Tŭ dòn dờp Yàng, kòp nă bol he neh geh hòi jà nàng duh broă Kơnràñ mơ geh pơnah pờ ơnang lơgăr Kơnràñ hơđăng ù. Mơya, ò êt dơ̆ bol he sền gơlơh he be dềt rhền, gonoăr pràn ò tơl, mơ òs jôi ală tơnggu nàng săng lơi gonoăr broă mơ Yàng jao phi. Behơ̆ bơta lơi dong bol he lòt găn jơh ală bơta rngòt rngơt mơ rcăng nùs dòp rò gơnoăr broă Yàng jao?

Ngai do, ngai 30/10, tonggu hoi dăn kòp ngai dan jà oh mi kơlồi sơnừng jonau Yàng kơnòm bơta dong kòl Lina Johnson boh tơnggu YANG JÔM NGUI AÑ HALA Ò?

“Gèn Yàng Jehôwa đơs mơ khai lah: “Ñcau neh ai kòn mơnùs in gơs bờr taih? Ñcau lơh khai in tĭ hala kloat taih? Ñcau ai khai in sền gŏ hala lơh măt khai in jơngo taih? Ò di là Añ, là Yàng Jehôwa ò ơ?” (Lik Ejiptơ 4: 11)

Oh mi neh tŭ lơi geh Yàng Hwềng Goh chồl lơh dô nơm broă lơi hơ̆, mơya nùs rngòt rngơt gơrwàng bơta kơlồi oh mi dê sơl? Oh mi neh tŭ lơi đơs mơ Yàng lah: “Ơ Yàng, kòn ò git di gơlăn he ò rgơi lơh broă hơ̆ ò, bơh kòn rngòt he lơh bơcah jơh broă.” Gơwèt mơ añ, añ neh lòt găn bơta be do oă dơ̆.

Tòm dô ngai ne, tom tŭ duh khoai Yàng tòm Hiu Jum Goh, bơta rngòt hơ̆ gơtùs tòm bồ dơ ngoh añ. Tơnơ̆ mơ tŭ pơjum, añ tùs tìp mơ tờmbơh bơr mơ cau bơtô jơnau Yàng ngai hơ̆. Añ tòm pà mơ ông lah añ rngòt ngăn he ò lơh sìr bơta mơ Yàng hòi ja he, ò nền Yàng ngăn kờñ ngui he hala ò, mơ kùng ò git pal lơh mbe lơi mơ ală bơta Kơnràñ găm ơn hơđăng rài kis añ jê.

Cau bơtô ñŏ mơ đơs mơ añ: “Bơh kòn git he ò rgơi lơh is, hơ̆ la tơnggu Yàng kơñ ngui kòn. Bơh dilah kòn rgơi lơh jơh ală bơta mơ ò gơtùp tis, kòn rờp ƀuôn pơnhừ să. Mơya Yàng neh sac rwah kòn nàng Kơnràñ geh gơklŏ.” Ală jơnau hơ̆ ngăn neh tòm gơl añ! Añ dòp git lah he ò càng lơh jơh ală bơta dô bă wil tơl, mơya bơta Yàng kờñ tòm añ là dô nơm nùs nhờm rcăng sìr dòn duh.

Tòm Lik Ejiptơ 3- 4, Môise neh tip Yàng Tom Trồ găn di rlau lò ồs sa. ting hơ̆, Yang neh đơs mơ ông tùs tĕ tìp Pharaôn nàng lăm làng bol Israêl lik klàs bơh Ejiptơ (3: 10). Tơnơ̆ hơ̆, Yàng ràng tơlik tơnggu broă Kơnràñ dê Môise in (3: 11- 4: 13). Tŭ sền bơta lơh lòt Môise tòm Lik Ejiptơ 4, añ be sền gŏ să tòm he ting hơ̆.

“Môise đơs mơ Yàng Jehôwa lah: “Khoai Yàng Jehôwa, añ òhềt tŭ lơi la cau jak đơs, bơh tom yau òr, hala bơh di tŭ Yàng tom bơh bơr mơ cau duh broă Yàng dê. Añ la cau gơs lơm piat đơs ò loh lang.” (10)

Di đap bơta rngòt ông dê, Yàng Tom Trồ neh tongkah ông lah Kơnràñ la Bơtau Ăt Bồ, Bơtau dờng rlau jơh mơ bơta lơbơñ lơñò mơ bơta lồi dùt jơi kòn mơnùs dê. Kơnràñ đơs: “Ñcau neh ai kòm mơnus in gơs bơr taih? Ñcau lơh khai in tĭ hala kloat taih? Ñcau ai khai in sền gŏ hala lơh mat khai in jongo taih? Ò di là Añ, là Yàng Jehôwa ò ơ? Behơ̆ tŭ do lòt tĕ; añ rơp dong mê tòm tŭ mê đơs, mơ bơtô mê ñchi jơnau mê păl đơs.” (11- 12)

Bulah behơ̆, ông Môise kùng găm đơs mơ Yàng: “Khoai Yàng dăn Yàng sôr cau lơi ndai nàng lơh broă hơ̆.” (13)

Añ sền gŏ he ngăn ndrơm be ông Môise, bơh kùng òs đơs mơ Yàng lah: “Ơ Yàng, kòn ò rgơi lơh. Dan Kơnràñ sac cau ndai.” Mơya Yàng ò sac cau ndai, mơya Kơnràñ sồr bơntơl cau tùs digah nàng yờ đo añ. Ndrơm be Yàng Tòm Trồ neh sôr ông Arôn tùs dong ông Môi se, Kơnràñ kùng ngui ală cau be cau bơtô tòm ngai hơ̆ tùs nàng chồl bơtrồt añ.

Tòm tŭ pơnjat sền Lik Ejiptơ, bol he sền gŏ Yàng Tom Trồ neh lơh sìr jơh ală bơta Kơnràñ hơ. Kơnràñ ngui ală cau bềng bơta lơbơñ mơ ò wil tơl nàng ràng tơlik gơnap gơnoăr, tò sơnđan Kơnràñ geh gơklŏ! Mơ ngai do Kơnràñ găm lơh jat gùng dà hơ̆.

Rềp do, añ gơs tŭ tơmbơh bơr mơ Cau Gơnoăr Bơtô. Ông đơs lah ông ò rgơi bơyai gùng bơh broă hiu nhă ùr klau bơh broă hiu nhă să tòm ông kùng neh lòt găn bơta gơcah. bulah tŭ do ông neh bơtê git oă bơta bơtê bơh di ală bơta lòt găn hơ̆, mơ găm gơs dô hiu nha chò hòp ring lơngai, mơya bơta kơlôi sơnưng hơ̆ găm tìng jăt. Bơta rngòt hơ̆ neh pìt ai tŭ lơmpah nàng ông yò đơ mơ bơt bơtao ală hiu nhă ùr klau tòm Hiu Jum Goh.

Bol he òs gơs pê gùng dà nàng bơtê lùp. Niam Rlau jơh la bơtê bơh sơrlèt pha lin cau ndai dê. Êt geh kờñ rlau la bơtê bơh bơh bơta tis cau ndai dê. Mơ gùng mơ cau lơi tòm bol he ò kòp kơñ, hơ̆ la păl bơtê bơh di bơta tis să tòm he dê.

Añ tòm pà gùng bơtê do nàng bòl he sền gŏ lah, bulah ò wil tơl, mơya bol he gam geh Yàng ngui. Bol he ròp gơtùp tis, mơya bol he rgơi bơtê nàng lơh pa wơl. Chăn tus, bơta git làm bol he dê kùng rgơi gơlik gơs bơta bơtê nàng chồl bơtrồt mơ bơt bơtao cau ndai. Yàng Tòm Trò rgơi ngui jơh ală bơta ò wil tơl bol he dê nàng dùh broă Kơnràñ, mìng la bol he rcăng nùs. Mơ tŭ hơ̆, să tòm Kơnràñ ròp geh Jòng rờ!

Behơ̆, dilah ngai do ông mò oh mi găm gơs jơnau lùp Yàng gam gơs ngui ông mò oh mi hala ò? Sèng hơ wơl nền cề la: Gơs! Ƀañ lơi ală bơta rngòt rngơt kơryăn ông mò oh mi duh broă Kơnràñ, dòn duh Kơnràñ, mơ ơn jơh ală bơta gơklŏ Kơnràñ in.

Dan jà bol he dô nùs bal tòm bơta hòi dan: Khoai Bèp kờñ gơboh, kòn git he ò wil tơl mơ tis oă bơta tis, mơya ơ Yàng, ưn ngai Yàng oă ngăn bơh Kơnràñ gam òs ngui kòn. Dan dong kòn ò gơplơ̆ nùs tòm tŭ sền gŏ he găm lơbơñ ò so, mơya ai kòn in sùm rcăng nùs hơ wơl jơnau hòi Kơnràñ dê, nàng geh Kơnràñ ngui mơ bơtô tiar. Kòn jơh nùs hòi dăn tòm sơnđăn Yàng Jesu Krist, Amen.

Ơ ală ông mò oh mi kờñ gơboh, Môise, cau neh rngòt rngơt mơ pơndăng jơnau hòi ja Yàng dê, neh gơlik gơs cau geh Yàng ngui nàng tề lăm jơh dô làng bol. Gơs tŭ lơi ông mò oh mi gŏ he bassil hala sến ò sơp is să he tòm tŭ gŏ gùt dàr gơs oă cau jak chai gam duh broă Yàn, mơ tòm tŭ gŏ să tòm he găm ò tơl pràn nàng lơh broă Kơnràñ sơl?
Ơ ông mò oh mi kờñ gơboh, Yàng ò săng lơi bol he bơh ală bơta ò lồi hala ò niam, mơya Kơnràñ găm ngui bol he bulah tŭ bol he gŏ he ò tơl jat rnòas. Kah tĕ lah Yàng ai kòp nă cau in ală bơta nđàc mơ ơn bol he tòm ală kơnă tiah pha ís, mơya bol he gơs dô bơta hòi sac ndrờm bal hơ̆ la: geh pơnah pò ơnàng lơgar Kơnràñ hơđăng ù do.

Behơ̆ tàng, ràc dan tĕ mơ Yàng ai ông mò ọh mi in nùs nhờm dòn duh nàng ông mò oh mi rcăng sìr hơ wơl jơnau hoi jà Kơnràñ dê. Mơ dòn nền lah, tŭ Yàng jao ông mò oh mi in gơnoăr broă, kùng là tŭ Kơnràñ bơntơl bơta nđàc hơđăng ông mò oh mi.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.