Txawm yog nyob rau hauv txhua tes haujlwm twg, yog tias peb tsis muaj haumphiaj, peb yuav yoojyim mus yuam kev thiab ua tsis tiav. Hauv tib neeg lub neej kuj ib yam nkaus li ntawd. Peb tau Vajtswv tsim thiab npaj ib lub haumphiaj dawbhuv rau peb, tiamsis vim tsis paub tseeb lub haumphiaj ntawd, peb thiaj yoojyim khiav mus caum tej yam uas yoojyim ploj mus hauv lub ntiajteb no. Twb yog li ntawd, tsuas yog thaum tig rov qab los nrhiav Vajtswv Txojlus, peb thiaj yuav paub tseem peb lub haumphiaj ua neej yog dabtsi tiag thiab vim li cas peb thiaj ua neej nyob rau hauv lub ntiajteb no.

Hnub no yog hnub 26/10/2025, Kev Thov Vajtswv Txhua Hnub thov caw peb sawvdaws nrog kawm Vajtswv Txojlus nrog tus qhia Tori Troncone dhau ntawm zaj kawm: TAU TSIM LOS RAU IB LUB HAUMPHIAJ

“Lawv yog haivneeg uas kuv tsim tseg ua kuv tug, lawv yuav hu nkauj qhuas kuv!” (Yaxaya 43:21)

Koj puas tau muaj zaug twg siv ib yam khoom mus tsis raws li lub haumphiaj tsim yam khoom ntawd lawm tsis tau? Zoo li kuv tau siv tus yaumsij tsheb mus qhib pob khoom thaum kuv nrhiav tsis pom rab txiab. Lossis thaum lub rooj tsis ruaj tsis khov ces kuv muab ntawv los tiag rau hauv qab tus ceg rooj.

Tej tswvyim no saib mas me tabsis kuj pab tau zoo kawg, tiamsis kuv kuj tsis hnov qab lawv lub haumphiaj tiag. Tus yaumsij yog qhib lub tsheb tsis yog coj los qhib pob khoom. Ntawv ces siv rau saum rooj noj tsis yog coj mus tiag rooj. Txawm peb muab mus siv rau lwm yam lawm los tsis tau qhia tias yam ntawd lub haumphiaj twb hloov lawm. Thiab peb tib neeg los kuj ib yam nkaus li ntawd. Txawm muaj tej ntu neej peb mus tsis raws li lub haumphiaj tiag los, Vajtswv lub haumphiaj tseg rau peb yeej tsis hloov pauv. Yog kom paub tseeb lub haumphiaj ntawd, peb yuav tsum tig rov qab los rau ntawm Vajtswv txojlus.

Thaum raug mus ua cev qhev tim Npanpiloos, cov Yixalayees tsis muaj tebchaws, tsis muaj Tuamtsev, tsis muaj kev ywjpheej, thiab lawv kuj xav tias Vajtswv twb tso lawv tseg lawm. Tiamsis dhau ntawm tus cev lus Yaxayas, Vajtswv qhia tawm Nwss txojkev hlub thiab Nws lub haumphiaj rau cov pej xeem. Vajtswv qhia rau lawv tias Nws tsim lawv los yog ua kom Vajtswv tau koob meej:

“Kuv tsim lawv los ua kom kuv tau koob meej, kuv yog tus puab lawv thiab tsim lawv ntag.” …Lawv yog haivneeg uas kuv tsim tseg ua kuv tug, lawv yuav hu nkauj qhuas kuv!” (Yaxayas 43:7, 21).

Vajtswv lub haumphiaj tsim tib neeg yog cia tib neeg los pehawm Vajtswv. Peb tau tsim los qhuas Vajtswv los ntawm peb lub qhov ncauj thiab peb lub neej (1 Petus 2:9, Efexus 1:11-2). No yog lub haumphiaj uas peb yuav caum mus tsis tag li.

Tiamsis thaum peb lub neej tau mus yuam kev, peb ho yoojyim hnov qab lub haumphiaj ntawd lawm. Peb pib mus nrhiav tej nuj nqis lossis kev kaj siab ntawm lwm yam, xws li: ntseeg siab rau tej kev vammeej ntiajteb kom muaj kev kaj siab, nrhiav kev txaus siab ntawm tej kev sib raug zoo hauv lub ntiajteb, lossis mus lawv li ntiajteb lub suab hu. Thiab zuj zug mus peb cia li tsis pehawm tus Tswv lawm tiamsis cia li mus pehawm tej uas Vajtswv tsim. Tej ntawd coj ua rau peb hnov txaus siab ib ntus xwb, dhau mus peb yuav hnov khoob lug. Rau qhov tej ntawd yuav pab tsis tau peb sab ntsujplig puv ntoob. Tej ntawd tsuas yog tej uas los hloov chaw ib ntus xwb, yeej piv tsis tau Vajtswv lub haumphiaj uas tseg rau peb.
Txoj xov zoo rau peb yog txawm tias peb tau yuam kev, tiamsis peb tseem tig tau rov qab los rau ntawm Vajtswv thiab tig los rau lub haumphiaj mus ib txhis tseg rau peb. Cia Vajtswv ntuas koj hnub no: koj tau tsim los ua rau Vajtswv tau koob meej.

“Cia li hu ib zaj nkauj tshiab qhuas tus TSWV! Neeg thoob ntiajteb cia li hu nkauj qhuas tus TSWV! 2Cia li hu nkauj qhuas tus TSWV thiab ua nws tsaug! Niaj hnub piav nws txojkev cawm dim rau sawvdaws mloog. 3Cia li piav nws lub koob lub npe kom nrov ncha moo lug rau txhua lub tebchaws, piav nws tes haujlwm tseemceeb rau txhua haivneeg tau hnov. Qhia nws tes haujlwm uas loj kawg nkaus rau txhua haivneeg. 4Tus TSWV yog tus muaj hwjchim loj tsimnyog sawvdaws qhuas nws kawg li; sawvdaws yuav tsum hwm nws heev dua hwm tej vajtswv huv tibsi. 5Lwm haivneeg tej vajtswv tsuas yog mlom xwb, tiamsis tus TSWV yog tus tsim lub ntuj. Sawvdaws yuav tsum tu lub siab kom dawbhuv mus pehawm tus TSWV; neeg ntiajteb cia li ntshai tshee hnyo ntawm nws xubntiag.” (Ntawv Nkauj 96:1-5, 9)

Thov caws peb sawvdaws nrog thov Vajtswv uake: Tus Tswv e! Kuv ua Koj tsaug rau qhov hnub no Koj tau ntuas kuv paub meej txog lub haumphiaj tiag tiag hauv kuv lub neej. Lub neej no muaj ntau yam kev txhawj, kev khuabxeeb thiab kev ntshaw, tiamsis thov ntuas kuv kom nco ntsoov tias kuv yog Koj tus, yog txhua yam uas kuv ua yuav tsum ua rau Koj tau koob meej. Thov Tus Tswv Koj pab txhawb kuv ua tau lub neej mus raws li Koj lub haumphiaj zoo. Kuv taij thov los ntawm Tus Tswv Yexus Khetos lub npe, Amees!

Ib tsoom phoojywg sawvdaws, Vajtswv twb tau tsim peb los pehawm thiab fij koobmeej rau Tus Tswv. Tsuas yog thaum koj nkag siab thiab ua neej raws lub haumphiaj no, Koj thiaj pom koj lub neej muaj nuj nqis. Yav tag los, koj puas tso siab rau ntiajteb es ua rau koj hnov qab Vajtswv lub haumphiaj loj yog ua neej pub rau Vajtswv thiab txhawb nqa Nws nyob hauv koj txhua tes haujlwm. Cia li tig rov qab los rau ntawm Vajtswv hnub no, Cia Vajtswv hloov pauv koj, pab koj ua neej raws lub haumphiaj uas Nws tsim koj los.

Nyob zoo rau nej txhua tus, Thov foom koob hmoov zoo rau nej ib hnub tshiab kaj siab lus thiab zoo siab rov qab ntsib nej dua rau tagkis.

Tus phoojywg, yog tias koj xav kawm paub ntxiv txog Vajtswv lossis koj muaj tej teebmeem, kev khuabxeeb xav qhia, koj cia li sau ntawv rau hauv qab zaj kawm no, inbox ntawm peb tus fanpage Facebook, lossis sau ntawv tuaj rau peb tus email: [email protected]. Tswv Yexus hlub koj. Peb los kuj xav kom txuas tau nrog koj thiab.