Thaum ntsib tej kev txomnyem, tshwj xeeb yog txomnyem nyiaj txiag, peb yooj yim poob rau txoj kev qaug zog thiab ua xyem xyav txog Vajtswv txoj kev muab pub. Tej lub nra nyhav txog nyiaj txiag vij puas ncig: nyiaj nqi tsev, nyiaj menyuam kawm ntawv, nyiaj noj haus yim hnub yim nce nqi… tag nrho muab tsuam rau hauv qab ua rau peb pom tias cas yus me ua luaj, ua tsis tau dabtsi ntawm ib puas tsav yam ntau ua luaj. Tiamsis nyob rau lub sijhawm ntawd, koj tau caw kom yuav tau nres thiab thim xav txog ib tug Vajtswv – tus uas paub koj tej kev cheem tsum.

Hnub no, yog hnub 20/07/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Pam Morrison dhau ntawm Zaj kawm TUS PAUB TXHUA TXOJ KEV CHEEMTSUM

“Nej leej txiv tus nyob saum ntuj paub zoo nej tej kev cheem tsum” (Mathais 6:32).

“Kuv tus Vajtswv uas muaj koob hmoov nplua mias, nws yuav pub txhua yam uas nej xav tau rau nej, rau qhov nej yog cov uas ntseeg Yexus Khetos.” (Filipis 4:19).
Kuv nyiam nyeem tej zaj xwm txheej txog tej tus tub tshaj tawm Txojmoo Zoo nto npe lug, nyob hauv muaj George Mueller. Yawg tau thov Vajtswv rau cov menyuam ntsuag uas yawg puag los tu thaum lawv tsis muaj dabtsi noj; los ntawm ib txoj kev twg; ncuav, mis, nrog rau tej nyiaj txiag uas luag pab cia li tshwm tuaj. Kuv kuj nyeem tej zaj xwm txheej zoo ib yam li ntawd los ntawm lwm tus ntseeg. Tiamsis kuv cim civ nug: Kuv yog leej twg? Kuv tsuas yog ib tug xibhwb me nyob sab hnub poob tebchaws Mekas, yog ib tug neeg uas tsis muaj leej twg paub txog, thiab tab tom ua Vajtswv haujlwm ntsiag to. tsis paub puas yuav saj tau tej kev muab pub zoo li ntawd? Kuv ua xyem xyav, tas kuv tau Vajtswv ntuas kuv.

Thaum kuv xav txog Vajtswv txoj kev tsim ib puas tsav yam loj kawg nkaus, koj puas pom yam uas zoo kawg nkaus thaum Vajtswv hlub tshua txog cov tib neeg me me li peb? saib saum lub ntuj, peb pom tsheej pua, tsheej txhiab lub hnub qub cig lam lug. Thaum lub ntuj tsaus nti, ntawd peb yuav xav tias: “Vajtswv loj kawg nkaus, thiab Vajtswv tab tom xav txog kuv!”

Thaum Vajntxwv Daviv saib ib puas tsav yam zoo uas Vajtswv tsim los, yawg kuj xav tsis thoob txawm yog tib neeg me me los, yawg kuj tau Vajtswv hlub tshua txog. Yawg sau: “Thaum kuv tsa qhovmuag ntsia saum lub ntuj uas koj tsim cia, kuv porn lub hli thiab tej hnubqub uas koj muab teeb nyias nyob muaj nyias chaw, neeg ntiajteb tsim txiaj npaum li cas, koj thiaj nco txog lawv? Noob neej zoo npaum twg, koj thiaj hlub lawv ua luaj?” (Ntawv Nkauj 8:3-4).

Kuj zoo li lwm tus, kuv twb ua thiab tau siv zog pab ntau tus thaum lawv txomnyem los ntawm txoj kev pab tiag tiag, thiab ntau zaug tej kev pab ntawv ua rau poob ntau yam. Kuv nco muaj ib hmo, thaum kuv cov nyiaj tas lawm, kuv thov Vajtswv tias: “Tus Tswv, thov pab kuv” tsuas npaum no lo xwb kuj ua lub nra nyhav hauv kuv sib lawm hov ntau. Tomqab thov Vajtswv tas, tsuas tau ob hnub xwb, kuv txais tau cov nyiaj ntau tshaj 20 zaug cov nyiaj uas kuv cheem tsum. Kuv niam kuv txiv nkawd tau cim civ fij nyiaj rau kuv, kuv yeej tsis tau hais rau nkawd paub txog kuv qhov teeb meem. Xav tsis thoob li!.

Kuv niam kuv txiv nkawd yog phaum uas nyob dhau kev tsov rog zaum II, yog cov neeg ntsib dhau kev txomnyem yog li nkawd ceev faj heev thaum siv nyiaj txiag. Nkawd yeej siv lub hnab nyiaj khaws cia thiab xa nyiaj tso tom txhab nyiaj txawm yog tsuas tau paj lim 3% xwb! Nkawd txaus siab hlo fij thiab muaj lub siab dav li ntawd puav leej yog los ntawm Vajtswv txoj kev tshoov nkawd lub siab.
Cov nyiaj ntawd thaum no twb tau muab los siv tas rau tej kev cheem tsum lawm, kuj txaus pab rau wb ib niam txiv kev ua haujlwm. Kuv nco Vajtswv tshav ntuj thiab txo lub hwjchim ntawm Vajtswv xub ntiag tus uas pab kuv tej kev cheem tsum. Vajtswv paub zoo kuv tej kev cheem tsum ntawm sab nqaij tawv thiab peb sab ntsujplig tib si.

Hnub no, koj tab tom ntsib teeb meem dabtsi? Cia li mus cuag Vajtswv hauv txoj kev thov Vajtswv thiab hais rau Vajtswv kom yog tej yam uas koj cheem tsum. Vajtswv tsis yog tsuas paub koj tej kev cheem tsum xwb, tiamsis Vajtswv tseem xav mloog koj tej lus thov, xav kom koj nrhiav tau txoj kev kaj siab thaum koj vam khom Vajtswv. Txhob txhawj lossis ua xyem xyav vim Tswv Yexus twb hais meej meej tias: “Nej leej txiv tus nyob saum ntuj paub zoo nej tej kev cheem tsum” (Mathais 6:32).

Muab peb tej kev txhawj rau Vajtswv, txawm yog tej ntawd yog tej uas me tshaj, tsis tseem ceeb, lossis yog tej yam uas koj tsis kam hais qhia rau leej twg. Koj yuav xav tsis thoob vim txoj kev cawm dim Nws los ntawm tus uas tswj ib puas tsav yam los. Thaum koj lub siab yij fab yij fwj thiab ua xyem xyav, cia li nco txog Ntawv Nkauj tshooj 18:

“Thaum kuv raug kev txomnyem, kuv hu tus Tswv; kuv thov kuv tus Vajtswv pab kuv. Nws nyob hauv nws lub Tuamtsev hnov kuv lub suab, nws mloog kuv lub suab quaj uas thov nws pab. Lub ntiajteb txawm qeeg nkaws thiab ua zog koog; tej taw roob co ua zog koog, rau qhov Vajtswv chim heev. Pa taws ncho auv niab hauv nws lub qhovntswg tuaj, nplaim taws thiab ncaig taws cig lam lug hauv nws lub qhovncauj tuaj. Tus Tswv qhib plho lub ntuj thiab nqis nrog tauv huab dub tsaus nti ntawm nws kotaw los. Nws caij rawv saum tus qhelunpees Phabtis thiab ya, nws nyob saum tus qhelunpees phabtis ya nrog cua ceev heev. Nws muab kev tsaus ntuj thaiv nws lub cev, muaj huab ntom nti thiab muaj dej puagncig nws.

Lawg thiab nplaim taws tawm hauv cov xoblaim los tsoo tej huab dub tshab plaws mus ua tus Tswv ntej. Ces tus Tswv thiaj ua kom xob nroo saurn ntuj tuaj, thiab hnov tus uas muaj hwjchim loj kawg nkaus lub suab. Nws tua nws xibxub tuaj thiab ua rau nws cov yeebncuab tawg ri sua, nws ua kom xob laim ci ntsa iab raws lawv khiav. Tus Tswv, thaum koj cern koj cov yeebncuab thiab nyooj rau lawv ntawm koj txojkev chim, ua rau qab thu dej hiavtxwv khoob lug thiab lub ntiajteb nyob do dus tsis muaj dabtsi thaiv. Tus Tswv thiaj cev tes puag saum nruab ntug tuaj tuav kuv hauv qab thu no, nws thiaj rub kuv tawm hauv qab thu dej qhov tob tshaj plaws los. Nws cawm kuv dim ntawm kuv cov yeebncuab lub hwjchim, thiab dim ntawm cov neeg uas ntxub kuv, rau qhov lawv muaj zog dua kuv. Thaum kuv raug kev nyuaj siab, lawv txawm tuaj ntaus kuv ntag, tiamsis tus Tswv tsomkwm kuv. Nws pab kuv tawm hauv txojkev puastsuaj nws cawm kuv rau qhov nws txaus siab rau kuv.” (Ntawv Nkauj 18: 6-19).

Thov caw nrog kuv peb thov Vajtswv ua ke
Tus Tswv – yog tus paub zoo kuv tej kev cheem tsum! Tus Tswv, kuv lees tias muaj tej lub sijhawm kuv tau ntshai thiab ua xyem xyav rau tej kev txhawj. Nyob rau ntawm tej ntawd, thov Vajtswv pab kom kuv ntseeg tias Vajtswv yog tus pab, tus yuav coj kuv mus txog rau ntawm qhov chaw nplua mias thiab dav nrhawv. Txawm kuv tab tom nyob rau ntu muaj tsis txaus lossis tsau npo los, thov Vajtswv pab kom kuv ntseeg rau Vajtswv lub hwjchim ua tus kav, paub tias tej yam uas Vajtswv ua yuav yog zoo tshaj plaws. Kuv thov hauv Tswv Yexus Khetos lub npe. Amees.

Cov kwv tij txhua tus, paub Vajtswv yog tus paub peb tej kev cheem tsum thiab niaj hnub pab peb, koj puas txaus siab hlo muab yus lub neej fij rau Vajtswv? Cia li mus cuag Vajtswv hauv txoj kev thov Vajtswv, muab tej kev txhawj fij rau Vajtswv, thiab paub tias Vajtswv tab tom nrog koj mus hauv txoj kev no. Muab sau cia tej yam uas koj tau txais ntawm Vajtswv hauv lub sijhawm dhau los, thiab sau koj tej kev cheem tsum rau, thov Vajtswv thiab tos Vajtswv ua tus teb koj tej lus thov.
Cia siab tias koj yuav muaj cuab kav thov tau Vajtswv ib yam li tus sau zaj nkauj no:

“Nyo hau thov Vajtswv coj peb taug txoj kev uas txhawj xeeb ntau no. thov muab taig kis fij rau Vajtswv ua tus xam, kom tus duab hauv lub neej yuav tsis tav kuv kev.”

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.