Xav tias leejtwg los twb tau ntsib dhau tej lub sijhawm uas ua rau yus qaug zog zis. Tiamsis tom qab tej teebmeem, tej kev mob siab thiab kev faib cais ntawd, peb pom Vajtswv txhais tes tabtom ua haujlwm kom yam phem yuav hloov los ua yam zoo. Dhau ntawm ntau zaj xwm hauv Vajluskub, peb pom ib qhov tseeb uas zoo kawg: yog thaum koj thiab kuv xaiv txojkev mloog Vajtswv lus, ces thaum kawg qhov uas peb txaiss tau yog nyob txij ntawm Vajtswv txhais tes – Tus uas yuav coj tau kev muaj yeej los txawm yog lub caijnyoog saib cuag li phem kawg nkaus heev.

Hnub no yog hnub 01/11/2025, Kev thov Vajtswv txhua hnub thov caw sawvdaws nrog kawm Vajtswv txojlus ua kev nrog tus sau Beth Patch dhau ntawm zaj kawm:
NYOB DHAU NTAWM TIB NEEG TXHAIS TES.

“Nej tau tuavhauv ua phem rau kuv lawm tiag, tiamsis Vajtswv tau muab qhov phem ntawm hloov ua qhov zoo, ua li ntawd thiaj cawm tau coob leej txojsia, ib yam li nej pom hnub no ntag.” (Chivkeeb 50:20)

Tom qab ntau lub xyoo uas xibfwb Martin Luther King Jr tau qhia zaj lus qhuab qhia uas muaj lub ntsiab lus tias: Kuv muaj ib txojkev npau suav” rau xyoo 1963 nyob ze ntawm peb lub zos. Thaum ntawd kuv nyuav pib mus kawm ntawv tiamsis kuv nco meej heev. Kuv thiab kuv tus muam hlob tau niam thiab txiv coj los tsev saib pog thiab yawg, thiab kuv tau muaj sijhawm nrog yawg mus ua si rau ntawm tej pov roob uas yug nyuj, thiab kuj tau pub zaub rau npua rau txhis noj. Nyob ntawm peb, no yog tej lub sijhawm uas zoo heev, tiamsis yeej tsis paub tias nyob ntawm niam txiv thiab tej neeg zej zos ces tabtom nyob rau hauv kev txhawj ntshai heev, txhua tus kaw qhov rooj zoo zoo, tsis muaj leejtwg kav tawm mus sab nraum vim ntshai muaj teebmeem loj tshwm tawm lub sijhawm ntawd.

Txhua zaug uas xibfwb Luther tshwm tuaj ces yeej muaj teebmeem tshwm lawv qab, txawm tias xibfwb yeej nqua hu txhua tus yuav tsum tawmtsam los ntawm kev zoo hauv txojkev nqu hu txhua tus mus rau ntawm qhov kevcai yog. Tiamsis khuvsim uas muaj ntau tug ho ntxub tej kev hloov pauv uas xibfwb Luther tabtom coj, thiab thaum kawg xibfwb raug luag muab nyiag tua pov tseg.Tiamsis Vajtswv tsis cia xibfwb Luther lub siab kub lug ntawd ploj mus. Cov uas caum xibfwb sawv los tawmtsam ntxiv thiab thaum kawg tebchaws Mekas thiaj li tsim tawm ib txojcai los pab cov tib neeg uas raug saib tsis taug.

Qhov kev muaj yeej xyoo ntawd ua rau kuv nco txog ntau zaj xwmtxheej hauv Vajluskub, thaum uas Vajtswv muab qhov phem hloov los ua qhov zoo. Kuv hnov zoo siab heev txog Yauxej zaj xwmtxheej. Txawm Yauxej raug nwg cov tijlaug muab muag mus ua cev qhev los nws tseem ncaj ncees thiab cia siab rau Vajtswv yog tus ua tau txhua yam. Twb yog vim li ntawd Yauxej thiaj tsis qaug rau Pautisfa tus poj niam cov lus haub ntxiag, txawm tias nws raug liam txim thiab raug ntes mus kaw ntau lub xyoo. Tiamsis Vajtswv yeej tsis cia Yauxej lub neej xaus hauv tsev twj. Nws tau Vajtswv tsa ua Iziv tug nom loj thiab tseem cawm tau nws tsev neeg dim tej kev txhaib nqhis, nyob hauv tseem muaj nws cov tijlaug tibsi. Yauxej ua siab ncaj lees tawm tias: “Nej tau tuavhauv ua phem rau kuv lawm tiag, tiamsis Vajtswv tau muab qhov phem ntawm hloov ua qhov zoo, ua li ntawd thiaj cawm tau coob leej txojsia, ib yam li nej pom hnub no ntag.” (Chivkeeb 50:20)

Yauxej thiab xibfwb Luther King zaj xwm puav leej qhia tawm ib lub ntsib lus yog: Vajtswv txojkev cawmdim thiab yog hais txog Tswv Yexus lub hwjchim. Cawmseej Tswv Yexus, yog tus Mexisyas tau cog lus yuav pub los, yog Vajtswv tib leej tub, twb tau los hauv lub ntiajteb no nrhiav thiab cawm tus neeg txhaum (Luka 19:10), thiab pub peb muaj txojsia puv ntoob (Yauhas 10:10). Txawm yog Nws raug ntsia rau saum tug ntoo khaublig los Vajtswv yeej tsis cia txhua yam xaus rau saum.

Leejtxiv tau ua rau tus Tswv sawv rov qab los, kom tagnrho txhua tus uas ntseeg Nws yuav kov yeej kev tuag, txais tau lub neej puv ntoob, thiab tau nrog Vajtswv nyob mus ib txhis thaum tag sim neej hauv lub ntiajteb no.

Tig rov qab mus saib, peb kawm tau dabtsi dhau lawv lub neej? Tej paj txiv ntawm lub siab ntseeg thiab lub siab mloog lus tsis yog nyob rau hauv lawv txhais tes tiamsis yog nyob rau hauv vajtswv txhais tes. Thiab thaum kawg, Vajtswv ua kom yam phem hloov los ua yam zoo.

“Peb paub hais tias peb cov uas hlub Vajtswv, txawm yog peb tau zoo thiab txomnyem los Vajtswv yuav ua kom tej ntawd muaj nqis rau peb cov uas Vajtswv pom zoo hu los raws li Vajtswv npaj tseg lawm.” (Loos 8:28)

Peb tabtom ua neej nyob rau hauv lub ntiajteb uas muaj kev sib ntxub kev kuv ntxhov nyob rau txhua qhov. Zoo ib yam li Martin Luther King, Yauxej thiab Tswv Yexus – yog cov uas tsis cia tej teebmeem, kev tawmtsam ua rau lawv mus yuam kev – peb yuav tsum tuav lub siab ruaj li lawv.

Koj puas hlub Vajtswv? Rov qab tig mus saib koj lub neej, saib tej yam uas tsis zoo thiab nrhiav pom Vajtswv tej koob hmoov nchuav los rau koj dhau tej kev txomnyem ntawd. Thaum ua li ntawd, koj yuav txais tau lub zog loj, thiab koj lub siab yuav nyob tiaj tug kaj siab lug tiv dhau tej kev txomnyem.

Thov caw nrog kuv peb thov Vajtswv ua ke: Kuv tug Vajtswv uas hlub kub kawg nkaus! Tus Tswv, hnub no kuv muab kuv tej kev mob siab, kev txhawj ntshai fij rau hauv Koj txhais tes. Kuv paub tseeb tias Koj yog tus tswjhwm txhua yam, yog Tus uas yuav pub rau kuv kov yeej nyob hauv tej kev txomnyem. Thov Koj tseem tabtom npaj ntxiv rau kuv lub neej, txawm yog thaum uas kuv tsis nkag siab tag txhua yam. Thov hloov txhua yam kev txomnyem hauv kuv lub neej dhau los ua qhov zoo hauv Koj txhais tes. Thov Koj pab kom kuv ua tau lub siab tug thiab nrog Koj mus txhua hnub, kom kuv lub neej yuav ua rau Koj tau ntsej muag. Kuv ua Koj tsaug los ntawm Tus Tswv Yexus Khetos lub npe. Amees!

Ib tsoom phoojywg sawvdaws, tsis txhob cia tej kev phem kev tsis zoo los cuam tshuam koj, cia li ntseeg siab tias Vajtswv yuav coj koj lub neej mus ntxiv rau yav tom ntej. Txawm yog peb tsis tau pom tag lub neej ntawd tiamsis Vajtswv yeej pom tag lawm. Cia Vajtswvv hloov tej kev mob kev txomnyem hauv koj lub neej dhau los muaj ib lub neej uas zoo kawg nkaus. Thiab thaum uas tig rov qab mus saib, koj yuav xav tsis thoob tias: Nyob rau ntawm thaj chaw uas tsaus ntuj nti, Vajtswv yuav ci Nws qhov kaj los rau hauv koj lub neej.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.