Muaj tej zaj movies tau tsim los ntawm ntau yam sib txawv, tiamsis txog thaum xaus, tag nrho tej ntawd ho txuas ua ke dhau los ua ib zaj uas tus twg los puav leej xav tsis thoob. Zaj xwm txheej hais txog Exethaws lub neej kuj zoo ib yam li ntawd. Hnub no, peb twb pom ib lub homphiaj “tsis muaj leej twg xav ua ntej”. Thaum Vajtswv siv ib tug pojniam txoj kev mloog lus me me los hloov pauv tag nrho Vajtswv haiv neeg. Tiamsis yam zoo tsis nres rau qhov ntawd, thaum mus tob dua, peb yuav pom tej yam me me, tiamsis tseeb tiag yog tej daim duab dhos zoo heev nyob hauv Vajtswv lub homphiaj tso dim.

Hnub no, yog hnub 23/10/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Tori Troncone dhau ntawm Zaj kawm THAUM VAJTSWV NTSIAG TO, YUAV TAU NRHIAV “POV THAWJ”

“Peb paub hais tias peb cov uas hlub Vajtswv, txawm yog peb tau zoo thiab txomnyem los Vajtswv yuav ua kom tej ntawd muaj nqis rau peb cov uas Vajtswv porn zoo hu los raws li Vajtswv npaj tseg lawm.” (Loos 8:28).

Ib ncig ntawm koj puas muaj leej twg xam tau tej yam ua rau xav tsis thoob nyob hauv zaj movies? Kuv txiv thiab kuv tus txiv yog ob tug neeg ntawd. Nkawd tsis muaj ib zaum twg yuav xav tsis thoob. Kuv tus zej zog ntxim hlub ho ua tus ntxeev siab nyob hauv zaj movies nto npe heev? Lawv tsuas nyeem feem pib xwb twb paub lawm. Qhov xaus hauv zaj movies ntev muaj ntau tshooj? Lawv twb paub ua ntej ntawm zaj ob lawm. Yeej tsis muaj yam dabtsi ua rau lawv xav tsis thoob, vim lawv pheej saib tej yam me me xwb, tej cim thiab thaum muab los txuas ua ke txhua yam tshwmsim los meej heev ua ntej zaj movies yuav qhia.

Thaum nyeem phau ntawv Exethaws, peb kuj yuav tau ua tib zoo ceev faj li ntawd. Zoo heev, Vajtswv lub npe tsis tshwm sim nyob hauv phau ntawv no. tiamsis qhov no tsis muaj lub ntsiab tisa Vajtswv yuav tsis tshwm ntsej muag. Tsuas yog peb yuav tau ntsiab kom meej dua kom ntsia pom txoj kev Vajtswv yuav nthuav tawm.
“Yawg, (Maudekhais), Exethaws yog Maudekhais ib tug kwvtij tus ntxhais, thaum Exethaws niam thiab txiv tuag lawm, Maudekhais sau Exethaws los ua nws tus ntxhais, Exethaws lub npe Henplais hu ua Hadaxas; nws yog ib tug ntxhais uas zoo nkauj thiab ntxim nyiam kawg li. Thaum vajntxwv samhwm thiab tshaj tawm mus lawm, ces lawv txawm coj tau cov hluas nkauj coob heev tuaj rau hauv lub tuamceeb nroog Susas, thiab Exethaws yog ib tug uas lawv coj tuaj rau hauv vajntxwv lub loog uas yog Henkais ua tus zov cov hluas nkauj ntawd…Lub sijhawm uas Maudekhais tau ua ib tug nomtswv nyob ntawm vajntxwv lub loog, mas muaj Npithanas thiab Teles uas yog ob tug nraug sam zov nyob ntawm ob sab lub rooj loog uas mus rau hauv chav uas vajntxwv nyob. Nkawd txawm ntxeev siab rau Vajntxwv Xawxes thiab tuavhauv yuav muab vajntxwv tua povtseg.

Maudekhais hnov zaj ntawd, nws thiaj mus hais qhia rau niam Vajntxwv Exethaws, ces Exethaws thiaj coj Maudekhais cov lus mus piav qhia rau vajntxwv paub” (Exethaws 2:7-8, 21-22).

Saib dhau, tej zaj xwm txheej no saib cuag li yog tej zaj xwm txheej tu ncab tu ncua. Tiamsis yog khawb kom tob dua, peb yuav pom Vajtswv txhais tes tab tom ua haujlwm, txawm yog tsis hais txog Vajtswv lub npe ntawm no.

Exethaws ntsib dhau txoj kev puas tshuaj loj thaum uas niam txiv tuag tas. Tiamsis Vajluskub qhia paub: “Peb paub hais tias peb cov uas hlub Vajtswv, txawm yog peb tau zoo thiab txomnyem los Vajtswv yuav ua kom tej ntawd muaj nqis rau peb cov uas Vajtswv porn zoo hu los raws li Vajtswv npaj tseg lawm.” (Loos 8:28).

Vim yog niam txiv tuag tas Maudekhais thiaj coj Exethaws mus tu, thiab dhau ntawd nws thiaj tau mus rau hauv vajntxwv lub loog. Vim Exethaws nyob hauv vajntxwv loog yog li Maudekhais thiaj qhia tau rau nws paub txog lub tswv yim yeebncuab xav muab vajntxwv tua pov tseg. vim li ntawd vajntxwv thiaj tuav tau nws txojsia. Tsis yog xwb tim cia li muaj! Tseeb tiag, Vajtswv txhais tes tab tom tswj, nws tab tom npaj lub homphiaj loj dua.

Zaj xwm luv luv no tsuas yog ib nyob hauv ntau qhov piv txwv, qhia tias tag nrho phau Exethaws tau kos ib daim duab zoo heev txog Vajtswv – Tus uas muab txhua hnub hauv peb lub neej sau cia, ua ntej uas peb tau yug los (Ntawv Nkauj 139:16)! Yog ua zoo nyeem thiab ceev faj tej “pov thawj”, koj yuav ntsia pom phau ntawv Exethaws tab tom nthuav tawm Vajtswv – tus ntsia pom txhua yam thiab muab tej ntawd los sib txuas ua ke rau lub homphiaj loj dua. Lub homphiaj ntawd thaum kawg coj txoj kev cawmdim los rau Vajtswv haiv neeg.

Yog li tshuav peb ne yuav ua li cas? Puas muaj zaum twg Vajtswv kuj tab tom ua haujlwm hauv koj lub neej raws li txoj kev uas koj tsis tau pom tamsim? Nws siv tej kev sim siab twg coj koj los nyob rau ib qhov chaw zoo dua? Tej kev hloov pauv- txawm mob lossis nyuaj nkag siab rau lub sijhawm ntawd – tiamsis tom qab no ho nthuav tawm Vajtswv txhais tes ncaj ncees? Zaj xwm txheej Exethaws caw peb xyaum ua cov “tub tshuaj ntawm sab ntsujplig” thiab ua zoo nrhiav tej pov thawj, thiab ntseeg tias txawm yog thaum Vajtswv ntsiag to los, Nws tsis muaj zaum twg yuav tsis tshwm ntsej muag, thiab Vajtswv yuav tsis nres ua haujlwm kom muaj nqis rau Vajtswv haiv neeg.

Thov caw nrog kuv peb thov Vajtswv ua ke: Tus Tswv, kuv ua Koj tsaug vim Koj ntsia pom thiab tshua txog txhua yam nyob hauv kuv lub neej. Thov ntuas kom kuv nco ntsoov tias, txawm yog kuv pom tias yus me tsis muaj zog, los koj yeej muaj cuab kav siv kuv rau koj lub homphiaj loj. Thov pub kom kuv muaj lub siab ntseeg, txawj ntse ib yam li Exethaws, kom kuv ntsia pom koj txhais tes tab tom ua haujlwm rau saum tsev neeg, haujlwm thiab txhua qhov chaw uas koj tso kuv nyob. Thov kom kuv lub neej nthuav tawm koj txoj kev ncaj ncees thiab koj lub hwjchim, kom coj tau coob tug los txais koj txoj kev cawm dim. Kuv thov hauv Tswv Yexus Khetos lub npe. Amees.

Cov kwv tij txhua tus, Vajtswv tsis muaj hnub yuav tsis saib Nws cov menyuam, tshwj xeeb yog cov neeg uas xav tias lawv tsis muaj zog, lawv me. Vajtswv tau siv ib tug ntxhais ntsuag los cawm ib haiv neeg. Hnub no, Vajtswv kuj muaj cuab kav siv koj – txawm yuav yog ib tug niam tsev, ib leej niam, lossis ib tug pojniam zoo li lwm tus- kom nthuav tawm Vajtswv txoj kev hlub loj. Koj puas zoo siab hlo ntseeg Nws? qhib koj lub qhov muag sab ntsujplig los txais yuav Vajtswv txhais tes tab tom ua haujlwm hauv yus lub neej, thiab nkag los rau ntau txoj kev txiav txim siab tias Vajtswv nrog nraim koj thiab tab tom ua haujlwm muaj hwjchim heev hauv koj lub neej.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.