Digơlan cau lơi kung neh lòt gan ală bơta bol glar gơlơh he in lơng gơr. Mơya pồn ndơp bơh ngkòi ală bơta ò ring lơ ngai, moat jrùng mơ cah is, bol he sền gŏ mpàng tê Yàng dê lơh broă, lơh ală bơta iơh gơlik gơs bơta niam. Gan dê ală sèng yal bềng tơl gơnap gơ noar tòm jơh ală rài Hiu Jum Goh dê, bol he đal git dô jơnau song ring niam: Tŭ añ mơ ồng mò oh mi sac rwah don kơ nờm mơ dòn bơr Yàng, gen cồng nha ò dê jat bơh bol he dê tai, mơ ơm tòm tê gơnap gơ noar Yàng Tom Trồ dê dô bă wil tơl – Bơtau rgơi cèng tus bơta pha lin digùl ală tŭ jơ gơlơh be sơ bơng rơng rlau jơh.

Ngai do, ngai 01/11/2025, Bơta Hòi Dan Kòp Ngai dăn jà ală ồng mò oh mi bơtê bal jơnau Yàng bơh tơnggume: RLAU MƠ GƠNOAR BROĂ KÒN MƠNUS DÊ.

‘Ală bi kòñ lơh iơh di añ, mơya Yàng Tom Trồ lơh wơl bơta kwơ añ in, nàng sền gàr bơta kis oă làng bol in, kung be neh gơlik gơs ngai do. ‘ (Sơnròp Gơlik Gơs 50:20)

Tơnơ̆ mơ bài diễn văn tiang pơnrơ “Añ gơs dô bơta mpau” nam 1963, cau jak chài Martin Luther King Jr. neh gơs tŭ jơ gơs jơnau đơs tòm bòn añ jê. Tŭ hơ̆ añ pa bơtê klơng tiểu học, mơya bơta hơ̆ gơ lơh añ kah dô bă loh làng. Añ mơ bi ur geh mè bèp cèng rê dê bòn mè bèp yo, mơ gơs tŭ lơm pah lòt gan bal mơ ồng ală gùng dềt hơđang nhơt, gùng sền gar lơ mo, mơ git bơta ai kòn sur mơ kòn be in sa. Gơwèt mơ bol hi, hơ̆ la dô bơta niam ngan, mơ òhềt git lah ơm tòm hiu mè bèp mơ cau gơp bòn rngòt rngơt, til mpồng mơ ò hoan lik bơh dih tài bơh bol khai rngòt bơta tòm lơh hala bơta iơh rgơi gơlik gơs tòm tŭ kơn jơ̆ kơn jut do.

Kòp dơ̆ cau jak chài Martin Luther King tơlik mat òs pơnjat gơs bơta sơrlồng sơr làng, bulah ồng sum jơh nùs hòi jà biểu tình ôn hòa tòm tŭ bơta tòm lơh tòm pìt bơta ring bal mơ jơnau di pal. Mơ moat jrùng ngăn, oă cau gơ jrañ ală bơta tòm gơl ồng tòm pơndang, mơ lồi ồng neh kong cau tơn chơt. Mơya Yàng ò lòi ồs song ring ồng dê chơt ò. Ală cau jat ồng kư̆ pơnjat tòm lơh mơ lồi lơgar Mỹ neh ai gơ noar bơta boh lam gơwèt gơnoar làng bol dê nàng làng bol pleh bơh bơta tòm cah is mpồl.

Bơta phalin dơng ngan lik bơh bơta sơrlồng sơr làng ală sơ nam thập niên 60 dê tơngkah wơl ală sèng yal tòm Sră Goh, tu YàngTom trồ tòm gơl ală bơta iơh gơlik bơta niam. An gơlơh ò gơ hui dê sèng Yal bơh ồng Giô-Sép. Bulah ồng kong oh mi kup tac lơh cau di, ồng kư dòn song mơ dòn kơ no, dê Yàng Tòm Trồ gơ nap gơ noar. Bơta dòn ồng dê dong ồng pleh bơt ơnai mò cau tòm dê, gen ồng kong cau đơs blac mơ kong jàm oă sơ năm. Mơya, Yàng Tòm Trồ ò lòi ồng Jôsep lòi tòm hiu jàm. Ồng geh yò bơtào lơh gơs cau at bồ bòn Israel dê mơ dong tă dô làng bol lik bơh bơta chơ ji gloh, tòm hơ gơs oh mi ồng dê. Ông đơs lah: ‘Ală bi kòñ lơh iơh di añ, mơya Yàng Tom Trồ lơh wơl bơta kwơ añ in, nàng sền gàr bơta kis oă làng bol in, kung be neh gơlik gơs ngai do. ‘ (Sơnròp Gơlik Gơs 50:20)
Sèng yal hơ kung be ràikis ồng Martin Luther King, ràng tơlik dô jơnau: hơ la gơ nap gơ noar dong klas Yàng Tom Trồ dê. Mơ jơnhoa rlau jơh hơ la Yàng Jesu Christ.

Yàng Dong Klas Jesu Christ, Bơtau Mesia neh geh ho pơ gon, Kòn Dùl Yàng Tòm Trồ , neh tus nàng jòi mơ dong klas cau roh rui (Luka 19:10) mơ ai pà bol he in bơta kis tơngkah tơng kan (10:10). Bulah Kơn ràn kong cau so tơm kong pơng hơđang chi pương, Yàng Bèp òhềt lòi bơta hơ la lồi dut. Yàng Bèp neh lơh Yàng Jesu Christ kis wơl, nàng jơh tơl nă cau lơi dòn dê Yàng rơp pha lin mơ bơta tồi glài mơ bơta chơt, geh bơta kis tơngkah tơngkan, mơ geh ơm mơ Yàng Tòm Trồ sum sum tu pơn dut rài kis tòm dunnia do.

Sền wơl, bol he go bơta lơi bơh ală krơh hơ tiah? Cồng nha bơta don mơ nus nhơm dòn bơr wil tơl ò ơm tòm tê bol khai, mơ ơm tòm tê Yàng Tòm Trồ. Mơ lồi dut, Yàng lơh bơta niam gơlik bơh bơta iơh.

‘Bol he git lah tòm jơh ală bơta, Yàng Tom Trồ lơh tồ gơs kwơ cau lơi in kòñ gơboh di Kơnràñ, hơ̆ la cau neh geh hòi sac jat bơta lơh nền Kơnràñ dê. ‘ (Rôma 8:28)

Bol he kis tòm dô lơgar mơ bơta gơ jran mơ bơta ò ring niam gam tềng hơ, cơng tàng la ală bơta tòm lơh, ală bơta tơn chơt, mơ ală bơta tòm lơh kư gơlik gơs tòm bă tiah do , bă tiah ne. Pơn dròm be Martin Luther King, Giô-sép mơ Yàng Jesu – ală cau neh ò lòi bơta gơlik gơs gùt dar, bơta iơh, bơta ò ring bal hala bơta gơ jran lơh he in lòt tis gùng – bol he kư kơ nus be hơ.

Ồng mò oh mi kòn gơboh Yàng sơl? Sền wơl dê rài kis he dê, jơh ală bơta ò bơtoah mơ đal git ală bơta nđàc ring lơngai mơ Yamgf cèng tus ồng mò oh mi in găn dê ală bơta gơlơh be la sơ bơng rơng hơ. Tu lơh be hơ, bơta dòn ồng mò oh mi rơp geh bơtơl tai bơta pràn kơldang rlau tai mơ nus nhơm he rơp geh dòp rò bơta ring lơngai lòt gan bơta iơh rmơh.

Dan jà bol he dô nùs bal tòm bơta hòi dan: Khoai Yàng kòñ gơboh! Ơ Yàng, ngai do kòn dan jào jơh ală bơta moat jrùng mơ bơta dơrcul kòn dê tòm tê Yàng. Kòn git lah Yàng la Bơtau at bồ hơđang ală bơta, Bơtau ai pà bơta phalin kòn in tòm tŭ kòn geh tìp bơta sơ bơng rơng. Dan dong kòl kòn kư̆ kơ̆ nùs dòn lah Yàng gam pơnjat cih tai ală bơta tòm rài kis kòn, bulah kòn òhềt wờng jơh ală bơta. Dan Yàng lơh ală bơta roh gơcoh mơ moat jrùng kòn dê gơlik gơs ală bơta ring niam tòm tê Yàng. Dan ai pà kòn in bơta lơngai lơngo nàng kòp ngai cơnđoà gơwèt mơ nùs dòn kơ nom, nàng kòn kis dô rài kis jong rơ sơn đan Yàng. Kòn ai sơnđan Yàng Jesu Krist, hòi dan mơ Yàng Bèp. Amen.

Ơ ală ồng mò oh mi kòñ gơboh, nchi bơta he lòi bơta rngòt rngơt mơ ală bơta ò di pal gùt dar he at bồ, bol he sac rwah te dòn Yàng Tòm Trồ gam cih ală bơta ring niam tòm rài kis he? Digơlan bol he òhềt go làm jơh jơh ală bơta gơlik gơs, mơya Yàng os sên go dô bawwil tơl bơh sơn ròp. Lòi te Yàng tòm gơl ală bơta ò gơn kơ nom, roh gơ coh hala bơta jê sồt gơlik gơs dô bơta ngùi rài tơ nơ bềng tơl bơta ring lơngai tơngkah tơng kan. Mơ tòm tu sền wơl, ồng mò oh mi rơp gơlơh krơi is đal git lah: tòm tu klăm jơ ngo rlau jơh, bơta àng Yàng dê sol pơndang tòm rài kisồng mò oh mi.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.