Gơs tŭ lơi Yàng hôi sac oh mi lòt jăt dô gùng mơ oh mi ò hềt tŭ lơi kơlôi tus sơl? Bol he ơs kơlôi lah he rơp don bơr jat Yàng bulah mbe lơi, mơya tus di tŭ cơnđòa lòt ngăn bơh di tiah ring lơngai, gen bol he sền gŏ hơ̆ la dô bơta gơlong. Ngăn tŭ hơ̆, bol he gơs tơl khin cha nàng hơ “ơi” mơ Kơnràñ hala ò? Ngăn bol he gơs rcăng sir săng jơh ală bơta nàng cơnđòa lòt jat jơnau hôi jà Kơnràñ dê hala ò?

Ngai do, ngai 24/10/2025, Bơta Hòi Dan Kòp Ngai dăn jà ală ồng mò oh mi bơtê bal jơnau Yàng kơnòm dê bơta dong kơl Joy Brunson dê bơh tơnggumê OH MI GƠS RCĂNG SIR NÀNG SĂNG LƠI JƠH ALĂ BƠTA SƠL?

“Gơs añ do, dan sồr añ lòt!” (Êsai 6:8)

Tòm ngai tơmbau, bar nă ur klau bol he neh ơn jơnau hơ pơgon mơ Yàng lah bol he rơp sùm cơnđòa jat bơta tề lăm Kơnràñ dê. Bol he tian gơs kung cih mơ tap bang kí tòm “dô nơm sră hơ pơgon dềt” lah añ rơp dòn duh bau klau tòm ală bơta lơh tòm hiu nhă, ai bau klau kung rơp sùm tề lăm jơh hiu nhă jat tòm toh gùng mơ Yàng hôi sac.

Đơs gen buôn ngăn: “Yàng cèng kòn lòt tiah lơi gen lòn lòt tiah hơ̆.” Bơh cau jat Yàng lơi kung lơh nên behơ̆ sơl. Mơya tòm tŭ Yàng hôi sac ngăn, gen oh mi gơs rcăng sir cơnđòa lòt hala ò? Gơs rcăng sir lòt mơ ò ai jơnau lùp mơ Kơnràñ hala ò?

Bar kơnhai tơnơ̆ bơta tơmbau, añ găm nggui tòm tiah wă rò nac, găm wă pò ală thung phăn tòm hiu pa. Bau klau añ ri bơh lơh broă, lăng añ mơ đơs: “Bi gơlơh be geh Yàng chôl nàng hiu nhă he mù tus tòm dô nơm bòn dơng ndai tòm kơnhai tơnơ̆.” Digơlăn oh mi rgơi wơng bơta ai lơh krơi añ jê tŭ hơ̆. Jơh rai kis añ mơng bơh ngai dô ting dô ngai nê ting nê, sơnăm lơi kung pal mù tus hiu pa. Ai bau klau añ gen gơpơrlơ̆ wơl, jơh rai ming kis tòm dô nơm bòn dềt. Mơya tŭ dô, khai đơs jơh bar nă bol hi pal prăp jơh ală phăn, tơngac hiu nhă, gơp bơyô, mơ lik săng ală bơta dềt mêr nàng tus dê tiah òhềt lòt tus, ò git dô nă cau lơi…ming tòm dô ết poh tai.

Kalkê ngăn nàng yal mơ hiu nhă mơ gơp bơyô bơh broă dô, tai bơh bol he ò gơs jơnau yal tơlik lơi rlau mơ sèng: “Yàng hôi sac behơ̆.” Behơ̆ la tòm toh dê Ngai Lik Ling, bol he ơn ală phăn hơđăng rơndeh, mơ ngai tơnơ̆ hiu nhă añ lik lòt. Tòm gùng lòt, bơta rngòt rngơt mơ pin wil wơl bềng tòm nus: “Ngăn dô la nus Yàng sơl?” “Dilah ală bơta gơduh gen mbe lơi tiah?” “Bol he pa tơmbau, lơh mbe lơi nàng rgơi kis?”

Añ dăn gơnoăr ò yal loh, mơya hơ̆ la tŭ jơ lơngai rlau jơh tòm rai kis bol he. Bol he geh sền gŏ Yàng lơh broă dô bă crih crai òhêt gŏ bơh lai!

Ngăn, jơh ală bơta Yàng càng tòm oh mi ming la dô jơnau hơ “Ơi!” Kơnràñ ming càng bơta dòn duh oh mi dê lơm. Mơ tòm tŭ oh mi rcăng sir lơh ală bơta hơ̆, Kơnràñ rơp pờ ală mpông mơ oh mi òhêt tŭ lơi kơlôi tus.

Dilah ngai dô Yàng hôi sac oh mi lơh dô bơta lơi, hala lòt tus tiah lơi – oh mi khin lòt ò? Oh mi khin săng lơi jơh ală bơta ơs mơng, ală tiah ring lơngai, nàng cơnđòa lòt jat gùng Kơnràñ neh rcăng lai oh mi in hala ò? Să tơm Mathiơ neh lơh behơ̆, mơ ò bat. “Yàng Jesu lòt bơh tềng hơ̆, gŏ dô nă cau sơnđan la Mathiơ nggui tòm tiah boh dia, gen sồr khai lah: “Jat tĕ Añ.” Khai ñă ntào mơ jat Kơnràñ.” (Mathiơ 9:9)

Tŭ Mathiơ lơh nên săng lơi rai kis pasgơs, niam tơl nàng lòt jat Yàng Jêsus, gen ông kol cau tơñŏ tơnhial, bơh broă boh dia rai hơ̆ kol cau sền osơp.

“Cau Pharisi gŏ behơ̆ gen đơs mơ cau bơtê Kơnràñ dê lah: “Ñchi bơh tài Cau Bơto bol mê dê sào bal mơ cau dar dia mơ cau glài taih?” 12Yàng Jesu kơno jơnau hơ̆ gen đơs mơ bol khai lah: “Cau pràn kơldang ò càng cau gơnoar sơnơm ò, mơya la cau kòp jê. 13Lòt tĕ bơtê git jơnau gơtha sèng do: ‘Añ kòñ bơta kòñ nđàc, ò kòñ phan ơn duh khoai ò.’ Bơh Añ tus ò di nàng hòi cau song ring ò, mơya nàng hòi cau glài.” (Mathiơ 9:11-13)

Yàng ò hôi sac ală kòn mơnus wil tơl. Kơnràñ hôi sac ală cau lơi niam nus don jat jơnau Kơnràñ. Tòm Sră Goh, oh mi rơp gŏ jơh ală cau geh Yàng ngui gen ò cau lơi wil tơl. Jơh tơl nă bol khai pal cang Bơtau Dong Klas, mơ jơh tơl nă bol khai hơ lah: “Gơs kòn do, dăn Yàng sôr kòn!” (Êsai 6:8)

Ơn tĕ Yàng in jơnau hơ “ơi” oh mi dê ngai do, mơ oh mi rơp gŏ Kơnràñ tề lăm oh mi tus ală tiah mơ oh mi ò tŭ lơi khin kơlôi tus!

Dan jà bol he dô nùs bal tòm bơta hòi dan: Khoai Yàng, kòn ưnngai Kơnràñ bơh Kơnràñ ò jôi cau wil tơl, mơ jôi ală nùs nhơm rcăng ssir dòn duh. Dăn dong kon git hơ “ơi” tòm tŭ kơno jơnau hôi jà Kơnràñ dê, bơh tòm tŭ kòn ò hềt sền gŏ gùng hơđăp. Dăn ai kòn in bơta dòn mơ nùs khin cha nàng lik bơh tiah ring lơngai he dê, lòt jăt Yàng kơp ngai bulah gùng gơs gai công. Kòn don lah tiah lơi Kơnràñ lăm kòn lòt, ting hơ̆ rơp bềng liu bơta gơs mat mơ lơngai ò lôi Kơnràñ dê. Kòn jơh nùs hôi dăn tòm sơnđăn Yàng Jêsus Krist, Amen.

Ơ ală ồng mò oh mi kòñ gơboh, Yàng ò càng oh mi pal wil tơl, pal jak chai hala gơs rcăng sir bơta rơndăp niam rài kis he in. Kơnràñ ming kòñ kơno oh mi đơs: “ơi, gơs kòn dô.” mơ bơh jơnau hơ bă liă hơ̆, Kơnràñ rơp pờ ală mpông tŭ lơmpah tiă rlau mơ bơta kơlôi sơnưng oh mi dê. Bơta kălkê la, tòm tŭ Yàng pờ bơr hôi jà, oh mi gơs rcăng sir niam nùs don duh, săng jơh ală bơta nàng cơnđòa lòt jat Kơnràñ hala ò?

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.