Ua Tswv Yexus tsaug rau tej haujlwm loj uas Tswv Yexus tau ua rau hauv lub ntiajteb no. Nws twb rov qab mus saum ntuj, thiab Vajtswv xav kom peb ua Nws tej haujlwm ntxiv mus. Peb muaj cuab kav ua tau tej ntawd nyob hauv Vaj Ntsujplig lub hwjchim, yog tus tau txib los nyob hauv peb thiab pab peb. Yog li peb puas tab tom vam khom Vaj Ntsujplig lub hwjchim los ua tej haujlwm loj rau Vajtswv lub tebchaws?

Hnub no, yog hnub 02/08/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Jessica Teed dhau ntawm Zaj kawm TEJ HAUJLWM LOJ DUA

Vajluskub: “Kuv qhia tseeb rau nej hais tias tus uas ntseeg kuv yuav ua tej haujlwm uas kuv ua; tsis yog li ntawd xwb, nws tseem yuav ua tau ntau dua tej uas kuv ua, rau qhov kuv mus cuag Leej Txiv lawm” (Yauhas 14:12).

Kuv tau poob kua muag vim zoo siab thaum uas tig rov qab mus ntsia kuv lub tsheb, thaum no nws yog ib cov hlau muab pov tseg lawm xwb. Kuv tsa suab: “Tus Tswv, tsuas muaj koj xwb thiaj muaj txaus lub peev xwm pab kuv kom ciaj sia tawm hauv qhov ntawd los!” Kuv nyuam qhuav ua tsheb sib tsoos phomsij heev, ua rau kuv ob lub qij txha tawg tas, tiamsis cuag li kuv yeej tsis ua li cas ntxiv lawm.

Hmo ntawd, kuv lub hlwb yeej tseem yoj yees rau tej xwm txheej nyuam qhuav tshwm los. Kuv sab tav o thiab mob ncus nco, thaum ntawd kuv yeej tsis paub tias kuv ob lub qij txha tawg lawm. Muaj ib tug phooj ywg nws tuaj saib kuv thiab thov Vajtswv rau kuv. Nws thov Vaj Ntsujplig qhia rau nws paub saib yuav thov Vajtswv rau yam dabtsi. Tas nws cev tes rau ntawm kuv sab tav, thov Vajtswv rau kuv tej pob txha, kuv ob txoj leeg nruab qaum. Thaum kuv tus phooj ywg tab tom thov Vajtswv, kuv hnov ntsoov kuv tus mob loog zog, txawm yog qhov mob ntawm ob yav qij txha. Wb puav leej zoo siab, hais tsis tawm ua lus. Vajtswv zoo kawg nkaus thiab hlub kuv tshaj plaws!

Tswv Yexus tes haujlwm nyob hauv ntiajteb no kuj ua tsis ntev, tiamsis nws tseem ceeb heev. Nws ua dejnum kwv yees li peb xyoos ntau, tsim muaj Nws lub tebchaws rau hauv ntiajteb no, muab Nws tus kheej tuag saum ntoo khaub lig, kov yeej ntuj tawg thiab txoj kev tuag, thiab qhib ib txoj kev ciaj sia rau peb kom rov qab muaj txoj kev sib raug zoo nrog Vaj Leej Txiv ua ke dua.

Ua ntej tawm hauv lub ntiajteb no mus, Tswv Yexus twb cog lus yuav pub tus txhawb zog rau cov thwjtim, tus ntawd yog Vaj Ntsujplig. Thaum Nws rov qab los cuag Leej Txiv, Vaj Ntsujplig yuav los qhia lawv thiab qhia kom lawv nco txog txhua yam uas Tswv Yexus twb qhia rau lawv lawm (Yauhas 14:15-27). Tsis yog tas li xwb, Nws tseem cog lus yuav pub ib qhov khoom plig muaj nqis ntxiv rau lawv: yog kev kaj siab, tsis yog ntsiag to sab nraud xwb, tiamsis yog kev kaj siab tiag hauv siab thiab hauv hlwb, txawm yog thaum uas txhua yam ib ncig yoj yees tsis tu.

Tswv Yexus hais nyob hauv Yauhas 14:28-29: “Nej twb hnov kuv hais rau nej hais tias, ‘Kuv yuav mus, tiamsis kuv yuav rov qab los cuag nej.’ Yog nej hlub kuv, nej yeej yuav zoo siab qhov uas kuv mus cuag Leej Txiv; rau qhov nws muaj hwjchim loj dua kuv. Nimno kuv qhia tej no rau nej, thaum muaj lawm nej thiaj yuav ntseeg kuv”

Thaum Tswv Yexus hais tej ntawd, nws tsis yog tsuas hais txog txoj kev tuag saum ntoo khaublig xwb, lub sijhawm ntawd ntaus lub cim rau Nws tes dejnum tiav hauv ntiajteb, thiab qhib dua ib lub sijhawm tshiab: yog thaum nws nyob ntawm Vaj Leej Txiv sab xis zoo li tus Pov Thawj Hlob. Thaum nws raug tuag, muab faus thiab sawv rov qab los, Tswv Yexus yeej tseem nyob 40 hnub ntxiv hauv ntiajteb.

Lub sijhawm ntawd, Nws tshwm rau ntau tus pom thiab cob cov thwjtim mus rau ib txua kev tshiab, ib tes haujlwm tshiab uas lawv yuav tau ua, tsis yog los ntawm tus kheej lub zog, tiamsis nyob hauv Vaj Ntsujplig lub hwjchim (Tes Haujlwm 1:3).

Vajluskub sau nyob hauv Tes Haujlwm 1:8-9: “Tiamsis thaum Vaj Ntsujplig tus Dawbhuv los nrog nej nyob lawm, nws yuav pub hwjchim rau nej , thiab nej yuav ua timkhawv qhia kuv zaj mus thoob plaws hauv lub nroog Yeluxalees, hauv lub xeev Yudas, hauv lub xeev Xamalis thiab mus txog qab ntuj kawg.” Thaum Yexus hais li ntawd tas, lawv tseem ntsia ntsoov Yexus, ces Vajtswv txawm coj Yexus mus saum ntuj lawm. Muaj ib tauv huab los roos nws, ces lawv tsis porn nws lawm”
Tomqab hais tej lus ntawd tas, Tswv Yexus tau coj nrog fuab nrog cua mus ntawm lawv qhov muag pom, txog rau thaum uas lawv tsis pom Nws lawm.

Niaj hnub nim no, peb muaj kev zoo siab loj hauv Vajtswv. Vajtswv pub rau peb muaj hwjchim nyob hauv Yexus Khetos lub npe los ua tej haujlwm uas Vajtswv cob, los ntawm Vaj Ntsujplig ua tus coj kev. Tswv Yexus hais tias: “Kuv qhia tseeb rau nej hais tias tus uas ntseeg kuv yuav ua tej haujlwm uas kuv ua; tsis yog li ntawd xwb, nws tseem yuav ua tau ntau dua tej uas kuv ua, rau qhov kuv mus cuag Leej Txiv lawm” (Yauhas 14:12).

Hmo ntawd, thaum kuv tus phooj ywg thov Vajtswv rau kuv tej qhov txhab, kuv saj tau Vaj Ntsujplig lub hwjchim ua haujlwm dhau ntawm kuv tus phooj ywg, ib yam li Tswv Yexus tau hais:

Tswv Yexus tsis yog tsuas pub Vaj Ntsujplig los ua ntxiv tej haujlwm uas Nws ua xwb, tiamsis tseem cia kom peb ua tej haujlwm loj dua rau Vajtswv lub tebchaws.
Yog li hnub no, koj puas yeej tseem tos ntsoov hnub Vajtswv lub tshwjchim ci ntsa iab rov qab los, koj tau hu los ua tej haujlwm “loj dua” npaum cas nyob hauv Vaj Ntsujplig lub hwjchim?

Thov caw nrog kuv peb thov Vajtswv ua ke
Kuv Tus Tswv, vim kuv tsis txhais ruam hauv lub ntiajteb txomnyem ntsuav no mus ntawm kuv lub zog. Kuv ua Koj tsaug tau pub Vaj Ntsujplig, yog tus nrog nraim, tus qhia, tus txhawb thiab ntxiv zog rau kuv txhua hnub. Thov pab kom kuv paub kawm mloog thiab txhais ruam mus raws li Vaj Ntsujplig ua tus coj, kom kuv tsis ua neej qaug zog zis hauv tib neeg lub zog, tiamsis ua neej nplua mias hauv lub zog los saum ntuj los. Thov Vajtswv Koj siv kuv lub neej los ua tej yam loj rau Vajtswv lub tebchaws dhau los ntawm Vaj Ntsujplig lub hwjchim. Kuv thov hauv Tswv Yexus Khetos lub npe. Amees.

Cov kwv tij txhua tus, Vajtswv tsis nqua hu kom peb siv zog ua Vajtswv haujlwm los ntawm peb tus kheej lub zog. Nws paub peb tsis muaj zog, muaj nrim, yog li Nws thiaj pub Vaj Ntsujplig los pab peb kom ua tiav tej yam uas loj tshaj tib neeg lub peev xwm. Vaj Ntsujplig yeej ua haujlwm dhau ntawm koj txhua hnub, dhau ntawm tej lus thov Vajtswv, ntawm txoj kev ntseeg thiab dhau ntawm tes haujlwm sib hlub me me muaj lub hwjchim los saum ntuj los. Tej yam uas tseem tshuav yuav thaiv tsis tau kom ua raws li tej haujlwm loj uas Vajtswv cob, tsuas yog koj zoo siab hlo mus raws li Vaj Ntsujplig lub hwjchim.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.