Xyoo tshiab mus kawm ntawv thaum twg twb muaj ntau yam kev xav sib xyaw ntxaws ua ke, ke kub siab lug, ke kuj tsis paub ua cas. Txawm yog menyuam kawm ntawv, kawm ntawv qib siab, tus qhia ntawv lossis cov ua niam ua txiv tib si. Tag nrho peb puav leej sawv ntawm tej kev pib dua tshiab nrog ntau yam tsis paub meej tab tom tos ntsoov: Ib lub chaw kawm tshiab, ib qhov chaw tshiab, lossis ib lub nra tshiab. Tiamsis twb yog tej yam pib me me ntawd, Vajtswv tab tom caw koj nrog Vajtswv mus ua ke, los ntawm lub siab ntseeg thiab mloog lus. Peb tsis tas yuav nrhiav ib lub hauv paus pib zoo, tiamsis ntseeg tias Vajtswv yuav zoo siab txhua zaug uas cov neeg kam pib los ntawm tej yam uas me tshaj hauv Vajtswv txoj kev coj kev.

Hnub no, yog hnub 05/09/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Lori Wilkerson Stewart dhau ntawm Zaj kawm PIB NTAWM QHOV ME ME.

“Lawv twb tas kev cia siab lawm, rau qhov lawv tsis porn muaj txojkev zoo ntxiv lawm. Tiamsis lawv yuav porn Xelunpanpees rau siab ntso ua lub Tuamtsev, thiab lawv yuav zoo siab heev” (Xakhaliyas 4:10)

Kuv nco Vajtswv tshav ntuj vim txhua zaug Vajtswv puav leej zoo siab thaum kuv pib dua ib yam tshiab. Vajtswv paub zoo txoj kev uas kuv txhais ruam hauv txoj kev ntseeg yeej tsis yooj yim, vim nrog Vajtswv mus yog txoj kev yuav tau muab lwm yam los pauv.

Tsis ntev no, kuv pib ib txoj kev tshiab nyob hauv lub neej. Txawm yog kuv twb yuav muaj plaub caug xyoo los, Vajtswv yeej tseem hu kuv tawm hauv kuv lub zej zos mus rau lwm lub nroog, tig rov qab los rau hauv tsev kawm ntawv, kawm ntxiv. Yog ib tug niam tsev, ib leej niam rau peb tug menyuam mos, koj paub tias yuav yog ib kaujruam “dhia” hauv txoj kev ntseeg nyuaj no rau kuv tsev neeg. Tiamsis, kuv pom tias Vajluskub kuj muaj ntau zaj xwm txheej ib yam li ntawd.
Thaum cov neeg mus ua qhev tim Npanpiloos rov qab los rau hauv Yeluxalees, lawv ntsib ntau qhov kev sim siab no txog lwm qhov kev sim siab. Ua ntej, lawv tsis muaj chaw pehawm vim lub tuam tsev Xalumoos puab twb rhuav pov tseg tas lawm. Xelunpanpees thiab Yausuas nkawd yog ob tug pov thawj hlob tau cob haujlwm txhim kho lub tuam tsev. Tiamsis ua ntej yuav ua txoj haujlwm, lawv yuav tau ua ib lub thaj fij khoom.

“Txawm yog cov uas rov qab los ntawd ntshai cov neeg uas ib txwm nyob hauv lub tebchaws ntawd los lawv cia li ua dua ib lub thaj tshiab rau ntawm qhov qub chaw thaum ub.” (Exalas 3:3).

Koj puas tau muaj zaum twg hnov ntshai thaum pib ua ib txoj haujlwm twg ntawd pub rau Vajtswv lawm tau? Hais tiag, Vajtswv nqua hu peb ua tej yam uas ua rau peb ntshai tshaj. Tiamsis ntshai yog yam tawm tsam txoj kev ntseeg. Ntau zaug, Vajtswv yuav tau tshem txoj kev ntshai hauv peb lub siab ua ntej, kom peb kawm tau txoj kev vam khom Vajtswv thiab Vajtswv tej lus cog tseg. Rau qhov kev ntseeg thiaj yog yam ua rau Vajtswv zoo siab.

Tau ntev los lawm, Vajtswv nqua hu kuv mus kawm kev tshaj xo thiab npaj tshwm saum sam thiaj tshaj xo. Thawj yam kuv ua yog tsis paub ua cas. kuv xav twj ywm: “Kuv ntshai tsis kam hais lus ntawm tej pab neeg coob coob! Thiab kuv yeej tsis paub dabtsi txog kev tshaj xo!”

Tej zaug thaum ntawd Vajtswv tau luag ntxhi. Kuv nyiam ib tug ntseeg Vajtswv muaj ib lo lus hais li no: Yog Vajtswv hu koj ua tej yam ua rau koj ntshai, ces “kav tsij ntshai… tiamsis kus ua thiab ntag!”

Koj puas tau pib ua Vajtswv txoj haujlwm uas tsis muaj neeg quav ntsej lossis pab lawm tau? Yausuas thiab Xelunpanpees nkawd ntseeg tias Vajtswv xav kom nkawd ua lub tuam tsev, tiamsis lub sijhawm ntawd nws txawv tamsim no. Nkawd tsis npaj pib nrov npe ntoo moo lug, kuj tsis muaj nyiaj ua ntau. Ntau zaug, nkawd yeej tsis muaj nyiaj los them cov kws ua tsev. Vajluskub sau tseg tias cov neeg mus ua qhev rov qab los muab mov them ua nyiaj, cawv txiv hmab pauv rau txiv ntoo roj.

Thaum kuv tsev neeg txav chaw mus rau lub nroog tshiab, wb ib niam txiv puav leej tsis tau muaj haujlwm. Kuj tsis muaj neeg los txais tos wb, rau qhov tseeb tiag… yeej tsis muaj neeg paub wb li! tiamsis muaj ib yam uas wb paub zoo yog: Yog Vajtswv twb pab rau ntau tus neeg ncaj ncees hauv Vajluskub thiab hauv keeb kwm ces Vajtswv kuj yuav tsis hnov qab wb.

Koj puas tau muaj zaum twg xav pib dua ib txoj kev tshiab, tiamsis ib ncig puav leej yog tej lus thuam thiab ua xyem xyav lawm tau? Xelunpanpees thiab Yausuas nkawd kuj raug cov uas laus zog ua rau nkawd qaug zog ib yam li ntawd. Exalas 3:12-13 sau tias thaum lub taw twb tau ua lawm, feem ntau cov pej xeem lawv qw zoo siab, tiamsis kuj muaj cov suab quaj! Cov pov thawj hlob muaj hnub nyoog lawm quaj vim lawv nco txog lub sijhawm uas Xalumoos lub tuam tsev ci ntsa iab thaum ub, thiab lawv paub tias qhov uas lawv rov qab ua zaum no yuav piv tsis tau lub yav tas los.

Thaum Vajtswv nqua hu koj pib ua haujlwm rau Vajtswv, cia li npaj kom txhij: tej kaujruam pib yuav me me xwb, tiamsis teeb meem yuav nyob puas ncig, nrog tej teeb meem tsis muaj nyiaj txiag, muaj kev txhawj ntshai thiab muaj kev qaug zog, ntau zaug yog pib ntawm cov ntseeg Vajtswv.

Mloog dhau yeej tsis muaj dabtsi zoo puas yog? Tiamsis twb yog vim li no es Vajtswv zoo siab thaum pom peb kam pib ua Vajtswv tes haujlwm. Los ntawm kev ntseeg thiab mloog lus yuav chwv txog Vajtswv, thiab rub raws txoj kev hlub nrog lub hwjchim saum ntuj ceebtsheej.

Thaum koj kam tshais ruam hauv kev mloog lus, Vajtswv yuav pub Vajtswv txoj kev hlub dhau ntawm tej phooj ywg uas koj xav tsis txog. Vajntxwv xailas txhawb cov neeg rov qab mus thiab pib ua tuam tsev. Cov vajntxwv Pawxias tomqab ntawd xws li Dali-us, Atexawxes kuj txhawb lawv ua txoj haujlwm no. tej zaug cov pejxeem hauv zej zog lawv tawm tsam, tiamsis cov neeg Yudais lawv ho txais tau kev pab los ntawm cov neeg muaj hwjchim tshaj lub sijhawm ntawd.

Thaum koj txhais ruam mus nrog kev ntseeg, Vajtswv tsis yog tsuas pab tej kev cheem tsum xwb, tiamsis tseem foom hmoov nplua mias rau koj thiab. Raws li lub sijhawm, cov neeg ua tuam tsev pib txais tau cov nyiaj pab thiab cov neeg tuaj pab. Vajtswv txib ib pab neeg rov qab los, zaum no yog Exalas ua tus coj. Vajntxwv Atawxawxes muab nyiaj kub thiab ntau yam khoom muaj nqis pub rau Exalas (Exalas 7), tsis tas li ntawd tseem samhwm rau cov tuav nyiaj kom: “yam twg uas Exalas xav tau puav leej muab kom txaus rau yawg.”

Koj xav saib zaj xwm txheej xaus li cas? Tuam tsev twb ua tiav, thiab qhov no txhawb Nehemis rov qab los puab tus ntsa yeej hauv Yeluxalees. Koj puas pom? Txawm yog pib los ntawm tej yam me me los, los ntawm lub siab mloog Vajtswv lus yuav dhau los ua lub zog cia rau lwm tus pib – thiab lub kaujkiv koob hmoov ntawd yuav ntws lug los.

Yog raws li Vajtswv tej lus Vajtswv tau hais: “Lawv twb tas kev cia siab lawm, rau qhov lawv tsis porn muaj txojkev zoo ntxiv lawm. Tiamsis lawv yuav porn Xelunpanpees rau siab ntso ua lub Tuamtsev, thiab lawv yuav zoo siab heev” (Xakhaliyas 4:10).

Kuv zaj xwm txheej tsuas pib ntawm ntu “pib me me xwb”. Tiamsis kuv tab pov tau ib qhov tias: Vajtswv twb npaj rau kuv tus txiv wb ib txoj haujlwm zoo, thiab kuv kawm tas ib nra ntawm lub tsev kawm qib siab. Thov kom Vajtswv zoo siab rau koj, thaum koj ncaj ncees pib los ntawm tej yam me me nyob hauv Vajtswv lub npe.

Thov caw nrog kuv peb thov Vajtswv ua ke: Tus Tswv, kuv ua koj tsaug rau txoj kev pib dua tshiab thiab muab koj tso rau hauv kuv lub neej. Txawm kuv tsis tau paub zoo txoj kev tom ntej los, kuv ntseeg tias Koj twb mus ua ntej thiab yuav coj kuv ib kaujruam zuj zus. Thov pub kom kuv muaj kev ntseeg tsis qaug zog thaum ntsib tej kev txomnyem. Thov pub kom kuv muaj lub siab tawv tiv dhau txoj kev ntshai, thiab ncaj ncees nrog koj mus txhua hnub raws li koj lub siab nyiam. Kuv thov hauv Tswv Yexus Khetos lub npe. Amees.

Cov kwv tij txhua tus, tej zaug hnub no koj tab tom hnov tej uas yus pib nws me me, tiamsis thov txhob saib yam ntawd tsis tseem ceeb. Rau qhov thaum koj ncaj ncees hnub no yuav qhib kev rau tej yam loj dua tom qab no, tsis yog tsuas tseg rau koj xwb, tiamsis tseem txhawb rau tej neeg ib ncig. Thov kom Vajtswv zoo siab rau koj tej kev pib me me rau hnub pib kawm ntawv. Thov Vajtswv ntxiv zog rau koj muaj lub zog tshiab, nrog Vajtswv txoj kev pab koj hauv txoj kev tom ntej.
Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.