Txhua hnub peb puav leej ntsia pom cov neeg uas muaj lub neej txomnyem, yuam kev ntawm ib ncig peb. Tiamsis pauv qhov uas nres twjywm, ntau zaug peb ho xaiv ua twjywm cia dhau mus. Tsis yog vim tsis muaj siab hlub tshua, tiamsis vim peb tus kheej kuj qaug zog heev. Peb tsuas xav kom tau nyob ntsiag to, zam kom deb tej kev cheem tsum sab nraud – tej kev cheem tsum uas peb tsis muaj hnub yuav pab tau. Tiamsis Tswv Yexus txawv. Txawm yog thaum Nws lub siab puas ntsoog hauv txoj kev nyuaj siab lossis Nws yeej muaj lub siab hlub tshua pub rau cov neeg uas tsau tsawv hauv qhov yuam kev. Ntawd kuj yog lub siab uas Vajtswv xav tau ntawm cov pej xeem uas Vajtswv coj txhua hnub.

Hnub no, yog hnub 19/09/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Craig von Buseck dhau ntawm Zaj kawm LUB SIAB KHUVLEEJ.

“Thaum Yexus tawm hauv nkoj los, nws porn muaj neeg coob coob, nws hlub lawv thiab nws kho lawv cov neeg muaj mob txhua tus zoo huv tibsi” (Mathais 14:14).

Muaj tej hnub tsis zoo, thaum uas txoj kev nyuaj siab tshwm tuaj ua rau peb lub siab nyhav ncuv. Tswv Yexus kuj tau ntsib dhau zoo li ntawd. Nws nyuam qhuav hnov xov phem txog Yauhas Npatitus, yog nws tus txheeb ze thiab kuj yog tus nkag siab Tswv Yexus dua lwm tus, tau raug tua pov tseg phem tshaj. Ib txoj kev tuag tsis ncaj ncees, tsuas yog los ntawm ib tug vajntxwv lo lus cog tseg raws li lub siab ntshaw pub rau lwm tus.

Tswv Yexus yog Vajtswv, tiamsis Nws kuj yog tib neeg – muaj puv npo kev xav zoo li peb. Thaum hnov txoj kev phem ntawd, yam xub thawj uas Tswv Yexus xav ua yog khiav tawm ntawm cov pej xeem, nrhiav ib qhov chaw ntsiag to thiab nrog Leej Txiv saum ntuj nyob ua ke. Phau Mathais hais tias: “Thaum Yexus hnov hais tias Yauhas tuag lawm, Yexus tib leeg txawm caij nkoj tawm qhov ntawd mus rau ib qhov chaw uas tsis muaj neeg.” (Mathais 14:13a).

Tej zaug peb kuj muaj tej lub sijhawm qaug zog zis, thaum uas tej kev txhawj nws tshwm los zoo li ib nthwv cua loj. Thaum ntawd, peb xav muab txhua yam tso tseg kom tau nrog Vajtswv nyob ua ke, ua twjywm hauv Vajtswv txoj kev tshwm ntsej muag.

Txawm li los cov pej xeem tsis cia kom Tswv Yexus muaj ib nyuag mentsis sijhawm nyob ntsiag to. Mathais hais tias: “Thaum sawvdaws hnov hais tias, Yexus mus rau qhov ntawd lawm, lawv txawm tawm hauv lawv tej nroog taug ntug dej caum Yexus qab mus” (Mathais 14:13b).

Tswv Yexus muaj cuab kav txib Petus lossis Yakaunpaus mus hais rau sawv daws tias hnub no nws cheem tsum so. Nws kuj muab cuab kav thov kom Yauhas pab tshaj xo rau sawv daws tias Nws tab tom tsis khoom, thov kom cov pej xeem rov qab mus tsev. Tiamsis Vajluskub sau tias: “Thaum Yexus tawm hauv nkoj los, nws porn muaj neeg coob coob, nws hlub lawv thiab nws kho lawv cov neeg muaj mob txhua tus zoo huv tibsi” (Mathais 14:14).

Ua ntej ntawd, Tswv Yexus nthuav tawm rau cov thwjtim kom lawv nkag siab txog Leej Txiv saum ntuj lub siab: “Yexus hnov lawv sib tham li ntawd, nws teb hais tias, “Cov neeg tsis muaj mob yeej tsis mus cuag kws tshuaj , tsuas yog cov neeg muaj mob thiaj mus cuag kws tshuaj xwb. Nej cia li mus nyeem Vajtswv Txojlus uas hais tias, ‘Qhov uas kuv xav tau yog, kom nej muaj lub siab hlub, tsis yog tus tsiaj uas muab tua theej txhoj,’ rau qhov kuv tsis yog los hu cov neeg ncaj ncees, tiamsis yog kuv los hu cov neeg txhaum.” (Mathais 9:12-13).

Tswv Yexus nthuav qhia meej meej tias: Vajtswv tsis yog tsuas hlub tshua txog cov neeg muaj txim xwb, Nws tseem xav kom peb txhua tus kuj muaj lub siab hlub tshua ntawd. Nws xav hloov pauv cov neeg uas muaj lub siab pob puas vim muaj kev tu siab, raug ntxeev siab, ua xyem xyav lossis qia dub pauv mus ua cov muaj lub siab mos muag, paub hlub Vajtswv thiab ntshaw kom coj txoj kev hlub ntawd mus pub rau lub ntiajteb… txawm nyob rau tej hnub uas phem tshaj.

Hnub no, nyob hauv txoj kev tsis khoom ntawm lub neej, thov kom peb tseg ib mentsis sijhawm los thov Vajtswv pub kom yus muaj lub siab paub hlub tshua txog cov neeg tab tom yuam kev. Thov kom lub siab hlub tshua ntawd yuav tshoov peb tawm, koom tes rau tes haujlwm Vajtswv tab tom ua, coj txojmoo zoo mus pub rau cov uas muaj lub siab puas ntsoog, mus rau qhov chaw uas lawv cheem tsum Vajtswv txoj kev hlub thiab kev cawmdim.

Cia li thov Vajtswv kom Vajtswv txoj kev hlub ntws los rau hauv peb txhua tus lub siab, kom peb kuj muaj lub siab hlub tshua ib yam li Tswv Yexus, txhua zaug uas ntsia pom cov neeg txhaum cheem tsum ib tug Cawm Seej.

“Nws cawm cov neeg pluag uas thov txog nws, thiab cov neeg txomnyem uas tsis muaj leejtwg pab. Nws hlub tshua cov uas qaug zog thiab cov pluag, nws cawm cov neeg txomnyem txojsia.” (Ntawv Nkauj 72:12-13).

Thov caw nrog kuv peb thov Vajtswv ua ke: Tus Tswv, ua Koj tsaug vim rau Koj lub siab hlub uas tsis muaj nrim niaj hnub ntws los rau hauv kuv lub neej. Thov pub kom kuv muaj lub siab zoo li Koj. Paub hlub, paub tshua thiab zoo siab hlo pab cov neeg txhaum. Thov siv kuv zoo li ib qhov cuab yeej nyob hauv Vajtswv txhais tes, kom kuv coj tau txoj moo zoo no mus qhia rau cov neeg txomnyem thiab yuam kev. Thov kom Vajtswv txoj kev hlub ntws los dhau ntawm kuv lub neej. Kuv thov hauv Tswv Yexus Khetos lub npe. Amees.

Cov kwv tij txhua tus, koj puas tab tom muaj lub siab hlub tshua ib yam li Tswv Yexus? Leej twg yog tus uas tab tom cheem tsum Vajtswv txoj kev hlub dhau ntawm koj hnub no? thov kom Vajtswv txoj kev hlub yuav tshoov kom koj ua haujlwm, txawm yog tsuas yog ib lo lus nug moo, ib qhov tuav tes, ib lo lus thov Vajtswv pab yooj yim… kuj txaus cawm ib tug twg nawd lub neej. Tsis paub koj puas zoo siab cia Vajtswv siv koj lub neej los ua ib qhov cuab yeej kom muaj nqis, nthuav tawm Vajtswv txoj kev hlub rau sawv daws?

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.