Buăl đêl đei krao khan hăm đĭ jơhngơ̆m, hơpơi kơ đei tơdrong hlĭch Kră Yang tuh ăn- mă lei đunh bơih ưh kơ đei ‘bôh kiơ? Rŏ lăng buăl đei jet kơdih: “Kră Yang oei tơyơ? Yua kơ kiơ Sư ưh kơ tơl tơwih? Đei tơdrong kiơ pơgăn tơdrong inh krao khan?” Mă lei kư̆m đei, tơplih kơ jô̆ jŏk kơ Kră Yang păng bơngai nai, lu bơ̆n kăl kơ lăng ming jơhngơ̆m kơdih: hăm đei tơdrong kiơ lăm tơdrong arih kơdih đei pơgăn tơdrong pŭn hiôk tuh ăn đơ̆ng ‘Bă Kơpal Plĕnh ti ưh?

Năr ‘nâu, ‘năr 17/09/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Jonathan Santiago kơ̆l ‘bai TƠDRONG PƠGĂN NƠ̆R KRAO KHAN.

“Tơdah jơhngơ̆m inh mong răk tơdrong kơnê̆; Lei Kră Yang ‘Bok Kei-Dei kuă kơ mơ̆ng nơ̆r inh.” (Hơriso 66:18)

Đơ̆ng rŏng kơ krao khan ơ̆t kơ por, Kră Yang đei tơ’bôh kơ inh pơđăm tơdrong pơgăn nơ̆r krao khan ưh kơ đei tơl tơwih: tơdrong yoch, hli tơrơ, tơdrong juăt kơ pơm, jơ năr păng ưh kơ rơgoh ‘lơ̆ng lăm tơdrong arih. Năr ‘nâu, inh ‘maih wă tơ’bôh đơ̆ng mă blŭng a: tơdrong yoch.

Nơ̆r Kră Yang pơma khan ưh kơ chu yom Kră Yang noh jơ̆ ưh kơ đei pŭn hiôk. Ưh kơ chu nơ̆r Kră Yang noh jơ̆ yoch. Rŏ lăng lu bơ̆n oei pơm tơpăt đei pơyơ̆r minh lăm mơjĭt, pơnam kơ năm akŭm rim giĕng, mă lei tơdah tơdrong lui lu bơ̆n ưh pơm kiơ̆ Nơ̆r Kră Yang, na tơpă, lu bơ̆n oei arih ưh kơ chu yom păng yoch ‘bơ̆t anăp Sư.

Kư̆m đei lu bơ̆n mơn đei hil blĕk kơ Kră Yang yua kơ Sư ưh kơ đei tơl tơwih nơ̆r bơ̆n krao khan. Na tơdah kơdih lu bơ̆n oei arih ataih đơ̆ng Kră Yang wă, tơm đơ̆ng lu bơ̆n oei pơgăn tơdrong pŭn hiôk mă Kră Yang wă ăn kơ bơ̆n.

Tơdrong wơ̆ ‘lŏ kiơ̆ kơ chăl: đon tơchĕng, na truh tơ nơ̆r pơma, tuch luch noh đei pơm.

Nơ̆r ‘Bok Kei-Dei chih: “Sư tơchĕng lăm jơhngơ̆m thoi yơ, sư thoi ei; Sư khan, sŏng sa, et sa bĕ; Mă-lei jơhngơ̆m sư ưh kơ đei thoi ei ôh.” (Tơdrong Pơđơ̆k 23:7).

Tơdah lăm jơhngơ̆m buăl đei tơdrong tơchĕng hil blĕk, ‘maih wă, klai gar …noh jơ̆ tơ’bôh kon bơngai gah lăm buăl – mă khan buăl wă drơ̆ng iŏk dah ưh. (Mathiơ 15:10-20)

Jơ̆ bơngai lui kơ Kră Yang, lu bơ̆n athei bơwei jơhngơ̆m đon tơchĕng lu bơ̆n ‘lơ̆ng rơgoh păng arih trŏ kơ nơ̆r ‘Bok Kei-Dei. Nơ̆r Kră Yang đei chih lăm Philip 4: 8 tơblŏk kơ lu bơ̆n thoi âu: “Ơ lu ‘nhŏng oh, iĕm kơtơ̆ng boih tơdrong noh na iĕm athei tơchĕng tơdrong kiơ ‘lơ̆ng, tơdrong kiơ tơpăt, tơdrong kiơ trŏ, tơdrong kiơ kăl, tơdrong kiơ đe ư-ang, tơdrong kiơ hơiă, tơdrong kiơ kon bơngai lăp đon, tơdrong kiơ đe tơ’mêm băl.”

Kơplah dan jơhngơ̆m đon tơchĕng tơ Kră Yang lu bơ̆n gô ‘bônh kơ bơwei jơhngơ̆m ‘lơ̆ng rơgoh hloh. Yua kơ kơnhăm đơ̆ng lu bơngai lui kơ Kră Yang wă kơ rai nhen Yang Yêsu hloh, lei na kơplah ‘măn jơ tơchĕng pơwao kơ Kră Yang rim năr. Kơplah rơih iŏk arih chu yom, lu bơ̆n gô ling lang oei trŏ kơ anih hơmet jơhngơ̆m sơng iŏk tơdrong pŭn hiôk đơ̆ng Kră Yang.

Sơ̆p hla bơar ‘Bok Kei-Dei chih: “Lôch dah arih đơ̆ng ‘bơ̆t apiĕt kon bơngai” – păng lu bơ̆n gô pŭ iŏk đơ̆ng tơdrong lu bơ̆n pơma. Nhen thoi buăl đei apinh Kră Yang tuh ăn pŭn hiôk đei jên tơmam, mă lei prăt năr buăl pơma nơ̆r ưh kơ gan lui ngeh, nơ̆r kơnê̆, na buăl gô đei đơ̆ng tơdrong ưh kơ gan lui ngeh noh na gô hiong kơ tơdrong pŭn hiôk mă đêl buăl đei apinh.

Tơdrong tơ’bôh kon bơngai tơpă lu bơ̆n. Lơ bơngai lui kơ Kră Yang oei tơchĕng khan “pơma gơh hơgei” noh jơ̆ tôm bơih, kơplah brŏk tơ hnam bơih arih thoi yơ kư̆m bưh. Mă lei lăm Galati 6:7-8 đei pơma khan rơđah thoi âu: “Iĕm ‘nĕ tơchĕng khan iĕm gơh hơlĕnh kơ ‘Bok Kei-Dei, yua kơ Sư băt tôm tơdrong. Bơ̆n pơtăm găr kiơ gô đei plei ‘nei tơpă. Thoi noh boih, dah bơ̆n chu kiơ̆ kơ jơhngơ̆m đon bơ̆n kơdih wă pơm tơdrong kơnê̆, lei bơ̆n gô răm. Dah bơ̆n wă chu kơ Yang Bơhngol ‘Lơ̆ng đĕch lei Yang Bơhngol ‘Lơ̆ng gô ăn kơ bơ̆n arih ling-lang hăm ‘Bok Kei-Dei.”

Lu bơ̆n ưh kơ gơh pơma hil kơ Kră Yang dah bơngai nai kơplah tơdrong arih lu bơ̆n ưh kơ đei pŭn hiôk, yua kơ dôm tơdrong lu bơ̆n yua iŏk năr ‘nâu đei plei noh tơm kơ đơ̆ng lu bơ̆n rei.

Tơdah lu bơ̆n arih thoi kơ Kră Yang lei hăm trŏ kơ Tơ’ngla kơ đĭ đăng păng hlôh băt tôm tơdrong, na lu bơ̆n oei hơlĕnh kơ kơdih akâu. Đon lui tơpă ưh kơ lăm tôm tơdrong lu bơ̆n tơ lĕch nơ̆r pơma, na athei tơ’bôh tơdrong arih lu bơ̆n pơm rim năr. Nhen thoi Yakơ đei pơma: “Kư̆m thoi noh mơ̆n, bơngai bu khan sư lui boih, mă-lei sư ưh kơ pơm ‘lơ̆ng pơm trŏ, sư lui thoi noh ưh kơ yua kiơ kơ sư.” (Yakơ 2:17)

Tơdah buăl ‘maih wă tơpă sơng iŏk tơdrong pŭn hiôk đơ̆ng Kră Yang, athei arih chu yom Kră Yang. Kơplah buăl yak năm hăm jơhngơ̆m chu yom, buăl gô dan trŏ kơ anih wă sơng iŏk tơdrong ‘lơ̆ng tơpăt mă Kră Yang đei ‘măn bơih kơ buăl.

Apĭnh đĭ đăng krao khan hơdai: Kơkuh kơ Kră Yang mă ‘mêm, kon bơnê kơ Ih yua kơ Ih ling lang ‘mêm kơ kon păng mơ̆ng nơ̆r kon, mă kơplah kon ưh kơ trŏ kơ Ih ‘mêm. Apinh huay kơ jô̆ yo kơ kon tơdah kon đei tơchĕng, nơ̆r pơma dah đei pơm tơdrong kiơ mă pơgăn kon năm tơ Ih. Apinh Yang Bơhngol ‘Lơ̆ng pơchrang chông anhăk wă kơ kon băt kơ tôm tơdrong kon kăl kơ tơbral păng tơplih. Apinh tơgŭm kon arih đei chu yom, wă kơ rim năr kon jê̆ Ih hloh, păng ling lang yak năm lăm trong Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm ko eng, Kră Yang ưh kơ đei layơ kơ‘bah kơ pŭn hiôk wă ăn kơ kon Sư. Lei lu bơ̆n tam dan jơhngơ̆m bơ̆n trŏ kơ anih wă sơng iŏk ưh? ‘Nĕ ăn kơ tơdrong lăng nhen iĕ đĕch thoi kơ đon tơchĕng ưh kơ trŏ, nơ̆r pơma kơnê̆, tơdrong arih ưh kơ chu yom pơm kơ buăl hiong tơdrong ‘mêm mơnat đơ̆ng Kră Yang ăn. Kră Yang oei gô buăl wih brŏk hăm jơhngơ̆m tơpăt tơpă, pơyom păng kiơ̆ hloi nơ̆r Kră Yang krao. Tơm kơ đơ̆ng anih noh, buăl gô ‘bôh pŭn hiôk Kră Yang ling lang tuh ăn lăm chăl arih buăl.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.