Yuav zoo li cas yog muaj neeg tuaj saib koj thaum uas koj tseem pw tsaug zog? Puas yog koj yuav ceeb, maj nroos, tsis paub yuav ua dabtsi vim tsis tau npaj dabtsi li. Tswv Yexus ceeb toom Vajtswv haiv neeg yuav tau ceev faj vim Nws yuav ntxov rov qab los thiab Nws yuav los tsis qhia leej twg paub. Yog tias Vajtswv los hnub no, tsis paub koj puas tau npaj txhij?

Hnub no, yog hnub 01/08/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Jonathan Santiago dhau ntawm Zaj kawm CEEV FAJ THIAB ZOV TOS

Vajluskub: “Nej yuav tsum ceevfaj thiab zov tos, rau qhov nej tsis paub hais tias thaum twg yuav txog lub sijhawm ntawd” (Malakaus 13:33).

Kuv tus txivtsev thaum twg twb sawv ntxov. Kuv pheej tawb ua si tias yus tsis yog “ib tug noog sawv ntxov” tiamsis kuj tsis yog tus “plas hmo ntuj”, kuv tsis yog ib tug sawv taus ntxov thiab kuj tsis yog tus nyob taus ntuj teb tag hmo.

Tiamsis muaj ib zaug, Vajtswv tshoov kuv lub siab, tshoov kom kuv pib sau ib phau ntawv. Thaum ntawd, wb tab tom tu peb tug menyuam yaus, yog li hmo twg kuv twb tsis tshuav zog li, qhau cev hlo xwb ces pw kiag. Kuv pom tias lub sijhawm ntsiag to yog lub sijhawm thaum sawv ntxov, ua ntej cov menyuam sawv.
Thaum pib txoj kev sawv ntxov yog ib qhov kev sim siab. Muaj tej tagkis mob ib ce, tsuas xav pw xwb tsis xav sawv, tiamsis nyob hauv kuv lub siab ho muaj lub suab hais maj mam tuaj: “Sawv os… kuv tsis xav ua poob lub sijhawm nrog Vajtswv nyob ua ke!” – thiab kuv paub tias qhov no yog qhov tseeb. Yog li, txawm yog yeej tsis yooj yim los, kuv yeej siv zog sawv saum txaj los, tov ib tais café thiab pib ib hnub tshiab nrog Vajtswv ua ke.

Tsis ntev dhau mus xwb kuv twb xyaum sawv ntxov tau 20 xyoo lawm. Tej phooj ywg, txheeb ze uas lawv paub wb ib niam txiv yog hom “noog sawv ntxov”. Yog li tsis ntev los no, thaum ib tug phooj ywg tuaj tos wb ntawm tsev qhua, nws xav tsis thoob thaum uas wb yeej tsis tau muaj leej twg sawv thaum twb txog 7 teev sawv ntxov lawm! Wb luag thiab hais tias tej zaug yog daim ntaub npog qhov rooj nws dub ua rau wb pw hnov qab lawm. Tiamsis los ntawm tej uas wb ntsib dhau ntawd kuj ua rau kuv nco txog ib daim duab tsimnyog yuav tau muab xav hauv lub neej sab ntsujplig.

Tswv Yexus hais txog hnub uas Nws yuav rov qab los nyob hauv Malakaus 13:32 “ Tiamsis hnub ntawd thiab lub sijhawm ntawd tsis muaj leejtwg paub. Txawm yog cov timtswv ceebtsheej lossis Neeg Leej Tub los twb tsis paub; tsuas yog Leej Txiv tib leeg thiaj paub xwb”

Zoo li tej daim ntaub thaiv qhov rooj nyob hauv lub chav pw hauv tsev qhua ua rau wb pw hnov qab, ntiajteb niaj hnub nim no kuj tab tom ua rau peb tsau tsawv rau hauv txoj kev tsaug zog ntawm sab ntsujplig tsaus ntuj nti li ntawd. Tswv Yexus paub txog tej no yuav tshwmsim tuaj, yog li Nws thiaj ceeb toom kom meej: “Nej yuav tsum ceevfaj thiab zov tos, rau qhov nej tsis paub hais tias thaum twg yuav txog lub sijhawm ntawd.” (Malakaus 13:33).

Thaum Tswv Yexus ceeb toom “yuav tau ceev faj”, Nws tsis yog hais txog yuav tau ceev faj ntawm sab nqaij tawv. Lo lus “ceev faj” ntawm no muaj lub ntsiab tob dua, txhais tias ua neej ceev faj, meej pem, paub qab hau thiab ceev faj txog hnub Tswv Yexus yuav rov qab los.

Muaj ib zaug muaj ib tug xibhwb nws siv ib daim duab los ua piv txwv zoo heev, ua rau kuv nco ntsoov txog tamsim no. Txoj kev ceev faj zoo li ib feem uas peb nyas tua phom. Ntawm tus phom qhov chaw nias tua muaj ib tus kwj me me pab rau peb lub qhov muag tsom tau kom yog daim phiaj yuav tua. Tus xibhwb hais tias, tus kwj ntawd nws kuj zoo ib yam li Tswv Yexus tus Ntoo Khaub Lig. Yog koj ceev koj lub qhov muag mus rau ntawm ntoo khaub lig, muab lub neej ib txhis ua lub homphiaj, ces koj yuav tsis ntshai yuam kev, kuj tsis txhawj tias yus yuav tsis nco qab hnub Tswv Yexus rov qab los.

Tswv Yexus kuj siv daim duab hais txog ib tug tswv mus deb los ua piv txwv txog qhov xwm txheej no. Tswv Yexus hais nyob hauv Malakaus 13:34-37:
“ Lub sijhawm ntawd zoo ib yam li ib tug txivneej uas tawm hauv nws lub tsev mus rau lwm qhov, tseg nws cov tubtxib zov tsev thiab faib haujlwm rau lawv, nyias muaj nyias ib tes haujlwm; thiab nws hais kom tus zov qhovrooj, zov zoo zoo. Yog li ntawd, nej yuav tsum zov zoo zoo rau qhov nej tsis paub hais tias thaum twg nej tus Tswv yuav rov los. Tej zaum nws yuav los thaum tsaus ntuj lossis thaum ib taghmo lossis thaum qaib yuav qua lossis thaum kaj ntug. Nyob tsam nws los tamsim thiab porn nej tseem pw tsaug zog. Tej Ius uas kuv qhia rau nej , kuv hais rau sawvdaws ib yam nkaus hais tias nej yuav tsum zov tos!”

Yog tias wb tus phooj ywg tuaj ntxov dua, rau lub sijhawm thaum 5 teev txhais, nws xav tias wb ob niam txiv yeej ib txwv sawv ntxov li txhua zaug ces yuav zoo li cas? Tej zaug tag nrho puav leej yuav xav tsis thoob vim wb yeej tseem tab tom pw tsaug zog! Cia siab tias yuav tsis muaj leej twg hauv peb cov no yuav xav tsis thoob rau hnub uas Tswv Yexus rov qab los, yuav tau maj nroos mos qhov muag kom tsim dheev hauv txoj kev pw tsaug zog ntawm sab ntsujplig.

Cia siab tias peb txhua tus yuav ua luv neej ceev faj, paub tias yus tab tom nyob rau ntu twg. Tig lub qhov muag ntsia rau qhov khoom plig nyob mus ib txhis, nrog ntoo khaub lig ua tus coj kev – kom thaum Tswv Yexus rov qab los, peb thiaj yuav tsis sawv hauv txoj kev pw tsaug zog los!

Thov caw nrog kuv peb thov Vajtswv ua ke
Vajtswv, nyob rau hauv lub hauv ntiajteb uas muaj ntau yam ua rau kuv lub siab hnov qab, thov Vajtswv ntuas kom kuv nco ntsoov tuav kuv lub siab ceev faj. Thov Vajtswv Koj pab kom kuv txhob khiav caum tej lub caijnyoog tsis muaj sijhawm so hauv lub neej, ua rau kuv hnov qab tias Koj yuav rov qab los thaum twg tsis paub. Thov Vajtswv ceeb toom kuv tus ntsujplig, tig kuv lub qhov muag mus rau ntawm tug Ntoo Khaub Lig, kom kuv ua lub neej txhua hnub tos ntsoov hnub Koj rov qab los. Kuv thov hauv Tswv Yexus Khetos lub npe. Amees.

Cov kwv tij txhua tus, txhob tos txog thaum Tswv Yexus rov qab los, peb thiaj maj nroos mos qhov muag thiab siv zog khiav tawm hauv txoj kev tsaug zog los. Ua lub neej txhua hnub zoo yam li yog hnub Tswv Yexus rov qab los. Tuav peb lub siab kom ceev faj, ceev lub qhov muag tig mus rau ntawm ntoo khaub lig, kom txoj kev ntshaw hnub Tswv Yexus rov qab los yuav dhau los ua lub zog thawb rau peb txhua kaujruam uas peb mus kev. Tsis paub koj puas npaj txhij rau hnub Tswv Yexus rov qab los lub sijhawm no lawm tau? Yuav tau nco qab ntsoov nug yus tus kheej txog qhov no kom peb tuav peb tus kheej ceev faj tos hnub Tswv Yexus rov qab los.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.