Buăl hăm đei mơn kơdih oei kơdâu ling lang mă ưh kơ băt wă truh tơyơ? Buăl pơm tôm tơdrong, đĭ jơhngơ̆m, pơnam, pơyơ̆r akâu, mă lei tơ lăm jrŭ, buăl ‘bôh tam mă đei tôm tơdrong kiơ noh? Trong lu bơ̆n oei yak năm ưh kơ đei dơhnă, mă ‘bĕnh kơ “tơmo rĕl iĕ” jơ̆ dôm kơ tơdrong pơm kơ jơhngơ̆m lu bơ̆n tơchĕng, pơm kơ jơ̆ng lu bơ̆n pơ̆k lăm trong yak năm kiơ̆ Kră Yang. Mă lei kư̆m đei, đơ̆ng lu tơmo rĕl noh jing nơ̆r tơ’blŏk đơ̆ng Kră Yang: “ Kon yak năm hăm trŏ kơ trong mă Inh đei krao iŏk kon ưh?”

Năr ‘nâu, ‘năr 09/09/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Cathy Irvin kơ̆l ‘bai PƠ̆K HUŎNG YUA KƠ DÔM TƠDRONG IĔ ĐĔCH.

“Thoi noh na lu bơ̆n athei tŭk lê̆ dôm tơdrong mă pơm kơ akâu bơ̆n trăp păng tôm kơ tơdrong yoch mă oei chô̆ pơkơ̆ng bơ̆n. Bơ̆n athei adrin kơdih kơdih kơdâu rok trong mă ‘Bok Kei-Dei đêl pơkă kơ bơ̆n boih.” (Hêbrơ 12:1b)

Chăl arih jơ̆ trong yak năm ataih, dôm kơ lu trong ưh kơ khan layơ kư̆m să, yak năm hiôk. Rŏ lăng buăl đei kơ tơ̆ng bu noh pơma thoi âu: “Inh jơ̆ bơngai tơmoi yak năm brih kơ teh đak ‘nâu” dah “ Teh đak ‘nâu ưh kơ pơlei hnam lu bơ̆n.” Trŏ kơ thoi noh, pơlei ‘lơ̆ng noh jơ̆ lu bơ̆n kơnhăm wă năm tơ noh, mă lei dang ei, lu bơ̆n oei arih, oei yak năm rim năr tơ kơpal teh ‘nâu. Nơ̆r ‘Bok Kei-Dei đei chih: “Anih ayơ tơpang jơ̆ng lu iĕm juă, Inh gô ăn kơ lu iĕm, thoi Inh đei pơkă bơih hăm Môis.” (Jôsuê 1:3). Tơdrong noh wă khan Kră Yang krao lu bơ̆n yak năm, pơyơ̆r akâu păng iŏk dôm kơ anih teh ăn kơ dêh char ‘Bok Kei-Dei.

Trong noh ưh kơ đei layơ hiôk ngăl, nhen thoi trong ‘nao tuh kơdrŏng. Noh nhen thoi trong iĕ lơ bơngai đei yak năm, ưh kơ dơhnă, hơđang,‘bĕnh kơ tơmo rĕl, ‘bônh kơ pơm kơ lu bơ̆n tơsĕr pơ̆k. Hăm đei layơ buăl yak năm hơđơ̆ng dêh bơih ră, mă lei kơ tơih minh găr tơmo rĕl iĕ na pơ̆k hloi, đei rơka ‘bĕnh kơ akâu ưh? Trong yak năm kiơ̆ Kră Yang kư̆m thoi noh. Lăng nhen thoi ‘bônh đĕch, mă lei đơ̆ng lăm tơdrong iĕ noh pơm kơ lu bơ̆n pơ̆k huŏng, tơdah lu bơ̆n ưh kơ kơchăng.

Đei lơ wơ̆t, đơ̆ng lăm dôm kơ tơdrong ‘maih wă kơ dih pơm kơ lu bơ̆n wơ̆l jrok. Inh ngăl khan tơdrong noh jơ̆ “tơmo rĕl iĕ”, wă khan dôm tơdrong pơm kơ lu bơ̆n ưh kơ lêng ê. Na lăm lu tơdrong noh, đei minh tơdrong ngăl hơlĕnh lu bơ̆n: đei lơ tơdrong jang, tơdrong arih đei lơ kơ hiơ̆k bơngơ̆t, tơdrong bơ̆jang, hnam dơnŏ, hnam akŭm, răt tơmam, tă kơ tơdrong kăl kơ wă pơm. Na đei wă pơđâu, dôm lu khŭl mă hơdai noh gô thoi yơ? Hăm đei layơ lu bơ̆n mă đei Kră Yang krao iŏk wă bơ̆jang đĭ đăng tơdrong noh? Dah đei tơdrong kiơ noh pơm kơ lu bơ̆n weh ataih đơ̆ng tơdrong kơnhăm tơm lăm chăl arih kơdih?

Inh kư̆m đêl đei thoi noh, kư̆ kơ jĕt kơdih: “Inh jơ̆ bơngai bơ̆jang kơ Kră Yang khăn, lu sư kăl kơ inh.” Tơdah inh chu mơ̆ng nơ̆r Kră Yang, rŏ lăng Sư gô pơma khan kơ inh: “Kon ‘mă ‘mêm, athei achăng lê̆ ‘biơ̆ tơdrong ‘nâu, Inh gô dan trŏ kơ anih Inh wă yua kon, gô ‘lơ̆ng hloh.” ‘Bu mă ưh kơ ‘maih arih pơm kiơ̆ kơ tơdrong ‘lơ̆ng đơ̆ng Kră Yang, hăm trŏ ưh? Yua kơ thoi noh, tơdah buăl mơn băt kơ dui ba lăm dôm tơdrong jang mă jơhngơ̆m tam mă lăp đon, rŏ lăng buăl kăl kơ pơdơh tŏ sĕt ‘mơ̆i păng apinh Kră Yang thoi âu: “Ayơ tơdrong jang mă Ih đei krao iŏk kon bơ̆jang tơpă?”

Brei mơ sơ̆ ‘nâu inh đei năm krao khan hơdai, na inh đei apinh Kră Yang ăn kơ inh băt kơ mơ̆ng nơ̆r Sư. Năr noh, đei bơngai klah song nơ̆r gah tơdrong jê̆ Kră Yang hloh dơ̆ng. Sư đei khan đơ̆ng lăm lơ tơdrong jang pơm kơ lu bơ̆n ataih đơ̆ng Kră Yang kơplah đơ̆ng layơ noh lu bơ̆n ưh kơ đei băt. Mơ̆ng kơ tơ̆ng ding ‘bơ̆t doh, lăm bơhngol inh nhen thoi đei teng neng re jơwa. Inh băt hơđăl Kră Yang tơ’blŏk kơ inh athei achăng lê̆ minh ‘bar tơdrong kiơ noh mă đơ̆ng ki sơ̆ inh oei hơnơ̆ng kơ bơwei. Păng kơplah ‘nâu, inh wă mơ̆ng Kră Yang hloi bơih. Sơ̆p hla bơar đei chih: “Wă pêng ‘măng kơ âu boih inh năm tơ iĕm, mă-lei ưh kơ sĭ năm chă jâu đe kư̆ kă ôh; tơ̆ng ‘bar pêng ‘nu ‘bôh sư pơm yoch tơpă, na gơh pơma kơ sư.” (II Kôrintô 13:1), na Kră Yang ưh kơ lê̆ inh gô hiơ̆ wă kơ đei pơsĭt hơđăl.

Ưh kơ đunh đơ̆ng noh, inh đei pơsĭt ‘bơ̆t mă ‘bar đơ̆ng buăl juăt inh, mŏ noh minh ‘nu bơngai bơtho nơ̆r ‘Bok Kei-Dei. Kơplah krao khan kơ inh, mŏ noh pơ’lơ̆ng pơma khan kơ inh: “Oh ưh kơ đei kơnhăm kơ lăm tơdrong jang. Kră Yang krao oh wă kơ bơtho nơ̆r Sư”. Inh mơ̆ng kơtơ̆ng hlĭch, păng kư̆m chhưu lăm jơhngơ̆m. Tă kơ, đei minh tơdrong plơ̆ng lăm chăl arih inh đei pơih.

Tơpă, chăl arih lu bơ̆n nhen thoi tơmam pơm ngôi yua hăm tơmo điê̆n. Na gô truh kơ sư gô đei minh lăm pêng tơdrong:

Mă minh: Tơmo đĭ, wă khan jơhngơ̆m lu bơ̆n đĭ pă kĕ bơih.

Mă ‘bar: Tŭl ‘bơm tơnăr, wă khan mă adrin, lu bơ̆n ưh kơ kĕ truh tơ anih đei pơkă tơ tuch luch.

Mă pêng: Kơtơih ‘bơm tơmam pơgăn, kơplah noh, lu bơ̆n kăl kơ bơngai nai tơgŭm bơ̆n hơmet trong wă kơ pơtrơp yak năm dơ̆ng.

Buăl oei lăm tơdrong kiơ noh? Brei mơsơ̆ buăl hăm đei juă ‘bơm tơmo rĕl ayơ ưh? Tơdah đei, athei bơnê kơ Kră Yang yua kơ tơdrong noh. Gah kơdih inh, tơmo rĕl anăn sư “ưh kơnhăm” pơm kơ inh tơchĕng ming lăm tơdrong arih inh păng lăm inh bơ̆jang.

Yua kơ thoi noh, athei pơ̆n nuih yak năm lăm tơdrong bơ̆jang păng kư̆m pơ‘lơ̆ng lăm tơdrong jang mă Kră Yang đei krao iŏk. Kơplah kơdih đei wơ̆ ‘lŏ lăm trong yak năm lăm đon lui, lu bơ̆n gô tưk tơ iung păng tơgŭm bơngai nai weh đơ̆ng lu tơmo rĕl lăm trong yak năm, wă kơ đĭ đăng lu bơ̆n yak năm ding truh tơ anih đei pơkă mă Kră Yang hơmet ăn bơih kơ bơ̆n.

Apĭnh đĭ đăng krao khan hơdai: Kơkuh kơ Kră Yang ‘mêm. Kon bơnê kơ Ih yua kơ Ih chông anhăk kon rim năr. Apinh Ih tơgŭm kon huay kơ druh kiơ̆ lăm tơdrong arih hrăt hrot lăm tơdrong jang mă hiơt kơ nơ̆r khan rơngơp đơ̆ng Ih. Tơdah đei tơdrong kiơ pơm kơ kon yak năm ưh kơ trŏ lăm tơdrong Ih đei pơjao ăn, apinh tơ’bôh kơ kon băt păng tơgŭm kon pơ̆n achăng lê̆. Kon rơhing kơ ‘maih wă yak năm kiơ̆ kơ Ih, wă kơ rai jê̆ hloh tơ anih mă Ih ‘măn bơih kơ kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, Kră Yang ưh kơ pơtrŭt buăl yak năm mă hrĕnh, hăt hot, dah chĕp pơm lơ tơdrong. Kră Yang wă kơ buăl pơdơh ‘mơ̆i păng lăng hơlen pơnhen trong wă yak năm. Đei dôm kơ tơdrong nhen iĕ đĕch, mă lei pơgăn buăl wơ̆ ‘lŏ kiơ̆ kơ kơnhăm đơ̆ng Kră Yang krao iŏk. Tơm kơ đơ̆ng buăl hơmet rơgoh ‘lơ̆ng lu tơmo rĕl iĕ noh, buăl gô ‘bôh hơđăl kơ trong mă Kră Yang hơmet ăn kơ buăl, noh jơ̆ trong ba truh tơ anih tôm tơdrong kiơ̆ kơ thoi Kră Yang wă.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.