Muaj tej txoj kev npau suav thaum me nws yeej tseem nyob rau ib qhov twg ntawd hauv peb lub siab zoo li ib daim duab kos tsis tau tiav. Tej kev npau suav ntawd nws ya saum nruab ntug, npau suav tau sawv saum sam thiaj, lossis tsuas yog tsim kom tau ib yam dabtsi twg zoo zoo ua rau lub ntiajteb yuav tau tig saib. Tiamsis tej zaum tsis tau muaj leej twg npau suav kom yus dhau los ua ib tug… qhev puas yog? Yeej tsis muaj leej twg xav tias yus yuav ua lub neej ntsiag to, yuav ua tej haujlwm uas tsis muaj koob npe nyob hauv lub neej no. Nyob rau hauv lub ntiajteb uas saib taus lub suab npe, thiab txais tau kev lees yuav, ces yuav ua li cas kom peb thiaj muaj lub siab zoo li ib tug qhev raws li Tswv Yexus tej lus qhia?

Hnub no, yog hnub 16/07/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke dhau ntawm Zaj kawm THOV PUB KOM KUV TAU UA KOJ TUS QHEV

“Cov uas nimno nyob tom tw yuav tau mus ua cov thawj, thiab cov uas nimno ua cov thawj, yuav tau los nyob tom tw.” (Mathais 20:16).

Thaum yau kuv npau suav kom yus yog ib tug uas txawj kos tej ris tsho hnav. Kuv xav kos thiab tsim tau tej cev ris tsho zoo, nws zoo thiab phim rau tus yamntxwv. Kuv xav mus thoob plaws lub ntiajteb, mus rau tej lub sam thiaj loj loj, xav kom yus yog tus neeg tawm los tau sawv daws npuaj tes txaus siab rau yus txoj kev siv zog. Ntawm no yog kuv txoj kev npau suav txawm yog nws yeej tseem tsis tau tshwmsim hauv kuv lub neej 40 xyoo dhau los. Tshuav koj ne zoo li cas? Thaum me koj npau suav ua txoj haujlwm dabtsi?

Muaj ib hnub, kuv mus nrhiav saum fuab cua Google “10 txoj haujlwm uas tej menyuam nyiaj tshaj”. Yeej nyob tsis dej tej uas kuv xam txog: Kws kho mob, cov hu nkauj, sau nkauj, ua movies, cov tub lag luam, tub ceev xwm, kos duab, tsav dav hlau, cov tub sib tw, thiab cov uas tsim ntsiab lus. Tej haujlwm no ib txwm swm heev. Tiamsis koj puas paub yam dabtsi tsis muaj zaug yuav tshwmsim nyob rau hauv cov haujlwm no? Ntawd yog “ua qhev”. Tsis muaj ib tug menyuam twg ho npau suav kom yus tau ua qhev.

Nyob rau hauv lub ntiajteb no, ua qhev yog txoj haujlwm uas qis tshaj. Lawv tsis nto npe, tsis muaj leej twg txheeb lawv lub npe, tsis yog tus neeg txiav ntaub nkag tsev tshiab, kuj tsis yog tus tau txheeb npe hauv tej haujlwm tau ua tiav. Tiamsis nyob hauv zaj lus piv txwv hais txog tus ua zog hauv lub vaj txiv hmab (Mathais 20:1-16), Tswv Yexus tau hais txog ib daim duab hloov pauv tag nrho tej kev xav ntawd.

Tus Tswv vaj tau ntiav neeg tuaj ua zog thaum sawv ntxov, tas rov qab ntiav neeg rau thaum cuaj teev sawv ntxov, kaum ob teev tav su, peb teev tsaus ntuj, thiab tsib teev tsaus ntuj. Yam uas xav tsis thoob tshwmsim rau thaum xaus: sawv daws, txawm tus yuav ua pes tsawg sij los puav leej tau txais tus nqi tib yam.

Cov neeg uas tuaj ua thaum sawv ntxov lawv yws. Lawv hnov cuag li yus raug ua tsis ncaj ncees. Thiab raws li tib neeg kev coj, qhov no yooj yim nkag siab. Tiamsis Tswv Yexus tab tom tham txog ib zaj lus piv txwv txog Vajtswv lub tebchaws, qhov chaw uas tus tsi luj tsis luj raws li tej uas yus ua tau, tiamsis yog nyob ntawm Vajtswv txoj kev hlub.

Vajtswv tsis yog tsis ncaj ncees. Vajtswv tsis yog tsuas “them nqi” raws li txoj kev uas peb cia siab xwb. Thaum peb hnov qab txojsia, txoj kev cawmdim, thiab txhua txoj koob hmoov hauv lub neej sab ntsujplig lawm tej no puav leej yog kev hlub, peb yooj yim poob mus rau qhov sib piv. Vim li cas tus ntawd ho tau ntau dua? Vim li cas Pawg Ntseeg tod ho loj hlob dua? Vim li cas tes haujlwm ntawd ho tawg paj txi txiv dua txawm yog thaum uas lawv “tsuas tuaj rau hauv vaj” thaum tsib teev tsaus ntuj?

Thaum saib ib tug kwv tij tau Vajtswv foom koob hmoov, ib Pawg Ntseeg loj hlob, ib tes haujlwm tawg paj txi txiv, peb yuav coj li cas?

Yog peb muaj kev khuam siab, ces yeej tsis muaj dabtsi yuav xav tsis thoob. Tiamsis yam uas txaus ntshai yog txoj kev khuam siab ntawd pauv los ua kev khib, sib piv, tas ua xyem xyav rau Vajtswv txoj kev ncaj ncees. Thiab ntawm no yog yam uas tus neeg tuaj ua zog thaum sawv ntxov hauv zaj lus piv txwv tau ua txhaum.

Peb tau nqua hu los ua lub neej “zoo siab nrog tus zoo siab, quaj nrog tus quaj” (Loos 12:15). Qhov no muaj lub ntsiab tias thaum lwm Pawg Ntseeg loj hlob, kuv zoo siab ib yam li yus Pawg Ntseeg tau koob hmoov. Thaum ua haujlwm pab yus tej kwv tij tawg paj txi txiv, kuv nco Vajtswv tshav ntuj ib yam li kuv nyuam qhuav tau txais. Thiab thaum ib tug twg nyuam kev, ib pab pawg twg ntsib dhau kev sim siab, kuv yuav tsis sawv sab nraud txiav txim, tiamsis nrog lawv koom khuv xim, koom thov Vajtswv pab kom lawv rov qab sawv taus.

Ib nyob rau hauv tej yam uas nyuaj tshaj ntawm sab ntsujplig tsis yog ua haujlwm, tiamsis tswj yus lub siab kom yog thaum pom lwm tus tau “them tus nqi” ntau dua li yus.

Peb tsis ua haujlwm kom tus kheej tau koob meej, lossis rau yus pab pawg loj hlob, tiamsis rau Vajtswv lub tebchaws. Yog muaj ib feem tau hwm ces tag nrho lub cev yuav tau koob meej. Thiab yog muaj ib feem mob, ces tag nrho lub cev yuav mob (I Kauleethaus 12:36).

Peb cheem tsum koom ua ib lub siab thiab ua siab dav, tsis yog pom lwm tus txi txiv xwb tiamsis yog ib txoj kev zoo siab, thiab tseem suav tias tej kev ua tiav ntawd yog yam uas Vajtswv ua rau Vajtswv txoj haujlwm.

Cia li xav txog cov neeg uas tau ntiav tuaj ua zog thaum tsib teev tsaus ntuj, lawv tsis yog tub nkeeg, timsis tej zaug lawv yog cov neeg laus, ua tsis tau haujlwm nrawm, lossis lawv nrhiav tsis tau haujlwm ua xwb. Txawm yog lawv ua tsawg dua los, tus tswv yeej them ib lub nyiaj thiab, tsis yog vim lawv tsimnyog, tiamsis vim yog tus tswv ntsia pom lawv muaj nqis.

Tswv Yexus tab tom qhia peb tias: nyob hauv Vajtswv lub tebchaws, tsis muaj ib tug twg yuav raug tso tom qab. Tsis muaj leej twg yuav lig dhau. Tsis muaj leej twg tsis muaj qab hau. Thiab txhua tus, txawm yuav ua ntev lossis nyuam qhuav ua los, puav leej muaj yus feem nyob hauv Vajtswv lub homphiaj cawmdim.

Tswv Yexus tsis yog tsuas qhia txog kev txo hwjchim xwb, tiamsis Tswv Yexus tseem ua neej pub rau qhov no. Tswv Yexus, tus uas tsim lub ntiajteb no, tau txhos caug ntxuav taw rau cov thwjtim. Thiab Nws tau hais tias: “Ib yam li ntawd Neeg Leej Tub, nws los nws tsis tau kom leejtwg tu nws, tiamsis nws los tu sawvdaws thiab muab nws txojsia los txhiv ntau leej (Mathais 20:28).

Lub ntiajteb no saib meej mom, hwjchim yog tias lawv ua tau. Tiamsis nyob hauv Vajtswv lub tebchaws, txo hwjchim thiaj yog tus yeej. Ntiajteb hais tias kom yuav tau nce siab. Vajtswv hais kom txo hwjchim. Ntiajteb nug “Kuv tau dabtsi?” Vajtswv nug “Koj puas hlub kuv tiag?”

Txoj kev npau suav thaum tseem me tau qhia rau kuv txog txoj kev npau suav thiab kev ntshaw. Thiab Vajtswv txoj kev hlub qhia kuv tias ua neej tsis yog tseg rau tus kheej tau ntsia pom, tiamsis yog cia kom lwm tus pom Vajtswv dhau ntawm yus lub neej. Tsis yog tau tsim los ua rau lwm tus pom zoo, tiamsis yog sib txhawb, sib pab, thiab koom ua haujlwm nrog lwm tus nyob hauv Leej Txiv tsev.

Thov caw nrog kuv peb thov Vajtswv ua ke: Tus Tswv, Koj yog Vajtswv thiab yog tus Tswv hauv kuv lub neej, thov pub kom kuv muaj lub siab zoo siab nrog tus uas tau koob hmoov, paub mob nrog tus uas ntsib teeb meem lossis ntog. Thov pub kom kuv tsis taij rau kuv feem, tiamsis ntseeg tias Vajtswv yog tus tsis muaj ib zaum twg hnov qab Vajtswv tej menyuam. Thov qhia rau kuv kom paub ua lub neej zoo li ib tug tub qhe, ua haujlwm ntsiag to, hlub tiag, koom ua ib hauv Leej Txiv tes haujlwm. Kom thaum kawg, kuv yuav hnov Vajtswv lub suab hais tias: “Kuv tus tub txib uas zoo thiab ncaj ncees cia li los nrog koj tus tswv zoo siab ua ke” Kuv thov hauv Tswv Yexus Khetos lub npe. Amees.

Cov kwv tij, txawm yuav ntxov thiab lig los, txawm koj ua ntau ua tsawg los, txawm yog koj sawv pem taub hau lossis tsuas yog tus sawv tom qab xwb los, peb txhua tus puav leej muaj feem nyob hauv Vajtswv lub homphiaj ib txhis. Thiab thaum koj ua lub neej nrog lub siab ua tus qhev, ncaj ncees thiab txo hwjchim, ces koj tab tom ua yam uas loj nyob hauv tus muaj loj tshaj lub qhov muag tau tuag saum ntoo khaub lig vim koj. Yog koj tau npau suav kom dhau los zoo li ib tug twg ntawd, yuav tau paub tias nyob hauv Vajtswv lub tebchaws, tau ua ib tug qhev ntseeg siab thiab mloog Vajtswv lus thiaj yog yam uas loj tshaj rau koj.
Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.