Muaj tej tus niam tsev lawv yeej tsis nto npe, tiamsis tau Vajtswv siv los ua tej haujlwm loj. Thaum ub los txog tamsim no, keeb kwm sau tseg txog cov neeg uas muaj lub siab tawv, ncaj ncees thiab kam ua lub neej pub rau Vajtswv – thiab nto npe nyob hauv cov pojniam ntawd yog Exathaws. Exathaws yeej ib txwm yog ib tug ntxhais ntsuag, ua neej nyob hauv vajntxwv loog. Tiamsis thaum txog lub sijhawm txiav txim, nws kam sawv los, muab nws txojsia tso rau ntawm Vajtswv txhais tes cawm Nws haiv neeg.

Hnub no, yog hnub 21/10/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Joy Brunson dhau ntawm Zaj kawm TSEEM TSHUAV LEEJ TWG TAWM TSAM PEB?

“Peb tseem yuav hais li cas thiab? Yog Vajtswv tuaj peb tog lawm, leejtwg tseem yuav tawmtsam tau peb?” (Loos 8:31).

Puas muaj zaum twg koj ib leeg yuav tau sawv los tiv thaiv yam yog, thaum uas sawv daws nyob ib ncig koj tsis kam tawm suab lawm tau? Hais tiag mas, txoj kev dhau los ua tus tib leeg tawm tsam cov coob yeej tsis yooj yim kiag li. Ntau zaug muaj tej lub sijhawm koj tseem yuav ntsib kev phomsij thaum txiav txim tuaj pab tsawg tog.

Thaum me los kuv nyiam zaj xwm txheej hais txog Exathaws. Kuv yeej tsis nkag siab tias yuav zoo li cas thaum sawv los cawm tag nrho ib haiv neeg, kam sawv ntawm vajntxwv xub ntiag sawv cev hais rau yus cov pej xeem tuav Vajtswv lub npe los hais. Kuv kub siab lug tos muaj ib hnub twg kuj yuav muaj sijhawm kam ua li ntawd hauv lub neej.

Tiamsis thaum ua lub neej tiag, kuv ho ntsib tej kev txiav txim siab nyuaj – yog tej yam uas sim txoj kev ntseeg thiab lub siab tawv. Kuv ntxov sawv los tuaj qhov tseeb tog lossis qhov yog tog yeej tsis tau yog yooj yim kiag li, tshwj xeeb yog thaum peb sawv los tuav Vajtswv lub npe.

Nyob hauv Exathaws 6:2, peb pom zaj xwm txheej hais txog Maudekhais, yog Exathaws tus txiv ntxawm. Yawg yog tus sawv los hais qhia rau vajntxwv Axelas paub txog Npethenas thiab Telas nkawd yog ob tug nom zov vajntxwv tau ntxeev siab yuav muab vajntxwv tua pov tseg. thaum paub qhov no, vajntxwv txiav txim siab muab nqi zog pub rau Maudekhais vim yawg lub siab tawv thiab lub siab ncaj ncees.

Thaum vajntxwv nug Hamas tias “yuav ua li cas rau tus neeg uas vajntxwv saib taus?” (Exathaws 6:6). Hamas xav tias ntshe yog nws. Tiamsis tomqab teb vajntxwv tas nws thiaj pom tias vajntxwv lub homphiaj yog npaj rau Maudekhais tsis yog Nws. Npau taws thiab txaj muag, Hamas thiaj nrhiav kev muab Maudekhais tua pov tseg.

Thaum Hamas tham rau nws pojniam thiab tag nrho nws tej phooj ywg mloog txog tej uas tau tshwm sim tuaj, cov tub txawg nrog rau yawg pojniam thiaj hais tias: “Yog thaum pib no koj twb tsis yeej Maudekhais uas yog neeg Yudais lawm, ces koj yuav swb nws xwb, nws yeej yuav kovyeej koj” (Exathaws 6:13). Kuv ras txog qhov no: “Yog tias yawg yog neeg Yudais tiag ces koj yuav kov tsis yeej yawg thiab koj yuav puas tshuaj ntawm yawg xub ntiag. Tej zaum yawg thiab nws tej phooj ywg pom tias Maudekhais tau Vajtswv nrog nyob ua ke thiab foom hmoov, thiab yeej tsis muaj dabtsi yuav tav tau Vajtswv lub homphiaj.

Niam vajntxwv Exathaws tau nthuav Hamas lub tswv yim phem rau ntawm vajntxwv xub ntiag, thaum kawg yawg thiaj raug dai rau ntawm tus ncej uas nws txhos yuav dai Maudekhais. Twb yog los ntawm Exathaws lub siab tawv thiab nws txoj kev txawj ntse tau hloov pauv qhov teeb meem, cawm nws haiv neeg dim txoj kev puas tshuaj. Yog tsis muaj lub siab mloog lus thiab ntseeg Vajtswv ntawm ib tug pojniam saib cuag li tsis muaj zog, ces keeb kwm haiv neeg Yixalayees tej zaug yuav txawv lawm.

Hamas lub tswv yim uas npaj tua lwm tus hlo dhau los ua lub ntxiab tua yawg tus kheej. Pib ntawm qhov tau vajntxwv siv, Hamas poob kev hlub tag thiab tsis muaj hwjchim, dhau los ua yeebncuab vim tawm tsam Vajtswv haiv neeg.

Muaj ntau zaj kawm muaj nqis nyob hauv phau ntawv Exathaws, thiab ntawm no yog ib nyob hauv tej qhov tseeb uas peb yuav tau nco ntsoov:

“Peb tseem yuav hais li cas thiab? Yog Vajtswv tuaj peb tog lawm, leejtwg tseem yuav tawmtsam tau peb?” (Loos 8:31).

Thaum peb sawv los tawm tsam qhov tseeb, vim Vajtswv lub siab nyiam, ces yam dabtsi ho yuav tawm tsam tau peb? Phooj ywg cia siab tias koj thiab kuv yuav tau txhawb zog kom muaj lub siab tawv vim paub tias Vajtswv nrog nraim, rub peb tes hauv txhua txoj kev. Txhob ntshai tib neeg, rau qhov thaum muaj Vajtswv nrog nraim, sim nug saib leej twg tseem yuav tawm tsam tau peb?

Thov caw nrog kuv peb thov Vajtswv ua ke: Ua Vajtswv tsaug vim hnub no Vajtswv ntuas kom kuv nco ntsoov tias yeej tsis muaj yam dabtsi yuav tav tau Vajtswv lub homphiaj. Thov pub kom kuv muaj lub siab tawv kam sawv rau qhov tseeb thiab Vajtswv lub siab nyiam, txawm yog thaum uas tsuas muaj kuv tib leeg xwb. Thov pab kom kuv ruaj siab tias koj tab tom nrog nraim kuv nyob, pab kuv thiab tawm tsam rau kuv. Kuv cia siab tias kuv lub neej yuav nthuav tawm Vajtswv txoj kev ncaj ncees, txawm yog yuav yog caij thiab tsis yog. Kuv thov hauv Tswv Yexus Khetos lub npe. Amees.

Cov kwv tij, Vajtswv lub hwjchim thiab Vajtswv lub homphiaj nws nyob siab tshaj tib neeg txoj kev npaj. Ib yam li Exathaws thaum ub, ib tug pojniam saib yam li tsis muaj zog tiamsis dhau los ua ib qhov cuab yeej rau txoj kev yuav cawm ib haiv neeg, niaj hnub Vajtswv kuj hu peb – nyob hauv muaj cov pojniam – ua lub neej muaj siab tawv, kam sawv los rau qhov tseeb. Txawm yog thaum peb pom tias yus me thiab tsis muaj zog los npaj kom txhij mus nrog txoj kev ntseeg, kom koj lub neej dhau los ua ib qhov pov thawj ciaj sia: yog tias Vajtswv nrog nraim peb nyob, ces yeej tsis muaj ib yam dabtsi yuav tawm tsam peb!

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.