Ua Vajtswv tsaug vim Txojmoo Zoo tau qhia tuaj rau tebchaws nyab laj tau ib tiam dhau los. hnub no, yog ncaj rau hnub kaj 13/07/2025, ntau lub Pawg Ntseeg hauv tebchaws muab hnub no los ua hnub nco txog Txojmoo Zoo tau qhia tuaj txog rau tebchaws nyab laj. Ntawm no yog lub sijhawm rau peb nthuav tawm peb txoj kev nco Vajtswv tshav ntuj, tus uas tau nchuav Nws txoj kev hlub nplua mias rau peb haiv neeg – yog lub sijhawm peb nco cov laus txiaj ntsig – cov uas tau mloog Vajtswv lus mus tshaj tawm Txojmoo Zoo rau cov neeg nyob hauv tebchaws nyab laj; thiab kuj yog lub sijhawm zoo rau peb txhua tus xav txog yus tes haujlwm pub rau yus haiv neeg.

Hnub no, yog hnub 13/07/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke dhau ntawm Zaj kawm IB TIAM KEV HLUB: 114 XYOO TXOJ MOO ZOO TUAJ TXOG RAU TEBCHAWS NYAB LAJ

Vajluskub: “Tus Tswv, kuv yuav ua koj tsaug kawg kuv lub siab, kuv yuav qhia txog tej txujci tseemceeb uas koj ua pab kuv lawm” (Ntawv Nkauj 9:1).

Xyoo 2011, Pawg Ntseeg nyab laj nyob hauv tebchaws mus rau txawv tebchaws – tau zoo siab ua lub koob tsheej nco txog 100 xyoo Txojmoo Zoo tuaj rau tebchaws nyab laj. Ntawm no yog ib lub cim hauv keeb kwm, ntaus cim rau ib tiam Txojmoo Zoo tau qhia rau lub tebchaws no.

Ncaj rau lub 6 hli xyoo 2011, txhua lub Pawg Ntseeg thoob plaws hauv tebchaws lawv tau dai ntaub, ua kev nco txog lub sijhawm tseem ceeb no. Kuv yeej tseem nco ntsoov lub sijhawm hnub ntawd, thaum kuv tau koom lub rooj koob tsheej no. thaum nyuam qhuav kaj ntug, tib neeg tuaj ntawm txhua lub xeev tuaj, tuaj nram qab teb, nruab nrab teb, pem tej toj roob, ib leeg nyias hnav nyias ib cev ris tsho raws li nyias hom neeg: nyab laj cev tsoos tsho ntev, txog rau cov pejxeem Ê-đê, K’ho, Stiêng, Gia Rai tej tsoos tsho… tag nrho tuaj koom rau lub rooj koob tsheej, ua siab ntev sawv nres tos, kub siab lug tau mus koom. Nyob rau qhov ntawm, Pawg Ntseeg rov tau ntsia pom lawv txoj kev ntseeg uas nyob rau ib tiam dhau los thiab nrog rau lub suab qhuas Vajtswv. Los txog tamsim no, txhua zaug thaum hnov zaj nkauj “Vajtswv txoj kev hlub tau los rau tebchaws nyab laj”. Kuv lub siab kaj nrig vim Vajtswv txoj kev hlub pub rau tebchaws nyab laj, pub rau tsev neeg, thiab kuv tus kheej:

“Kuv lub tebchaws muaj ntau xyoo tib neeg tau hnov Vajtswv lub npe, muaj kev ntseeg. Hauv kuv tus ntsujplig puv npo kev zoo siab los ntawm Vajtswv txoj kev zam txim, ua lub neej kaj siab lug. Ntau xyoo dhau mus sai, muaj tib neeg coob rog tus Tswv mus ua ke qaum teb nruab nrab teb mus rau qab teb, mus txog rau tej toj roob hauv pes hav zoov hav tsuag.”

Pawg Ntseeg Nyablaj tau sawv khov kho rau ntawm ntau txoj kev nyuaj: tej xyoo muaj kev tsov rog, tej ntu kev lag luam mus tsis tau zoo nrog rau lub ntiajteb hloov pauv thiab tsis muaj kev tab pov. Tiamsis, dhau ntawm tej lub sijhawm zoo li ntawd, Vajtswv tseem tuav kom Vajtswv Pawg Ntseeg nyob khov kho. Txawm yog muaj tej lub sijhawm Pawg Ntseeg yuav tau kaw qhov rooj, vim kev tsov rog los Txojmoo Zoo yeej tsis tau muaj ib zaum twg raug kaw qhov rooj. Vajtswv tau siv cov tib neeg muaj lub siab tawv, cov uas hwm Vajtswv los tsim tsa Vajtswv Pawg Ntseeg. Tau ib tiam dhau los, Vajtswv Pawg Ntseeg loj hlob qab teb mus rau qaum teb. Lub suab ntawm Txojmoo Zoo tshaj txhua qhov saum tej roob mus rau tiaj nrag, ntawm tej zej zos mus txog rau hauv nroog loj. Txojmoo Zoo tau ua qauv zoo rau lub ntiajteb, hloov pauv ntau tus lub neej. Txhua tiam ntawm cov ntseeg Vajtswv lawv tshaj tawm Txojmoo Zoo tsis tseg, ua haujlwm pab rau lub zej zos, ua ntau txoj haujlwm zoo hauv txhua haiv neeg.

Dhau ntawm tej yam ntawd, peb pom tes haujlwm uas Vajtswv tau ua pub rau haiv neeg Nyablaj yog ib txoj koob hmoov hlub – loj kawg nkaus. Qhov no ua rau peb nco txog Vajntxwv Daviv – yog tus uas tau saj Vajtswv tej haujlwm zoo uas Vajtswv tau ua. Daviv thiaj sau: “Tus Tswv, kuv yuav ua koj tsaug kawg kuv lub siab, kuv yuav qhia txog tej txujci tseemceeb uas koj ua pab kuv lawm” (Ntawv Nkauj 9:1). Thaum saib keeb kwm Pawg Ntseeg nyab laj, peb yuav tsis ua Vajtswv tsaug tau li cas? Peb ho yuav ua twjywm ntsiag to rau Vajtswv tes haujlwm tau li cas? Daviv tsis yog tsuas nthuav tawm lub siab nco Vajtswv tshav ntuj los ntawm lo lus ua tsaug tsis tseg xwb, tiamsis tseem paub nco Vajtswv txiaj ntsig los ntawm pauj rov qab rau Vajtswv “ua tim khawv txog Vajtswv tej haujlwm”. Niaj hnub nim no, peb kuj raug nqua hu los ua ib yam li ntawd, yog qhia Vajtswv txoj kev hlub rau lwm tus tau paub.

Txawm yog peb ua Vajtswv tsaug rau tej yam uas Vajtswv tau ua los kuj muaj tej kev nyuaj siab rau qhov tseem tshuav cov ntsujplig uas tsis tau muaj ib zaum twg tau hnov Txojmoo Zoo, lawv yeej tseem ua neej nyob rau hauv txoj kev tsaus ntuj raug khi rau hauv qhov tsaus ntuj. Thaum pom txog qhov no, peb lub siab yuav tau lees txim, thov Vaj Ntsujplig foom koob hmoov, tsim tsa yus haiv neeg, yus lub Pawg Ntseeg hauv zej zos. Peb tsis yog tsuas nres ntawm qhov ua Vajtswv tsaug xwb, tiamsis yuav tau thov Vajtswv pub kom peb muaj lub siab zoo li Tswv Yexus: “Thaum Yexus saib cov neeg coob coob ntawd, nws hlub lawv kawg li, rau qhov lawv ntxhov siab thiab tsis muaj leejtwg pab lawv, lawv zoo ib yam li pab yaj uas tsis muaj tus tswv yug.” (Mathais 9:36).

Los ntawm tej zej zos deb deb pem tej roob txog rau hauv nroog tib neeg coob coob, tseem tshuav tsawg tus ntsujplig uas tsis tau hnov dua txog Tswv Yexus lub npe? Hnub no, peb tau caw los kom muaj lub siab hlub tshua ib yam li Tswv Yexus, ua lub neej ua tim khawv dhau ntawm peb lo lus hais, ua haujlwm thiab yus kev ua neej. Tig rov qab mus saib ib tiam dhau los, peb ibke ua Vajtswv tsaug, ibke thov Vajtswv hlub tshua txog yus, kom paub qhia Vajtswv txoj kev cawmdim.

Thov caw nrog kuv peb thov Vajtswv ua ke
Tus Tswv uas muaj kev hlub, kuv ua Koj tsaug vim Koj tau hlub tshua txog kuv lub tebchaws tau ib tiam dhau los. Koj tes haujlwm loj kawg nkaus thiab ci ntsa iab rau saum kuv haiv neeg. Thov pub kom kuv muaj lub siab nco koj tshav ntuj thiab siv zog tshaj tawm Txojmoo Zoo rau cov neeg uas tsis tau txais kev cawmdim; pab kom kuv hlub Vajtswv koj Pawg Ntseeg, thiab koom tes rau txoj kev txhim tsa koj Pawg Ntseeg nyob rau tiam no. Kuv thov hauv Tswv Yexus Khetos lub npe. Amees.

Cov kwv tij phooj ywg, Vajtswv tau tiv thaiv Vajtswv Pawg Ntseeg nyob rau tebchaws Nyablaj no tau ib tiam dhau los. Tig rov qab mus saib txoj kev hlub ntawd, koj puas zoo siab ua Vajtswv tsaug? Cia li ua Vajtswv tsaug rau Vajtswv txoj kev hlub uas tau cawm koj dim, thiab twb yog vim txais txoj kev hlub ntawd, koj kuj yuav qhia rov qab rau lwm tus.

Los ntawm lub siab nco tshav ntuj ntawd, siv zog dua “qhia Vajtswv tej haujlwm” vim peb tus kheej- thiab tej neeg uas tab tom ua neej nyob rau tiam no – yog cov pov thawj ciaj sia, yog ib feem hauv Vajtswv txoj kev hlub tab tom sau ntxiv rau tebchaws Nyablaj.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.