Puas tau muaj zaum twg koj hnov cuag li yus zoo li ib tug neeg uas tsis muaj neeg ntsia pom lawm tau? Ib tug neeg muaj kev cheem tsum, muaj tej kev zoo siab thiab nyuaj siab tiamsis tsis muaj leej twg tshua txog, tsis muaj neeg paub txog? Tej lub sijhawm li ntawd, koj xav li cas? Kheev lam koj kuj xav tias yog muaj ib tug twg ntsia pom koj tej kev khuam siab, txav los thiab nthuav tawm lawv txoj kev tshua txog koj?

Hnub no, yog hnub 20/10/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke dhau ntawm VAJTSWV TUS UAS NTSIA POM.

“Hankas xav hais tias, “Puas yog kuv porn Vajtswv tiag, thiab kuv tseem muaj sia nyob qhia txog zaj no? ” Yog li ntawd, nws thiaj tis npe rau tus Tswv uas nrog nws hais Ius ntawd tias, “Vajtswv Tus Uas Pom Tau”  (Chivkeeb 16:13).

Kuv tus ntxhais xeeb kub siab lug tuav kev tes mus kawm ntawv. Hnub no yog hnub tsev kawm ntawv tso cai rau cov laus nrog lawv tej menyuam kawm ua ke.
Ntawm kuv xub ntiag yog lub rooj kawm muaj duab thiab muaj ntau hom xim zoo nkauj, muaj tej lub rooj me me, zoo nkauj pub rau cov menyuam muaj tsib xyoos ntxim hlub. Kuv zaum ib sab ntawm kuv tus ntxhais xeeb, ua twj ywm ntsia nws lub ntsej muag saib tus qhia, cov taub hau qaij qaij pib xyaum sau ntawv. Tamsim ntawd lub chav kawm cia li zoo cuag li xub ntseeb muaj neeg tshum nws lub taub thaum hnov lub suab qhia tias txog sijhawm noj su nrov tuaj. Cov menyuam ntxhais, menyuam tub khiav mus rau ntawm lawv qhov chaw rau khoom muab lawv tej zaub mov thau los, zaum rau ntawm rooj noj nyias pluas su.
Thaum uas sawv daws ib leeg nyias nrog nyias tej phooj ywg sib tham, kuv ua twjywm zaum ib ceg ntawm Amy ib sab, nws cov plaub hau dub dub plws loo. Nws zaum twj ywm ntawm nws tais su twb muab qhib lawm, lub qhov muag saib deb deb puag tod yam li tab tom ntsia nws lub ntuj. Los ntawm tej uas kuv kawm tau thaum qhia cov menyuam uas nyob ib leeg, kuv paub yuav tau ua ib yam dabtsi twg. Kuv mus ze maj mam nug: “Koj puas cim civ noj tau?” Nws tig los saib kuv tsis teb. Kuv hais ntxiv “Kuv pab pub mov rau koj noj ov”. Yeej ntsiag to tsis teb ib los. tiamsis zaum no, nws lub ncauj pib rua tos kuv pab.

Maj mam hais ib diav zuj zus cev rau hauv qhov ncauj, kuv xav txog txoj kev uas Vajtswv saib cov neeg uas cheem tsum kev pab nyob hauv Vajluskub. Kuv xav txog Hankas, yog Xalas ib tug ntxhais qhev neeg Iziv, tom qab no yog Anplahas tus niam yau.

Chivkeeb 16 sau txog ib feem ntawm Hankas lub neej. Tomqab paub tias nws muaj menyuam lawm, tshuav nws tus tswv Xalas, tsis muaj menyuam ntau xyoo, Hankas ua “saib tsis taus nws tus tswv” (Chivkeeb 16:4). Txoj kev sib raug zoo ntawm tus tswv thiab qhev dhau los tsis zoo. “Ces Xalais thiaj li tsimtxom Hankas heev, Hankas thiaj li khiav lawm” (Chivkeeb 16:6).

Tiamsis thaum uas tab tom khiav nkaum, muaj qhov teeb meem tshwm tuaj, muaj ib txoj kev sib ntsib tau hloov pauv Hankas lub neej. Nws ntsib Vajtswv tau muab sau tseg hauv Chivkeeb 16:7: “Tus Tswv tus timtswv los ntsib Hankas rau ntawm ib tug dej txhawv uas nyob hauv tiaj suabpuam ntawm txojkev uas mus rau hauv lub nroog Sules”

Yeej tsis muaj dabtsi yuav xav tsis thoob thaum Vajluskub sau tias Vajtswv tus tim tswv mus ntsib Hankas ntawm txoj kev los mus rau Sules vim Sules yog cheeb tsam tebchaws Iziv sab hnub tuaj. Hankas yog neeg Iziv yog li qhov uas nws nrhiav kev rov qab los mus tsev ces yeej yog lawm.

Kuv xav txog qhov uas Hankas yog ib tug pojniam hluas, qaug zog zis, ib leeg taug kev los mus tsev. Ib kaujruam zuj zus ntawm moj sab qhua kub lug, kuv cim civ nug tias tsis paub yam twg tau hla dhau nws lub hlwb. Tsis paub nws puas ntshai? Puas hnov nyob ib leeg? Nws puas hnov tias lub neej no cuag li tsis ncaj ncees rau nws thaum nws yog ib tug qhev cim civ tiv thaiv tsis tau tus kheej? Puas yog Hankas hnov cuag li nws yog ib tug uas tsis muaj ntsej muag, tsis muaj neeg pom, tsis muaj neeg tshua txog?

Txawm Vajluskub tsis hais meej txog Hankas tej kev xav, los peb paub tias cov nyeem lawv tab pov tias Vajtswv paub, Vajtswv pom thiab Vajtswv tshua txog. Yog li, Vajtswv thiaj txib Nws tus timtswv los ntsib Hankas ntawm ntug dej ntawm txoj kev uas nws mus.

Yog tias tus dej ntawm ntus kev muaj cuab kav daws tau nws txoj kev nqhis ces tej lus uas Vajtswv tus timtswv hais rau nws tseem zoo li ib tug dej ntws ua rau txias zias nws lub siab tab tom tag kev cia siab. Hankas lub siab tau txhawb zog thiab yug dua tshiab txog qhov uas nws tsa suab, hu Vajtswv “swv uas nrog nws hais Ius ntawd tias, “Vajtswv Tus Uas Pom Tau.” (Chivkeeb 16:13). Tomqab txoj kev sib ntsib ntawd, Hankas ua raws li cov timtswv tej lus qhia thiab tig rov qab los cuag nws tus tswv.

Hankas thaum khiav ntawm nws tus tswv lub tsev mus, tsuas yog ib tug qhev tsis muaj npe thiab tsis muaj leej twg paub txog. Tiamsis thaum Hankas rov qab los, nws yog ib tug neeg txawv lawm, rau qhov nws paub: Vajtswv ntsia pom Nws; “Vajtswv yog tus pom” ntsia pom thiab tshua txog pog.

Tomqab peb caug feeb maj mam cev ib diav mov zuj zus uas kuv pub, thaum kawg Amy kuj noj tas nws pluas su. Xwb tim, nws tsa muag saib kuv tas maj mam cev nws txhais tes rau kuv. Nws lub qhov muag saib kuv zoo li ob peb feeb ua tsaug ua rau kuv luag, kuv nkag siab, nyob rau hauv lub ntuj uas cov menyuam nyob ib leeg, nthuav tawm lub siab nco tshav ntuj los ntawm yam uas tsis muaj ntau li.

Kuv tuav kuv tus ntxhais xeeb txhais tes tawm hauv chav kawm los tom qab tas sijhawm. Kuv xav txog nws txoj kev zoo siab thaum ntsia kuv, tej zaug thaum nws cheem tsum txog ces muaj neeg ntsia pom nws qhov kev cheem tsum thiab txav los pab nws. Kuv xav txog tus neeg uas yog Hankas hauv Vajluskub, txog qhov uas nws kuj zoo siab, nco Vajtswv tshav ntuj thaum uas Vajtswv ntsia pom, nkag los thiab pab nws. Txoj kev zoo siab ntawd, lub siab nco tshav ntuj ntawd tej zaug yuav ntau tshaj ntau npaug los ntawm tus tsim ib puas tsav yam, tus ntsia pom txhua yam twb hlub txaus, tshua txaus los nrhiav thiab pab ib tug neeg uas tag kev cia siab nyob ib leeg zoo li pog.

Kuv rov qab nco txog ntau zaug Vajtswv kuj ntsia pom thiab pab peb tej kev cheem tsum ntawm sab nqaij tawv thiab kuv sab ntsujplig tib si. Yog tias thaum ub, Vajtswv pom thiab pab Hankas li cas hauv Vajluskub, ces hnub no, Vajtswv kuj yuav hlub tshua kuv thiab ntsia pom txhawm kuv tej kev cheem tsum.

Thov caw nrog kuv peb thov Vajtswv ua ke: Tus Tswv muaj kev hlub, kuv ua Koj tsaug vim Koj yog tus hlub tshua. Thaum kuv xav tias cuag li yus tsuas yog ib tug neeg tsis tshwm ntsej muag hauv ntiajteb, Vajtswv yeej ntsia pom kuv. Thaum tej kev cheem tsum cuag li nws nyhav tshaj kuv lub zog, Vajtswv paub thiab pub yam uas kuv cheem tsum rau kuv. Thaum tej kev ntshai thiab nyob ib leeg npog kuv, Vajtswv los thiab rub kuv tes. Thov pab kom kuv paub ntseeg paub vam khom rau Vajtswv, tus saib kuv. Kuv thov hauv Tswv Yexus Khetos lub npe. Amees.

Cov kwv tij txhua tus, tshwj xeeb yog cov pojniam, hnub no yog koj hnov cuag li yus yog ib tug uas tsis muaj leej twg pom, ces nco ntsoov tias Vajtswv ntsia pom koj. Txawm yog koj tab tom ua twjywm ua haujlwm hauv Pawg Ntseeg, dhau ntawm txoj kev tu tej pluas noj rau tsev neeg, thiab dhau ntawm txoj kev ua tiav tes haujlwm tau cob ntawm qhov chaw khwv nyiaj, nco ntsoov tias Vajtswv yog tus hlub tshua. Vajtswv paub thiab hlub koj, txoj kev hlub ntawd loj txaus cia Vajtswv nkag los thiab pab koj thaum koj cheem tsum. Yog li, ruaj siab mog phooj ywg!

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.