Ờ gớs cau lời tòm bol he là ờ gớs dô dơ̆ gơ plơ̆ gơ pự. Hơ̆ là bơta lơh nền ò di, là bơta lơbơn lơ ñio tòm bơta dòn, mò kung gớs tŭ sang pơndang Yàng bơh jơnau đớs hala broă lơh kơlôi tus bol he ò di păl nàng geh Yàng ngui tai. Mơya, Jơnau Yàng ai bol he in git nùs koñ gơboh mờ nùs nđàc sơngit Kơnràñ dê dờng rlau mờ bơta gơplơ̆ he sền là dờng kơn jơ̆ ngăn mờ bol he.

Ngai do, ngai 2/11/2025, Bơta Hòi Dan Kòp Ngai dan jà ồng mò oh mi bơtê bal Jơnau Yàng bơh kơnòm dê bơta dong kòl Wendy O’rourke bơh tơnggume YÀNG SÙM GĂM NGUI.

“Ơ Yàng, Kơnràñ git jơh ală bơta, Kơnràñ git lah añ gơboh di Kơnràñ.” Yàng Jesu đơs lah: “Ròng siam tĕ ală belàt Añ jê.” (Jang‬ ‭21‬:‭17b)

Bol he mờng òs kơlôi lah ala cau geh cih tòm Sră Goh là ala cau krơi ís mờ chài rgơi. Mờya bol khai kung bè là kòp bè ala cau be bol he ngai do. Bulah kung gớs lơbơn lơñio, ờ tơl git wă, gơblơ̆, mơya bol khai sùm geh Yàng Tòm Trồ ngui.

Pier là dồ cơng tàng loh làng. Kung bè Jakơ mơ Jăng, ồng là cau tòm ala cau lòt jat Yàng mềr kiăr. Ồng là cau sơn rơp neh ho lah: “Kơnràñ la Bơtau Krist Kòn Yàng Tom Trồ gam kis sùm.”(Mathiơ‬ ‭16‬:‭16)

Yàng Jesu đơs mơ khai lah: “Ơ Simôn kòn Jôna, lơngai mê in, bơh ò di poac mơ mhàm yal tơlik mê in git bơta do ò, mơya hơ̆ la Bèp Añ ơm hơđang trồ. Mơ Añ kung đơs mơ mê lah: mê la Pier, Añ rơp bơt bơtào Hìu Jum Goh Añ hơđang lŭ klềr do, ală mpồng lơgar làng ƀồc ò geh pha rlau mơ Gơ.” (‭‭Mathiơ‬ ‭16‬:‭17‬-‭18)
Mơya, tơnơ̆ hơ̆, tŭ Yàng Je-su ai ala cau bơtê in git lah Kơnràñ păl kong bơta jê sồt mờ kong chơt, Pier lam Kơnràñ lik is mơ lah pơrhơng lah: “Ơ Yàng, Yàng Tom Trồ ò kòñ behơ̆ ò. Bơta hơ̆ ò tŭ lơi tus di Kơnràñ ò.”(‭‭Mathiơ‬ ‭16‬:‭ ‭22)

Mơya Kơnràñ wơlke đơs mơ Pier lah: “Ơ cà Satan, ruc tĕ tơnơ̆ Añ! Mê lơh kai gơtup tìs Añ in, bơh nùs kơlôi mê ò gơwèt hơ broă Yàng Tom Trồ, mơya gơwèt hơ broă kòn mơnus dê.”(Mathiơ‬ ‭16‬:‭‭23)

Tòm jơ să lồi dut, Pier mờ ala cau bơtê neh hơ nền mờ Yàng Je-su lah: “Bulah añ pal chơt bal mơ Kơnràñ, añ kung ò pơndang sang Kơnràñ ò.” (Mathiơ 16:23). Mơya tơnơ̆ bàr pe jơ tơnơ̆, ồng neh sang pơndang Kơnràñ pe dơ̆. Bơta pràn ís ồng dê neh gơ tơlah tơn.

Mơya, Pier găm geh ơm tòm gơnoăr broă ồng dê! Nùs nđàc sơngit dờng ờ nàng Yàng Je-su dê neh geh ràng tơlik tòm sră Jăng 21, tŭ Kơnràñ neh lơh pa wơl ồng in mờ jào gơnoăr broă ê sền mpồl be làt Kơnràñ dê ai ồng in. Pe dơ̆ Yàng Je-su lùp: “Mê gơboh di Añ sơl?” Gen khai đơs lah: “Ơ Yàng, Kơnràñ git jơh ală bơta, Kơnràñ git lah añ gơboh di Kơnràñ.” Yàng Jesu đơs lah: “Ròng siam tĕ ală belàt Añ jê.” (Jang‬ ‭21‬:‭17)

Tus di lơh wèr ngai prăm jơt, bol he neh sền gŏ bơta tòm gơl loh làng ồng Pier dê hơ̆ là tŭ ồng geh bềng lìu Yàng Hwềng Goh. Tŭ ồng khin cha ntào dê đap mpồl làng bol dờng, yăl bơto bơh Jơnau Niam dê ala cau neh pơng đin Yàng Je-su (Broă 2:23). Tơ nơ̆, ồng tề lăm Hìu Jum Goh dồ bă pràn kơldăng, lơh oă bơta krơi ís tòm sơnđăn Yàng Je-su mờ lơh jat jơnau hòi jà Yàng Tòm Trồ dê ai ồng in yăl bơto Jơnau Niam làng bol bơh dìh in.

Kơlôi tús bơta rơngòt rngơt ngăn tŭ ala cau dòn kơno lah bơtau He-rốt kup ồng Pier, koñ tơnchơt ồng bè pa tơnchơt ồng Jakơ. bol he rơp kơlôi lah ồng Pier rơp kơlôi rcăng mờ rngòt ngăn. Mơya, “Tòm mang lài mơ ngai Herôt neh lơh nền tơlik Pier nàng cahrña, gen khai ơm bic digùl bàr nă cau ling mơ kòl kơt mơ bàr dang che sreng, mơ di bơr mpồng hìu jàm gơs cau ling kơp gàr.” (Broă‬ ‭12‬:‭6)‬. Bol he mình rgơi git lah Pier gớs dồ bơta dòn kơ̆ cî dê bơta kís wơl Yàng Je-su dê, tian dê bơta chơt kung ò lơh ồng in rngòt. Bơh hơ̆, tơnơ̆ ồng neh cih tòm sră pơ yoa ồng dê lah: “Jào phi tĕ jơh ală bơta kơlôi rcang oh mi dê Kơnràñ in, tài bơh Kơnràñ òs sền gàr oh mi sùm.” (I Pier‬ ‭5‬:‭7). Di ngăn, tòm mang di tiah ơm jam klăm jơngo, Pier bik lơ hă tiăn gớs dồ nă cau gơn rơh tup dê tình rơ pàs nàng tơng kah ồng mờ lăm ồng lik klàs bơh tiah ơm jàm.

Tŭ Pier tús dê hìu nhă ala cau dòn nàng rgùm hòi dăn, gen dô nă dĭ ùr sơnđan la Rôda lòt tus iat. Khai git đal sap đơs Pier dê gen khai hòn chò ngan, tian gơs hŭi ò pò mpồng, mơya ntoat mut yal lah Pier ơm ntào di bơr mpồng. Bol khai đơs lah: “Ai sơnrang.” Mơya khai đơs nền lah hơ̆ la ngan. Bol hơ̆ đơs lah: “Hơ̆ la cau gơnrơh khai dê.” (Broă‬ ‭12‬:‭13‬-‭15 )

Pier pơnjat là cau lăm bồ tòm Hìu Jum Goh bơh bồ dà sơn rờp mờ cih 2 sră pơyoa tús dê ngai do găm sùm gớs bơta bơt bơtào bol he im. Tòm ala sră pơyoa mờ bo he hòi lah I Pier mờ II Pier, ồng mờng ờs đớs bơh nùs nđàc sơngit mờ bơta nđàc. Ñchi bơh tài taih? Bơh ồng lah cau neh lòt găn dồ bă nền cê ala broă hơ̆ tús bơh Yàng Tòm Trồ, là Bơtau ò tŭ lơi sang lời ồng tŭ ồng gơplơ̆ gơ pừ.

Mờ Yàng Tòm Trồ kung ò tŭ lơi sang lời bol he! Tòm ngai do, tús té mờ Kơnràñ, yăl glài, kơno jơnau Kơnràñ đớs tòm hwềng nùs, đăl git bơta koñ gơboh mờ nùs nđàc sơngit Kơnràñ dê, mờ dăn Kơnràñ dong bol he kís dồ rài kís niam nùs Yàng Hwềng Goh, nàng bol he gớs bơta pràn kơldang cơn đoà lòt tòm ngai hìng băl mờ bơta kơ nền lah bol he găm ơm tòm bơta nđàc mờ bong bơñà Yàng Tòm Trồ dê, nàng jơh nùs yăl nùs koñ gơboh Kơnràñ dê làm jơh dunnia

Dan jà bol he dô nùs bal tòm bơta hòi dan: Khoai Yàng là Bơtau lơbơn niam mờ bềng nùs nđàc sơngit! Neh oă dơ̆ kòn neh nwơl kời bơh bơta koñ gơboh Kơnràñ mờ ò kís wil tơl Kơnràñ in, mơya kòn git lah Kơnràñ ò sang lòi kòn, mơ sùm ai kòn in tŭ tơngai mờ bơta nđàc nàng rê wơl. Tòm ngai do, kòn dăn gơ jrăn sang glài mờ dăn Yàng lơh pa kòn in, nàng kòn in geh Yàng ngui mờ lơh ala broă Yàng in. Kòn jơh nùs hòi dăn, tòm sơnđăn Yàng Je-su Krist, A-men.

Ơ ồng mọ, oh mi koñ gơboh, bơta nđàc mờ nùs nđàc sơngit Yàng Tòm Trồ dê sùm lìu làc dê ala cau rê wơl gơ jrăn sang glài mờ Kơnràñ. Bulah oă bơta lơbơn lơñio mờ gơ plơ̆, mơya cau bơtê Pier sùm geh Yàng toh glài mờ ngui nàng tề lăm mpồl be làt Kơnràñ dê. Ngai do, bơta nđàc Kơnràñ sùm lìu làc mờ dờng rlau ala bơta tìs haha bơta lơbơn lơñio bol he dê.

Bol he găm ơm tòm bơta rngòt hala ba sìl sơl? Bol he kơlôi lah Yàng ò tŭ lơi ngui tai bol he sơl? Tús té mờ Kơnràñ tòm jơ do mơ, nàng geh Kơnràñ toh glài mờ tuh bềng lìu bol he in bơh nùs koñ gơboh mờ gơnoăr Kơnràñ dê, gen bol he kung geh jào broă dơng hơ̆ là lơh cơng bơh Kơnràñ di gùl dunnia do.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.