Oă cau òs kơlôi tus tơn bơh ngai wèr “Halloween” tŭ kơno tus ngai 31 kơnhai 10. Mơya ngai do, bŏl he rơp đal git sền wơl ngai do jat pơnah pha is. Bŏl he rơp ri wơl pah rài yau nàng sền wă lọh bơh dô nă cau jrô bơh jơnau Yang cau Đưk – Martin Luther, kŭng băl mơ ală bơta tòmgơl ồng cèng tus cau jat gùng duh khoai Jơnau Niăm tòm ngai do oă pah rài yau or, tŭ ồng đơs dờng jơnau tơngkah jơh ală pah rài Hiu Jum Goh jơl tus di ngai do.

Ngai do, ngai 31/10/2025 bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê kơnờm dê bơta dong kòl Lina Johnson dê bơh Tơnggume NGAI LƠH NỀN TÒMGƠL RI WƠL MƠ JƠNAU SŎNG

“Behơ̆ dilah bơr mê yal tơlik Yàng Jesu la Yàng, mơ nùs mê dòn lah Yàng Tom Trồ neh lơh Kơnràñ in kis wơl bơh bơta chơt, gen mê rơp geh dong klàs:” (Rôma 10:9)

Jat Sră Britannica.com neh cih wơl , Martin Luther deh ngai 10 kơnhai 11 sownă 1483. Lài ỏe ală cU dòn jat Jơnau Niăm òs kah kirsơnre ngai deh mơ ngai chơt ồng di (18 kơnhai 2) nàng kah tus ồng. Mơya nđợ tơnơ̆ ngkơi, jơh să sac ngai 31 kơnhai 10.

Ñchi bơh tai ngai do geh sac là tài bơh năm 1517, Martin Luther neh yồng “95 Luận đề” hơđăng mpồng hiu jum Castle tòm tiah Wittenberg, lơgar Đưk. Tòm hơ̆, ồng họi jà ală cau at bồ gùng duh khoai pah rài hơ̆ păl gơjrañ săng glài mơ ri wơl hơ Jơnau sŏng Jơnau Yang di. Tài bơh tòm pah rài hơ̆, cau làng bŏl òhềt gơs tŭ lơmpah ơm rềp Jơnau Yang be bŏl he ngai do, găm gơs ală cau at bồ gùng duh khoai gen bơtọ sôr wơl ală bơta sơlơ̆ wơl mơ Sră Goh – lài ngăn là broă sa jền ală cau dòn nàng tòmgơl ai wơl bơta tọh tồi glài.

Tĭh dờng dềt mềr mơ Hiu Jum Goh, ăñ òs gơs jơnau lùp: Dilah Yang Jesu neh họi dăn jơh tơl nă bŏl he geh dô bă băl (Jang 17: 21), gen ñchi bơh tai gơs wơl oă ir gùng duh khoai pha is taih? Ăñ ò khin đơs lah he gơs jơnau ho wơl, mơya bơh bơta git wă, ăñ dòn lah Martin Luther òhềt gơs bơta cah is hala bơtào gơs dô nơm gùng duh khoai pa ndai ò. Ồng mìng họi jà Hiu Jum Goh pah rài hơ̆ gơjrañ săng glài lơm. Là dô nă cau git lọh Sră Goh, ồng git he ò tŭ lơi kơrmap gar wil tơl bơta boh lăm. Ồng kŭng dòp geh bơta ràng tơlik jrô ndơp, bơh nùs koñ nđàc mơ bơta nđàc tọh glài Yang Tom Trồ di bơh mìng Yang Jesu. Ồng dòp git he ò tŭ lơi pò is gùng mut tòm lơgar hơđăng trồ, kŭng ò ai jền nàng geh rwat ò. Ồng mìng rơp dòp rò ală bơta Yang Dŏng Jesu neh lơh ồng ĭn – Kơnrẵn neh kis dô rài kis wil tơl mơ kŏng chơt ala ồng ĭn. Tài bơh hơ̆, ồng jơh nùs tòmlơh tồ jơnau sŏng Yang Tom Trồ di ò gơkòl lơh rkwet rkwe.

Găm bŏl he ngai do mbe lơi taih? Bŏl he gơs dòp git lah he ò tŭ lơi kis siơ̆u bơta nđàc tọh glài mìng tus bơh Yang Dong Jesu sơl? Bŏl he găm ntào kơ̆ hơđăng Jơnau Yang sơl?

Rôma 3:23 cih “Bơh jơh tơl nă neh tìs glài, siơ̆u roh bơta gơklŏ Yàng Tom Trồ dê;”
Bŏl he ò tŭ lơi kis dô rài kis ò gơtup tìs ò.

Mơya Rôma 10:9 cih wơl: “Behơ̆ dilah bơr mê yal tơlik Yàng Jesu la Yàng, mơ nùs mê dòn lah Yàng Tom Trồ neh lơh Kơnràñ in kis wơl bơh bơta chơt, gen mê rơp geh dong klàs”

Kơnòm bơh bơta dòn tom bơta phi să Yang Dong Jesu mơ pha lin Kơnrẵn di diđap bơta chơt, bŏl he dơñ geh bơta dŏng klàs. Găm bơta lơi lơngap lơngai rlau mơ hơ̆ mơ!

Dan jà bol he dô nùs bal tòm bơta hòi dan: Khoai Yang, kọn jọng ro Ưnngai Kơnrẵn, tài bơh ngai do kọn geh tơngkah tus bơta nđàc tọh glài mơ dŏng klàs mìng gơs tòm Yang Dŏng Jesu lơm. Dăn Yang tơngkah nàng kọn git sền wơl hwing nùs he, sền sơwì rài kis he kòp ngai jat nùs koñ Kơnrẵn di hala ò. Dăn Yang sơñio ală tiah lơi kọn càng geh tòmgơl pa tòm kọn, mơ bơtọ kọn prap kơ̆ rài kis he tòm jơnau sŏng Jơnau Kơnrẵn di. Kơp koñ rài kis kọn geh tòmgơl pa kòp ngai, tồ sơlơ gơlik gơs ndrom be Yang rlau tai mơ ơn jơh bơta gơklŏ Kơnrẵn ĭn. Kọn jơh nùs họi dăn, kọn ai sơnđăn Yang Jesu Krist, Amen.

Ơ ală ồng mọ ọh mi koñ gơboh, tòm ngai kir sơnre Lơh nền Tòmgơl ri wơl hơ Jơnau Sŏng ngai do, dô bă băl ơn dô êt tŭ jơ nàng Ưnngai Yang tài bơh Kơnrẵn neh tọh glài bŏl he ĭn. Sền sơwì wơl tĕ rài kis he bơh ală jơnau sŏng tòm Sră Goh, mơ họi dăn băl mơ Kơnrẵn: “ Khoai Yang, Gơs tiah lơi tòm rài kis kọn càng geh tòmgơl sơl?” Tŭ bŏl he lời Jơnau Kơnrẵn sọl gùng, ngăn Kơnrẵn rơp lăm bŏl he cơnđòa mut tòm bơta tòmgơl mơ tĭh dờng ngăn, sơntom bơh hwing nùs rcang sir dòn bơr.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.