Krao khan đei pơtih thoi dui jơhngơ̆m gah bơhngol đơ̆ng bơngai lui kơ Kră Yang. Trŏ kơ krao khan gĭt kăl yua kơ ‘noh jơ̆ mă ‘Bok Kei-Dei pơthim jơhngơ̆m pran păng ăn kơ lu bơ̆n jê̆ hơdai lăm tơdrong pơgơ̆p hăm Sư hloh. Mă lei, đei layơ buăl băt kơ năl kơdih lăp năm hăm Kră Yang wă roi tơbăt dôm tơdrong kăl wă, na hiơt khan kơdih kŭm kăl kơ thĕng hreh wă mơ̆ng kơtơ̆ng đơ̆ng Sư khan ưh?

Năr ‘nâu, ‘năr 04/08/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Lina Johnson kơ̆l ‘bai MƠ̆NG NƠ̆R PƠMA HƠBÔN.

Sơ̆p Hla Bơar ‘Bok Kei-Dei: “Đơ̆ng rŏng kơ teh tơdrŏ đei pla ŭnh; mă-lei Kră Yang kư̆m ưh kơ oei lăm pla ŭnh. Đơ̆ng rŏng kơ pla ŭnh đei nơ̆r hơbôn pơma hơdar.” (I Pơtao 19:12)

Đei layơ buăl pơma dơnuh điê̆n thoăi păng ‘maih wă ră roi tơdrong kiơ noh, mă lei kơplah buăl tim mă tam pơma, na bơngai tơ pah to đei pĭt kơ măi bơih ưh? Tơdrong ‘nâu đei truh hăm inh lơ wơ̆t. Păng sư đei lê̆ mĭnh tơdrong mơn ưh kơ hiôk. Bơngai ‘noh lei đei pơma đĭ dôm lu tơdrong kiơ lu sư wă pơma, na inh ‘noh ưh kơ đei jơnăr pơma tơdrong oei đei lăm jơhngơ̆m kơdih.

Đei layơ buăl tơchĕng lu bơ̆n kŭm pơm kơ Kră Yang mơn ‘bôh thoi noh ưh? Lu bơ̆n krao khan, mă lei lu bơ̆n hăm mơ̆ng kơtơ̆ng ưh? ‘Bok Kei-Dei jơ̆ Tơ’ngla khan hăm lu bơ̆n. Tơdah ưh lei yua kơ liơ Kră Yang Yêsu đei pơma: “Dah iĕm triu Inh tơpă lei iĕm băt kơ ‘bơ̆r Inh pơma hloi păng Inh kư̆m băt kơ iĕm mơ̆n, na iĕm kiơ̆ Inh hloi.” (Yôhan 10:27)? Kră Yang khan kơ lu bơ̆n đơ̆ng Nơ̆r ‘Bok Kei-Dei păng đơ̆ng ‘noh khan lăm jơhngơ̆m lu bơ̆n.

Lu bơ̆n hơdai lăng chăl roi tơbăt tơ ala âu gah ‘bok Êli tơ’bơ̆p Kră Yang:
“Kră Yang khan: “Lĕch bĕ păng dơ̆ng ‘bơ̆t anăp Kră Yang tơ kơpal kông, yua kơ Kră Yang wă năm trong ‘noh.” Đei hloi kial tih tơthu kơtang ‘bơ̆t anăp Kră Yang, kial tơthu pơm kơ kông ‘noh đah lang păng lu tơmo pơchah đĭ, mă-lei Kră Yang ưh kơ đei lăm kial ‘noh. Đơ̆ng rŏng kơ kial hơbŭt ‘noh đei teh tơdrŏ, mă-lei Kră Yang kư̆m ưh kơ đei lăm teh tơdrŏ. Đơ̆ng rŏng kơ teh tơdrŏ đei pla ŭnh; mă-lei Kră Yang kư̆m ưh kơ oei lăm pla ŭnh. Đơ̆ng rŏng kơ pla ŭnh đei nơ̆r hơbôn pơma hơdar. Lăp Êli kơtơ̆ng nơ̆r pơma ‘noh sư iŏk ao tai gom muh măt sư, păng lĕch dơ̆ng ‘bơ̆t ‘măng hơgơp tơmo. Đei nơ̆r khan kơ sư, “Ơ Êli, ih pơm kiơ tơ âu?” (I Lu Pơtao 19:11-13).

Chăl ‘nâu đei roi dơ̆ng hơ’mon ‘Bok Kei-Dei tơ’bôh Sư hăm ‘bok Êli kơpal kông Hôrep. Mơ̆ng băt ‘bok Êli đei pơlôch lu bơngai khan lê̆ adrol gah Baal, yă Jêsebel blĕk păng pơkă khan gô pơlôch sư. ‘Bok Êli đei kơdâu ôn wă dŏng tơdrong arih kơdih. Lăm kơplah ưh pă hơmĕng, sư krao apĭnh Kră Yang iŏk tơdrong arih sư. Mă lei tơ kông Hôrep, ‘bok Êli đei gơh tơ’bơ̆p ‘Bok Kei-Dei. Kơplah Kră Yang ‘bôh, đei mĭnh pôm kial dơhlu pran jăng mah truh kơ kông đei blah tŏk bŏk, lu tơmo đei pơchah, hơdai hăm teh tơdrŏ păng ŭnh. Đơ̆ng rŏng kơ đĭ đăng, ‘bok Êli lăp mơ̆ng kơtơ̆ng “mĭnh nơ̆r hơbôn pơma hơdar”.

Kŭm thoi ‘Bok Kei-Dei đei khan hăm ‘bok Êli, Sư oei pơtrơp khan bơtho lu bơ̆n dang ei. Sơ̆p Hla Bơar ‘Bok Kei-Dei jơ̆ hơnă kơjăp păng jơ̆ tơdrong tơ’bôh tôm tơdrong (II Timôthê 3:16). Sơ̆p Hla Bơar ‘Bok Kei-Dei bơtho lu bơ̆n lăm lơ tơdrong, mă lei ưh kơ trŏ layơ kŭm đei tôm hơđăl kơ rim tơdrong tơ’bơ̆p: thoi kơ tơdrong rơih tơdrong jang, anih bơ̆jang, dah dôm lu tơdrong tơm kăl.

Pơtih gia, lăm II Têsalônik 3:10 đei chih: “Bơngai bu alah ưh kơ wă jang, iĕm ‘nĕ kơ ‘me sư.” Tơdrong ‘nâu đei tơ’bôh Kră Yang lăng gĭt kơ tơdrong bơ̆jang. Tơdah lu bơ̆n ‘maih wă kơ đei tơmam sa, lu bơ̆n athei pơnam kơ bơ̆jang. Mă lei, Sơ̆p Hla Bơar ‘Bok Kei-Dei ưh kơ pơma hơđăl lu bơ̆n kăl athei bơ̆jang tơdrong jang hơđăl ayơ, păng ‘noh jơ̆ tơdrong mă inh kăl kơ chơ chă kiơ̆ kơ Kră Yang wă: đơ̆ng nơ̆r lăm Sơ̆p Hla Bơar ‘Bok Kei-Dei, đơ̆ng tơdrong krao khan, đơ̆ng tơdrong bơtho tơ’bôh đơ̆ng Yang Bơhngol ‘Lơ̆ng.

‘Bok bơtho kơ inh đei pơma: “Kră Yang đei mĭnh tơdrong proh hơmet ‘lơ̆ng rŏ kơ chăl arih buăl, mă lei kŭm phŏ sư gô ưh kơ lĕi lăi hăm tơdrong proh hơmet mă buăl đei hơmet.” Thoi noh, buăl kŭm gơh jet: Tơdrong ‘noh jơ̆ thoi yơ? Pơm liơ inh gơh mơ̆ng kơtơ̆ng nơ̆r Kră Yang? Nơ̆r tơl ‘bônh tơpă: athei ‘măn jơnăr hăm Sư.
Kŭm thoi inh đơ̆ng đei bơngai bu ‘noh hăt hot kơ pơtôch tơdrong krao manuh, inh kŭm đơ̆ng đei hăt hot weh đơ̆ng tơdrong pơma dơnuh hăm Kră Yang. Kơplah lu bơ̆n krao khan, Kră Yang mơ̆ng kơtơ̆ng, păng kŭm khan lăm jơhngơ̆m lu bơ̆n. Tơdrong krao khan jơ̆ mĭnh tơdrong pơma dơnuh ưh kơ trŏ kơ đŏk. Tơdah buăl kăl kơ đei bơtho tơ’bôh, athei lăng chơ chă lăm Sơ̆p Hla Bơar ‘Bok Kei-Dei, athei arih hăm Nơ̆r đơ̆ng Kră Yang. Tơdah buăl kăl kơ Kră Yang chông anhăk hơđăl hloh, athei ‘măn jơnăr thĕng hreh ‘bơ̆t anăp Kră Yang păng chơ chă Sư.

“Hreh bĕ athei băt Inh boih Kră Yang ‘Bok Kei-Dei”. (Hơriso 46:10a)

Tơdah lu bơ̆n ưh kơ thĕng hreh ‘bơ̆t anăp Kră Yang, lei thoi yơ lu bơ̆n băt kơ tơdrong Sư wă? Athei ăn kơ akâu jăn buăl mĭnh tơdrong pơlong lăng lăm năr ‘nâu, ‘noh jơ̆, ‘măn jơnăr kơ Kră Yang păng ‘măn jơnăr mơ̆ng kơtơ̆ng Sư. Nơ̆r đơ̆ng Sư gô ba truh tơdrong hiôk hian hơđăl dêh. Kră Yang gô ưh kơ layơ ưh kơ jing mĭnh hăm kơdih Sư. Tôm tơdrong Sư khan ling lang trŏ hăm dôm lu tơdrong kiơ Sơ̆p Hla Bơar ‘Bok Kei-Dei đei chih.

Wă kơ mơ̆ng kơtơ̆ng nơ̆r Kră Yang, lu bơ̆n kăl kơ pơjuăt, păng ‘noh jơ̆ mĭnh trong yak trŏ hăm tôm jơnăr păng tơdrong đei adrin. Athei krao wơ̆n Kră Yang mơ̆t lăm tơdrong arih buăl. Pơtơm hăm tơdrong đŏk Sơ̆p Hla Bơar ‘Bok Kei-Dei păng wơ̆ ‘lŏ lăm Sư. Kơdih Kră Yang gô tơgŭm buăl băt kơ Sư, hlôh hơđăl Nơ̆r Sư, păng pơhrăm iŏk mơ̆ng kơtơ̆ng nơ̆r Sư rim năr.

Apĭnh đĭ đăng krao khan hơdai:
Kơkuh kơ Kră Yang ‘mêm mơnat kơ kon. Bơnê kơ Kră Yang yua kơ Ih ling lang oei hơdai hăm kon păng mơ̆ng kơtơ̆ng nơ̆r kon krao khan lăm rim jơ, rim anih. Kră Yang ơi, lơ wơ̆t kơplah kon hăt hot năm hăm Kră Yang, roi hăm lơ tơdrong mă ưh kơ wă thĕng hreh wă mơ̆t lăm tơdrong oei hơdai đơ̆ng Ih. Apĭnh Kră Yang huay kơ jô̆ yo kơ kon. Apĭnh Kră Yang bơtho kon băt thĕng hreh ‘bơ̆t anăp Ih, wă kơ kon hlôi mơn đei tơpă tơdrong oei hơdai đơ̆ng Ih, păng mơ̆ng kơtơ̆ng nơ̆r khan hơbôn đơ̆ng Ih lăm Nơ̆r Kră Yang păng đơ̆ng Yang Bơhngol ‘Lơ̆ng bơtho. Apĭnh Kră Yang ‘măn ăn kơ kon jơhngơ̆m pran wă kơ arih kiơ̆ thoi Nơ̆r Ih lăm rim jơ phŭt đơ̆ng chăl arih kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng ‘mêm kơ-eng, tŏk bŏk tơdrong arih hăt hot đơ̆ng chăl dang ei, lu bơ̆n ‘bônh dêh tơ hiong tơdrong thĕng hreh gĭt kăl lăm jơ pơgơ̆p hăm Kră Yang. Lơ wơ̆t, lu bơ̆n lăp tam pơyơ̆r kơ Sư mĭnh tơdrong chih hơmet lơ kơjung dôm lu tơdrong anat păng tơdrong kăl wă, na hiơt kơ tơdrong hiôk chơt ‘nă hal kơplah gơh oei lăm tơdrong oei hơdai đơ̆ng Kră Yang. Năr ‘nâu, lu bơ̆n ‘nĕ kơ hăt hot lăm jơ krao khan hăm Kră Yang, mă lei athei hiơ̆ ‘biơ̆, athei pơdơh tŏ sĕt wă kơ mơn đei Nơ̆r Kră Yang, wă tơchĕng pơwao hơdai Kră Yang păng mơ̆ng kơtơ̆ng nơ̆r khan đơ̆ng Sư. Yua kơ, krao khan ưh kơ trŏ jơ̆ mĭnh tơdrong pơma đŏk, mă jơ̆ mĭnh tơdrong pơma dơnuh ‘ngam rơngơp lăm lu bơ̆n hăm ‘Bă Kơpal Plĕnh.
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.