Yog ib tug ntseeg Vajtswv, peb tau nqua hu dhau los ua ib tug timkhawv pub rau Vajtswv nyob hauv lub ntiajteb no. Qhia Vajtswv tej lus tsis yog thaum twg twb yooj yim, vim nyob rau lub sijhawm ntiajteb kawg no, muaj ntau tus yuav tsis kam mloog qhov tseeb. Tiamsis, sawv ntawm tej kev txomnyem thiab kev tawm tsam ntawd, peb puas thaub qab thiab kav liam xwb? Vajtswv txojlus ntuas peb li cas txog tes haujlwm cheem tsum no?

Hnub no, yog hnub 03/08/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Esther Griffin dhau ntawm Zaj kawm UA SIAB NTEV QHIA VAJTSWV TEJ LUS

Vajluskub: “Koj yuav tsum muab siab rau qhia Vajtswv Txojlus, tsis hais lub sijhawm twg los koj yuav tsum qhia. Koj yuav tsum ua siab ntev qhuab ntuas sawvdaws, yaum sawvdaws los ntseeg thiab txhawb sawvdaws lub zog” (II Timautes 4:2).

Koj puas tau muaj zaum twg raug tav, txiav kev sib txuas ua ke lossis raug tsis quav ntsej vim koj tau hais txog Vajtswv lawm tau? Yog muaj, koj puas yog thawj tus. Tswv Yexus ntuas peb tias: “Yog neeg ntiajteb ntxub nej, nej yuav tsum nco ntsoov hais tias, lawv twb xub ntxub kuv ua ntej lawm” (Yauhas 15:18). Thaum tseem nyob hauv ntiajteb, Tswv Yexus twb qhia tej uas nyob siab tshaj cov pej xeem thaum ntawd tej kev xav; Nws kuj kho tej haujlwm qia dub lossis lawv tej kev cob qhia yuam kev txog Vajtswv lub tebchaws (Mathais 23:13-28).

Tsis yog tus twg twb nyiam Tswv Yexus tej lus qhia. Tseeb tiag, muaj ntau tus tso tseg tsis caum Tswv Yexus qab lawm (Yauhas 6:60-66). Tiamsis kuv ntseeg tias yog Tswv Yexus tsis hais txog tej qhov tseeb ntawd, peb kuj yuav tsis muaj hnub paub tias yus cheem tsum ib tug cawm seej. Txawm yog muaj ntsis nyuaj mloog thiab ua rau peb muaj kev tu siab rau peb lub siab khav los, qhov tseeb thiaj muaj cuab kav pab kom peb tus kheej pom yus tej kev txhaum thiab yus ua tsis tau dabtsi rau yus tus kheej tej kev txhaum.

Kuj tsis muaj tus dabtsi yuav nyuaj nkag siab thaum uas tib neeg tsuas xav mloog tej yam uas yooj yim, thiab ntxub tej yam uas ua rau lawv pom yus tej kev txhaum. Yog tsis muaj qhov kev cob qhia, tib neeg yuav ua lub neej raws li txoj kev uas lawv suav tias yog, thiab ntseeg tias qhov ntawd yog yam uas lawv yuav tau ris txoj kev tuag mus ib txhis. Ntawd yog qhov uas vim li cas Tswv Yexus yuav tau kho lawv yog yam uas cheem tsum dua li uas Nws tau lwm tus nyiam Nws (Lukas 22:41-44).

Tswv Yexus ntsia pom ib daim duab loj dua, ntawd yog Txojmoo Zoo txog kev cawmdim thiab ib lub neej sib raug zoo ua ke nrog Vajtswv (Yauhas 3:16-18). Kom muaj txoj kev sib raug zoo ntawd, txhua tus yuav tau pib lub neej los ntawm txoj kev lees txim tiag thiab tag siab nrhiav Vajtswv. Yog li, Tswv Yexus thaum tseem ua neej nyob hauv ntiajteb thiaj ua raws li Leej Txiv lub siab nyiam thiab ua tiav tes haujlwm Leej Txiv cob rau Nws ua (Yauhas 4:34). Nws thov Vajtswv thiab nrhiav lub zog ntawm sab ntsujplig ntawm Vaj Leej Txiv kom muaj zog qhia txog ntuj ceebtsheej (Mathais 6:9-13).

Tej zaug peb yuav hnov khwv thiab qaug zog vim ntau zaug peb tsuas ntsia pom txoj kev nyias nyob nyias, tsis quav ntsej qhia Txojmoo Zoo. Tiamsis Tswv Yexus ntuas peb tias peb tsis nyob ib leeg, vim Vaj Ntsujplig yog tus tab tom nyob hauv peb thiab ua haujlwm dhau ntawm peb. Nws yog tus ua timkhawv txog Tswv Yexus: “Tus Pab yog Vaj Ntsujplig, nws los qhia Vajtswv zaj uas yog qhov tseeb thiab yog Leej Txiv txib nws los. Kuv yuav kom Leej Txiv txib nws los, thiab nws yuav qhia kuv zaj rau nej” (Yauhas 15:26).

Peb muaj lub nra ua timkhawv txog Vajtswv txoj kev zoo thiab Tswv Yexus txoj kev cawmdim, vim peb twb pom thiab saj tau qhov ntawd lawm. Peb tsis tas yuav txhawj tias leej twg yuav mloog thiab txais yuav, vim hloov pauv tib neeg lub siab yog Vaj Ntsujplig tes haujlwm. Peb tsuas yog ncaj ncees tseb lub noob uas yog Txojmoo Zoo thiab npaj txhij cia Vaj Ntsujplig ua haujlwm dhau ntawm peb xwb. Paulus qhia tias tus neeg mus tshaj tawm Txojmoo Zoo yuav ntsib ntau txoj kev txomnyem thiab sim siab, tiamsis yawg hais tias txoj kev ua siab ntev yuav tseem ceeb dua lub caijnyoog tamsim:

“Koj yuav tsum muab siab rau qhia Vajtswv Txojlus, tsis hais lub sijhawm twg los koj yuav tsum qhia. Koj yuav tsum ua siab ntev qhuab ntuas sawvdaws, yaum sawvdaws los ntseeg thiab txhawb sawvdaws lub zog. Tiamsis koj tsis txhob ua li lawv. Koj yuav tsum tswj koj lub siab txhua lub sijhawm, ua siab ntev nyiaj tej kev txomnyem mus qhia Txojmoo Zoo thiab muab siab rau ua txhua yam haujlwm uas Vajtswv muab rau koj ua lawm kom tiav (II Timautes 4:2,5).

Yog li, kav tsij ua siab tawv qhia txog Tswv Yexus thiab tig yus lub qhov muag mus rau ntawm daim duab loj dua, txawm yog peb ntsia tsis pom tej paj txiv los ntawm tej uas yus tseb hnub no, tiamsis ncaj ncees nyob hauv tes haujlwm qhia Txojmoo Zoo. Rov qab nco txog peb tau nco Vajtswv tshav ntuj li cas vim txhua yam uas Vajtswv tau ua rau peb. Cia qhov ntawd dhau los ua kev txhawb zog thiab yog lub zog txhawb peb qhia Vajtswv txoj kev hlub thiab kev zoo rau tej neeg ib ncig. Nyob twjywm hauv Vajtswv, vim dhau ntawm Nws lawm peb yeej ua tsis tau dabtsi (Yauhas 15:5).

Thov caw nrog kuv peb thov Vajtswv ua ke
Tus Tswv uas muaj kev hlub! Kuv ua Koj tsaug tau tseg ib tug qauv zoo txog kev qhia Txojmoo Zoo thiab coj lwm tus tig rov qab los rau qhov tseeb. Thov pab kom kuv tsis txhob cia tej kev txomnyem hauv ntiajteb no ua rau kuv ua poob lub sijhawm qhia koj txoj kev hlub thiab kev cawmdim hnub no. Txawm yog hnub no kuv ntsia tsis pom tej paj txiv los, thov Vajtswv pab kom kuv ncaj ncees rau koj tejlus cog tseg tau samhwm. Thov kom Txojmoo Zoo txog Vajtswv lub tebchaws tau qhia mus thoob ntiajteb. Kuv thov hauv Tswv Yexus Khetos lub npe. Amees.

Cov kwv tij txhua tus, Vajtswv txojlus dhau ntawm zaj kawm hnub no txhawb peb txhua tus kom ncaj ncees rau tes haujlwm Vajtswv cob. Thiab ntuas kom peb nco ntsoov tias tej paj txiv yog Vajtswv li, tshuav peb feem ces yog tuav peb lub siab kom ncaj ncees. Yog koj tab tom ntsib kev tawmtsam vim qhia Txojmoo Zoo, yog txhua zaug uas mus saib, ua tim khawv txog Vajtswv tsuas txais tau txoj kev ua twjywm ntsiag to, yog koj tej lus nug moo tsuas txais tau txoj kev ua txuj tsis paub, ces txhob maj tag kev cia siab. Cia li tig mus saib Tswv Yexus, tus uas tau tiv kev txomnyem thiab dhau los ua ib tug qauv zoo rau peb. Nws tsis ntshai tsam raug tawm tsam lossis luag tsis txais yuav, kom qhia Txojmoo Zoo rau txhua lub zos kom sawv daws lees txim thiab paub qhov tseeb. Vajtswv paub koj tej kev siv zog thiab tab tom nrog nraim koj. Thov Vajtswv pub kom koj muaj lub siab mos muag, paub txhua yam ntawm ib ncig, kom koj ntxiv lub siab hlub tshua txog cov tib neeg txhaum thiab ruaj siab tshaj tawm Txojmoo Zoo, ua tim khawv rau Vajtswv mus thoob qab ntuj kawg.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.