Puas muaj zaum twg koj thov Vajtswv txog ib qhov teeb meem twg ntawd, tiamsis hnov cuag li Vajtswv ua twj ywm ntsiag to tsis teb yus. Dhau ntawm ntau xyoo, peb xav tias cuag li Vajtswv hnov qab lossis tsis mloog peb tej lus thov ntxiv lawm. Tiamsis, tsis paub peb puas ruaj siab thov Vajtswv thiab tso peb txoj kev ntseeg rau ntawm Vajtswv lawm tau?

Hnub no, yog hnub 27/10/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Adam Howard dhau ntawm Zaj kawm TUS NEEG MUAJ KEV NTSEEG LOJ

“Yexus teb tus pojniam ntawd hais tias, “Koj yog ib tug pojniam uas muaj kev ntseeg heev! Koj yeej yuav tau raws li koj thov.” Ces lub sijhawm ntawd nws tus ntxhais txawm zoo lawm.” (Mathais 15:28).

Vajluskub muaj ib zaj xwm txheej hais txog ib tug pojniam neeg Kana-as muaj kev ntseeg thaum Tswv Yexus mus dhau lub nroog Tiles thiab Xidoos, yog cheeb tsam cov neeg Khana-as nyob, yog lwm haiv neeg:

“Yexus tawm qhov ntawd mus rau pem cheebtsam uas ze lub nroog Tiles thiab lub nroog Xidoos. Muaj ib tug pojniam uas yog neeg Kana-as, nyob hauv cheebtsam ntawd tuaj cuag Yexus, thiab thov hais tias, “Daviv tus Tub, thov koj hlub kuv! Kuv tus ntxhais raug dab, ua rau nws txomnyem kawg li.” Tiamsis Yexus tsis teb tus pojniam ntawd ib los li. Yexus cov thwjtim los cuag Yexus thiab hais tias, “Koj kom nws khiav mus! Rau qhov nws pheej raws peb qab thiab quaj thov li ntawd! ” Yexus teb hais tias, “Vajtswv tsuas txib kuv los nrhiav cov Yixalayees uas yog pab yaj uas ploj lawm xwb.” Thaum tus pojniam hnov li ntawd, nws txawm los txhos caug ntua ntawm Yexus kotaw, thiab thov hais tias, “Tus Tswv, thov koj pab kuv.” Yexus teb hais tias, “Tsis tsimnyog muab menyuam tej mov pov rau tej dev noj.” Tus pojniam ntawd teb hais tias, “Yog los mas, tus Tswv, tiamsis txawm yog tej dev los tseem tau noj tej mov seem uas poob saurn tus tswv lub rooj los thiab.” Yexus teb tus pojniam ntawd hais tias, “Koj yog ib tug pojniam uas muaj kev ntseeg heev! Koj yeej yuav tau raws li koj thov.” Ces lub sijhawm ntawd nws tus ntxhais txawm zoo lawm.” (Mathais 15:21-28).

Tswv Yexus nyuam qhuav ntsib dhau ib lub sijhawm muaj ntau qhov teeb meem tshwm tuaj: Yauhas Npatitus tuag, yog Tswv Yexus ib tug kwv tij. Txuas ntxiv yog pub mov rau 5000 tus neeg noj, thiab ntsib cov neeg Falixais txoj kev tawm tsam. Thaum mus dhau lub nroog Tiles thiab Xidoos, Tswv Yexus ntsib tus pojniam Khana-as tuaj thov kom Tswv Yexus pab nws tus ntxhais raug dab txomnyem heev. Vim nws tus ntxhais, pog quaj thov thaum Tswv Yexus thiab Nws cov thwjtim tab tom taug kev mus.

Tswv Yexus cov thwjtim npau taws heev. Lawv hais rau Tswv Yexus tias: “Koj kom nws khiav mus! Rau qhov nws pheej raws peb qab thiab quaj thov li ntawd!” (nqe 23). Cov thwjtim thov kom Tswv Yexus hais kom nres. Tiamsis Tswv Yexus tsis ua li ntawd. Thaum pib, Tswv Yexus ua twjywm, tiamsis ho hais ntxiv tias: “Yexus teb hais tias, “Vajtswv tsuas txib kuv los nrhiav cov Yixalayees uas yog pab yaj uas ploj lawm xwb” (nqe 24).

Tsis tso tseg, tus pojniam no txhos caug nqes, thov Tswv Yexus: “Tus Tswv! Thov pab kuv!” Tswv Yexus teb pog: “Muab tej menyuam cov mov pov rau dev noj yog yam uas tsis yog kev” hnov cuag li nyhav, tiamsis Tswv Yexus tab tom siv ib daim duab nyob rau hauv cov neeg Yudais txoj kev coj noj coj ua txawv lwm haiv neeg. Lo lus “dev” uas Tswv Yexus hais yog daim duab “tus menyuam dev” tau tu hauv tsev, zaum ntawm tej rooj noj, noj tej mov poob saum rooj poob los.

Tus pojniam thaum hnov cov lus no, pog txo hwjchim thiab hais tias: “Yog los mas, tus Tswv, tiamsis txawm yog tej dev los tseem tau noj tej mov seem uas poob saurn tus tswv lub rooj los thiab”. Pog nthuav tawm ib txoj kev ntseeg loj tias txawm yog tej hmoov uas yog los ntawm Vajtswv lub hwjchim thiab Vajtswv lub siab hlub tshua xwb los kuj txaus kho zoo rau nws tus ntxhais lawm. Twb yog vim pog txoj kev ntseeg thiab pog lub siab txo hwjchim tau ua rau Tswv Yexus hlub tshua thiab hais tias: “Koj yog ib tug pojniam uas muaj kev ntseeg heev! Koj yeej yuav tau raws li koj thov” Thiab nyob rau lub sijhawm no, koj tus ntxhais yuav tau kho zoo.

Thaum nyeem mus nyeem los zaj xwm txheej no, kuv pib pom ib qhov zoo heev. Nyob rau hauv cov tshooj ua ntej ntawm Mathais, peb pom Tswv Yexus raug vij puas ncig los ntawm tej kev cheem tsum, txawm yog tsis khoom los Tswv Yexus yeej nthuav tawm lub siab hlub tshua rau cov neeg uas Nws ntsib thiab lub siab hlub tshua ntawd tsis hloov pauv txawm yog kev cheem tsum yuav ntau npaum twg.

Tiamsis nyob ntawm tus pojniam Khana-as no, yam uas Tswv Yexus tshua txog tsis yog tus ntxhais qhov kev cheem tsum, tiamsis yog leej niam txoj kev ntseeg. Pog ntseeg Tswv Yexus lub hwjchim kho zoo thiab taij thov txog rau thaum uas Vajtswv teb nws tej lus thov, kom tag nrho tej uas pog txais yuav yog “tej hmoov ncuav poob los saum rooj los kuj tau”. Ntawm pog, npauv xwb kuj txaus cawm nws tus ntxhais lawm.

Qhov no ua rau peb nco txog Yakhauj thaum yawg nrog Vajtswv tus timtswv sib mos nyob hauv Chivkeeb 32:22-32 thiab hais tias: “Kuv yuav tsis cia koj mus, yog koj tsis foom koob hmoov rau kuv”.

Tswv Yexus muaj cuab kav kho zoo txhua tus mob nkeeg tib ntsais muag xwb. Tiamsis yog txhua txoj kev cheem tsum tau Vajtswv teb tamsim, ces nyuaj rau peb kawm txog txoj kev ua siab ntev. Twb yog nyob rau lub sijhawm tos ntawd, Vajtswv yuav taw rau peb saj tau Vajtswv tus kheej ntau dua: ntawd yog txoj kev cob qhia txog kev ntseeg thiab kev kho hauv tus cwjpwm, thiab peb kawm tau txoj kev ntseeg Nws.

Nyob rau hauv lub ntiajteb no, peb ib txwm swm txhua yam yuav tau nrawm, yuav tsum muaj tamsim. Vim li ntawd, ntau zaug peb kuj ua poob peb txoj kev ua siab ntev. Kuv cim civ nug, yog peb sawv cev zoo li tus pojniam Khana-as, tsis paub peb puas ntsib qhov teeb meem xub thawj, thaum cov thwjtim nrhiav kev tav nws txoj kev cheemtsum? Tej zaug muaj ntau tus hauv peb kuj ua tsis tau siab ntev ib yam li Yakhauj, tshwj xeeb yog thaum pom peb tus kheej qaug zog heev hauv txoj kev taij thov.

Hnub no, kuv xav txhawb koj zog: ua siab ntev hauv txoj kev thov Vajtswv. Txawm yog koj tab tom thov Vajtswv yam dabtsi, kuj yuav tau pheeb rau ntawm Vajtswv kom ruaj hauv txhua qhov teeb meem. Tej zaug koj yuav hnov yus tas zog vim thov Vajtswv ntev, twb los cuag Vajtswv ntev nrog lub kua muag, thiab cuag li yeej tseem ua twjywm ntsiag to. tiamsis kuv txhawb koj zog: sawv khov kho thiab mus ntxiv.

Peb yuav ruaj siab hauv txoj kev thov Vajtswv thiab ntseeg siab rau Vajtswv lub hwjchim. Lo lus cog tseg rau tus uas ua siab ntev rau Tswv Yexus tej lus hais nyob hauv Mathais 7:7-8: “Nej thov, nej thiaj yuav tau; nej nrhiav, nej thiaj yuav ntsib; nej khob, Vajtswv thiaj yuav qhib qhovrooj rau nej. Rau qhov txhua tus uas thov yeej yuav tau, txhua tus uas nrhiav yeej ntsib, thiab txhua tus uas khob, Vajtswv yeej yuav qhib qhovrooj rau nws”

Thaum peb ua siab ntev hauv txoj kev thov Vajtswv, nrog ib txoj kev ntseeg zoo, ces muaj ib hnub twg Vajtswv kuj yuav hais rau peb ib yam li hais rau tus pojniam Khana-as thaum ub: “Koj muaj kev ntseeg loj! Yam koj thov yuav tau txais!”

Thov caw nrog kuv peb thov Vajtswv ua ke: Tus Tswv! Koj yog tus tab tom hnov koj tej menyuam tej lus taij thov. Vajtswv! Thov zam txim vim ntau zaug kuv tseem tsis tau ua siab ntev hauv txoj kev thov Vajtswv, tsis tau ntseeg tias Vajtswv yuav ua kom tiav tej uas kuv tos. Thov Vajtswv zam txim thiab pab kom kuv kam ua lub neej hauv txoj kev ntseeg thiab kam them tus nqi rau tej uas yus taij thov. Kuv thov hauv Tswv Yexus Khetos lub npe. Amees.

Cov kwv tij txhua tus, puas muaj qhov kev cheem tsum twg uas koj yuav tau fij rau Vajtswv ntau xyoo tiamsis Vajtswv yeej tseem tsis tau teb yus tej lus thov? Tus pojniam Khana-as thaum ub kuj ntsib ntau qhov teeb meem, tiamsis pog tsis tso tseg pog ntseeg Vajtswv txoj kev hlub tshua txawm yog txoj kev hlub ntawd tsuas yog tej hmoov mov poob saum rooj xwb.” Yog tias koj twb hnov cuag li tso tes hauv txoj kev taij thov Vajtswv, ces tamsim hnub no yog lub sijhawm zoo rau koj rov qab pib, txiav txim mus nyob ze Vajtswv dua, kom paub tias nyob hauv txhua qhov teeb meem, koj tsis nyob ib leeg. Kuj ntseeg Vajtswv txoj kev tswjhwm. Yog Vajtswv teb, koj yuav zoo siab. Tiamsis yog tias cuag li Vajtswv ntsiag to tej zaug Vajtswv muaj homphiaj zoo tseg rau koj lub neej. Yog li, peb thiaj yuav tsis qaug zog, tiamsis txiav txim pheeb rau Vajtswv hauv txhua qhov teeb meem hauv yus lub neej.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.