Gơs tŭ lơi oh mi ràc dan mơ Yàng bơh dô bơta lơi hơ̆ mơ ya sền wơl kung bè Kơnràñ ơm momọ̆. Lòt gan oă kơnhai sơnam, bol he kơlôi lah Yàng neh hŭi hala ò gam kơno jơnau hòi dan he dê tai. Mơ ya, bol he neh kơ̆ nùs ràc dan mơ Yàng mơ ơn bơta dòn wĭl tơl tom Kơnràñ hala òhềt?

Ngai do, ngai 27/10/2025, Bơta Hòi Dan Kờp Ngai dan jà jơh ală cau iat kơlôi sơnơng Jơnau Yàng kơnòm di bơta dong kơl Ađam Howard bơh tơnggume CAU GƠS BƠTA DÒN DỜNG.

“Gen Yàng Jesu đơs lah: “Ơ cau ùr gen, bơta dòn ai la dờng ngan! Gơlik gơs tĕ be nùs ai kòñ.” Kòn ur khai geh bòi bơh dê jơ hơ̆.” (Mathiơ 15:28)

Sră Goh yal wơl bơta yal yau bơh bơta dòn dô nă cau ùr Kanaan tom tŭ Yàng Jesu lòt tus hơ kơnhwàl Tirơ mơ Sidôn, la tiah cau Kanaan dê, gơrê mơ làng bol bơdìh:
“Bơh tềng hơ̆ Yàng Jesu pleh lòt tòm kơnhwàl Tirơ mơ Sidôn. Ne, gơs dô nă cau ùr bơh lơgar Kanaan lik bơh tiah hơ̆ mơ rac dan lah: “Ơ Yàng, Kòn Dabit dê, dan nđàc sơngit di añ! Kòn ùr añ gơkòl cà lơh, bòl glar ngan.” Mơya Kơnràñ ò ho dô jơnau lơi. Gen ală cau bơtê tus dan mơ Kơnràñ lah: “Dan sồr khai rê, bơh khai jat tơnơ̆ bol he mơ hòi rac sùm.” Kơnràñ ho lah: “Añ mìng geh sồr lòt tus hơ ală belàt tìs nrah hìu Israel dê lơm.” Mơya cau ùr tus cùn khoai Kơnràñ mơ đơs lah: “Ơ Yàng, dan dong kòl añ.” Kơnràñ ho lah: “Ò di ai piang lă ală kòn sau dê mơ sang so in.” Mơya khai đơs lah: “Ơ Yàng, ngan behơ̆, mơya kòn so kung geh sa ală phan pìng bơh cơnòng cau tòm gơ dê sơl.” Gen Yàng Jesu đơs lah: “Ơ cau ùr gen, bơta dòn ai la dờng ngan! Gơlik gơs tĕ be nùs ai kòñ!” Kòn ùr khai geh bòi bơh di jơ hơ̆”.

Yàng Jesu pa lòt gan dô tŭ tơngai mơ oă ngan broă gơlik gơs: bơta chơt ồng Jang Baptit dê, oh mi đah jơi bơtiàn Kơnràñ dê. Pơnjat tai la broă Kơnràñ lơh piang lă ai 5000 nă cau in sa, mơ ntào di đap bơta sò-dră cau Pharisi dê.

Tom tŭ mùt hơ kơnhwàl Tirơ mơ Sidôn, Yàng Jesu neh tìp dô nă cau ùr Kanaan tus ràc dan dan Yàng dong tă kòn ùr khai dê klàs bơh cà lơh, bòl glar ngan. Tài bơh kòn ùr he, mò ñim ràc ròc dan Yàng tom tŭ Kơnràñ mơ ală cau bơtê lòt gùng.

Ală cau bơtê be òsup òiàng. Bol khai đơs mơ Yàng Jesu lah: “Dan sồr khai rê, bơh khai jat tơnơ̆ bol he mơ hòi rac sùm.” (sèng 23). Ală cau bơtê dan Yàng lơh bơta nggồr nggàc do ơm bơdơh wơl. Mơ ya Yàng Jesu ò lơh behơ̆. Bơh sơnròp Kơnràñ ơm momọ̆, mơ ya tơnơ̆ hơ̆ Kơnràñ ho: “Añ mìng geh sồr lòt tus hơ ală belàt tìs nrah hìu Israel dê lơm.” (sèng 24)

Ò bài kong alah, cau ùr cun gơltang, pơnjat ràc dan dan Yàng Jesu: “Ơ Yàng! Dan dong kơl añ”. Kơnràñ ho lah: “Ò di ai piang lă ală kòn sau dê mơ sang so in.” Kơno gơlơh bè kơnjơ̆ ngan mơ ya Yàng Jesu neh ngui dô nơm rùp sơnio òs mòng mơ cau Juđa nàng đơs bơh bơta pha is digùl cau Juđa mơ làng bol bơdih. “so” mơ Yàng Jesu đơs la rùp sơnio bơh “so kòn” geh ròng tom hiu, òs nggui hơđơm cơnòng sa mơ sa ală phan pìng hơđơm.

Cau ùr tom tŭ kơno ală jơnau hơ̆, mò neh pơndềt să mơ đơs: “Ơ Yàng, ngan behơ̆, mơya kòn so kung geh sa ală phan pìng bơh cơnòng cau tòm gơ dê sơl.” Mò neh rang tơlik dô bơta dòn dờng lah bulah “phan pìng” bơh gơnap gơnoar mơ nùs nđàc sơngit Yàng dê kung tơl nàng sơmbòi kòn ùr khai dê. Bơh bơta dòn mơ nùs nhơm pơndềt să mò dê neh lơh Yàng Jesu in rngoh-rngàc mơ đơs: “Ơ cau ùr gen, bơta dòn ai la dờng ngan! Gơlik gơs tĕ be nùs ai kòñ!” Kòn ùr khai geh bòi bơh di jơ hơ̆.” Mơ di di jơ hơ̆ kòn ùr mò dê geh sơmbòi.

Tom tŭ sền wêh sền wơl bơta yal yau do, añ sơntòm đal git dô bơta niam ngan. Tom ală tap lài sră Mathiơ dê, bol he gŏ Yàng Jesu gơkòl gơrwàng bơh ò git nđò bơta pal cang. Bulah giga, mơ ya Kơnràñ kư yal tơlik nùs nđàc sơngìt gơwèt mơ ală cau Kơnràñ tìp, mơ nùs nđàc sơngìt hơ̆ ò tŭ lơi tơmgơl bulah bơta pal cang oă kar lơi.

Bulah behơ̆, gơwèt mơ bơta yal yau cau ùr Kanaan, bơta Yàng Jesu geh rngoh-rngàc ò di mìng bơh bơta pal cang ngan kòn ùr mò dê, mơ la bơh bơta dòn cau mè dê. Mò dòn di gơnap gơnoar sơmbòi Yàng Jesu dê mơ hòi ràc jơl tus Kơnràñ ho wơl, bulah jơh ală bơta mơ mò dòp geh mìng la “ală phan pìng bơh di cơnòng”. Gơwèt mơ mò, kar hơ̆ la tơl rau tô rgơi dong tă kòn ùr mò dê.

Bơta do tơngkah wơl bol he kah tus Jakôp tom tŭ ồng tòmpơt mơ cau gơnrơh Yàng Jehôwa dê tom Sơn Ròp Gơlik Gơs 32:22-32, mơ đơs: “Dilah mê ò ai lơngai añ in gen añ ò ai mê in lòt ò.”

Yàng Jesu rgơi sơmbòi jơh ală bơta kòp jê tom dô ñơp mat. Mơ ya dilah jơh ală bơta geh Yàng ho wơl mo, gen kalkê ngan nàng bol he bơtê git bơh bơta kơ̆-dơn. Bơh tom tŭ kơp gơn, Yàng rơp ai bol he in gìt lam bơh Kơnràñ oă rlau. Hơ̆ la bơta lòng tiàr bơh bơta dòn, bơta bơt mòn tom nùs nhơm, mơ bol he bơtê git gùng dòn kơnom di Kơnràñ.

Tom dunnia ngai do, bol he òs mòng mơ ală bơta gơlik gơs mhar ngan, pal gơs mo. Gen behơ̆, gơs tŭ bol he lơh roh bơta kwơ màng bơta kong ơt dê. Añ lùp is, dilah ơn añ la cau ùr Kanaan, behơ̆ bol he kong alah sơl tom tŭ tìp bơta kơryan bơh sơnròp, tom tŭ ală cau bơtê joi bơta nàng lòi bơdih bơta pal cang he dê? Digơlan oă cau tom bol he kung kalkê nàng kong ơt be ồng Jakôp, ñưk la tom tŭ gŏ să-tòm he neh bòl glar ngan tom broă ràc dan.

Ngai do, añ kòñ pơndòm-pơiàng oh mi; kư pơnjat kong ơt tĕ tom bơta hòi dan. Bulah oh mi gam dan mơ Yàng bơta lơi, kung pal lơh nền koăr mơ Kơnràñ tom kờp bơta kalkê oh mi dê. Digơlan oh mi sền gŏ he neh jơh pràn tài bơh dan jọ̆ jòng ngan, neh tus mơ Kơnràñ ò git nđò tom trồ mang bal mơ dà mat hòr, mơ Kơnràñ gam ơm momọ̆. Mơ ya añ chồl oh mi: Kơ̆ tĕ nùs mơ cơnđoà lòt pơnjat.
Bol he kơ̆ tĕ nùs tom bơta ràc dan mơ dòn kơnom di gơnap-gơnoar mơ bơta at-bồ Yàng Tom Trồ dê. Jơnau ho ai ală cau in kơ̆ nùs neh geh Yàng Jesu đơs tom Mathiơ 7:7-8: “Dan tĕ, rơp ai; Jòi tĕ, rơp bàn; Teh tĕ, rơp geh pò bol mê in. Bơh cau lơi dan gen geh; cau lơi joi gen bàn; mơ cau lơi teh gen geh pò khai in.”
Tom tŭ bol he kơ̆ nùs tom bơta hòi dan mơ dô bơta dòn bîng tơl, gen tus di dô ngai ne să-tòm Yàng kung rơp đơs mơ bol he be Kơnràñ neh đơs mơ cau ùr Kanaan ngai òr: “Bơta dòn ai la dờng ngan! Gơlik gơs tĕ be nùs ai kòñ.”

Dan jà bol he dô nùs bal tòm bơta hòi dan: Khoai Yàng kòñ gơboh! Kơnràñ la Bơtau gam kơno ală jơnau ràc dan kòn sau Kơnràñ dê. Ơ Yàng! Dan Kơnràñ toh glài tài bơh oă dơ̆ kòn òhềt kơ̆ nùs tom bơta hòi dan, òhềt dòn lah Yàng rơp lơh gơs ală bơta kòn kơp gơn. Dan Yàng toh glài mơ dong kòn kung khin cha kis tom bơta dòn mơ khin pal dòp jơh ală bơta bơh ală bơta he ràc dan. Kòn jơh nùs hòi dan tom sơnđan Yàng Jesu Krist, A-men.

Ơ jơh ală ồng mò, oh mi kòñ gơboh, gơs bơta kalkê lơi mơ oh mi neh ơn Yàng in lòt gan oă kơnhai sơnam mơ ya Yàng òhềt ho wơl sơl? Cau ùr Kanaaan ngai or kung tìp oă bơta kơryan, mơ ya mò ò kong alah mơ ya kư pơnjat dòn kơnom di bơta nđàc sơngit Kơnràñ dê, bulah bơta nđàc sơngit hơ̆ mìng la “ală phan pìng bơh di cơnòng cau tom dê”. Dilah oh mi neh kong alah tom bơta rac dan mơ Yàng, gen ngai do mo la tŭ lơmpah nàng oh mi sơntòm wơl, tô lơh nền tus rềp mơ Yàng rlau, oh mi ò ơm ìs ò. Kung pal dòn kơnom tĕ di bơta at-bồ Yàng dê. Dilah Kơnràñ ho wơl, oh mi hòn-chò. Mơ ya dilah Kơnràñ ơm momọ̆, digơlan Yàng gơs dô bơta rơndap niam rlau rài kis oh mi in. Gen tang, bol he ò rgơi gơplơ̆ nùs, mơ ya lơh nền kư koăr mơ Yàng tom kờp bơta kalkê tom rài kis.

Ơm ngac ală ồng mò oh mi. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.