Nyob hauv txoj kev ua Vajtswv haujlwm, peb yuav cim civ kos tus nrim rau peb: ntawm no yog qhov chaw kuv yuav mus, tshuav qhov tod kuv yuav tsis mus li. tiamsis Tswv Yexus txawv. Nws yeej tsis xyeej zaum nrog cov neeg uas raug ua saib tsis taus, kam nkag rau hauv cheeb tsam uas sawv daws puav leej zam. Twb yog ntawm tej chaw “uas tsis muaj neeg xav mus ntawd” Vajtswv txoj kev hlub ho ci ntsa iab tuaj. Thiab hnub no, Vajtswv kuj tab tom hu koj tawm hauv “lub chaw tso siab ntawd” kom ntsia pom daim duab loj dua txog Vajtswv lub homphiaj.

Hnub no, yog hnub 3/11/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Carolyn Fraiser dhau ntawm Zaj kawm TES HAUJLWM TSIS MUAJ NRIM.

“Tej uas Vajtswv hais tias huv lawm, koj tsis txhob hais tias tsis huv.” (Tes Haujlwm 10:15)

“Kuv tsis yog los hu cov neeg ncaj ncees, tiamsis kuv los hu cov neeg txhaum, kom lawv tso lawv tej kev txhaum tseg” (Lukas 5:32).

Petus yog ib tug pejxeem neeg Yudais kub siab. Yawg siv zog coj raws li txhua nqe kevcai thiab tag nrho tej uas kevcai yuam kom ua. Tiamsis txawm yog thaum uas twb nrog Tswv Yexus ua ke hauv lub neej, ntawm Tswv Yexus txoj kev tuag thiab sawv hauv qhov tuag rov qab los, Petus yeej tseem tsis nkag siab tag lub ntsiab ntawm txhua yam. Nyob hauv yawg lub siab yeej tseem ntseeg tias tus Mexiyas tau txib los tsuas yog cawm cov neeg Yudais xwb.

Tiamsis Vajtswv ho qhib rau yawg ib daim duab loj dua. Lub zeem muag txog ib puas tsav yam raug suav tias tsis huv ntawm yawg xub ntiag ua rau yawg tsis paub ua cas. Noj tej yam uas Vajtswv txwv tsis pub cov neeg Yudais noj los? yuav tsis muaj hnub li! yawg teb: “Tsis tau, tus Tswv! Kuv yeej ibtxwm tsis noj tej uas kevcai txwv tsis pub noj” (Tes Haujlwm 10:14). Tiamsis Vajtswv ceeb toom yawg: “Tej uas Vajtswv hais tias huv lawm, koj tsis txhob hais tias tsis huv.” (nqe 15).

Kuv cim civ nug: peb twb muaj ntau zaug poob rau lub caijnyoog no? peb xav tias tej zaug Vajtswv yuav tsis muaj hnub hu peb mus rau tej qhov chaw uas tsis yog chaw zoo, lossis tseg sijhawm rau cov neeg uas tsis koom kev ntseeg. Tiamsis tsis paub puas yog li ntawd?

Tswv Yexus yog tus qauv zoo tshaj. Nws zaum nrog cov sau se noj ua ke, nrog cov neeg uas tsis yog neeg Yudais sib tham thiab tsis ntseeg. Nws kuj mus dhau lub nroog Xamalis ntsib ib tug pojniam uas ib txwm muaj lub npe phem ntawm qhov dej. Nyob hauv Lukas 5:31, Nws hais ncaj qha rau cov pov thawj hlob muaj hwjchim thaum ntawd: “Tus neeg tsis muaj mob tsis tas yuav mus cuag kws tshuaj, tsuas yog tus mob xwb thiaj mus”.

Vajtswv yeej tsis ua xyem xyav rau Petus lub siab hlub Vajtswv. Vajtswv paub Petus yeej hwm Nws tiag. Tiamsis Vajtswv kuj xav hloov pauv yawg txoj kev xav. Nws xav kom Petus ntsia pom lub homphiaj loj dua, yog lub homphiaj cawm tag nrho tib neeg ntiajteb, tsis yog tsuas tseg rau cov neeg Yudais xwb.

“Qhov uas Vajtswv txib nws Leej Tub los rau hauv ntiajteb no, tsis yog los txiav txim rau neeg ntiajteb, tiamsis yog los cawm neeg ntiajteb kom lawv dim lawv lub txim” (Yauhas 3:17).

Petus tsis tas yuav tos ntev kom nkag siab tej uas Vajtswv xav qhia yawg. Petus ntsib Kaunelius, tsis yog ib tug pov thawj hlob, kuj tsis yog neeg Yudais, tiamsis yog cov neeg Loos ib tug thawj tub rog- tseem raug suav tias yog lawv yeebncuab! Tiamsis Vajluskub sau tias Kaunelius yog “Nws yog ib tug uas coj Vajtswv txoj kevcai nruj thiab nws tsev neeg puav leej hwm Vajtswv” (Tes Haujlwm 10:2). Yawg thov Vajtswv thiab pab cov neeg txomnyem (nqe 4). Tsuas muaj ib qhov yog tsis tau hnov txog Tswv Yexus xwb. Thiab Vajtswv ho xaiv Petus yog tus coj Txojmoo Zoo mus qhia rau yawg.

Tig rov qab los saib txoj kev nrog tus Tswv mus, kuv yuav tau cim civ nug qee lo lus nug nyuaj tias: puas muaj thaum twg kuv yuav tau zam tej chaw uas Vajtswv xav kom kuv mus, tsuas yog vim ntshai ib tsam tej neeg ib ncig ntawd ntsia pom kuv? Puas muaj zaum twg kuv ntsib ib tug neeg cheem tsum pab tiamsis ho txhob txwm ua tug tsis paub? Puas muaj zaum twg kuv ua txuj tsis hnov Vaj Ntsujplig txoj kev tshoov siab, kom kuv caw ib tug twg tuaj hauv tuam tsev, tsuas yog lawv muaj lub neej tsis zoo?

Qhov tseeb tiag yog, kuv zoo li Petus ntau yam heev. Kuv txiav txiav rau lwm tus, thaum uas Vajtswv xav kom kuv qhib rau lawv muaj kev cia siab dhau ntawm Txojmoo Zoo. Kuv twb ua poob lub sijhawm coj qhov pom kev ci mus rau hauv qhov tsaus ntuj. Kuv ntsia tsis pom lwm tus lub siab zoo li Vajtswv pom. Tej yam uas Vajtswv ua rau kom huv, kuv ho suav tias “tsis huv”.

Hnub no, Vajtswv puas tab tom hu koj nthuav tawm Vajtswv txoj kev hlub rau ib tug neeg uas koj tsis xav qhia? Lossis Vajtswv tab tom tshoov koj siab kom tawm hauv cheeb tsam tso siab mus rau ib qhov chaw deb deb twg ntawd? Yog koj tseem ua xyem xyav, cia li tso siab vim koj tsis nyob ib leeg. Thiab koj txiav txim siab mloog raws li Vajtswv lub suab hu, koj yuav ntsia pom lub hwjchim saum ntuj tau nthuav qhia dhau ntawm koj lub neej, thiab qhov pom kev ntawm txoj kev cawmdim yuav los rau txhua tus nyob ib ncig.

Thov caw nrog kuv peb thov Vajtswv ua ke: Tus Tswv, muaj ntau zaug kuv tsuas xav nyob hauv kuv qhov chaw tso siab xwb, kom kuv tau lub neej zoo thiab tsis muaj leej twg ua rau kuv hnov nyuaj. Tiamsis hnub no, kuv hnov Vajtswv lub suab hu kuv kom muaj lub siab tawv tawm los. thov pub kom kuv muaj lub qhov muag ntsia pom li koj pom, pub kom kuv muaj lub siab hlub tib neeg ib yam li Vajtswv hlub, thiab pub rau kuv muaj txhais taw mus rau ntawm qhov chaw uas kuv tsis tau xav txog. Txawm yog kuv ntshai los thov Vajtswv ntuas kom kuv tsis mus ib leeg. Vajtswv twb mus kho kev rau kuv ua ntej lawm, thiab Vaj Ntsujplig yuav nrog nraim kuv. Thov kom dhau ntawm kuv lub neej, ntau tus ntsujplig yuav tau chwv txog dhau ntawm Vajtswv txoj kev hlub cawmdim. Kuv thov hauv Tswv Yexus Khetos lub npe. Amees.

Cov kwv tij txhua tus, koj puas ntseeg tias ib kaujruam mloog lus hauv txoj kev ntseeg xwb kuj txaus rau Vajtswv nthuav tawm Vajtswv lub hwjchim hloov pauv ib tug neeg twg ntawd lub neej? Thaum koj mloog raws li Vajtswv lub suab hu, ces tsis yog lwm tus lub neej hloov pauv xwb, koj tus kheej kuj ntsia pom Vajtswv lub hwjchim thiab Vajtswv txoj kev hlub ciaj sia hauv koj lub neej. Kom koj pom tias, mloog Vajtswv lus yuav tsis muaj hnub ua rau koj pob puas, tiamsis tsuas coj koob hmoov thiab txojsia nplua mias pub rau koj thiab rau sawv daws xwb.
Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj