Thov Vajtswv tau muab piv zoo li txoj kev ua pa ntawm sab ntsuj plig hauv tus ntseeg Vajtswv. Qhov uas thov Vajtswv nws tseem ceeb los vim ntawd yog txoj kev uas Vajtswv yuav ntxiv zog thiab ua rau kom peb nyob ze Vajtswv hauv txoj kev sib raug zoo ua ke nrog Nws. Tiamsis, puas tau muaj zaum twg koj pom tias yus tsuas mus cuag Vajtswv nthuav qhia yus tej kev cheem tsum xwb, ho hnov qab tias yus kuj yuav tau ntsiag to mloog Vajtswv lub siab hais tuaj rau yus thiab?

Hnub no, yog hnub 04/08/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Lina Johnson dhau ntawm Zaj kawm UA TIB ZOO MLOOG LUB SUAB MOS MUAG

Vajluskub: “Tom qab av qeeg tas txawm muaj hluavtaws, tiamsis tus Tswv tsis nyob hauv cov hluavtaws ntawd li thiab. Ces thaum cov hluavtaws dhau lawm, txawm muaj ib lub suab hais yau yau tuaj” (I Vajntxwv 19:12).

Puas tau muaj zaum twg koj sib tham hauv xov tooj thiab kub siab heev xav qhia txog ib yam dabtsi lawm tau, tiamsis thaum koj tsis tau hais, ces tus neeg hu tuaj cia li tua xov tooj lawm? Qhov no tshwmsim rau kuv ntau zaug. Thiab nws ua rau kuv pom tias tsis zoo. Tus tod ces nws twb hais tas tej uas nws xav hais, tshuav kuv yeej tsis muaj sijhawm los hais yam uas nyob hauv kuv lub siab.

Puas muaj zaum twg koj xav tias peb kuj ua rau Vajtswv hnov zoo li ntawd thiab? Peb thov Vajtswv, tiamsis peb puas mloog Vajtswv hais? Vajtswv yog tus hais rau peb. Yog tsis li ntawd vim li cas Tswv Yexus ho hais tias: “Kuv pab yaj paub kuv lub suab thiab kuv paub lawv thiab lawv mloog kuv.” (Yauhas 10:27)? Vajtswv hais rau peb dhau ntawm Vajluskub thiab dhau hauv peb lub siab.

Peb koom saib ua ke ntu Vajluskub uas hais txog tus cev lus Eliyas ntsib Vajtswv:

“Tus Tswv teb Eliyas hais tias, “Koj cia li tawm mus sawv saum ncov roob tabmeeg kuv.” Tus Tswv txawm hla los mus thiab ua cua daj cua dub ntsawj tej pov roob tawg pleb zorn zaws thiab tej pobzeb tawg dawbvog, tiamsis tus Tswv tsis nyob hauv cov cua ntawd. Tom qab cua tu lawm, txawm muaj av qeeg, tiamsis tus Tswv tsis nyob hauv qhov av qeeg ntawd thiab. Tom qab av qeeg tas txawm muaj hluavtaws, tiamsis tus Tswv tsis nyob hauv cov hluavtaws ntawd li thiab. Ces thaum cov hluavtaws dhau lawm, txawm muaj ib lub suab hais yau yau tuaj. Thaum Eliyas hnov lub suab ntawd, nws txawm muab nws lub tsho los npog nws ntsejmuag thiab tawm mus sawv ntawm rooj tsuas. Muaj ib lub suab hais rau Eliyas hais tias, “Eliyas, koj tuaj ua dabtsi ntawm no?” (I Vajntxwv 19:11-13).

Ntu Vajluskub no hais txog zaj xwm txheej Vajtswv tshwm los hais rau Eliyas thaum yawg nkaum saum lub roob Hules. Hnov xov tias Eliyas tau tua cov cev lus Npa-as, Yexanpees npau taws thiab cog lus yuav tua Eliyas pov tseg. Eliyas mus khiav nkaum cawm nws txojsia. Thaum tag kev cia siab, yawg thov Vajtswv tshem yawg txojsia mus. Tiamsis nyob saum roob Hules, Eliyas tau ntsib Vajtswv. Thaum Vajtswv tshwm los, muaj ib nthwv khaub zeeg cua tshuab tuaj ua rau lub roob faib ua ob sab, cov pob zeb tawg tas, nrog rau av qeeg thiab nplaim taws cig hauv av tuaj. Tiamsis, Vajtswv tsis nyob hauv kuj tsis nyob hauv nthwv av qeeg. Tomqab ntawd, Eliyas tsuas hnov “ib lub suab mos muag maj mam hais tuaj”.

Kuj zoo ib yam li uas Vajtswv tau hais rau Eliyas, Vajtswv yeej tseem qhia peb niaj hnub nim no. Vajluskub yog tus cag ruaj khov thiab yog txoj kev qhia zoo (II Timautes 3:16). Vajluskub qhia peb los ntawm ntau txoj kev, tiamsis tsis yog thaum twg twb taw qhia meej meej rau txhua yam: xws li xaiv haujlwm, qhov chaw ua haujlwm, lossis tej ntu sijhawm tseem ceeb hauv lub neej.

Pivtxwv, nyob hauv II Thexalaunikes 3:10 sau: “yog leej twg tsis xav ua haujlwm, ces kuj txhob pub rau noj” Qhov no ua rau pom Vajtswv saib taus txoj kev ua haujlwm. Yog peb xav kom muaj noj, peb yuav tau nquag ua haujlwm. Tiamsis, Vajluskub tsis hais meej meej peb yuav tau ua tej haujlwm twg, thiab ntawd yog yam uas kuv yuav tau nrhiav Vajtswv lub siab nyiam; dhau ntawm Vajluskub, dhau ntawm kev thov Vajtswv, dhau ntawm Vaj Ntsujplig coj kev.

Kuv tus xibhwb tau hais tias: “Vajtswv muaj homphiaj zoo rau koj lub neej, tiamsis tej zaug nws yuav tsis zoo li tej uas koj tau npaj.” Yog li, koj yuav nug tias: Qhov ntawd yog zoo li cas? Yuav ua li cas kuv thiaj hnov Vajtswv lub suab? Lo lus teb yooj yim xwb: tseg sijhawm rau Vajtswv. Kuj zoo ib yam li kuv tau raug ib tug twg txiav kiag kuv kev tham lus hauv xov tooj, kuv kuj twb tau maj nroos tawm hauv txoj kev nrog Vajtswv sib tham mus lawm. Thaum peb thov Vajtswv, Vajtswv mloog, thiab kuj hais rau peb lub siab. Thov Vajtswv yog ib txoj kev sib tham tsis yog ib leeg tham. Yog koj tau taw kev, yuav tau tshuaj Vajluskub, ua lub neej hauv Vajtswv tej lus. Yog koj cheem tsum Vajtswv taw kev kom meej dua, tseg sijhawm ntsiag to nrog Vajtswv nyob ua ke thiab nrhiav Vajtswv.

“Cia li nyob twjywm thiab paub tias kuv yog Vajtswv” (Ntawv Nkauj 46:10a).

Yog peb tsis nyob twjywm ntawm Vajtswv xub ntiag, yuav ua li cas thiaj paub Vajtswv lub siab nyiam? Cia ib qhov kev sim siab rau koj tus kheej hnub no, tej zaug ntawd yog, tseg sijhawm rau Vajtswv thiab ua tib zoo mloog Vajtswv lub suab. Vajtswv lub suab yuav ua rau koj muaj kev kaj siab meej kawg nkaus. Vajtswv yuav tsis muaj ib zaum twg tawm tsam nws tej lus. Txhua yam Vajtswv hais puav leej yog raws li tej uas Vajluskub sau.

Kom hnov Vajtswv lub suab, peb yuav tau xyaum, thiab ntawd yog ib ntu kev tsimnyog peb siv sijhawm thiab dag zog rau. Caw Vajtswv nkag los rau hauv koj lub neej. Pib los ntawm qhov uas nyeem Vajluskub thiab loj hlob hauv Vajtswv. Vajtswv yuav pab kom koj paub Vajtswv, nkag siab zoo Vajtswv tej lus, thiab kawm txoj kev mloog Vajtswv lub suab txhua hnub.

Thov caw nrog kuv peb thov Vajtswv ua ke
Kuv tus Vajtswv uas muaj kev hlub. Ua Vajtswv tsaug vim Vajtswv nyob rawv ntawm kuv thiab mloog kuv tej lus thov txhua lub sijhawm, txhua qhov. Vajtswv, ntau zaug kuv maj nroos los cuag koj, hais rau koj ntau yam tiamsis kuv ho tsis nyob twjywm hauv koj txoj kev tshwm ntsej muag. Thov Vajtswv zam txim rau kuv. Thov Vajtswv qhia rau kuv paub nyob ntsiag to ntawm Koj xub ntiag, kom kuv saj tau Koj txoj kev tshwm ntsej muag, thiab hnov koj lub suab hais mos muag dhau ntawm koj tej lus thiab Vaj Ntsujplig tej lus qhia. Thov pub kom kuv muaj lub zog ua lub neej raws li Koj tej lus txhua feeb hauv kuv lub neej. Kuv thov hauv Tswv Yexus Khetos lub npe. Amees.

Cov kwv tij, nyob hauv txojkev ua neej maj nroos li niaj hnub nim no, peb yuav yooj yim ua poob txoj kev nyob ntsiag to cheem tsum hauv lub sijhawm nrog Vajtswv sib tham. Muaj ntau zaug, peb tsuas txaus sijhawm nyeem rau Vajtswv paub txog tej teeb meem thiab kev cheem tsum xwb, tiamsis hnov qab txoj kev zoo siab thaum uas tau nyob hauv Vajtswv txoj kev tshwm ntsej muag. Hnub no, peb txhob maj nroos hauv txoj kev nrog Vajtswv sib tham, tiamsis yuav tau maj mam, nres ib me ntsis kom tau saj Vajtswv tej lus, xav txog Vajtswv thiab mloog Vajtswv lub suab. Rau qhov, thov Vajtswv tsis yog ib txoj kev yus cim civ tham, tiamsis yog ib txoj kev sib tham qab zib ntawm peb nrog Vaj Leej Txiv saum ntuj.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.