Bơnê kơ Kră Yang Yêsu yua kơ dôm lu tơdrong Sư pơm kơpal teh đak tih tơpă păng tih hloh. Kră Yang đei brŏk tŏk tơ kơpal plĕnh, păng Sư wă kơ lu bơ̆n pơtrơp hăm dôm tơdrong jang đơ̆ng Sư. Lu bơ̆n gơh pơm tơdrong ‘noh lăm tơdrong mơsêh mơyang đơ̆ng Yang Bơhngol ‘Lơ̆ng, jơ̆ Tơ’ngla đei ăn truh wă oei lăm lu bơ̆n păng tơgŭm lu bơ̆n. Thoi noh na lu bơ̆n đei gơnang tơ lăm tơdrong mơsêh mơyang đơ̆ng Yang Bơhngol ‘Lơ̆ng wă bơ̆jang dôm lu tơdrong tih hloh kơ dêh char ‘Bok Kei-Dei pơgơ̆r ưh?

Năr ‘nâu, ‘năr 02/08/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai Jessica Teed kơ̆l ‘bai DÔM TƠDRONG TIH HLOH DƠ̆NG.

Sơ̆p Hla Bơar ‘Bok Kei-Dei: “Inh khan kơ iĕm tơpă, bơngai bu lui kơ Inh, bơngai ‘noh gô pơm dôm tơdrong Inh pơm mơ̆n. Păng sư gô pơm tơdrong tih hloh kơ Inh dơ̆ng mơ̆n, kơlih kơ Inh wă wih tơ ‘Bă Inh boih.” (Yôhan 14:12)

Inh đei lĕch đak măt yua kơ đei mơn lăm jơhngơ̆m kơplah lăng đêl gre inh kơdih, dang ei oei pă mĭnh pôi bơsei ưh pă yua. Inh ôr khan: “Kră Yang ơi, lăp mĭnh ‘nu Ih đĕch đei tơdrong mơsêh mơyang tơgŭm kon gơh arih sot lĕch hlôi đơ̆ng noh!” Inh ‘nao hlôi tơ’bơ̆p đei tơdrong truh trăp, pơm kơting kơnơl inh đei pơchah, mă lei ‘ngoaih kơ ‘noh lei inh đĭ đăng ưh kơ đei kiơ hloi.

Lăm măng ei, kơ̆l ‘ngok inh oei dăr yua kơ dôm kơ tơdrong ‘nao truh. Kơ iĕng inh pơ’ngeh tih păng jĭ, kơplah ‘noh inh oei ưh tim mă băt tơdrong kơting kơnơl jơ̆ng inh đei pơchah. Mĭnh ‘nu bơngai buăl năm ngôi păng krao khan kơ inh. Duch ei krao apĭnh Yang Bơhngol ‘Lơ̆ng bơtho tơ’bôh kơ sư băt kơ athei krao khan tơdrong kiơ. Na sư dan ti tơ kơpal kơ iĕng pơ’ngeh, krao khan kơ kơting, kŭl tăng, huan jơ̆ng păng huan pơtrơp hăm kơting inh. Lăm kơplah buăl inh oei krao khan, inh mơn hơđăl dôm tơdrong jĭ lăm inh dang ‘biơ̆ hloi, mă khan tơklă anih oei jĭ lăm kơnơl jơ̆ng inh. ‘Bar ‘nu nhi đei chhôk hơ iă, ưh kơ gơh tơlĕch nơ̆r. Kră Yang tih hloh păng ‘mêm mơnat kơ inh tơpă!

Tơdrong jang đơ̆ng Kră Yang Yêsu kơpal teh đak ưh kơ đei đunh, mă lei đei gĭt kăl tơpă. Sư bơ̆jang tơdrong jang lăm pêng jĭt sơnăm mĭnh puăt, wă pơjing dêh char đơ̆ng ‘Bok Kei-Dei pơgơ̆r kơpal teh đak, pŭ iŏk pơmat tat kơdih akâu kơpal ‘long pơglang, blah kĕjei đơ̆ng dơnâu ŭnh păng tơdrong lôch, păng pơih mĭnh pôm trong arih ăn kơ lu bơ̆n đei wơ̆t dơ̆ng tơdrong pơgơ̆p tơpă hăm ‘Bok Kei-Dei ‘Bă.

Adrol kơ weh đơ̆ng teh đak, Kră Yang Yêsu đei pơkă ăn ‘Bok Pơlung kơ lu bơngai pơhrăm, ‘Bok ei bơih jơ̆ Yang Bơhngol ‘Lơ̆ng. Kơplah Sư brŏk hăm ‘Bă, Yang Bơhngol ‘Lơ̆ng gô truh wă bơtho lu sư păng tơ’blŏk kơ lu sư gah dôm lu tơdrong Sư đei bơtho ăn (Yôhan 14:15-17). Păng ưh kơ sĭ lăp thoi noh đĕch, Sư kŭm đei pơkă gô ăn kơ lu sư mĭnh tơmam gĭt kăl nai: ‘noh jơ̆ tơdrong hiôk hian, ưh kơ sĭ lăp tơdrong thĕng hreh gah ‘ngoaih, mă jơ̆ tơdrong hiôk hian tơpă lăm jơhngơ̆m păng lăm đon tơchĕng, mă khan kơplah tôm tơdrong jum dăr oei gling glơng ưh kơ pơdơh.

Sư khan lăm Yôhan 14:28-29: “Iĕm kơtơ̆ng Inh khan kơ iĕm, khan Inh gô jăk đơ̆ng iĕm păng gô wih dơ̆ng tơ iĕm. Dah iĕm ‘mêm kơ Inh tơpă, lei iĕm kư̆m hiôk chơt tơduă iĕm mơ̆n, yua Inh khan Inh wă tŏk tơ ‘Bă Inh păng yua kơ Sư tih hloh kơ Inh. Inh roi lê̆ kơ iĕm hơdrol tơdrong ‘noh dang ei, na lăp iĕm ‘bôh tơdrong ‘noh ning-mônh, iĕm gô lui kơ Inh tơpă.”

Kơplah Kră Yang Yêsu khan dôm lu tơdrong ‘noh, Sư ưh kơ sĭ lăp tơ’blŏk truh kơ tơdrong lôch kơpal ‘long pơglang, mă kŭm oei pơma truh kơ tơdrong Sư tŏk tơplĕnh, jơ năr chih hơmet tơdrong pơtôch tơdrong jang Sư kơpal teh, păng pơih mĭnh chăl ‘nao: jơ̆ kơplah Sư oei gah ‘ma kơ ‘Bok Kei-Dei ‘Bă thoi ‘Bok Soi Tih.

Đơ̆ng rŏng kơ tơdrong chu lôch, chu ‘bŭ păng iung arih, Kră Yang Yêsu oei kơpal teh đak lăm 40 năr. Lăm jơ năr ‘noh, Sư tơ’bôh hăm lơ bơngai păng hơmet kơ lu bơngai pơhrăm mơ̆t lăm trong yak năm ‘nao, mĭnh tơdrong jang mă lu sư gô pơtrơp bơ̆jang, ưh kơ trŏ hăm jơhngơ̆m pran kơdih, na lăm tơdrong mơsêh mơyang đơ̆ng Yang Bơhngol ‘Lơ̆ng (Tơdrong Jang 1:3).

Sơ̆p Hla Bơar ‘Bok Kei-Dei chih lăm Tơdrong Jang 1:8-9: “’Mă-lei lăp Yang Bơhngol ‘Lơ̆ng jur oei păng iĕm, iĕm gô đei jơhngơ̆m pran năm bơtho tơdrong Inh tơ Pơlei Jêrusalem, jơ̆p kơ dêh char Juđê păng dêh Samari, đơ̆ng noh jơ̆p kơ teh đak.”

Sư bơtho khan kơ đe ei đang boih, đơ̆ng noh Kră Yang Yêsu tŏk tơ kơpal plĕnh, hơmơ̆l gom Sư. Na đe ei hnhoi Sư dĭng tơ hơmơ̆l gom Sư ưh pă ‘bôh boih.
Dang ei, lu bơ̆n đei tơdrong tơm tih wă hiôk chơt lăm Kră Yang. ‘Bok Kei-Dei ăn kơ lu bơ̆n tơdrong mơsêh mơyang lăm ‘Bok Krist wă bơ̆jang dôm lu tơdrong jang mă Sư pơjao, hăm tơdrong bơtho tơ’bôh đơ̆ng Yang Bơhngol ‘Lơ̆ng. Kơdih Kră Yang Yêsu đei khan: “Inh khan kơ iĕm tơpă, bơngai bu lui kơ Inh, bơngai ‘noh gô pơm dôm tơdrong Inh pơm mơ̆n. Păng sư gô pơm tơdrong tih hloh kơ Inh dơ̆ng mơ̆n, kơlih kơ Inh wă wih tơ ‘Bă Inh boih.” (Yôhan 14:12)

Lăm măng ei, kơplah buăl inh krao khan kơ dôm lu rơka inh, inh đei hơdai hăm tơdrong hlôi đei mơn tơdrong mơsêh mơyang đơ̆ng Yang Bơhngol ‘Lơ̆ng đei pơgơ̆r đơ̆ng lăm duch ei, trŏ thoi nơ̆r Yang Yêsu đei khan.

Kră Yang Yêsu ưh kơ sĭ lăp ăn kơ lu bơ̆n Yang Bơhngol ‘Lơ̆ng wă pơtrơp dôm lu tơdrong jang sư đei jang, mă kŭm ăn kơ lu bơ̆n gơh bơ̆jang dôm lu tơdrong jang tih hloh dơ̆ng kơ dêh char đơ̆ng ‘Bok Kei-Dei pơgơ̆r.

Thoi noh năr ‘nâu, dah buăl oei wă chang gô năr Kră Yang ư-ang jur dơ̆ng, buăl đei krao bơ̆jang dôm tơdrong jang “tih hloh” thoi yơ lăm tơdrong mơsêh mơyang Yang Bơhngol ‘Lơ̆ng?

Apĭnh đĭ đăng krao khan hơdai:
Kơkuh kơ Kră Yang kon, bơnê kơ Ih yua kơ kon ưh kơ kăl kơ athei yak năm lăm trong yak năm pơmat tat ‘nâu hăm jơhngơ̆m pran kơdih kon. Bơnê kơ Kră Yang đei ăn Yang Bơhngol ‘Lơ̆ng, jơ̆ Tơ’ngla oei hơdai, bơtho, pơlung păng pơthim ăn jơhngơ̆m pran kơ kon rim năr. Apĭnh tơgŭm kon pơhrăm iŏk mơ̆ng kơtơ̆ng, chu yom păng yak năm lăm tơdrong chông anhăk đơ̆ng Yang Bơhngol ‘Lơ̆ng, wă kơ kon ưh kơ arih lăm tơdrong gleh lap đơ̆ng kon bơngai, mă arih lăm jơhngơ̆m pran mah mai đơ̆ng plĕnh. Apĭnh yua kơdih tơdrong arih rơdu tơrăn kon wă bơ̆jang dôm lu tơdrong tih hloh kơ dêh char Ih yua đơ̆ng tơdrong mơsêh mơyang Yang Bơhngol ‘Lơ̆ng. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, Kră Yang ưh kơ krao lu bơ̆n adrin bơ̆jang tơdrong tơtă Sư pơjao hăm jơhngơ̆m pran kơdih. Sư băt kơ lu bơ̆n ‘bĕnh tơdrong rơdu, đei hơgăt, thoi noh Sư ăn Yang Bơhngol ‘Lơ̆ng wă tơgŭm lu bơ̆n pơm jing dôm lu tơdrong hloh kơ tơdrong gơh đơ̆ng kon bơngai. Yang Bơhngol ‘Lơ̆ng oei pơgơ̆r lăm buăl rim năr, đơ̆ng lăm nơ̆r krao khan, đơ̆ng đon lui, păng đơ̆ng dôm tơdrong tơ’bôh ‘mêm mơnat iĕ ioch chĕp tơdrong mơsêh mơyang đơ̆ng plĕnh. Dôm lu tơdrong ưh kơ ‘lơ̆ng ưh kơ gơh pơgăn buăl yak bơ̆jang dôm tơdrong tih hloh Kră Yang pơjao, lăp kăl kơ buăl gô yak năm hloi lăm tơdrong mơsêh mơyang Yang Bơhngol ‘Lơ̆ng.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.