Ưn ngài Yàng Je-su bơh ala broă dờng màng Kơnràñ neh lơh. Yàng neh guh rê hơđăng trồ, mờ Kơnràñ kòñ bol he pơnjat lơh ală broă Kơnràñ dê. Bol he rgơi lơh bơta hơ̆ tòm gơnoăr Yàng Hwềng Goh, là Bơtau neh geh cèng tús nàng ơm tòm kờp nă bol he mờ dong kòl bol he. Gen bol he găm gơ kơnờm tòm gơnoăr Yàng Hwềng Goh nàng lơh ală broă dờng dê lơgăr Yàng Tòm Trồ sơl?

Ngai do, ngai 2/8/2025, Bơta Hòi Dan Kòp Ngai dan jà ồng mò oh mi bơtê bal Jơnau Yàng bơh kơnòm dê bơta dong kòl Jessica Teed bơh tơnggume ALĂ BROĂ DỜNG RLAU TAI

Sră Goh: “Di ngan, di ngan, Añ đơs mơ bol mê, cau lơi dòn Añ, gen rơp lơh ală broă Añ lơh sơl; mơ khai rơp lơh ală broă dờng rlau tai, tài bơh Añ rê wơl hơ Bèp.” (Jang 14:12)

Añ neh hòr dà mat tŭ sền wơl rdeh añ dê, tŭ do mìng là lòs bơ cah. Añ neh đớs: “ Ơ Yàng, mìng Kơnràñ geh tơl gơnoăr dong kòl kòn nàng lik klàs bơh hơ̆!” añ neh lòt găn bơta gơ plơ̆ rdeh kung kơnjơ̆, lơh tìñ mat ka gơ rơ dàng, mơ bơdìh bơta hơ̆ añ ờ gơlơh bè lơi.

Tòm mang hơ̆, bồ tơngoh añ gơ sơ noach bơh ala broă neh gơlik gớs. Bơlàt añ gơ hào ás mờ jê bơ kồr, tŭ hơ̆ añ ờ hềt git broă lơi gơ tơng tús mờ tìñ mat ka jơng añ gơ rơ dàng. Dồ nă cau bơyô tús còp mờ hòi dăn añ in. Cau melo neh rac dăn Yàng Hwềng Goh tề lăm cau melo git broă lơi di păl nàng hòi dăn. Gen melo ơn tê hơđăng bơlàt ás, hơ đanng tìñ tau, driang che mờ poac añ dê. Dê tòm tŭ cau bơyô añ găm hòi dăn, añ neh sền gŏ bơta jê bơng kồr añ geh rài, dê tềng tiñ măt ka jơng añ kung geh rài sơl. Bàr nă bol hi hòn chò ngăn, ò rgơi ngui jơnau lơi nàng đớs. Yàng ngăn dờng màng mờ koñ gơboh git nđờ!

Gơnoăr broă Yàng Je-su hơđăng ù ờ jŏ rau, mờ ya là dờng màng ngăn. Kơnràñ neh lơh gơnoăr broă tòm pe năm mờ gùl, nàng lơh gớs lơgăr Yàng Tòm Trồ hơđăng ù tiah, phi să tòm hơđăng chi pơng, geh pha lơgăr làng ƀồc mờ bơta chơt, mờ pờ dồ nơm gùng kís ai bol he in geh lơh wơl bơta tòm klac mờ Yàng Bèp.

Lài mờ tŭ lik bơh dunnia, Yàng Je-su neh hơ ai Bơtau Pơndờm Pơniang ala cau bơtê in, Bơtau hơ̆ là Yàng Hwềng Goh. Tŭ Kơnràñ rê wơl mờ Bèp, Yàng Hwềng Goh rơp bơto mờ tờng kah bol khai bơh ala jơnau Kơnràñ neh bơtê (Jăng 14:15-27). Mờ ò mìng bè hơ̆, Kơnràñ kung hơ ai bol khai in dồ phăn ƀàn kwơ màng ndai: Hơ̆ là bơta ring lơngai, ờ di là bơta ring lơngai bơ dìh, mờ là bơta ring lơngai ngăn tòm nùs mờ tòm bồ tơngoh, bulah ala broă gut dăr sùm gớs rơng gô.

Kơnràn neh đớs tòm Jăng 14:28-29: “Bol mê neh kơno Añ đơs mơ bol mê lah: ‘Añ lòt, mơ Añ rê wơl hơ bol mê.’ Dilah bol mê kòñ gơboh di Añ, gen rơp hòn chò tài bơh Añ rê wơl hơ Bèp, bơh Bèp dờng rlau mơ Añ. Tŭ do Añ neh đơs ală bơta hơ̆ mơ bol mê lài mơ tŭ òhềt gơlik gơs, nàng tòm tŭ ală bơta hơ̆ gơlik gơs gen bol mê dòn.”

Tŭ Yàng Je-su đớs ala bơta hơ̆, Kơnràñ ò mìng đớs tús bơta chơt hơđăng chi pơng, mờ kung đớs tús di bơta guh rê hơđăng trồ Kơnràñ dê, hơ̆ là tŭ pơndut gơnoăr broă Kơnràñ dê hơđang ù, mờ pờ dồ tŭ pa: là tŭ Kơnràñ ơm nggui đah ma Yàng Bèp bè dồ nă cau ơn phăn ơn duh khoai dờng. Tơnơ̆ mờ tŭ kong chơt, kong cèng tơp mờ kís wơl, Yàng Je-su găm ơm tai tòm dunnia tòm poan jơt ngai. Tòm ala ngai hơ̆, Kơnràñ neh tơlik mat mờ oă cau mờ rcang ala cau bơtê cơnđoà lòt tòm dồ nơm gùng dà pa, dồ gơnoăr broă mờ bol khai pơnjat lơh, ờ di bơh pràn ís, mờ là tòm gơnoăr Yàng Hwềng Goh (Broă 1:3)

Sră Goh neh cih tòm sră Broă 1:8-9: “Mơya tòm tŭ Yàng Hwềng Goh mù hơđang bol mê, gen bol mê rơp dòp geh gơnap gơnoar, mơ rơp lơh gơs cau lơh cơng bơh Añ tòm ƀòn dờng Jerusalem, jơh lơgar Jude, lơgar Samari, jơl tus làm plai ù.” Lồc Kơnràñ đơs ală jơnau hơ̆ rau, gen geh guh rê hơđang trồ tòm tŭ ală cau hơ̆ ơm tơnggòr sền, gơs mhwal mù rò Kơnràñ ndơp thit, bol khai ò gŏ tai.”

Ngai do, bol he ai cơng tàng dờng hơ̆ nàng hòn chò tòm Yàng. Yàng Tòm Trồ ai bol he in gơnoăr tòm sơnđăn Bơtau Krist nàng lơh ala broă mờ Kơnràñ neh jào phi, băl mờ bơta tề lăm Yàng Hwềng Goh dê. Yàng Je-su neh đớs: “Di ngan, di ngan, Añ đơs mơ bol mê, cau lơi dòn Añ, gen rơp lơh ală broă Añ lơh sơl; mơ khai rơp lơh ală broă dờng rlau tai, tài bơh Añ rê wơl hơ Bèp.”

Tòm mang hơ̆, tŭ bơyô añ hòi dăn dê ala bơta tềl sồt añ jê, añ neh sền gŏ gơnoăr Yàng Hwềng Goh neh lơh broă hơđăng cau bơyô añ dê, ngăn di bè jơnau Yàng neh đớs.

Yàng Je-su ò mìng ai bol he in Yàng Hwềng Goh nàng pơnjat ala broă Kơnràñ neh lơh, mờ kung lời bol he rgơi lơh ala broă dờng rlau tai dê lơgăr Yàng Tòm Trồ in.
Gen tàng ngai do, tŭ bol he găm kơp gơn ngai Yàng màng ryŭ rê wơl, bol he geh hòi jà nàng lơh ala “broă dờng rlau” bè lơi tòm gơnoăr Yàng Hwềng Goh?

Dan jà bol he dô nùs bal tòm bơta hòi dan:
Khoai Yàng kòn dê, ưn ngài Kơnràñ bơh kòn ò càng cơnđoà lòt hơđăng gùng dà dunnia kal ke do bơh bơta pràn ís kòn dê. Ưn ngài Yàng neh ai Yàng Hwềng Goh, là Bơtau ơm băl, bơto, pơndờm pơniang mờ bơtơl tai bơta pràn kòn in kòp ngai. Dăn dong kòn họk git bơta iat, dòn duh mờ cơnđoà lòt tòm bơta tề lăm Yàng Hwềng dê, nàng kòn ò kís tòm bơta lơbơn lơñio kòn mơnús dê, mờ ya kís tòm bơta pràn lìu làc bơh đăng trồ. Dăn ngui rài kís ò sơp kòn dê nàng lơh gớs bơta dờng màng rlau jơh lơh găr Kơnràñ in kơnờm dê gơnoăr Yàng Hwềng. Kòn jơh nùs hòi dăn tòm sơnđăn Yàng Je-su Krist, A-men.

Ờ ồng mọ, oh mi koñ gơboh, Yàng ò hòi jà bol he pơnđơl nàng lơh gơnoăr broă Kơnràñ dê bơh pràn ís he. Kơnràñ git bol he là bềng lơbơn lơñio, ò tơl git wă, gen tàng Kơnràñ ai Yàng Hwềng Goh nàng dong kòl bol he lơh ala broă pha lin rlau mờ bơta chài rgơi kòn mơnús. Yàng Hwềng Goh sùm găm lơh broă tòm bol he kòp ngai, bơh jơnau hòi dăn, bơta dòn, mờ bơh broă lơh koñ gơboh dêt rhền cèng gơnoăr bơh đăng trồ. Ala bơta siơ̆u ờ tơl ò rgơi kơryăn cơnđoà lòt bol he nàng lơh ala bơta dờng màng mờ Kơnràñ neh jào ai, mìng bol he sùm rcăng nàng cơnđoà lòt tòm gơnoăr Yàng Hwềng dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.