Ua neej nyob muaj ntau zaug koj twb tau ntsib qhov uas mus “khob qhov rooj tiamsis tsis muaj leejtwg qhib.” Muaj tej zaug ntawd yog txoj haujlwm uas koj ntshaw, ib txojkev sib raug zoo uas koj cia cia siab, lossis ib lub sijhawm uas koj xav kom tau lees txais. Muaj tej zaug koj sawv tseeg vim qhov uas yog, tiamsis ho raug lwm tus rhuav tshem. Qhov ntawd ua rau koj poob siab, pom cuag li yus tug kheej me heev. Tiamsis dhau txhua zaug uas tsis tau lees txais ntawd, Vajtswv tseem tabtom npaj koj lub neej mus rau tej yam uas loj dua, cob qhia koj kom ua tau ib tus neej muaj lub siab tawv, sawv khov kho thiab koj yuav zoo li lub teeb ci rau hauv qhov kaj thiab qhov tsaus ntuj huvsi.

Hnub no yog hnub 25/10/2025, Kev Thov Vajtswv Txhua Hnub thov caw peb txhua tus nrog kawm Vajtswv Txojlus ua ke nrog tus qhia Dayna Lovelady dhau ntawm zaj kawm: TSIS TAU LEES TXAIS VIM VAJTSWV LUB KOOB MEEJ

“Nws ua kom nej txojkev ncaj ncees ci ib yam li lub hnub ci thaum tavsu.” (Ntawv Nkauj 37:6)

Txij li thaum me los txog hnub no, kuv twb ua dhau ntau yam xws li: dhia tes taw, kawm nkauj, kawm ntaub ntawv, ua thawjcoj. Kuv mus xeem ua yeeb yam, xeem hu nkauj, thiab xeem hauv tej pab dhia tes taw. Feem ntau kuv kuj ua tau zoo, tiamsis muaj qee zaug kuv kuj raug tshem tawm. Kev poob siab thaum ua tsis tiav kuv lub haum phiaj mas hnov tsis zoo siab kiag li. Tiamsis kuv kuj tiv dhau thiab caum kuv lub haum phiaj tom hauv ntej.

Kuv xav tias peb txhua tus yeej ntshaw ib yam dabtsi twg thiab ua siab caum yus txojkev ntshaw ntawd. Tej zaug ntawd yog koj caum txojkev ua haujlwm, siv zog tu koj txojkev sib raug zoo nrog ib tug neeg twg, tiamsis ho tsis tau lees txais. Qhov ntawd ua rau peb hnov poob siab qaug zog. Muaj qee zaug peb tsuas xav ua lub neej ncaj ncees thiab ua yam uas yog tiamsis ho tsis tau lwm tus lees txais.
Hauv Mathais 21:42, Tswv Yexus hais tias: “Nej tsis tau nyeem Vajtswv Txojlus uas hais tias, ‘Lub pobzeb uas cov kws ua tsev muab povtseg,lub ntawd twb los ua lub thawj lawm.Qhov no yog tus Tswv ua;peb pom li ntawd, peb xav tsis thoob li!’ ”

Tej zaug koj tsis tau lees txais txawm yog koj twb ua yog. Yog li ntawd, koj tabtom raug zoo li Tswv Yexus. Tus Tswv raug luag muab tshem tawm txawm yog Nws yog ib tug zoo tagnrho thiab tsis muab ib qho twg txhaum hlo li. Koj siv zog tuaj kev ncaj ncees tog, tiamsis cuag li txhua lo lus dag tseem kov yeej nyob rau txhua qhov. Tiamsis Ntawv Nkauj 37:6 cog lus tias: “nws ua kom nej txojkev ncaj ncees ci ib yam li lub hnub ci thaum tavsu.” Vajtswv yeej muaj hwjchim ua koj koj qhov ncaj ncees yuav ci kaj lug, txawm yog ib ncig ntawd tsaus ntuj ntu. Thov txhawb koj txhob qaug zog, rau qhov tus TSwv yuav siv qhov uas luag tsis lees txais koj los cob qhia koj thiab yuav siv koj mus rau tej yam uas loj dua.

Tiamsis, nyob rau ntu uas peb tau cob qhia kuj muaj qee zaug peb hnov qaug zog. Tiamsis Tswv Yexus yeej nkag siab peb rau qhov Nws yog tus twb tau ntsib dhau tej ntawd lawm. Yaxayas 53:3 sau tseg: “Peb saib tsis taus nws thiab muab nws tso povtseg, nws raug kev txomnyem thiab nyiaj rawv txojkev mob;tsis muaj leejtwg yuav tig saib nws.Peb tsis quavntsej nws ib yam li nws tsis tsimtxiaj dabtsi.”

Tswv Yexus twb raug saib tsis taug thiab tsis tau sawv daws lees txais – yog li ntawd hnub no Nws yeej nkag siab tej uas peb tabtom ntsib. No yeej yog Kev hlub ntawm Txojmoo zoo rau peb sab ntsujplig. Peb yog Khetos tus, tus Tswv uas twb tau ntsib dhau qhov uas tsis tau lees txais, thiab Nws paub kov yeej tej ntawd hauv Nws lub hwjchim ci ntsa iab.

Thov caws peb sawvdaws nrog thov Vajtswv uake: Kuv Leejtxiv saum ntuj ceebtsheej, Thov Koj txhawb kuv lub zog thaum uas kuv tsis tau lwm tus lees txais. Thov Koj ntuas kuv nco ntsoov tias Tswv Yexus kuj raug luag muab tshem tawm, tiamsis tom qab Pawgntseeg rov tau txhim tsaa los ntawm Tswv Yexus uas yog lub pob zeb loj. Thov Koj pab kom kuv lub neej tau cog ruaj khov hauv Koj thiab tsuas yog ntawm Koj xwb. Thaum qaug zog, thov Koj pab kom kuv ntseej ruaj siab rau Koj – uas yog Tus Tswv Cawmseej ruaj khov mus ib txhis. Kuv taij thov txhua lo lus los ntawm Tswv Yexus Khetos lub npe, Amees!

Ib tsoom phoojywg sawv daws, muaj tej zaug hnub no koj tseem hnov mob siab vim qee zaug uas koj tsis tau lees txais. Nco ntsoov tias, Tus Tswv kuj tau raug saib tsis taug, tiamsis Nws twb dhau los ua tagnrho ntiajteb no tus Tswv Cawmseej. Qhov uas luag tsis lees txais koj yeej tsis qhia tawm koj tus kheej, tiamsis qee zaug ho tau Vajtswv siv los kho koj tus kheej kom ua tau lub neej ua rau Vajtswv tau koob meej dua. Cia tos kom Vajtswv yuav siv tej uas luag saib tsis taug koj los ua rau koj zoo li lub hlaws kub ci ntsa iab ua rau Vajtswv tau koob meej hauv Nws lub haumphiaj.

Nyob zoo rau nej txhua tus, Thov foom koob hmoov zoo rau nej ib hnub tshiab kaj siab lus thiab zoo siab rov qab ntsib nej dua rau tagkis.

Tus phoojywg, yog tias koj xav kawm paub ntxiv txog Vajtswv lossis koj muaj tej teebmeem, kev khuabxeeb xav qhia, koj cia li sau ntawv rau hauv qab zaj kawm no, inbox ntawm peb tus fanpage Facebook, lossis sau ntawv tuaj rau peb tus email: [email protected]. Tswv Yexus hlub koj. Peb los kuj xav kom txuas tau nrog koj thiab.