Hăm đei layơ buăl chơchă anih wă kơ kơ‘nơp – ưh kơ sĭ minh anih man păng tơmo, mă anih hiôk hơđơ̆ng ăn kơ bơhngol? Lăm tơdrong arih đei lơ kơ tơplih, hăm lơ tơdrong kơnê̆ păng trăp trĭn lăm jơhngơ̆m blư truh hloi, lu bơ̆n ngăl hơpơi rŏ kơ kơdâu tơ kơđông kơjăp, anih mă dôm kơ hiơ̆k bơngơ̆t, hli tơrơ ưh kơ đei truh. Mă tơpă, anih noh đei bơih, mă ưh kơ đei ataih. Noh jơ̆ lăm pơnăr Kră Yang ‘mêm mơnat, anih lu bơ̆n đei pơdơh hiôk hơđơ̆ng.

Năr ‘nâu, ‘năr 31/05/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Bill Gaultiere kơ̆l ‘bai ANIH KƠ’NƠP HIÔK HƠĐƠ̆NG.

Sơ̆p Hla Bơar ‘Bok Kei-Dei: “Mă-lei Kră Yang jing anih kơđông kơjăp pĕng inh. Kră Yang thoi Tơmo Tih, anih mă inh kơ’nơp.” (Hơriso 94:22)

Kơplah oei hơ‘lơ̆p, inh ‘blŏk kơplah hnam dơnŏ oei lăng tivi, na tơdrong roi tơbăt khan lê̆ hơdrol gô đei phŭt gơhnŏk huơ̆r tih wă jê̆ truh bơih. Tơ anih inh arih, kial phŭt huơ̆r noh lăm bơyan puih păng bơyan ‘mi hngach sơnăm ayơ kư̆m đei ngăl, lei na hnam dơnŏ nhôn ưh kơ ‘bôh hlĭch kiơ.

Mă lei kơplah noh, inh đei mơn lăm inh pha ra dêh. Na ‘bă inh đei ôr krao rơ̆n:
“ Đĭ đăng bơ̆n jur tơ sơlŭng gơ‘nơp dang ei hloi! Mă tĕnh! Pơih ‘măng ‘mŏk păng iŏk ŭnh ‘bin!”

Mă ‘bă inh glơng pôk ‘bar ‘nu hơ’lơ̆p kon kơmar, na rim ‘nu lu nhôn kơdâu jur tơ sơlŭng gơ‘nơ̆p lăm rimrôm hnam.

Inh đei hli tơrơ păng đei tŏ sĕt bơngơ̆t. Tơpơh ‘nu lu nhôn hơ oei ngôi gơ‘nơ̆p lăm sơlŭng, mơ̆ng brŏ roi tơ‘băt ling lang kơ tơdrong phŭt gơhnŏk huơ̆r. Inh đei jet bă inh, tơdah phŭt huơ̆r ‘bơm hnam ‘nâu na thoi yơ:

“Rŏ lăng ưh kơ đei ‘bơm kon. Mă tơdah đei, lu bơ̆n huay kơ đei kiơ yua kơ bơ̆n oei lăm âu.”

Mĕ inh kư̆m đei pơma:
“Phŭt huơ̆r huay kơ ‘bơm hnam bơ̆n ôh! Yua anăn Yang Yêsu, phŭt huơ̆r huay kơ huơ̆r ‘bơm hnam nhôn! Apinh Kră Yang!”

Tơpă, phŭt gơhnŏk đei huơ̆r jê̆ hnam nhôn, mă lei huay kơ đei răm kiơ. Đĭ đăng hnam dơnŏ nhôn hiôk hơđơ̆ng lăm sơlŭng gơ‘nơp ala rimrôm hnam!

Đơ̆ng năr noh truh tơ hrei âu, anih mă tơ lăm sơlŭng ala rimrôm hnam noh kăl tơpă hăm inh. Inh ‘maih wă dêh jur tơnoh pơm ngôi. Năr anhơ tŏ tơ ala noh rơngơp. Kơplah bơ̆l hăl, inh jur tơ noh chă tơmam so, tơdah ‘nhŏng oh pơm kơ inh hrơ̆ng hreng, inh jur tơ noh chă anih pơdơh thĕng hreh minh drô̆.

Dôm kơ tơdrong inh ‘maih wă dêh noh man kơđông gơ’nơp! Inh kư̆m đei pơtơm mŏ oh đei man hơdai inh. Inh gô “pơm bơngai wei lăng tơm kơ gah man” pơjao tơdrong jang ăn kơ lu sư. Lu nhôn yua iŏk dôm kơ tơmam kiơ oei gơh yua: ‘long, tang dŏ so, dôm kơ lu tơpu hla bơar tih wă pơm nhen thoi tơnăr. Na lu nhôn iŏk khăn lơ̆k kơpal giơng păng khăn hum pơm bơbŭng hnam.

Lăm anih gơ‘nơp noh, lu nhôn ‘bôh hiôk hơđơ̆ng – gơh weh wer đơ̆ng phŭt huơ̆r, weh đơ̆ng dôm kơ “ tơdrong kơnê̆” kiơ̆ kơ đei tơchĕng, mă kư̆m truh tơ đe ayăt – lu nhôn kư̆ kơ pơm ngôi nhen thoi đei tơdrong tơblah noh!

Lu nhôn kư̆m pơm pơchơt lăm anih gơ‘nơp – inh chĕp ba tơmam pơm ngôi bơngai linh, na mŏ oh nai đei chĕp ‘bŭp‘bê. Mă lei chơt dêh noh đei hơmet ming anih gơ‘nơp: man să ‘biơ̆ dơ̆ng, klah song lơ anih ‘nâu tơ anih to. Đei minh ‘măng mĕ inh đei ăn kơ inh iŏk tang dŏ kơjung, đơ̆ng anih sŏng sa chĕp ba tơ anih sơlŭng ala rimrôm hnam– năr ‘noh đei man kơđông tih hloh ‘lơ̆ng hloh!

Pơtao Đawit lăm sơ̆p hla bơar ‘Bok Kei-Dei kư̆m đei lơ wơ̆t chă anih gơ‘nơp thoi noh. Mă sư ưh kơ sĭ mơ̆t gơ’nơp tơlăm hơgơp tơ tơmăn glă Isơrael – mă sư gơ‘nơp lăm ‘Bok Kei-Dei.

“Kră Yang jơ̆ kơđông kon kơ‘nơp” – noh jơ̆ nơ̆r juăt kơ krao khan đơ̆ng Đawit. Đei 150 chăl lăm Hơriso, đei truh tơ 100 wơ̆t sư đei tơ‘bôh ‘Bok Kei-Dei jơ̆ anih kơđông, jơ̆ anih kơ‘nơp, jơ tơmo tih, jơ̆ pơnăr, jơ̆ anih hơđơ̆ng ăn kơ sư.

Păng noh jơ̆ tơdrong mŏ oh lu nhôn pơm lăm sơnăm noh – chă anih gơ‘nơp lăm Kră Yang. Kră Yang đei tơl tơwih nơ̆r krao khan đơ̆ng mĕ inh, păng bơwei hnam dơnŏ nhôn oei liĕm akâu hiôk ‘lơ̆ng.

Tơdrong ‘bôh hiôk hơiă dêh noh: lu bơ̆n ưh kơ kăl kơ man kơđông tơ lăm teh đak ‘nâu. Lu bơ̆n kư̆m ưh kăl gô truh tơ pơlei ‘lơ̆ng na đei hiôk hian. Mă lu bơ̆n tơ anih tơyơ, tơdrong arih thoi yơ, đei tơ‘bơ̆p tơdrong truh, mă kư̆m đei truh pă băt pơm thoi yơ – lu bơ̆n kư̆m oei đei mơ̆t tơ anih “ hlơp” lăm tơdrong krao khan, tơdrong oei hơdai đơ̆ng ‘Bok Dŏng Pơklaih Yang Yêsu păng Yang ‘Bă. Oei tơ noh, lu bơ̆n đei kơ‘nơp lăm Kră Yang păng Dêh char Sư, oei hơdai lăm tơdrong arih lu bơ̆n hrei âu ( Hơriso 91:1; Mathiơ 4:17; 6:4; 6:6; 6:18). Noh jơ̆ anih tơdrong ‘mêm ling lang tôm mah, anih lu bơ̆n gô pơdơh lăm tơdrong ‘mêm ưh kơ đei tơplih đơ̆ng Kră Yang. Păng đơ̆ng anih hlơp noh, lu bơ̆n đei dŏng pơklaih, pơthim jơhngơ̆m pran, wă yak năm tơ‘bơ̆p tơdrong lăm teh đak đei lơ tơdrong kơnê̆ – băt kơ bơ̆n ưh kơ đei yak năm minh drô̆, yua kơ Kră Yang jơ̆ anih kơđông ăn kơ lu bơ̆n kơ‘nơp.

Apĭnh đĭ đăng krao khan hơdai:
Kơkuh kơ Kră Yang ‘mêm, bơnê kơ Kră Yang yua kơ Ih jơ̆ ling lang anih kơđông kơjăp kơ kon, jơ̆ anih kon gơ’nơp kơplah kon gleh lap, jơ̆ anih kon đei pơklaih kơplah kon đei chhŭr nuih. Pŭn hiôk tơpă kơplah kon đei pơdơh lăm tơdrong ‘mêm mơnat ưh kơ đei layơ tơplih đơ̆ng Ih! Lăm jơ ‘nâu, apinh Ih chông ba kon mơ̆t tơ lăm anih gơ‘nơp hlơp lăm Ih, mă khan jum dăr đei lơ tơdrong kơnê̆ bơwang. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, mă khan ưh kơ kĕ găn kial hơbŭt truh tơ tơdrong arih, mă lei lu bơ̆n rơih iŏk anih gơ’nơp. Kră Yang jơ̆ tơm kơ kơđông kơjăp kơ lu bơ̆n, jơ̆ anih hiôk hơđơ̆ng kơplah đei tơdrong kơnê̆. Lu bơ̆n pă kăl gô truh tơ jơhngơ̆m rơdu na năm tơ Kră Yang, athei năm tơ Sư lăm năr ‘nâu, kơplah jơ ‘nâu. Kră Yang oei chro ti chang gô lu bơ̆n pơdơh hiôk hơđơ̆ng lăm Sư. Buăl hăm inh athei hơdai yak năm tơ anih hlơp lăm Kră Yang, păng chơchă tơdrong hiôk hơđơ̆ng hloh kơ tơdrong hlôh băt!

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.