He neh gơs tú hòi dan jơh nùs, kơp gơn ngan dồ bơta krơi is Yàng pà – mơya kơp sùm mơ ờ gó gơlik bơta lơi sơl ơ? Digơlan he lùp is: “Yàng gam tềng tiah lơi taih? Nchi bơtài Yàng ờ hơ wơl? Gơs bơta lơi gam kup kơryan jơnau an hòi dan sơl ơ?” Mơya oă dớ, rlau mơ yoam dê Yàng mơ cau ndai, bol he pal càng sền swì is nùs nhơm he dê: ngan la gam gơs bơta lơi tòm rài kis he dê lơh he in ờ rgơi dờp ală bơta nđàc tus bơh Yàng Tòm Trồ sơl ơ?

Ngai do, ngai 17/09/2025, rơndap bơta hòi dan kòp ngai hòi jà ồng mọ oh mi kơlôi sơnơng Jơnau Yàng bal mơ ồng Jonathan Santiago bơh tơnggume BƠTA KUP KƠRYAN JƠNAU HÒI DAN.

“Dilah nùs añ neh kơlôi gơboh di tồi glài, Gen Yàng ò bài iat añ.” (Đơs Crih 66:18)

Tơnớ mơ tú hòi dăn mơ ơt sa, Yàng neh ràng tơlik an in gó gơs 5 bơta kup kơryan lơh jơnau an hòi dan ờ rgơi dờp: Tồi glài, bơta rngòt, nùs is, tú jơ mơ siớu rơndap tòm rài kis. Ngai do, an kờn tompà bơh bơta dớ sơnrờp hớ là: tồi glài.

Jơnau Yàng đơs lah ờ dờn bơr Yàng gen ờ geh lơngai. Ờ dờn bơr hớ la tồi glài. Digơlan bol he sùm gam dờn song ơn pơnah 10, gam lòt pơjum kờp poh, mơya dilah rài kis he dê ờ cơnđoà lòt jat Jơnau Yàng, gen ngan bol he gam kis tòm bơta ờ dờn bơr mơ tìs glài dê đap mat Yàng.

Oă dớ bol he gơs nùs gơjran mơ Yàng tài bơh Kơnràn ờ hơ wơl jơnau hòi dan he dê. Mơya dilah să tờm he dê gam kis rài kis ngài mơ nùs kờn Yàng, gen sătờm bol he hớ là cau gam kup kơryan bơta lơngai mơ Yàng neh rcang pà ai he in.

Tồi glài ờs mờng geh dờng tòm pơnah he kơlôi, gen tus dê jơnau đơs, mơ lồi dut là broă lơh.

Sră Goh cih: “Bơh khai kơlôi tòm nùs mbe lơi, gen khai ngan la behơ̆.” (Jơnau Pơnđik 23:7). Dialh tòm nùs he dê prap ală bơta iớh, ham kờn, boăh gơjran, … gen hớ la tềl sơnio ràng tơlik kòn mơnus tòm dơlam he dê – bulah he dờn hala ờ dờn. (Mathio 15:10-20)

La cau lòt jat Yàng, bol he pal bơtê git prap gàr nùs kơlôi he dê sùm sàng goh mơ kis jat Sră Goh. Jơnau Yàng geh cih tòm sră Philip 4:8 tơngkah bol he lah: “dilah bơta lơi song ngan, bơta lơi màng ryŭ; bơta lơi song ring, bơta lơi sàng goh, bơta lơi pal kòñ gơboh, bơta lơi gơs pơnro niam, dilah gơs bơta kơ̆ dơn lơi, dilah gơs bơta lơi pal jòng ro, gen oh mi pal kơlôi sơnơng tĕ di ală bơta hơ̆.”

Tú nùs kơlôi he dê sùm gơwèt tus hơ Yàng, bol he rơp prap gàr bồ tơngoh he dê sàng goh rlau. Tài bơh rài kis cau dờn Yàng pal sơlơ ngai sơlơ đòm jat Yàng Jêsus bol he dê, gen tú he lời tú jơ kơlôi sơnơng tus hơ Yàng kòp ngai, bồ tơngoh he mơ rài kis he rơp geh tomgơl nàng ràng tơlik rùp să Kơnràn dê. Tú he sac rwah kis tòm bơta dờn bơr, bol he rơp sùm ơm di tiah nàng dờp leng ală bơta lơngai tus bơh Yàng.

Sră Goh cih: “Kis, chơt ơm hơđơm gơnoar lơmpiat dê” – mơ bol he rơp dờp wơl cồng nha bơh jơnau đơs he dê. Gơlơh bè tú he dan mơ Yàng pà bơta lơngai bơh jền pră, mơya dilah jơh dồ ngai he mìng đơs ală jơnau pin wilwơl, ờ niam, gen he rơp dờp cồng nha bơh bơta pin wil wơl hớ mơ lơh roh bơta lơngai mơ he dan.

Broă lơh ràng tơlik sătờm he dê. Oă cau dờn Yàng gam kơlôi is lah mìng he đơs di đơs niam la wil tơl rau, ờ càng lơh bơta lơi tai, kis bè lơi khat gơboh he dê. Mơya Galati 6:7-8 lah pơrhơng bol he loh làng ngan: “Yàng Tom Trồ ò lòi cau sền òsơp di Yàng ò, bơh cau sih gar lơi, gen toès wơl gar hơ̆. Cau lơi sih jat poac să, gen bơh poac să rơp toès bơta ồm lề; mơya cau lơi sih jat Yàng Hwềng, gen rơp bơh Yàng Hwềng mơ toès bơta kis gam sùm sùm.”

Bol he ờ rgơi yoam Yàng hala yoam cau ndai tú rài kis he dê siớu bơta lơngai, tài bơh ală bơta he toès ngai do digơlan la cồng nha ală broă mơ bol he neh tam ngai lài đap.

Crap wơl, dilah bol he kis gơlơh bè Yàng ờ di là Bơtau gơnap gơnoar mơ git jơh ală bơta, gen bol he gam pơrlồm is să tờm he dê. Bơta dờn ngan ờ di mìng ơm tòm ală bơta he đơs, mơya pal geh ràng tơlik bơh rài kis kòp ngai he dê. Bè ồng Jakơ neh đơs: “Dilah bơta dòn ò gơs broă lơh gen gơ chơt is gơ dê.” (Jakơ 2:17)
Dilah he ngan kờn dờp geh bơta lơngai tus bơh Yàng, kis té tòm bơta dờn bơr. Tú he cơnđoà lòt tòm bơta dờn bơr, he rơp ơn să tờm he dê di dê tiah nàng dờp ală bơta niam rlau jơh mơ Yàng neh rcang sir he in.

Dan jà bol he dô nùs bal tòm bơta hòi dan: Khoai Yàng kờn gơboh, kon ừn ngài Yàng tài bơh Kơnràn sùm kờn gơboh mơ iat kon, bulah kon la dồ nă cau ờ dipal. Dan toh glài kon in dilah gơs bơta kơlôi, jơnau đơs hala broă lơh loi gam kup kơryan kon tus mơ Kơnràn. Dan Yàng Hwềng Goh sòl pơnđàng nàng kon dờp git ală bơta kon pal gơjran sang glài mơ tomgơl wơl. Dan dong kon kis dồ rài kis dờn bơr, nàng kòp ngai kon geh tus rềp mơ Yàng rlau tai, mơ sùm cơnđoà lòt tòm gùng dà Kơnràn dê. Kon jơh nùs hòi dăn, ai sơnđan Yàng Jêsus Krist, Amen.

Ơ ală ồng mọ oh mi kờn gơboh, Yàng ờ tú lơi siớu bơta lơngai nàng pà ai bol he in. mơya ngan bol he gam ơn rài kis he di tiah nàng dờp bơta lơngai hala ờ? Ban lời ală bơta dềt rhền gơlơh bè bơta kơlôi tìs, jơnau đơs ờ niam, rài kis siớu dờn bơr lơh he in lơh roh bơta nđàc Yàng pà. Kơnràn sùm gam kơp gơn bol he rê wơl bal mờ dồ nùs nhơm song ngan, pơndềt să mơ mhả dờn bơr jơnau hòi săc Kơnràn dê. Di dê tòm tiah hớ, he rơp gó bơta lơngai Yàng dê sùm tuh bìng lìu hơđang rài kis he dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.