Bơngai lui kơ Kră Yang, lu bơ̆n đei krao iŏk wă kơ jing bơngai ră roi tơdrong ‘nao ‘lơ̆ng tơ lăm teh đak kơ Kră Yang. Ră roi Nơ̆r Kră Yang ưh kơ đei ‘bônh, yua kơ lăm năr hơtuch, lơ bơngai ưh kơ wă mơ̆ng tơdrong tơpă. Mă lei, ‘bơ̆t anăp dôm kơ pơmat tat păng tơdrong kơnê̆ pơgăn noh, lu bơ̆n hăm wă kơdŭn tơrŏng păng drơ̆ng iŏk tơdrong thoi noh ưh? Nơ̆r Kră Yang bơtho tơ’bôh kơ lu bơ̆n thoi yơ gah tơdrong mă jah tĕnh ‘nâu?

Năr ‘nâu, ‘năr 03/08/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Esther Griffin kơ̆l ‘bai CHƠ̆N JƠHNGƠ̆M RĂ ROI NƠ̆R KRĂ YANG

Sơ̆p Hla Bơar ‘Bok Kei-Dei: “Kră Yang ‘Bok Kei-Dei păng Kră Yang Yêsu Krist ‘bôh bơ̆n ling-lang na ih athei kơchăng, athei bơtho tơdrong Sư ling-lang; mă đe mơ̆ng mă đe ưh, ih kư̆ bơtho đĕch. Ih athei khă đe ‘nĕ pă pơm tơdrong yoch păng bơtho đe lui mă kơjăp, bơtho pơlung sư adar adeh.” (II Timôthê 4:2)

Buăl đei layơ đei pơgăn, pă đei tơ’bưh băl dah ưh kơ ‘maih mơ̆ng buăl ră roi gah Kră Yang ưh? Tơdah đei, buăl ưh kơ bơngai blŭng a đei tơdrong thoi noh. Kră Yang Yêsu tơ’blŏk khan kơ lu bơ̆n: “Dah bơngai ala teh âu hil areh kơ iĕm, iĕm kư̆m băt mơ̆n lu sư hil ‘noh, lu sư hil areh kơ Inh mă hơdrol.” (Yôhan 15:18).

Kơplah oei lăm teh đak, Kră Yang Yêsu ră roi dôm tơdrong hloh kơ tơdrong tơchĕng kon pơlei kơplah noh; Sư kư̆m hơmet bơtho tơ’bôh dôm kơ tơdrong klai gar dah bơtho ưh kơ trŏ lăp gah ‘Bok-Kei-Dei đơ̆ng lu sư ( Mathiơ 23:13-28).

Lơ bơngai kư̆m ưh kơ hưch wă kơ nơ̆r Yang Yêsu bơtho tơ’bôh. Tơpă thoi noh, lơ bơngai tơwih rŏng kuă kơ kiơ̆ Sư dơ̆ng bơih ( Yôhan 6:60-66). Mă inh lui ngeh tơdah Yang Yêsu ưh kơ pơma tơpă thoi noh, lu bơ̆n ưh kơ đei layơ mơn băt kơ kơdih kăl kơ minh ‘nu ‘Bok Dŏng Pơklaih. Mă khan mơ̆ng ưh kơ gan hlôh, păng pơm kơ jơhngơ̆m pơang, mă lei tơm đơ̆ng tơdrong Tơpă noh tơgŭm ăn kơ kon bơngai mơn ‘bôh tơdrong yoch păng ưh kơ gơh pơm kiơ ‘bơ̆t anăp tơdrong yoch kơdih. Kư̆m ưh kơ đei kiơ tơnat kơ hlôh, kon bơngai ‘maih mơ̆ng tơdrong hiôk hơ iă kiơ̆ kơ teh đak ‘nâu păng dah ưh kơ đei chông anhăk đơ̆ng tơdrong pơtho noh, lu bơ̆n gô achăng lê̆ păng pơm kiơ̆ kơ jơhngơ̆m kơdih ‘maih wă, păng gô truh tơ tơdrong lôch khŏm khŏm. Yang Yêsu ‘bôh tơdrong bơtho tơ’bôh noh kăl hloh kơ bơngai nai hưch wă ( Luka 22:41-44)

Yang Yêsu ‘bôh tơdrong tih hloh, noh jơ̆ tơdrong ‘nă hal gah tơdrong pơklaih păng tơdrong pơgơ̆p hăm Sư ( Yôhan 3:16-18). Wă kơ năm lăm tơdrong pơgơ̆p noh, rim ‘nu kăl kơ tơbral tơdrong yoch tơpă păng đĭ jơhngơ̆m chă Kră Yang. Yua kơ thoi noh, Yang Yêsu kơplah oei tơ teh đak ‘nâu, pơm kiơ̆ kơ dôm tơdrong ‘maih wă đơ̆ng Yang ‘Bă păng pơm keh tôm tơdrong jang mă ‘Bă pơjao (Yôhan 4:34). Sư krao khan păng chơchă jơhngơ̆m pran lăm bơhngol đơ̆ng Yang ‘Bă wă kơ ră roi gah Pơlei ‘Lơ̆ng (Mathiơ 6: 9-13).

Lu bơ̆n kư̆m đei mơn ‘bôh pơmat tat păng ‘bơ̆l hăl yua kơ lu bơ̆n ‘bôh bơngai ưh kơ ‘maih mơ̆ng kơplah ră roi Nơ̆r ‘Bok-Kei-Dei. Na Yang Yêsu đei tơ’blŏk kơ lu bơ̆n ưh kơ hơdrô̆ ôh, yua kơ Yang Bơhngol ‘Lơ̆ng jơ̆ Tơ’ngla oei arih lăm lu bơ̆n. Sư tơ’bôh gah Yang Yêsu: “ ‘Bok Dŏng Mơnat gô truh tơ iĕm, anăn Sư Yang Bơhngol ‘Lơ̆ng. Sư tơbăt ăn kơ iĕm tơdrong ‘Bok Kei-Dei. Sư gô jur đơ̆ng ‘Bă Inh yua kơ Inh wơh Sư đơ̆ng anih ‘Bă Inh; na Sư gô bơtho tơdrong Inh.” (Yôhan 15:26)
Lu bơ̆n kăl kơ đei jơhngơ̆m năm ră roi gah tơdrong ‘lơ̆ng tơpăt ‘Bok-Kei-Dei păng tơdrong Dŏng Pơklaih đơ̆ng Yang Yêsu, yua kơ lu bơ̆n đei ‘bôh păng mơn bơih tơdrong noh. Lu bơ̆n ‘nĕ kơ hiơ̆k kơ bơngai bu wă mơ̆ng păng sơng iŏk, yua kơ tơplih jơhngơ̆m kon bơngai noh đơ̆ng tơdrong jang Yang Bơhngol ‘Lơ̆ng. Lu bơ̆n kăl kơ tơpăt tơnăp năm rei adrĕch Nơ̆r ‘Bok-Kei-Dei wă kơ Yang Bơhngol ‘Lơ̆ng bơ̆jang đơ̆ng lu bơ̆n. ‘Bok Pôl đei roi tơbăt sư năm ră roi Tơdrong ‘Nao ‘Lơ̆ng đei tơ’bơ̆p lơ tơdrong pơmat tat păng pơlong lăng, mă lei sư pơma pơsĭt thoi âu, jơhngơ̆m chơ̆n păng chu pŭ iŏk noh kăl hloh kơ tôm tơdrong ‘bôh ‘bơ̆t anăp:

“Athei bơtho tơdrong Sư ling-lang; mă đe mơ̆ng mă đe ưh, ih kư̆ bơtho đĕch. Ih athei khă đe ‘nĕ pă pơm tơdrong yoch păng bơtho đe lui mă kơjăp, bơtho pơlung sư adar adeh. Mă-lei ih athei đei jơhngơ̆m chơ̆n lăm tôm tơdrong. Mă pơmat ih kư̆ adrin ‘nĕ hŭt tơdrong pơm đon ‘lơ̆ng tơpăt, bơtho tơdrong ‘nao ‘lơ̆ng Kră Yang Yêsu Krist ling-lang, adrin jang tôm tơdrong ‘Bok Kei-Dei.” (II Timôthê 4:1-2, 5)

Yua kơ thoi noh, athei adrin bơtho nơ̆r Kră Yang păng lăng tơ tơdrong tih hloh, mă khan lu bơ̆n lăng ưh kơ ‘bôh bơ̆n đei đơ̆ng rei adrĕch năr ‘nâu, mă lei kư̆ kơ tơnăp kơ bơtho Nơ̆r ‘Bok-Kei-Dei. Athei ‘blŏk lăng dơ̆ng lu bơ̆n đei bơnê kơ Kră Yang thoi yơ yua kơ tôm tơdrong Sư đei tuh ăn kơ bơ̆n. Athei ăn tơdrong pơlung păng tơ iung tih hloh ăn kơ lu bơ̆n, bơtho jơhngơ̆m ‘mêm păng tơdrong ‘lơ̆ng tơpăt đơ̆ng Kră Yang ăn kơ bơngai jum dăr, Athei ling lang oei lăm Kră Yang, lu bơ̆n ưh kơ gơh pơm minh tơdrong kiơ. (Yôhan 15:5)

Apĭnh đĭ đăng krao khan hơdai:
Kơkuh kơ Kră Yang ‘mă ‘mêm! Bơnê kơ Ih đei ăn kơ kon đei ‘bôh pơhrăm iŏk gah tơdrong arih bơtho nơ̆r ‘Bok-Kei-Dei păng chông ba bơngai nai wơ̆t brŏk tơ Tơdrong Tơpă. Apinh tơgŭm kon ưh kơ yua kơ tơdrong pơmat tat ‘biơ̆ đĕch mă tơhiong lê̆ đei tơdrong wă ră roi gah tơdrong ‘mêm mơnat păng dŏng pơklaih đơ̆ng Ih. Mă khan năr ‘nâu kon tam mă ‘bôh đei yua kơ Ih, mă lei apinh Kră Yang tơgŭm kon đei jơhngơ̆m ‘lơ̆ng tơpăt mă tơdrong jang Ih đei pơjao ăn. Hơpơi kơ tơdrong ‘nao ‘lơ̆ng đơ̆ng dêh char ‘Bok-Kei-Dei đei ră roi ding truh tơ jơ̆p jang kơ lăm teh đak. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, Nơ̆r Kră Yang đơ̆ng lăm ‘bai krao khan năr ‘nâu, pơlung rim ‘nu lu bơ̆n tơpăt lăm tơdrong jang mă Kră Yang pơjao. Păng tơ ‘blŏk kơ lu bơ̆n đei noh đơ̆ng ‘Bok-Kei-Dei, gah lu bơ̆n đei noh athei bơwei jơhngơ̆m ‘lơ̆ng tơpăt. Tơdah buăl oei tơ’bơ̆p tơdrong đe hil kơ ră roi tơdrong ‘Nao ‘Lơ̆ng, tơdah dôm năr năm ngôi pơlung băl, ră roi gah Kră Yang ưh đei kiơ, tơdah nơ̆r pơma pơtruh đơ̆ng buăl mă ưh kơ đei bu ‘maih mơ̆ng, ‘nĕ hăt kơ bơ̆l hăl. Athei lăng tơ Yang Yêsu, Sư pŭ iŏk tơdrong pơmat tat na đei pơm kơ mĭl ăn kơ lu bơ̆n. Sư ưh kơ hli kơ đe hil dah ưh kơ drơ̆ng iŏk, wă kơ bơtho Tơdrong ‘Nao ‘Lơ̆ng jơ̆p kơ pơlei pơla wă kơ lơ bơngai băt kơ tơbral păng mơn băt kơ tơdrong tơpă. Kră Yang băt kơ dôm tơdrong adrin đơ̆ng buăl păng oei hơdai hăm buăl. Athei apinh Kră Yang ăn kơ buăl đei jơhngơ̆m rơmuăn, hlôh băt kơ dôm tơdrong oei đei jum dăr kơ bơ̆n, wă kơ buăl rai đei jơhngơ̆m ‘mêm mơnat kơ kon bơngai păng đei jơhngơ̆m băt kơ bơtho Nơ̆r Kră Yang, ră roi gah Kră Yang truh tơ jơ̆p kơ teh đak.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.