Koj twb siv zog thov Vajtswv, tos kom Vajtswv ua ib qhov txujci Vajtswv pub – tiamsis yeej tseem tsis tau pom yam dabtsi tshwmsim? Tej zaug koj yuav cim civ nug: “Vajtswv tab tom nyob qhov twg? Vim li cas Vajtswv tsis teb? Puas muaj yam dabtsi tab tom tav kuv tej lus thov Vajtswv?” tiamsis ntau zaug, pauv qhov uas kwv yws Vajtswv thiab lwm tus, peb yuav tau rov qab tshuaj peb lub siab: tsis paub puas muaj yam dabtsi hauv yus lub neej tab tom tav txoj koob hmoov ntws ntawm Leej Txiv saum ntuj los?

Hnub no, yog hnub 17/09/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Jonathan Santiago dhau ntawm Zaj kawm YAM UAS TAV COV LUS THOV VAJTSWV.

“Yog kuv tsis lees kuv tej kev txhaum, tus Tswv yuav tsis mloog kuv tej lus thov” (Ntawv Nkauj 66:18). 

Tomqab ib lub sijhawm ua kevcai yoo mov thiab thov Vajtswv, Vajtswv nthuav tawm rau kuv pom muaj tsib yam tav kev ua rau cov lus thov Vajtswv tsis tau txais yuav: kev txhaum, kev txhawj ntshai, tus cwjpwm qub, lub caijnyoog thiab txoj kev tsis tswj tus kheej hauv lub neej. Hnub no, kuv xav qhia rau koj paub txog tej yam thaum pib: kev txhaum.

Vajtswv txojlus hais tias tsis mloog Vajtswv lus ces tsis tau koob hmoov. Tsis mloog Vajtswv lus ces yog kev txhaum. Tej zaug peb yeej tseem ncaj ncees fij feem kaum, yeej tseem mus pehawm txhua thiv, tiamsis yog peb lub neej tsis mus raws li Vajtswv txojlus, ces tseeb tiag, peb yeej tab tom ua neej nyob hauv txoj kev tsis mloog lus thiab ua txhaum ntawm Vajtswv xub ntiag.

Ntau zaug peb hnov npau taws rau Vajtswv vim Vajtswv tsis teb yus tej lus thov. Tiamsis yog peb tus kheej tab tom ua neej nyob deb Vajtswv lub siab nyiam, ces peb thiaj yog cov neeg tab tom tav txoj koob hmoov uas Vajtswv pub rau yus.
Kev txhaum pheej loj hlob raws li tsheej ntu: xub xav, tas mam txog lo lus hais, thiab thaum kawg yog cev tes ua.

Vajluskub sau: “Nws yuav hu hais tias, “Cia li los noj,” tiamsis nws lub ncauj lam hu xwb, nws lub siab tsis yog li ntawd.” (Pajlug 23:7). Yog nyob hauv koj lub siab tseem muaj tej kev xav npau taws, ntshaw yam phem, sib khib, ces ntawd yog lub cim nthuav tawm koj tus neeg sab hauv tiag tiag – txawm yog koj puas kam txais thiab tsis kam los xij. (Mathais 15:10-20).

Yog ib tug ntseeg Vajtswv, peb yuav tau kawm txoj kev ceev kom peb lub hlwb dawbhuv thiab ua lub neej yog raws li Vajluskub. Vajtswv txojlus sau nyob hauv Filipis 4:8 ntuas kom peb nco ntsoov tias: “Cov kwvtij, kuv thov xaus lus li no hais tias nej yuav tsum cim ntsoov tej uas zoo thiab tsimnyog qhuas rau hauv nej lub siab: tsis hais tej uas tseeb, tej uas tsimnyog hwm, tej uas ncaj ncees, tej uas dawbhuv, tej uas ntxim nyiam thiab tej uas yuav tau koob meej, nej yuav tsum khaws tej ntawd cia rau hauv nej lub siab huv tibsi”

Thaum peb tig peb lub hlwb mus rau ntawm Vajtswv, peb yuav yooj yim tswj tau peb lub hlwb kom huv. Vim txhua tus ntseeg Vajtswv lub homphiaj yog yim hnub yim dhau los zoo li Tswv Yexus, yog li thaum tseg sijhawm los xav txog Vajtswv txhua hnub, peb lub hlwb thiab lub neej yuav tau hloov pauv kom nthuav tawm Vajtswv tus duab. Thaum xaiv ua lub neej mloog lus, peb yuav nyob yog chaw thiab txais yuav txoj koob hmoov ntws ntawm Nws los.

Vajluskub sau: “Ciaj thiab tuag los nyob ntawm koj tus nplaig” – thiab peb yuav txais tau tej uas peb cov lus hais tawm. Piv txwv li tej zaug koj ho thov kom Vajtswv foom hmoov rau nyiaj txiag, tiamsis koj pheej hais tej lus ua xyem xyav, tsis zoo, ces koj yuav tau sau los ntawm txoj kev ua xyem xyav ntawd thiab ua poob txoj koob hmoov uas koj yuav tau thov.

Tes haujlwm nthuav tawm peb tus neeg tseeb sab hauv. Muaj ntau tus ntseeg Vajtswv xav tias lawv tsuas yog hais “kom zoo xwb” ces txaus lawm, tshuav thaum los txog tsev lawm kaw qhov rooj rau ua lub neej zoo li cas los kuj tau. Tiamsis Kalatias 6:7-8 ceeb toom meej meej tias: “Nej tsis txhob xav yuam kev, yeej tsis muaj ib tug yuav dag tau Vajtswv, txhua tus nyias yuav tau sau raws li tej uas nyias tseb. Tus uas tseb tej uas neeg lub siab nyiam, tus ntawd yeej yuav tau sau kev ploj kev tuag raws li tej uas nws tseb. Tiamsis tus uas tseb tej uas Vaj Ntsujplig nyiam, tus ntawd yuav tau sau txojsia ntev dhawv mus ibtxhis”

Peb yuav cais tsis tau Vajtswv lossis yws lwm tus thaum uas yus lub neej tsis tau koob hmoov, rau qhov tej uas peb tab tom sau hnub no tej zaug yuav yog tej paj txiv ntawm tej uas peb tab tom tseb.

Muab los hais, yog peb ua lub neej zoo li Vajtswv tsis yog tus muaj hwjchim, tsis yog tus paub txhua yam ces peb tab tom dag peb. kev ntseeg tiag tsis nyob ntawm tej uas peb hais tawm, tiamsis tau ua nthuav tawm dhau ntawm txoj kev ua neej txhua hnub. ib yam li Yakaunpaus tau hais: “Yog kev ntseeg tsis ua haujlwm ces yog kev ntseeg tiag” (Yakaunpaus 2:17).

Yog koj xav txais Vajtswv txoj koob hmoov tiag, yuav tau ua lub neej mloog Vajtswv lus. Thaum koj mloog lus, koj yuav tso yog chaw thiab txais yuav txhua yam zoo uas Vajtswv twb npaj tseg rau koj lawm.

Thov caw nrog kuv peb thov Vajtswv ua ke: Tus Tswv muaj kev hlub, kuv ua Koj tsaug vim Koj hlub kuv thiab mloog kuv lus, txawm yog thaum uas kuv tsis tsimnyog. Thov zam txim rau kuv yog muaj tej kev xav, lo lus hais lossis tej haujlwm twg tab tom tav kuv los cuag koj. Thov Vaj Ntsujplig taw kev rau kuv kom kuv paub yam uas kuv yuav tau lees txim thiab hloov pauv. Thov pab kom kuv ua ib lub neej mloog lus, kom txhua hnub kuv tau los nyob ze koj dua, thiab txhais ruam mus hauv koj txoj kev. Kuv thov hauv Tswv Yexus Khetos lub npe. Amees.

Cov kwv tij txhua tus, Vajtswv tsis muaj ib zaum twg yuav tsis muaj koob hmoov los pub rau Vajtswv cov menyuam. Tiamsis tsis paub peb puas tso peb kom yog qhov chaw ua thawj coj? Txhob cia tej yam uas saib cuag li me xws li kev xav yuam kev, lo lus hais tsis zoo, kev ua lub neej tsis mloog lus ua rau koj ua poob Vajtswv txoj koob hmoov Vajtswv pub. Vajtswv tab tom tos koj tig rov qab los ntawm lub siab tiag, txo hwjchim thiab zoo siab hlo ua raws li Vajtswv lub suab hu. Nyob ntawm qhov chaw ntawd, koj yuav pom Vajtswv txoj koob hmoov ntws lug hauv koj lub neej.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.