Rơp gơlik gơs mbe lơi dilah cau ndai tus còp ồng mò oh mi mơ ồng mò oh mi gam lơhă bic taih? Ồng mò oh mi rơp nrất nrơu, mhar mhar, mơp dơl bơh ò hềt rcang bơta lơi. Yàng Jesus tơngkah lang bol drơng kơp té bơh Kơnràn rơp rê wơl tòm dô ết jó tai mơ bơta rê wơl Kơnràn dê nisơna ngan. Dilah ngai do Yàng rê wơl, gen ồng mò oh mi neh rcang sir hala ò?

Ngai do, ngai 01/08/2025, rơndap bơta hòi dăn kòp ngai hòi jà ồng mọ oh mi kơlôi sơnơng jơnau Yàng bal mơ ồng Jonathan Santiago bơh tơnggume KƠRHIA MƠ DRƠNG KƠP

Sră Goh: “Kơrhia, mơ drơng kơp tĕ, bơh bol mê ò git tŭ tơngai hơ̆ la tŭ lơi.” (Mak 13:33)

Bau klau ẵn jê tú lơi kung guh bơh drim. Mơ ẵn kung òs đơs kơnhơl lah ẵn ò di la “sêm guh bơh drim” mơ kung ò di la “sêm bic cơrla”, ẵn ò di la cau guh bơh drim kung ò di cau bic cơrla.

Mơya gơs dô dớ, Yàng lơh rngoh rngac ẵn, chôl ẵn sơntòm cih sră. Tú hớ, ẵn gam sên gar pe nă kon dềt ẵn jê, gen ẵn ò tơl pràn lơh broă ndai tai, tơm bic să tòm cơnong bic gen ẵn bic tơn. Ẵn sên gó lah tú jơ lơngap lơngai rlau jơh hớ la ang drim, lài mơ tú ală kon ẵn jê guh bic.

Bơh sơnròp, guh bic bơh drim la dô bơta kal ke ngan gơwèt mơ ẵn. Gơs tú ang drim să jan ẵn lơngah lơgãn, gơboh bic rlau mơ guh cih sră, mơya tòm dơlam nùs ẵn jê gơs dô jơnau tơngkah lơbơn niam: “Guh té… ẵn ò kỡn lơh roh tú jơ ơm inh mơ Yàng ò.” – mơ ẵn git bơta hớ la ngan. Gen tàng, bulah ò buôn mơya ẵn pơnđơl pràn lik bơh tiah bic, lơh dô ly cafe mơ sơntòm ngai pa mơ Yàng.

Hớ tàng ẵn neh lơh bơta hớ 20 sơnam rau. Ală cau gơp bơyô, ală cau tòm hiu nhă ẵn jê cau lơi kung git bol he la “sêm guh gỡn”. Behớ gen pa do, tú dô nă cau gơp lòt rò bol he tòm hiu ơpah bic, khai ai lơh krơi ngan tú sên gó neh 7h drim rau mơ bol he ò hềt guh bic! Bol he nhõ mơ đơs lah digơlan bài kơrnìng mpồng jơngo ir lơh he in bic lơhă. Mơya bơta hớ kung tơngkah tòm ẵn dô nơm rùp sơnio đah hwềng pal kơlôi sơnưng.

Yàng Jesus đơs bơh bơta rê wơl Kơnràn dê tòm Mak 13:32 ““Bơh ngai mơ jơ hơ̆ gen ò gơs cau lơi git, bulah cau gơnrơh hơđang trồ hala Kòn kung ò git sơl, mìng Bèp git lơm.”

Kung bè ală bài kơrnìng mpồng tòm tiah ơpah bic lơh bol he in bic lơhă, dunnia ngai do kung ơm tòm bơta lơhă bic đah hwềng klam jơngo behớ. Yàng Jesus git loh bơta hớ rơp gơlik gơs, gen tàng Kơnràn neh tơngkah loh làng lah: “Kơrhia, mơ drơng kơp tĕ, bơh bol mê ò git tŭ tơngai hơ̆ la tŭ lơi.” (Mak 13:33).

Tú Yàng tơngkah “drơng kơp tĕ”, Kơnràn ò đơs tus bơta drơng kơp đah poac să. Bơh “drơng kơp” tòm seng do gơs gơtha jrô ndơp rlau tai, gơs gơtha la kis kơrhia, kah rngal, gơs bơta kơlôi sơnưng mơ sum kah tus tú jơ Yàng rơp rê wơl.

Gơs dô dớ dô nă cau bơto ne ngui rùp sơnio lơh pơnyơu niam ngan, lơh ẵn in kah sum tus ngai do. Bơta drơng kơp gơs pơyơu bè dô nơm phan sền nàng cuh phào. Hơđang phào òs gơs dô nơm tiah sền rhên nàng sên di tơnggu mơ chuh phào. Cau bơto đơs, tiah sền hớ kung bè chi pơng Yàng Jesus dê. Dilah ồng mò oh mi sùm sền di chi pơng, ai rai kis tòm dunnia lơh gơs tiah he rơp chuh, gen ồng mò oh mi ò rngòt chuh tis, kung ò rngòt lah he rơp húi ngai mơ Yàng rê wơl.

Yàng Jesus kung ai dô nơm rùp sơnio bơh dô nă cau tòm rê bơh tiah ngai nàng đơs bơh tơnggu me do. Kơnràn đơs tòm Mak 13:34-37:
“Kung be dô nă cau ne lòt ngài, sang hìu, jào gơnoar ală cau dĭ in kòp nă at bồ dô nơm broă mơ kung sồr cau kơp mpồng ơm drơng kơp. Behơ̆ drơng kơp tĕ, bơh bol mê ò git cau tòm hìu rê tŭ lơi, mho hala gùl mơnang, tŭ iar nrau hala àng drim, rngòt khai rê nisơna mơ gŏ bol mê gam lơhă bic mòn. Ală bơta Añ đơs mơ bol mê Añ kung đơs mơ tơl nă cau sơl: Drơng kơp tĕ!”

Long sền dô nă cau gơp bol he dê tus gỡn rlau, tòm toh di 5 jơ gul ang drim, bơh kơlôi lah ur klau ẵn jê kung lôh gỡn bè òs gen rơp mbe lơi taih? Digơlan khai rơp ai lơh krơi ngan tòm tú bol he gam lơhă bic! Kơp kỡn lah bol he ò gơs cau lơi mơp dơl behớ tòm tú Yàng Jesus rê wơl, pal mhar pò mat nàng pơnđơl lik bơh bơta lơhă bic đah hwềng.

Kơp kỡn kòp nă tòm bol he sùm kis kah rngal, dòp git loh lang he gam tis tòm pah rài lơi. Tơnggơr mat mơ sền tus hơ phan bàn gam sum sum, mơ sền di chi pơng la sră sơnio gùng – nàng tus Yàng tus wơl, bol he rơp ò mơp dơl, gam lơhă bic!

Dan jà bol he dô nùs bal tòm bơta hòi dan:
Khoai Bèp kỡn gơboh, digul ală bơta lơh kon in pơrwài digul dunnia do, dan Kơnràn tơngkah kon sum sên gar nùs nhơm kon nàng git drơng kơp. Dan dong kon bãn ming ntoat jat ală bơta rơndap dunnia do dê, mơ húi lah Kơnràn rơp rê wơl tòm tú jơ kon ò hềt git. Dan Yàng pơrlài hwềng nùs kon, ai mat kon in sền di chi pơng Kơnràn, nàng kon in kis kòp ngai tòm bơta kơp gơn mơ ji gloh tơhir ngai Yàng rê wơl. Kon jơh nùs hòi dan, tòm sơnđan Yàng Jesus Krist, Amen.

Ơ ală ồng mò oh mi kỡn gơboh, bẵn lòi tus dê tú Yàng rê wơl, bol he mơp dơl pò mat mơ pơnđơl lik bơh bơta lơhă bic. Lòi té kòp ngai he kis ngai do bè la ngai do la ngai lôi dut he gam kis, bè ngai do la ngai Yàng rơp rê wơl. Prap gar té nùs nhơm he git drơng kơp, sên gar mat he nàng sùm sền tus cho pơng Yàng, nàng bơta kơp kỡn he dê tòm ngai Yàng tus rơp gơlik gơs bơta chồl bơtrut he tòm kòp cơnđoà he lòt. Ngai do ồng mò oh mi rơp rcang sir nàng wă rò Yàng rê wơl sơl? Kòp ngai lùp is să tòm he nàng he sìm prap gar să tòm he drơng kơp nàng kơp gơn ngai Yàng Jesus Krist rê wơl.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.