Hoi dăn geh sơñio be nhờm tă đah hwềng cau dòn Yàng dê. Ờs bơta hoi dăn la dờng mang bơh hơ̆ la gùng dà Yang Tom Trồ ai bơntơl pràn mơ lơh bol he in rềp đèt mèr tom bơta gơtòm klĕ mơ Kơnràñ rlau. Mơya, neh tŭ lơi ồng mò oh mi dòp git he mìng tùs mơ Yàng nàg ràng tơlik ală bơta păl càng he di lơm, mơ lơi hŭi lah he kùng păl càng ơm mŏ mŏ nàng kơno jơnau đơs Kơnràñ dê sơl?

Ngai do, ngai 04/8/2025, tơnggu Hoi Dan Kòp Ngai dăn jà ông mò oh mi dô nùs bal kơlồi sơnờng jnau Yàng kơnòm bơta dong kòl Lina Johnson bơh tơnggu IAT KƠNO JƠNAU ĐƠS LƠBƠÑ NIAM

Sră Goh: “Tơnơ̆ mơ bơta lơnggơr ù gơs lơmpiat ôs hơng; mơya ò gơs Yàng Jehôwa tom lơmpiat ôs hơng. tơnơ̆ mơ lơmpiăt ôs hơng, gơs dô jơnau lơbơn niam bơkah lơngồt.” (1 Ală Bơtau 19: 12)

Neh tŭ lơi ồng mo oh mi tơmbơh bơr điện thoại mơ kòp kơñ ngăn tòm pa bơta lơi hơ̆, mơya tŭ ồng mo oh mi ò hềt đơs sìr, gèn cau ơm bơh đah ne neh kăl rau sơl? Bơta do neh gơlik gơs mơ añ oă dơ̆. Mơ bơta do lơi wơl añ in bơta gơlơh iơh. Cau đah ne gen neh đơs jơh ală bơta he kơñ đơs, ai gah mơ añ gen ò gơs tŭ lơmpah lơi đơs ală bơta găm tom nùs he.

Gơs tŭ lơi ồng mò oh mi kơlồi bol he kùng lơh Yàng in gơlơh behơ̆ sơl? Bol he hoi dăn, mơya bol he iat kơnò sơl? Yàng Tom Trồ la Bơtau neh đơs mơ bol he. Dilah ò gèn ñchi bơh tai Yàng Jêsu đơs lah: “Belàt añ jê kơno jơnau đơs añ, añ git gơ mơ gơ jat ăñ.” (Jang 10: 27)? Yàng đơs mơ bol he kơnòm di Sră Goh mơ bơh hơ̆ đơs mơ nùs bol he. bo he kùng sền bal pơnah yal wơl be tơnơ̆ do bơh broă cau gơnoăr hwơr Êli tip Yàng:

“Yàng Tom Trồ đơs mơ khai lah: “Lik lòt tĕ, ntao di jơng mơnơm di đăp Yàng Jêhôwa. do Yàng Jêhôwalot gan, gơs dô ròs càl dơng khồm pràn ngăn di dăp Kơnràñ, crè mơnơm, mơ lơh lì làc ală pơnai lŭ; mơya ò gơs Yàng Jêhôwa tòm ròs càl hơ̆. Tơnơ̆ mơ ròs càl gơs bơta gơlơnggơr ù. Tơnơ̆ mơ bơta gơlơnggơr gơs lơmpiăt ồs hơng; Mơya ò gớs Yàng Jêhôwa tom lơm piăt ồs hơng. Tơnơ̆ mơ lơmpiăt ồs hơng, gơs dô jơnau lơbơñ niam, bơkah lơngồt. Tŭ Êli pa kơnọ jơnau hơ̆, gèn ai ao jrùh gom muh măt he, lik lòt ntao di bơr rgồng; do gơs dô jơnau đơs mơ khai lah: “Ơ Êli, ñchi mê lơh tềng do taih?”(1Bơtau 19: 11-13)

Sêng Sră Goh do yal wơl bơh bơta tơlik mat Yàng Tom Trồ dê mơ cau gơnoăr hwơr Êli hơđăng mơ nơm Hôrêp. Kơno Êli neh tơnchơt ală cau gơnoăr hwơr Baal di, Jêsabên gơjrañ mơ srat să rơp tă bơta kis ông dê. Êli pal dô pleh nàng dong tă bơta kis he dê. Tòm bơta jê sồt mơ roh gơn kơnòm, ông hoi dăn Yàng tă bơta kis ôg di. Mơya tòm mơnơm Hôrêp, Êli neh geh tơm bơh bơr mơ Yàng Jêhôwa. tòm tŭ Yàng tơlik mat, gơs dô ròs càl dơng tian gơs mơnơm gơ crè, ală pơnai lŭ bơcah rpòt rpèt, băl mơ bơta gơlơnggơr ù mơ ồs. Moya,Yàng ò gơs tòm ròs càl dơng hơ̆, kùng ò gơs tòm bơta gơlơng gơr hala ồs. tơnơ̆ mơ jơh ală bơta, Êli mìng kơno “dô jơnau lơbơn niam”.

Kùng be Yàng Tom Trô neh đơs mơ Êli, Kơnràñ găm pơnjat bơtô mơ bol he ngai do. Sră Goh la mơnàng kơ̆ cê mơ la bơta yal tơlik wil tơl (2Timôthe 3:16). Sră Goh tề lăm bol he tòm oă pơnah, mơya ò di tŭ lơi kùng păl gơs wil tơl ai kờp ală bơta gơlik gơs: be broă lơh, tiah lơh broă, hala ală kơnă dờng mang.

pơnyơu, tòm 2Têsalônika 3:10 gớ cih: “Dilah cau lơi ò bai lơh broă, gegn kùng ò geh gơnoăr nàng sa sơl.” Bơta do ai tơnggit lah Yàng sền dờng mang bơta lơh broă. Dilah bol he kờñ gơs phăn sa, bol he păl tơryăng-tơryồng lơh broă. Bulah behơ̆, Sră Goh kùng ò đơs loh lah bol he păl càng lơh broă loh lang lơi,mơ hơ̆ la bơta mơ bol he pal càng joì git nùs kờñ Yàng dê: găn di Jơnau Sră Goh, bơta hoi dăn , kơnòm bơta dong kòl Yàng Hwềng Goh dê.

Cau gơnoă bơtô ăn jê neh đơs: “Yàng gơs dô bơta rơndăp niam rlau jơh rai ồng mò oh mi dê, mơya di gơlăn gơ ò rgơi ndrơm mơ bơta rơndăp mơ ông mo oh mi neh ơn lai.” Behơ̆, ồng mò oh mi rgơi lùp: Bơta hơ̆ la mbe lơi taih? Lơh mbe lơi añ rgơi kơno Jơnau Yàng? Sềng hơ wơl ngăn la ƀuôn: ơn tĕ tŭ jơ mơ Kơnràñ. Kùng ndrơm be añ neh kol cau lơi hơ̆ mhăr pơndùt bơta hòi lùp, añ kùng neh mhằr pơndùt lik bơh bơta tơmbơh mơ Yàng. Tom tŭ bol he hoi dăn, Yàng iat kơno, mơ kùng đơs tòm nùs bol he. Bơta hoi dăn la dô bơta tơm bơh bơr ò di la bơta đơs tơmbơh is. Dilah ồng mò oh mi càng bơta tề lăm, sền sơwì tĕ Sră Goh, kis tĕ mơ Jơnau Yàng. Dilah ồng mo oh mi càng Yàng tề lăm lơh lang rlau tai, ơn tĕ tŭ jơ ơn is ngềt ngơt di đap Yàng mơ jòi jat Kơnràn.
“
Dilah bol he ò ơm ngềt ngơt dê đăp Yàng, lơh mƀe lơi bol he rgơi dòp git nùs kờñ Kơnràñ? Lơi tĕ Să tòm he in dô bơta gơlòng tòm ngai do, hơ̆ la, ơn tŭ jơ Yàng in mơ ơn tŭ jơ iat kơno Kơnràñ. Jơnau đơs Kơnràñ. Jơnau Kơnràñ dê rờp cềng wơl bơta rìng lơngai dô bă loh làng. Yang rơp ò tŭ lơi sơlơŭ wơl mơ să tòm Kơnrañ. Jơh ală bơta Kơnràñ đơs sùm sùm tòm toh mơ jơh ală bơta Sră Goh neh cih.

Nàng iat kơno Jơnau Yàng dê, bol he pal càng bơtê tiar, mơ hơ̆ la dô bơta di pal mơ tŭ jơ mơ bơta pràn bol he di neh săng. Jà tĕ Yàng mùt tòm rài kis ồng mò oh mi di. Sơntòm bơh broă sền sèng Sră Goh mơ tih dờng tòm Kơnràñ. Să tòm Yàng rờp dong kơl ồng mo oh mi dòp git Kơnràñ, wơng loh Jơnau Kơnràñ, mơ bơtê iat kơno Jơnau Yàng kòp ngai.

Dan jà bol he dô nùs bal tòm bơta hòi dan:
Khoai Yàng Kờñ Gơboh kòn dê. Ưn ngai Kơnràñ bơh Kơnràñ sùm tơlik mat di gah kòn mơ iat kơno Jơnau hoi dăn kòn dê tòm kòp tŭ, kòp ơnih. Ơ Yàng, oă dơ̆, kòn sơrbac sơrbăng tùs mơ Yàng, đơs mơ Yàng oă bơta mơ ò kong ơm mŏ mŏ nàng tơnkrăm he tòm bơta gơs măt Kơnràñ dê. Dăn Yàng toh glài kòn in. Dăn Yàng bơtô Kòn git ơm mŏ mŏ dê đăp Kơnràñ, nàng kòn git lam ngăn bơta gơs măt Kơnràñ dê, mơ iat kơno jơnau đơs lơbơñ niam Kơnràñ dê găn dê Jơnau Yàng mơ kơnòm Yàng Hwềng Goh bơtô sồr. Dan Yàng ai kòn in gơnoăr pràn nàng kis jat Jơnau Kơnràñ dê kòp tŭ kòp jơ tòm rài kis kòn. Kòn jơh nùs hoi dăn tòm sơnđăn Yàng Jesu Krist, Amen.

Ơ ală ồng mò oh mi kòñ gơboh, digùl bơta lơh lòt kís giga oă broă pah tơngai ngài do di, bol he ƀuôn ngăn lơh roh bơta ơm mŏ mŏ păl càng ngăn tòm tŭ jơ tòmbơh bơr mơ Yàng. Oă dơ̆, bol he ming tơl tŭ nàng ơn Kơnràñ in dô nơm sră rơndăp jòng ală tơnggu mơ ală bơta păl càng, mơ lơi hŭi bơta hòn chò hừh hờh tŭ geh ơm tòm bơta gơs măt Yàng dê. Ngai do, bol he bañ mhăr gơjăl tòm jơ hòi dăn mơ Yàng, mơya ơlĕ, ơdàr tĕ, dơh tĕ dô êt tŭ nàng git làmJơna Yàng, nàng kơlồi sơnờng di gah Yàng mơ iat kơno jơnau đơs Kơnràñ dê. Bơh hơ̆, hoi dăn ò di la dô bơta tòm bơh bơr tòm bơh is, mơ la dô bơta tòm bơh bơr băl bơkah lơngồt digùl kòp nă bol he mơ Bềp Hơđăng Trồ.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.