Puas muaj zaum twg Vajtswv hu koj mus raws li ib ceg uas koj tsis tau muaj hnub xav txog? Peb pheej xav tias yus yuav mloog Vajtswv lus txawm yog yuav zoo li cas, tiamsis thaum koj tawm ntawm qhov chaw tso siab, peb thiaj pom tias ntawd yog ib qhov kev sim siab. Tsis paub, peb puas muaj txaus lub siab tawv los teb tias “ua li” rau Vajtswv? Tsis paub peb puas zoo siab hlo tso txhua yam mus nrog Vajtswv lub suab hu?

Hnub no, yog hnub 24/10/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Joy Brunson dhau ntawm Zaj kawm KOJ PUAS ZOO SIAB HLO TSO TXHUA YAM TSEG?

“Muaj kuv nyob ntawm no, thov txib kuv!” (Yaxayas 6:8).

Ncaj rau hnub sib yuav, wb ib niam txiv tau cog lus rau Vajtswv tias wb yuav mus raws li Vajtswv ua tus coj kev. Wb tseem sau ua ntawv tseg thiab cog lus ua ke tias kuv yuav hwm kuv tus txiv txhua txoj kev txiav txim siab hauv tsev neeg, tshuav kuv tus txiv cog lus yuav coj tsev neeg mus raws li Vajtswv lub suab hu.

Hais yooj yim: “Vajtswv coj mus qhov twg ces yuav mus qhov ntawd”. Rau qhov tus neeg twg nrog tus Tswv mus ces kuj yuav tau ua ib yam li ntawd. Tiamsis thaum Vajtswv hu koj tiag tiag lawm, tsis paub koj puas zoo siab hlo mus? Puas zoo siab mus thiab tsis nug Vajtswv ib los li?

Tom qab ob hlis sib yuav tas, kuv zaum ntawm lub chav tos qhua, thiab qhib tej tawb khoom tshiab hauv lub tsev tshiab. Kuv tus txiv mus ua haujlwm los, ntsia kuv thiab hais tias: “Kuv hnov cuag li Vajtswv tshoov kom peb tsev neeg yuav tau mus nyob dua lwm lub roog rau hli tom ntej.” Tej zaug koj yeej xam tau tias kuv txoj kev xav tsis thoob lub sijhawm ntawd. Tag nrho kuv lub neej ib txwm swm nyob rau ub rau no, cuag li xyoo twg kuj yuav raug tshem tsev. Tshuav kuv tus txiv ho txawv, tag nrho nws lub neej tsuas nyob rau hauv ib lub zos me. Tiamsis thaum no nws ho hais kom wb yuav tau sau khoom, tso tsev neeg, phooj ywg thiab tso txhua yam uas ib txwm swm tseg mus rau ib qhov chaw uas tsis tau mus dua, tsis paub leej twg…Tsuas yog ob peb thiv thiab xwb.

Nyuaj qhia rau tsev neeg thiab tej phooj ywg paub txog qhov xwm txheej no, vim peb tsis muaj dua lwm lo lus txhais txawv dhau ntawm lo: “Vajtswv hu kom ua li ntawd”. Yog li ncaj rau hnub koob tsheej Tswv Yexus yug, wb muab khoom tsaws rau saum tsheb, kaj ntug hnub tom qab wb tawm mus. Thaum tab tom mus, txoj kev ntshai thiab ua xyem xyav puv npo hauv kuv lub siab: “Puas yog Vajtswv lub siab nyiam tiag?” “Tsam nws tsis yog ne?” “wb nyuam qhuav sib yuav tas, tsis muaj qhov chaw pheeb qhov twg, yuav ua li cas nyob taus?”

Kuv thov tsis tham tag nrho, tiamsis nws ho yog ib lub sijhawm tau koob hmoov tshaj nyob hauv wb lub neej. Wb pib pom Vajtswv ua haujlwm zoo heev uas yav dhau los tsis tau ntsib dua!

Tseeb tiag, tag nrho tej uas Vajtswv cheem tsum ntawm koj tsuas yog ib lo lus “ua li!” Nws cheem tsum koj txoj kev mloog lus xwb. Thiab thaum koj zoo siab hlo ua qhov ntawd, Vajtswv yuav qhib lub qhov rooj uas koj tsis tau xav txog dua li.

Yog tias hnub no Vajtswv nqua hu kom koj ua ib yam dabtsi twg, lossis mus rau ib qhov chaw twg-koj puas kam mus? Koj puas kam tso tag nrho tej uas yus ib txwm swm, tej qhov chaw tso siab, kom nkag los rau hauv txoj kev uas Vajtswv twb npaj rau koj lawm? Twb yog Mathais ua li ntawd, tiamsis yeej tsis ua xyem xyav.

“Exus txawm tawm qhov ntawd mus, thaum nws tabtom taug kev mus, nws porn ib tug txivneej sau se hu ua Mathais, zaum ntawm lub rooj sau se. Yexus hais rau Mathais hais tias, “Koj cia li nrog kuv mus.” Ces Mathais txawm sawv tsees nrog Yexus mus.” (Mathais 9:9).

Txawm yog thaum Mathais txiav txim tso txoj kev nplua nuj, tej qhov chaw zoo caum raws Tswv Yexus qab, yawg raug tib neeg ntiajteb thuam, vim txoj kev sau se thaum ntawd raug neeg ntiajteb saib tsis taus.

“Thaum cov Falixais porn li ntawd, lawv txawm nug Yexus cov thwjtim hais tias, “Ua li cas nej tus xibhwb nrog cov neeg sau se thiab cov neeg txhaum noj mov ua ke? “Yexus hnov lawv sib tham li ntawd, nws teb hais tias, “Cov neeg tsis muaj mob yeej tsis mus cuag kws tshuaj, tsuas yog cov neeg muaj mob thiaj mus cuag kws tshuaj xwb. Nej cia li mus nyeem Vajtswv Txojlus uas hais tias, ‘Qhov uas kuv xav tau yog, kom nej muaj lub siab hlub, tsis yog tus tsiaj uas muab tua theej txhoj,’ rau qhov kuv tsis yog los hu cov neeg ncaj ncees, tiamsis yog kuv los hu cov neeg txhaum” (Mathais 9:11-13).

Vajtswv tsis nqua hu cov tib neeg zoo. Nws nqua hu tus uas zoo siab hlo mloog raws Nws lub suab. Nyob hauv Vajluskub, koj yuav pom tag nrho cov tib neeg tau Vajtswv siv puav leej tsis muaj leej twg zoo kawg nkaus. Tag nrho lawv puav leej cheem tsum kev cawmdim. Thiab tag nrho lawv puav leej hais tias: “Muaj kuv nyob ntawm no, thov txib kuv!” (Yaxayas 6:8).

Cia li fij rau Vajtswv koj lo lus “ua li” rau Vajtswv hnub no, thiab koj yuav pom Vajtswv coj koj mus txog rau ntawm qhov chaw uas koj tsis muaj hnub npau suav txog!

Thov caw nrog kuv peb thov Vajtswv ua ke: Tus Tswv, ua Vajtswv tsaug vim Koj tsis nrhiav ib tug neeg zoo, tiamsis nrhiav tus neeg muaj lub siab mloog lus. Thov qhia rau kuv paub tias “ua li” thaum hnov Vajtswv lub suab hu, txawm yog thaum kuv ntsia tsis pom txoj kev tom ntej. Thov pub kom kuv muaj kev ntseeg thiab muaj lub siab tawv tso qhov chaw tso siab tseg, thiab nkag los nrog tus Tswv mus txhua hnub txawm yog txoj kev muaj kev phem. Kuv ntseeg tias qhov chaw twg koj coj kuv mus, nyob ntawd yuav puv npo koj txoj koob hmoov tsis muaj nrim. Kuv thov hauv Tswv Yexus Khetos lub npe. Amees.

Cov kwv tij txhua tus, Vajtswv tsis yuam kom koj zoo kawg nkaus, yuav txawj lossis muaj homphiaj rau yus lub neej. Vajtswv tsuas xav mloog koj hais tias: “Ua li, muaj kuv nyob ntawm no” thiab cov lus teb ntawd, Vajtswv yuav qhib qhov rooj rau koj siab tshaj koj txoj kev xav. Qhov teeb meem yog, thaum Vajtswv tsa suab hu, koj puas zoo siab hlo mloog lus, tso txhua yam nkag los nrog tus Tswv mus?
Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.