yam li ntawd. Yog koj xav ua ib lub neej ntseeg Vajtswv tiag tiag, lossis muaj lub neej tau nyob ze Vajtswv xwb, ces lub neej no yuav tawm tsam koj vim tej ntawd. Nws yuav ntaus koj!

Zoo ib yam li Rocky tau hais tias: “Yeej tsis muaj leej twg ntaus koj mob tshaj koj lub neej.” Lub Ntiajteb yuav nrhiav txhua txoj kev los txeeb koj txoj kev zoo siab thiab kev kaj siab mus, dhau ntawm tej teeb meem tsis raws li lub siab xav, tej kev puas tshuaj los raug tamsim, tej qhov tob uas koj tsis faj ua ntej.

Yog li koj yuav ua li cas?

Tej zaug koj yuav nkaum, pos qhov muag thiab cia luag ntaus. Tseeb tiag, tej zaug ntawm yog tag nrho tej uas koj muaj cuab kav ua tau. Muaj tej yam kev sim siab tsis yuam kom yuav muaj homphiaj lossis peev xwm tawm tsam, tiamsis tsuas yog tshuaj txog txoj kev ua siab ntev tiv xwb.

Tej zaug koj kuj tau pab yeeb ncuab dhau los ntawm cim civ ua mob rau koj tus kheej. Ntawd yog thaum koj lees txais cia tej kev xav tsis zoo nkag los rau hauv koj lub hlwb: “Kuv zoo tsis txaus”, “Kuv txawj ntse tsis txaus”, “Kuv yuav tsis muaj hnub tiv dhau”… Lub sijhawm ntawd, yeeb ncuab tsis tas yuav ntaus. Koj cim civ ntaus koj tus kheej.

Tiamsis yeej tseem tshuav ib txoj kev xaiv thiab: Koj muaj cuab kav sawv thiab tawm tsam. Tawm tsam dhau ntawm qhov uas vam khom Vajtswv tej lus cog tseg: “Tsis muaj ib yam cuabyeej twg uas yuav tawmtsam tau koj li.” (Yaxayas 54:17). Koj muaj cuab kav khaws Vajtswv tej lus cia rau hauv siab thiab zoo siab hlo nthuav tawm qhov tseeb ntawd txhua hnub. Koj muaj cuab kav ntsib tim ntsej tim muag thiab tawm tsam txhua lo lus dag uas tab tom nrhiav kev ntaus kom koj lub nkoj hauv lub neej tog.

Yeej paub tias qhov no tsis yooj yim. Koj yuav muaj qhov txhab. Tej zaug koj yuav yoj yees. Yeebncuab yeej ua tsis zoo, thiab nws paub zoo koj qhov kev qaug zog yog dabtsi. Tsis txhob xav tias yeebncuab yuav zam koj – tsis tas li xwb nws tseem ntaus rau qhov uas mob tshaj.

Yeej tsis muaj ib tug yuav zoo huv si tawm hauv tshav rog los uas tsis muaj qhov txhab. Txawm yog Tswv Yexus los kuj muaj. Tomqab sawv hauv qhov tuag rov los, Nws kuj muab rau cov thwjtim saib tej qhov txhab uas raug ntsia hlau ntsia saum Nws lub cev (Lukas 24:39). Tseeb tiag, twb yog tej qhov txhab ntawd yog tej pov thawj uas peb yuav tsis lees txais tsis tau tias Tswv Yexus tau tuag lawm tiag – thiab tamsim no Nws twb sawv lawm. kuv ntseeg tias peb tej qhov txhab kuj muaj lub ntsiab li ntawd: ntawd yog lub cim qhia tias peb twb kov yeej ntsus kev tsov rog lawm.

Tej qhov txhab ntawd pab rau peb muaj txaus peev xwm mus pab cov neeg uas tab tom ntsib kev txomnyem, thiab hais rau lawv tias: “Kuv twb ntsib dhau lub caijnyoog zoo li koj los. Kuv nkag siab koj!”

Yog li, kav tsij tsa taub hau kom siab. Tej zaug koj yuav swb qho zaug, tiamsis txhob hnov qab tias koj twb kov yeej rau thaum kawg lawm!

“Txojkev ntseeg piv ib yam li neeg sib tw khiav. Koj yuav tsum siv zog khiav kom kawg koj lub zog, koj thiaj li tau txojsia uas ntev mus ibtxhis uas Vajtswv hu koj los yuav, rau qhov koj twb lees tabmeeg rau ntau leej” (I Timautes 6:12).

Thov caw nrog kuv peb thov Vajtswv ua ke
Tus Tswv uas muaj kev hlub, thov pab kom kuv tsis khiav nkaum hauv ntsus kev tsov rog sab ntsujplig. Thaum kuv raug ntaus ntog, muaj qhov txhab, thov qhia kom kuv paub vam khom Koj lub zog thiab tsis tso tseg. Thov qhia kom kuv nco ntsoov tias Koj tau muaj tej qhov txhab vim kuv, thiab Koj nkag siab kuv zoo. Thov Koj ceev kuv lub siab cia, kom kuv sawv khov kho thiab ncaj ncees mus txog thaum kawg. kom dhau ntawm tej qhov txhab ntawd, sawv daws yuav paub tias Koj yog tus uas twb kov yeej rau kuv lawm. Kuv thov hauv Tswv Yexus Khetos lub npe. Amees.

Cov kwv tij txhua tus, koj puas tab tom muaj tej qhov txhab tom qab ntsus kev tsov rog sab ntsujplig? Tej qhov txhab ntawd yog pov thawj qhia paub tias koj twb sawv khov khov, txiav txim tsis kam swb, thiab koj twb kov yeej hauv lub hwjchim uas Vajtswv pub lawm. Kev ntseeg tsis txhais tias yuav tsis muaj hnub ntog; tiamsis ntseeg txawm yog ntog los, peb yeej sawv los, txawm yog thaum lub cev no muaj ntau lub qhov txhab. Thiab koj cia li zoo siab mus li, vim paub tias Vajtswv nrhiav cov neeg uas kam tawm tsam rau Vajtswv lub npe thiab ncaj ncees mus txog thaum kawg.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.