La cau dòn Yàng, bol he geh hòi sàc nàng gơlik gơs cau lơh cơng Kơnràñ in tom dunnia do. Bơto yal Jơnau Yàng ò di tŭ lơi kung buôn-soh, tài bơh tom ală ngai lồi dut, oă cau rơp ò bai iat jơnau sọ̆ng. Mơ ya bulah behơ̆, ntào di đap ală bơta bòl glar mơ sò-dră hơ̆, bol he rùc wơl mơ dòp ală bơta gơlik gơs hala ò? Jơnau Yàng tơngkah bol he mbe lơi bơh gơnoar broă pal cang do?

Ngai do, ngai 03/08/2025 Bơta Hòi Dan Kờp Ngai dan jà jơh ală cau iat kơlôi sơnơng Jơnau Yàng kơnòm di bơta dong kơl Esther Griffin dê bơh tơnggume KƠ̆ NÙS BƠTO YAL JƠNAU YÀNG.

Sră Goh: “Bơto yal tĕ jơnau Yàng, jơh nùs tĕ bulah bơtoah hala ò bơtoah, ai tơl bơta kong ơt mơ bơta bơto sồr nàng bơto tơnggit, lah pơrhơng mơ bơto pơndòm.” (II Timôthe 4:2)

Gơs tŭ lơi oh mi gơkòl klơ̆n ò rgơi tơmbơh bơr hala buôn-wờng la ò geh kơlôi tus tài bơh oh mi neh đơs bơh Yàng hala ò? Dilah gơs, oh mi ò di la cau sơnròp. Yàng Jesu tơngkah bol he: “Dilah dunnia gơjrañ-kơuềng dê bol mê, gen git tĕ lah bol khai neh gơjrañ-kơuềng dê añ lài mơ bol mê rau.” (Jang 15:18). Tom Tŭ gam ơm tom dunnia, Yàng Jesu bơto yal ală bơta sơrlèt rlau mơ bơta kơlôi sơnơng be òs làng bol di tŭ hơ̆; Kơnràñ kung bơtọ pơniam wơl ală broă lơh wàñ- kơrlêh hala ală bơta bơto tìs bơh Lơgar Trồ bol khai dê (Mathiơ 23:13-28).

Ò di cau lơi kung kòñ gơboh jơnau bơto Yàng Jesu dê. Ngan behơ̆, oă cau neh đi-ngkơi ò bai jat Kơnràñ tài (Jang 6:60-66). Mơ ya añ dòn lah dilah Yàng Jesu ò đơs ală jơnau sọ̆ng hơ̆, bol he ò tŭ lơi dòp git lah he pal cang dô Bơtau Dọ̆ng-Klàs.

Bulah gơlơh be kălkê iat mơ lơh jê sồt nùs nhơm jòng-să, mơ ya mìng Jơnau Song rgơi dong kơl kòn mơnus đal git tồi-glài mơ bơta ò tơl pràn di đap tồi-glài să tòm he dê. Kung ò gơs bơta lơi nàng kalkê wă wơng tom tŭ kòn mơnus mìng kòñ iat ală bơta lơbơn niam, mơ gơjrañ sang-lòi ală bơta lơh bol khai in pal ntào di đap bơta tìs glài he dê. Dilah ò gơs bơta bơto pơn-niam wơl, cau rơp kis dô rài kis jat bol khai kơlôi la tomtoh, mơ nên cê tài bơh bơta hơ̆ bol khai rơp pal àñ công nha la bơta chơt sùm sùm. Hơ̆ la tơnggu Yàng Jesu ai gọ̆ broă bơto pơn-niam wơl la pal cang ngan rlau mơ broă geh cau ndai kòñ gơboh (Luka 22:41-44).

Yàng Jesu sền gọ̆ dô nơm rùp pàc-sir dờng rlau, hơ̆ la jơnau hòn-chò bơh bơta dọ̆ng-klàs mơ dô rài kis gơtom klàc đềt-mêr mơ Kơnràñ (Jang 3:16-18). Nàng cơnđoà mùt tom bơta gơtom klac hơ̆, kờp nă cau pal sơntòm mơ bơta gơjrañ săng glài ngan mơ jơh nùs jòi jat Kơnràñ. Gen behơ̆, Yàng Jesu tom tŭ gam hơđang plai ù neh lơh jat nùs kòñ Yàng Bèp dê mơ lơh wil tơl broă mơ Bèp jao (Jang 4:34). Kơnràñ hòi dan mơ jòi jat bơta pràn đah hwềng tus bơh Yàng Bèp nàng pơnjat bơto yal bơh Lơgar Đang Trồ (Mathiơ 6:9-13).

Digilan bol he sền gọ̆ bơta kălkê mơ gơplơ̆ nùs tai bơh gơs tŭ bol he mìng dòp geh wơl bơta ò geh kah kơlôi tus, gơkòl sang-lòi tom tŭ tom pà Jơnau Niam. Mơ ya Yàng Jesu tơngkah lah bol he ò ơm ìs ò, tài bơh Yàng Hwềng Goh la Bơtau gam kis tom bol he mơ lơh broă tom bol he. Kơnràñ la Bơtau lơh cơng bơh Yàng Jesu: “Mơ ya tŭ lơi Bơtau Pơndòm-pơniang tus, la Bơtau añ rơp sồr bơh dê Bèp mơ lòt tus hơ bol mê, hơ̆ la Hwềng Jơnau–song dê lik bơh dê Bèp, Bơtau hơ̆ rơp lơh cơng bơh añ.” (Jang 15:26)

Bol he gơs gơnoar broă lơh cơng bơh bơta niam ngan Yàng Tom Trồ dê mơ bơta dong-klàs Yàng Jesu dê, tài bơh bol he neh sền gọ̆ mơ gìt lam bơta hơ̆. Bol he ò cang kơlôi rcang cau lơi rơp kơno mơ dòn dòp, tài bơh bơta tơm- pơrgơl nùs cau dê la broă lơh Yàng Hwềng Goh dê. Bol he mìng pal cang dòn sọ̆ng lòt sih gar Jơnau Niam mơ sùm rcang sir tô Yàng Hwềng Goh lơh broă gan bol he. Cau Gơnoar bơto dơng ồng Pol ai git cau bơto yal Jơnau Niam rơp tìp oă bơta gơlòng bòl glar, mơ ya ồng đơs pràn lah nùs nhơm kơ̆ dơ̆n mơ kong-ơt nền cê ngan dờng mang rlau mơ bơta gơlik gơs di đap mat:

“Bơto yal tĕ jơnau Yàng, jơh nùs tĕ bulah bơtoah hala ò bơtoah, ai tơl bơta kong ơt mơ bơta bơto sồr nàng bơto tơnggit, lah pơrhơng mơ bơto pơndòm. Mơ ya mê git kơrhia tĕ tom jơh ală bơta, kong bòl glar, lơh broă cau bơto yal Jơnau Niam dê, lơh dô bă wĭl tơl gơnoar broă mê dê.” (II Timôthe 4:2,5)

Tai behơ̆, khin cha tĕ lơh cơng bơh Yàng mơ wèt gar mat he tom dô nơm rùp pàc-sir dờng rlau, bulah digơlan bol he ò rgơi gọ̆ công nha bơh ală bơta lơi he neh sih ngai do, mơ ya kư dòn sọ̆ng tĕ tom broă lơh cơng Jơnau Niam Yàng dê. Kah tĕ wơl bol he neh ưnngai Yàng mbe lơi tài bơh jơh ală bơta Kơnràñ neh lơh he in. Lòi tĕ bơta hơ̆ gơlik gơs bơta pơndòm-pơiàng mơ la bơta gơchồl dờng mang bol he in tom pà bơta kòñ gơboh mơ bơta niam rlau jơh Yàng dê tus di jơh tơl nă cau gùt dar. Ơm tĕ sùm tom Yàng tài bơh rlau mơ Kơnràñ, bol he ò rgơi lơh bơta lơi (Jang 15:5)

Dan jà bol he dô nùs bal tòm bơta hòi dan:
Khoai Yàng kòñ gơboh! Kòn jơh nùs ưnngai Kơnràñ neh lòi wơl kòn in dô nơm krơh bơh rài kis bơto yal Jơnau Niam mơ ceng cau ndai rê wơl mơ Jơnau Song. Dan dong kơl kòn ò di bơh ală bơta kalkê ìng mơ lơh roh tŭ lơmpah bơto yal bơh bơta kòñ gơboh mơ bơta dong-klàs Kơnràñ dê. Bulah digơlan ngai do kòn òhềt sền gọ̆ công nha, mơ ya dan Yàng dong kòn kư dô nùs dòn-sọ̆ng mơ gơnoar sồr dờng mang mơ Kơnràñ jao. Dan Jơnau Niam bơh lơgar Yàng Tom Trồ geh bơto yal jơh plai ù in. Kòn jơh nùs hòi dan tom sơnđan Yàng Jesu Krist, Amen.

Ơ jơh ală ồng mò, oh mi kòñ gơboh! Jơnau Yàng gan bơta hòi dan kờp ngai ngai do bơto pơndòm kờp nă bol he dòn-sọ̆ng tom gơnoar broă mơ Yàng jao. Mơ tơngkah bol he kah tĕ lah công nha gơrê mơ Yàng Tom Trồ, ai pơnah kờp nă bol he la sùm tơngkah nùs dòn-sọ̆ng. Dilah oh mi ntào di đap bơta sò-dră tài bơh bơto yal Jơnau Niam, dilah ală dơ̆ còp rwàng, lơh cơng bơh Yàng mìng dòp geh wơl bơta ò geh kah kơlôi tus, gen bañ mhar gơplơ̆ nùs. Sền tơnggòr tĕ Yàng Dọ̆ng-Klàs Jesu, Bơtau neh kong bòl glar mơ gơlik gơs dô nơm krơh bol he in.

Kơnràñ ò rngòt gơkòl sò-dră hala ò geh dòp rò, nàng bơto yal Jơnau Niam ală ƀòn dờng, ƀòn dềt nàng jơh ală cau gơjrañ sang glài mơ dòp git jơnau sọ̆ng. Yàng git ală bơta pơnđơl pràn mơ ò cau git oh mi dê mơ gam lòt bal mơ oh mi sùm. Dan Yàng ai oh mi in dô nùs nhơm lơbơn niam, mhar dòp git ală bơta gùt dar he, nàng oh mi sơlo geh bơtơl nùs nđàc sơngit cau glài mơ kơ̆ nùs bơto yal Jơnau Yàng, lơh cơng bơh Kơnràñ jơl tus lam plai ù.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.