Peb txhua tus puav leej muaj ib zaug ua tsis tiav. Ntawd tej zaug yog txiav txim siab yuam kev, tsis lees txais yuav Tus Tswv los ntawm los lus hais lossis tes haujlwm. Dhau tej zaug uas peb yuam kev ntawd, peb xav tias peb tsis tsimnyog tau Vajtswv siv lawm. Tiamsis, Vajtswv Txojlus qhia peb tias Vajtswv txojkev hlub thiab kev khuvleej tseem loj dua peb tej kev txhaum.

Hnub no yog hnub 02/11/2025, Kev Thov Vajtswv txhua hnub thov caw peb sawvdaws nrog kawm Vajtswv txojlus ua ke nrog tus qhia Wendy O’rourke dhau ntawm zaj kawm: VAJTSWV TSEEM HLUB HAB SIV.

“Tus Tswv, koj yeej paub ib puas tsav yam huv tibsi; koj yeej paub hais tias kuv hlub koj.” (Yauhas 21:17b)

Peb pheej xav tias txhua tug neeg nyob hauv Vajluskub yog cov neeg uas zoo tshwjxeeb heev. Tiamsis qhov tseeb lawv kuj yog tib neeg zoo pheej tshaj li peb tiam no. Txawm tias lawv zoo tsis txaus, tau ua txhaum, tiamsis Vajtswv twb tseem zoo siab siv lawv.

Petus yog ib tug zoo li ntawd. Petus thiab Yankaunpaus, Yauhas yog cov thwjtim uas nyob ze Tswv Yexus heev. Petus yog thawj tug uas lees txais tias: “Koj yog tus Mexiyas uas yog Vajtswv tus uas muaj sia nyob tus Tub.” (Mathais 16:16)

Tswv Yexus teb: “Yauhas tus tub Ximoos, koj hmoov zoo kawg! Tej lus no tsis yog neeg qhia rau koj, tiamsis yog kuv Txiv tus uas nyob saum ntuj ceebtsheej qhia rau koj. 18Kuv hais rau koj tias, koj yog Petus, thiab kuv yuav tsa kuv pawg ntseeg rau saum lub pobzeb no, txawm yog kev tuag los yuav kov tsis yeej pawg ntseeg ntawd.” (Mathais 16:17-18)

Tiamsis, kiag tom qab, thaum Tswv Yexus hais rau cov thwjtim tias Nws yuav raug txomnyem thiab raug tiag, Petus txawm coj Yexus mus rau ibcag thiab cheem hais tias, “Tus Tswv, thov Vajtswv txwv kom tsis txhob muaj li ntawd. Koj yeej yuav tsis raug tej no li!” (Mathais 16:22).

Tiamsis Tus Tswv tig rov qab mus hais rau Petus: “Niag Dab Ntxwgnyoog, koj cia li khiav ntawm kuv mus! Koj tsis txhob tav kuv kev, tej uas koj xav ko yog neeg li xwb, tsis yog Vajtswv li.” (Mathais 16:23)

Hauv pluag mov kawg, Petus thiab cov thwjtim hais ruaj ruaj rau Tswv Yexus tias: “Txawm yog kuv yuav nrog koj tuag los kuv yeej yuav tsis hais tias, kuv tsis paub koj li!” (Mathais 26:35). Tiamsis ob peb sijhawm tom qab, Petus twb peb zaug tsis lees paub Tswv Yexus. Petus lub zog qaug tag tamsim ntawd.

Tiamsis Vajtswv tsi tshem Petus tawm ntawm Nws tes haujlwm! Vajtswv kev khuvleej tau qhia tawm hauv Yauhas 21, thaum tus Tswv twb kho zoo thiab cob Nws tes haujlwm rau Petus. Peb zaug Tus Tswv nug: “Koj puas hlub kuv?” Petus txawm hais rau Yexus hais tias, “Tus Tswv, koj yeej paub ib puas tsav yam huv tibsi; koj yeej paub hais tias kuv hlub koj.” (Yauhas 21:17b)

Txog hnub Vaj Ntsujplig nqes los, peb pom Petus tau hloov pauv tagnrho thaum yawg tau puv npo Vaj Ntsujplig. Petus sawv tabmeeg ntawm pab neeg coob coob thiab qhia tawm Txojmoo zoo rau cov neeg uas twb muab Tswv Yexus ntsia saum ntoo khaublig (Tes Num 2:23). Tom qab, Petus ua siab tawv coj pawgntseeg, ua ntau txijci thiab qhia Txojmoo zoo mus rau lwm haiv neeg.

Peb cia li xav txog qhov uas cov ntseeg hnov li cas thaum lawv hnov tias Huabtais Helauj tau nteg Petus lawm, thiab yuav muab Petus tua ib yam li tau tua.

Yankaunpaus. Txawm li ntawd los, Ua ntej hnub uas Helauj yuav coj Petus los rau cov pejxeem, hmo ntawd Petus pw tsaug zog hauv ob tug tubrog kis nruab nrab. Luag muab ob txoj saw hlau khi Petus, thiab muaj tubrog zov lub tsev lojcuj lub roojvag huv tibsi. (Tes Num 12:6). Peb tsuas paub tias Petus ntseeg siab rau ntawd Tswv Yexus kev sawv rov qab los, thiab yawg tsis ntshai kev tuag lawm. Twb yog li ntawd, tom qab no, Petus sau hauv nws tsab ntawv tias “Vajtswv yog tus uas niaj hnub tsomkwm nej, yog li ntawd nej cia li muab nej tej kev nyuaj siab huv tibsi tso plhuav rau Vajtswv.” (I Petus 5:7). Tseeb tiag, hmo ntawd Petus pw tsaug zog txog qib uas Vajtswv tug tubtxib tsoo lub qhovrooj thiab hu yawg sawv coj yawg tawm tsev locuj mus.

Thaum Petus los txog ntawm lub tsev uas cov ntseeg tabtom thov Vajtswv, ib tug ntxhais qhev npe hu ua Laudas hnov yawg lub suab, zoo siab heev txog qib uas hnov qab qhib qhov rooj thiab cia yawg sawv sab nraum. Tiamsis thaum tug ntxhais qhev hais, lawv cov ntawd tsis muaj leejtwg ntseeg li, thiab tseem teb tias “Ntshai koj vwm lawm.” Tiamsis Laudas hais tias, “Yog Petus tiag hos.” Lawv txawm hais tias, “Ntshai yog tus timtswv uas ibtxwm nrog Petus xwb.”(Tes Num 12:15).

Petus ua tug thawjcoj nyob rau tiam pawgntseeg xub thawj thiab sau ob tsab ntawv uas txhawb zog heev rau peb cov niaj hnub nim no. Hauv phau I Petus thiab II Petus, Yawg pheej hais txog kev khuvleej thiab kev hlub pub dawb. Vim li cas? Vim Petus tau saj dhau meej meej txog ob qho ntawd los ntawm Vajtswv, tus uas tsis tso Petus tseg txawm yog Petus tau yuam kev.

Thiab Vajtswv yeej tsis tso peb tseg! Hnub no, cia li tsav los ze tus Tswv, lees txim, mloog Nws lub suab, saj tau Nws kev khuvleej thiab kev hlub pub dawb rau koj, thiab thov Tus Tswv pab koj ua tau lub neej haum Vaj Ntsujplig siab kom koj yuav ua tau lub siab tawv mus qhia Vajtswv txojkev hlub rau lub ntiajteb no.

Thov caw nrog kuv peb thov Vajtswv ua ke: Tus Tswv uas yog tus Tswv muaj kev hlub thiab kev ua siab ntev! Muaj ntau zaug kuv tsav deb Koj thiab tsis ua kuv lub neej pub rau Koj. Tiamsis Koj yeej tsis tso kuv tseg, tseem pub kuv muaj sijhawm tig rov qab los vim koj nplooj siab hlub pub dawb dawb rau kuv. Hnub no, kuv thov lees kuv tej kev txhaum, Thov Koj kho kuv dua thiab siv kuv txib kuv mus rau Koj tes haujlwm. Kuv taij thov los ntawm Tswv Yexus Khetos lub npe, Amees!

Ib tsoom phoojywg, Vajtswv kev khuvleej thiab kev hlub twb tseem puv npo rau peb txhua tus uas tig rov qab los lees txim. Txawm peb tau qaug zog, poob kev txhaum, tiamsis Petus tseem tau Vajtswv zam txim thiab siv nws mus tu Vajtswv pab yaj. Hnub no, Vajtswv kev hlub tseem pub dawb dawb rau peb thiab loj dua peb tej kev qaug zog.

Koj tseem nyob rau hauv kev txhawj, kev txaj muag? Koj xav tias Vajtswv yuav tsis siv koj lawm? Cia li tsav los cuag Tus Tswv kiag sijhawm no, cia tus Tswv zam txim thiab hliv Nws txojkev hlub los puv nkaus koj, kom koj kuj tau Nws cob ib tes haujlwm mus ua tim khawv rau lub ntiajteb no.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.