Ua neej nyob, muaj qee zaug peb ntsib tej teebmeem uas ua rau peb txhawj ntshai thiab tsis paub yuav ua li cas. Kuj muaj qee zaug, peb cim civ nrhiav kev pab yus thiab tsis vam khom rau tus Tswv lub zog. Peb puas tseem nco tias Tus Tswv tabtom nrog peb mus uake hauv txhua kauj ruam, thiab qhov uas peb yuav tsum ua yog ntseeg siab rau Nws thiab ua twjywm cia Tus Tswv yog tus nqis tes.

Hnub no yog hnub 19/10/2025, Kev Thov Vajtswv Txhua Hnub thov caw sawvdaws nrog kawm Vajtswv Txojlus ua ke nrog tus qhia Gene Markland los ntawm zaj kawm: KUV YUAV NROG KOJ MUS

“Kuv yuav nrog koj mus thiab pub kom koj tau so.” (Khiavdim 33:14)

Muaj qee tus tsis nyiam qhov uas mus kuaj kaus hniav. Lawv tos txog thaum uas tiv tsis taug lawm lawv mam mus xwb; muaj qee tus txawm mob li cas los yeej tsis kam mus li. Kuv yeej nkag siab txog qhov kev mob thiab txhawj ntawd, txawm tias kuv yeej ntsib tau tej kws tshuaj kho kaus uas txawj thiab ua zoo.

Peb pheej txhawj tias tsis paub cov kws tshuaj kho kaus yuav ua li cas thaum peb cov kaus muaj mob. Txawm li los, yog xav kom peb tej kaus nyob ruaj nyob zoo, ces qhov uas mus kuaj yog sijhawm yog ib yam uas cheemtsum.

Nyob rau tagnrho lub sijhawm uas mus kuaj ntawd, kuv siv zog kom kuv ua tau lub siab tug, kom kws tshuaj thiaj ua tiav nws tes haujlwm. Kuv paub tias thaum hauv yus lub qhov ncauj tabtom muaj tej cuab yeej kuaj kaus ces kuv yuav tsum ua twjywm tsis txhob nti. Tej haujlwm uas kws tshuaj ua yuav pab kho kuv cov kaus, tiamsis yog kuv nti, kuv cov kaus yuav raug puastsuaj.

Sim xav seb yam dabtsi yuav tshwmsim yog tias thaum kws tshuaj tabtom txi riam rau kuv cov kaus hniav es kuv ho sawv ntsug lossis mus kev.

Ua neej nyob, muaj ntau zaug peb kuj ntsib tej yam uas ua rau peb mob ntawm sab nqaij tawv thiab sab ntsujplig tagnrho. Thaum ntawd, peb taij thov Vajtswv pab. Tiamsis muaj qee zaug peb ho hnov qab lawm tias Tus Tswv tseem tabtom nyob ntawd thiab ua haujlwm pab peb.

Thaum Mauxes pom cov pej xeem Yixalayees pe tus mlom nyuj, yawg thov Vajtswv zam txim rau lawv, rau qhov yawg yeej paub tias cov pej xeem tabtom ua txhaum loj lawm. Vajluskub sau tseg tias Mauxes tau nrog Vajtswv sib tham “ tim ntsej tim muag ib yam li ob tug phoojywg sib tham.” (Khiavdim 33:11). Txawm yog Mauxes paub tseeb tias Vajtswv yeej paub meej nws thiab nws yog tus tau koob hmoov ntawm Vajtswv qhov muag, tiamsis Mauxes yeej tsis paub meej tias leejtwg yuav nrog nws mus rau txoj hau kev tom ntej. Kiag thaum ntawd, Vajtswv ceebtoom ib lo lus txhawb zog heev: “Kuv yuav nrog koj mus thiab pub kom koj tau so.” (Khiavdim 13:14).

Lo lus “Kuv yuav nrog koj mus” uas hais rau Mauxes ntawd qhia rau yawg paub tias yawg tsis yog ib leeg xwb tiamsis yawg yuav tau so hauv Vajtswv. Tau so tsis yog tias txhua yam teebmeem yuav ploj tag mus, tiamsis yog muaj Vajtswv nrog nraim, Tus Tswv nrog mus nyob hauv txhua qho kev teebmeem. Peb nco txog Ntawv Nkauj 23: “txawm yog kuv taug txojkev uas tsaus ntuj nti los kuv tsis ntshai dabtsi, rau qhov koj nrog nraim kuv”. Thiab “Koj npaj rooj noj rooj hau rau kuv, tabmeeg kuv cov yeebncuab;

Yog li ntawd, koj cia li muab koj lub siab lub paj hlwb pheeb rau ntawm tus Tswv, thiab ntseeg tias tus Tswv yuav ua tiav Nws lub haumphiaj zoo hauv koj lub neej. Koj yuav tsis nyob tag li hauv tej kev teebmeem! Tiamsi yam uas koj cheem tsum ua yog ua twjywm thiab tos, tsis txhob ua lawv li koj lub siab xav, yog ua, tej zaug koj yuav raug puastsuaj.

Muaj neeg tau nug kuv tug phoojywg uas raug ib tug mob ntev ntev tias thaum twg Vajtswv mam kho nws zoo. Kuv tug phoojywg teb: “Kuv paub Vajtswv yeej kho tau kuv zoo, tiamsis yog nyob ntawm Vajtswv lub sijhawm.”

Kuv kuj tau ntsib lub sijhawm uas txomnyem heev. Thaum ntawd, kuv taij thov: “Tus Tswv kub paub tias Koj tabtom coj kuv kev, tiamsis txojkev no nyuaj heev ua rau kuv yoojyim ntog. Tsis yoojyim rau kuv li, ua cas Koj tsis coj kuv mus rau thaj chaw uas muaj zaub mos nyoos?”

Tiamsis dhau mus, kuv pom tau tias txojkev uas nyuaj tshaj yog txojkev uas tau koob hmoov tshaj. Yav tag los kuv tsis nkag siab tiamsis tamsim no kuv paub tseeb hais tias Vajtswv lub haumphiaj yeej loj thiab zoo dua kuv txojkev xav.

Txhob hnov qab tias Vajtswv yog peb Leejtxiv, Nws hlub peb thiab yuav pub yam uas zoo tshaj rau peb. Thaum uas koj tabtom ntsib kev txomnyem koj yuav ntsia tsis pom, tiamsis nco ntsoov Nws cov lus cog tseg. Tus Tswv uas yeej tsis hais lus dag tau cog lus tias: “Cia li nyob twjywm thiab paub tas kuv yog Vaajtswv”. (Ntawv Nkauj 46:10)

Thov caws peb sawvdaws nrog thov Vajtswv uake: Kuv tus Vajtswv uas muaj kev hlub! Thaum kuv ntsib kev txomnyem, thov Koj pab kom kuv txhob cia siab rau kuv tus kheej, kom kuv txhob cim civ nrhiav kev daws, tiamsis pab kom kuv txo hwjchim, cia siab rau Koj, xyab kuv txhais tes mus tuav Koj, muab kuv nplooj siab pheeb rau ntawm Koj ua tus coj kev, qhib tagnrho kuv nplooj siab los taij thov Koj ua tus cawm kuv. Thov tus Tswv Koj pab koj kuv ntsia siab rau Koj lub haumphiaj uas zoo kawg nkaus rau kuv lub neej, txawm tias lub sijhawm no kuv tsis tau nkag siab tag txhua yam. Kuv taij thov los ntawm Tswv Yexus Khetos lub npe, Amees!

Ib tsoom phoojywg sawvdaws, lo lus cog tseg “Kuv yuav nrog koj mus” yog lo lus koj yuav tsum tuav kom ruaj nyob rau hauv koj lub neej. Nyob hauv koj txhua txojkev, koj txhua kauj ruam koj tsis mus ib leeg, rau qhov Vajtswv nrog nraim koj mus thiab coj koj mus so rau hauv Nws qhov chaw tau koob hmoov. Koj tabtom sab sab vim lub nra nyhav uas koj tabtom ris? Cia li tsav los cuag Vajtswv kiag lub sijhawm no, thiab taij thov Nws coj koj mus rau hauv Nws thaj chaw so, thiab pab koj pom tau tias Nws tej lus cog tseg tabtom nrog nraim koj mus.

Nyob zoo rau nej txhua tus, Thov foom koob hmoov zoo rau nej ib hnub tshiab kaj siab lus thiab zoo siab rov tau ntsib nej dua rau tagkis.

Tus phoojywg, yog tias koj xav kawm paub ntxiv txog Vajtswv lossis koj muaj tej teebmeem, kev khuabxeeb xav qhia, koj cia li sau ntawv rau hauv qab zaj kawm no, inbox ntawm peb tus fanpage Facebook, lossis sau ntawv tuaj rau peb tus email: [email protected]. Tswv Yexus hlub koj. Peb los kuj xav kom txuas tau nrog koj thiab.