Jơnau đơs lik bơh nùs nhơm. dồ nă cau gơs nùs nhơm ơm rềp mơ Yàng rơp ràng tơlik ală jơnau niam. mơya oă dơ, gen bol he đơs ală jơnau gơjran mơ lơh jê sồt cau, bulah he kờn hala ờ kờn. tòm tú bè hớ, bol he pal geh tơngkah bơta lơi taih?

Ngai do ngai 29/10/2025, rơndap bơta hòi dăn kòp ngai hòi jà ồng mọ oh mi kơlôi sơnơng Jơnau Yàng bal mơ mò Jessica Teed bơh tơnggume TŬ JƠNAU ĐƠS RÀNG TƠLIK NÙS NHƠM

“Mơya ală bơta lik bơh di bơr la gơlik bơh nùs, hơ̆ la bơta lơh ƀơ̆ ƀơl cau in. Bơh tòm nùs mơ gơlik ală bơta kơlôi iơh, tơnchơt cau, rềs àr, bơrnàn, ntung kơñau, lơh cơng blac, mơ jơnau tràl sơrbil.” (‭‭Mathiơ‬ ‭15‬:‭18‬-‭19)

Bol he sùm neh lơh tis tòm jơnau đơs tú he đơs ală jơnau ờ niam, yoam joh, blac pơrlồm, đơs iơh, hala ală jơnau ndai geh ràng tơlik tòm tú he gam gơjran. ală jơnau hớ ràng tơlik nùs nhơm ờ hềt geh tom gơl, mơ nùs nhơm hớ ngan pal kờn Yàng Dong Klàs. Sră Goh bơtê bol he pal prap gàr nùs nhơm he dê rlau jơh, tài bơh nùs nhơm la tiah gơlik ală bơta kơlôi, bơta dờn mơ pơnah he sền gó să tờm he, sền gó cau ndai mơ sền gó dunnia gùt dar he dê sơl. he gó sơl ơ, nùs nhơm ràng tơlik bơta kơlôi sơ-nơng, bơta kơ-lôi sơ-nơng gơlik jơ-nau đơs, mơ jơ-nau đơs ràng tơlik bơta he gam dờn, mơ bơta dờn hớ kung tup bư pơnah mơ he lơh lòt kờp ngai gơ-wèt mơ cau ndai.

“Prap gàr tĕ nùs kòn dê dô bă kơrhia rlau jơh, Bơh ală croh dà bơta kis gơlik bơh di gơ.” (‭‭Jơnau Pơnđik‬ ‭4‬:‭23‬)

Neh gơs dồ tú tòm rài kis an dê, ală jơ-nau an đơs sùm gơs bơta ờ niam mơ bơta gơ-jran. ală jơ-nau đơs hớ ràng tơlik di ngan nùs nhơm an dê tòm tú hớ. an mìng krơmê sền dê bơta kalke, bơta siơu siăr tian gơs ờ gó tai bơta nđàc mơ Yàng neh pà ai an in. an gơ-kòl tòm gùng kalke do: bơta jê nùs deh ală bơta kơ-lôi sơ-nơng ờ niam, mơ kơ-lôi sơ-nơng ờ niam gen gơlik ală jơnau đơs ờ niam. cồng nha hớ la an gơlik gơs cau ờ git ừn ngài mơ ờ niam, gơ-wèt mơ să tờm an kung mơ cau ndai sơl. Kờp jơ-nau đơs, kờp bơta kơ-lôi sơ-nơng ờ niam cèng an mut tòm bơta roh bơta gơn kơ-nờm. mơya tòm tú hớ, an dờp git la an kờn Yàng Jêsus rlau jơh. Yàng ờ di mìng la Bơtau Dong Klàs an dê, mơ kung la Yàng at bồ rài kis an dê sơl.
Sră Goh đơs nùs nhơm kon mơ-nus la “blac chừt rlau mơ jơh ală jơi phan, Mơ ƀơ̆ iơh ngan” (‭‭Jeremi‬ ‭17‬:‭9). Tòm Mathio 15, Yàng Jêsus kung neh ràng tơlik gơtha jơnau pơn-yơu tus dê ală cau bơtê in nàng git bơta dờng màng hớ ờ di la ală phan gơ tơmut tòm bơr, mơya la ală phan lik bơh dê bơr cau dê:

“Bol mê òhềt wă lah phan lơi mut tòm bơr gen mù tòm kơndul, mơ lik di tiah ò ơ? Mơya ală bơta lik bơh di bơr la gơlik bơh nùs, hơ̆ la bơta lơh ƀơ̆ ƀơl cau in. Bơh tòm nùs mơ gơlik ală bơta kơlôi iơh, tơnchơt cau, rềs àr, bơrnàn, ntung kơñau, lơh cơng blac, mơ jơnau tràl sơrbil. Hơ̆ la ală bơta lơh ƀơ̆ ƀơl cau in, mơya sa mơ ò rào tê ò di lơh cau in ƀơ̆ ƀơl ò.” (‭‭Mathiơ‬ ‭15‬:‭17‬-‭20‬)

Gen bè hớ, tòm rài kis cau dờn Yàng, bol he pal “kup jơh ală bơta kơlôi sơnơng nàng dòn bơr Bơtau Krist.” (‭‭II Kôrintô‬ ‭10‬:‭5) mơ bol he pal ơn hwềng nùs he dê tòm “bơta lơi song ngan, bơta lơi màng ryŭ; bơta lơi song ring, bơta lơi sàng goh, bơta lơi pal kòñ gơboh, bơta lơi gơs pơnro niam, dilah gơs bơta kơ̆ dơn lơi, dilah gơs bơta lơi pal jòng ro” (‭‭Philip‬ ‭4‬:‭8). Mơya, bol he ờ rgơi lơh ală bơta do dilah bol he ờ dan Yàng sơm-bòi mơ tom-gơl nùs nhơm he dê là đap.

An neh ơm is să tờm an dê tòm oă kơn-nhai sơ-nam. ală bơta kơ-lôi mơ jơnau đơs ờ niam sùm gơlik tòm nùs kơ-lôi an dê be la ală bơta di ngan. an sơ-lơ ngai sơ-lơ ngài mơ Yàng oă rlau, an ờ kờn hòi dăn hala duh khoai Yàng, bulah mìng Yàng sùm la Bơtau dong tă an lik klàs bơh ală broă gơlik gơs hớ. mơya lòt gan ală ngai, Kơnràn neh sơm-bòi ală tềl sồt tòm nùs an dê, dong an sền să tờm mơ gar mat Yàng dê. Yàng ràng tơlik an in git Yàng la cau lơi dê gùl ală bơta jê sồt an dê. gen kòp tú dồ êt, Yàng tom-gơl pơnah an sền gó Yàng, sền să-tờm he dê, mơ sền cau ndai. Yàng neh cèng an lik bơh tiah klam jơ-ngo, nàng cơn-đoà mut tòm bơta àng crih crài Yàng dê.

“Mơya oh mi la jơi bơtiàn geh sac rwah, la cau gơnoar ơn phan duh khoai cau bơtau dê, la làng bol sàng goh, la làng bol is Yàng Tom Trồ dê, tồ oh mi in yal tơlik ală broă crih crài ngan Kơnràñ dê, la Bơtau neh hòi oh mi lik klàs bơh tiah klam jơngo mơ tus hơ tiah àng gơcrà krơi is Kơnràñ dê.” (‭‭I Pier‬ ‭2‬:‭9)

Pơyoa tus dê ală cau gam gơkòl broă bè an: dilah Yàng neh tom-gơl an, gen Yàng kung rgơi tom-gơl bol he sơl. di dê tòm tú do, Yàng sùm gam pờ dờng ơ-nàng mpàng tê Kơnràn dê, chò nùs hoài bol he lik bơh tiah jrô roh bơta gơn kơ-nờm mơ cèng bol he mut tòm bơta àng crih crài Kơnràn dê. ngai do, nga he chò nùs nàng ơn jơh ală bơta jê sồt he dê Yàng in, nàng geh sơm-bòi, rào goh mơ tom gơl nùs nhơm he dê sơl ờ ơ?

Dan jà bol he dô nùs bal tòm bơta hòi dan: Khoai Yàng, tú jơ-nau đơs kon gơlik siơu bơta niam mơ sràt bơtang, dan Yàng tơnkah kon git sền swì nền cê tòm nùs nhơm he dê mơ bơta tom klac bal mơ Yàng. kon ừn ngài Yàng tài bơh kon geh gơ-rê is bal mơ Kơnràn, gen tàng dan Yàng botê kon in git ngui sơn dồi bơ he dê nàng ràng tơlik bơh Yàng mơ tơnggkah ală cau ndai. kon jơh nùs hòi dăn, ai sơnđan Yàng Jêsus Christ, Amen.

Ơ ală ồng mọ oh mi kờn gơboh, dờp git he la “jơi bơtiàn geh sac rwah, la cau gơnoar ơn phan duh khoai cau bơtau dê, la làng bol sàng goh, la làng bol is Yàng Tom Trồ dê”, he chò nùs nàng ơn jơh hwềng nùs, sơn dồi bơr, mơ jơh rài kis he dê nàng bơto yal bơh Yàng sơl ơ? kòp tú he sền gó nùs nhơm mơ jơ-nau đơs he dê bềng bơta sràt bơtang mơ boah gơ-jran, sền swì wơl bơta tomklac mơ Yàng. he gam ơm rềp mơ Yàng sơl ơ? he dờp git Yàng tòm kòp gùng lòt broă lơh he dê sơl ơ? dan té Yàng sơm-bòi nùs nhơm he dê, tài bơh mìng tú lơi nùs nhơm he dê geh sơm-bòi mơ tom-gơl, he sùm rgơi đơs mơ kis bè dồ nă cau gơrê is mơ Yàng.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.