Gô thoi yơ tơdah đei bơngai năm ngôi tơ buăl mă buăl oei tep hiôk? Rŏ lăng buăl gô kơdrăt, hăt hot, păng mơngơ̆ng yua ưh kơ đei hơmet hơdrol. Yang Yêsu đei roi tơbăt ăn kơ kon pơlei Sư athei kơ chăng yua kơ Sư gô jur dơ̆ng păng tơdrong wơ̆t jur Sư gô ưh kơtam kơ băt. Tơdah Kră Yang jur năr ‘nâu, lei buăl tam hơmet jơhngơ̆m bơih ưh?

Năr ‘nâu, ‘năr 01/08/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai Veda Jonathan Santiago kơ̆l ‘bai KRĂNG PĂNG KƠCHĂNG

Sơ̆p Hla Bơar ‘Bok Kei-Dei: “Iĕm athei kơchăng tơdrong lui mă tơpă păng krao khan mă nŏng yua kơ iĕm ưh kơ băt tơdrong ei wă truh layơ.” ( Markôs 13:33)

Klo inh layơ sư kŭm iung đơ̆ng tep hrôih. Gah inh ngăl hơnul khan inh ưh kơ “sem iung hrôih” păng kư̆m ưh kơ thoi sem “bơrơ̆m”, inh ưh kơ đei iung hrôih păng kư̆m ưh kơ đei kĕ kral kơmăng.

Na đei minh ‘măng, Kră Yang pơm ăn kơ inh đei mơn lăm jơhngơ̆m, pơtrŭt inh athei chih hla bơar. Kơplah noh, nhi oei wei rong tơpêng ‘nu hơ’lơ̆p, thoi noh kơmăng ayơ inh kư̆m lap pă kĕ, ‘nao tơkơ̆l ‘bich đĕch na tep hiơt hloi. Inh đei mơn tep hiôk hloh noh kơplah pơge hrôih, hơdrol kơ lu hơ’lơ̆p hơđơ̆r đơ̆ng tep.
Blŭng a tơdrong iung đơ̆ng tep hrôih noh jơ̆ tơdrong pơlong lăng. Đei dôm kơ pơge rơgah rơgĕnh ‘bĕnh kơ akâu, inh ‘maih wă kơ ‘bĭch đĕch, mă lei lăm jơhngơ̆m đei tơdrong tơ’blŏk pơlơ̆ng dơdar: “Iung bĕ… mă inh ưh kơ wă ăn jơ phŭt hlôi wă kơ pơgơ̆p hăm Kră Yang ôh!” Na thoi noh, mă khan ưh kơ đei ‘bônh, inh adrin iung đơ̆ng anih tep, pơm đak ka phê păng pơtơm yak năm năr plơ̆ng hăm Kră Yang.

Inh đei pơjuăt iung hrôih đơ̆ng tep kư̆m đei 20 sơnăm bơih. Buăl juăt kư̆m băt kơ klo akăn nhi thoi kơ “sem iung hrôih”. Yua kơ thoi noh brei mơsơ̆ ‘nâu, kơplah đei buăl juăt đei năm sơng iŏk lu nhôn tơ hnam tep tơmoi, sư ‘bôh chrêu dêh ‘bôh ‘bar ‘nu nhi tam mă iung đơ̆ng tep mă khan truh tơ 7 jơ pơge bơih! Nhi hiĕk băt yua kơ đei che pĕng ‘măng măng hei pơm kơ ‘bar ‘nu nhi tep hiơt. Dôm kơ đêl đei thoi noh đei tơ’blŏk kơ inh trŏ kơ đei tơchĕng pơwao lăm tơdrong arih gah bơhngol.

Yang Yêsu pơma gah Sư wă wơ̆t jur dơ̆ng lăm Markôs 13:32: “Năr păng jơ ei ưh kơ đei bu băt. Lu linh jang ‘lơ̆ng kơpal plĕnh ti ưh kơ băt. Inh Kon ‘Bok Kei-Dei ră, kư̆m hơdai ưh kơ băt mơ̆n. Pôm ‘Bă Inh đĕch băt kơ năr ei kơnh.”

Nhen thoi che hơ’bơ̆l pĕng ‘măng lăm hnam tơmoi tep pơm kơ lu nhôn tep hiơt, teh đak hrei ‘nâu kư̆m oei tep hiơt gah bơhngol măng mu. Yang Yêsu băt kơ tơdrong ‘nâu gô truh, lei na Sư đei khan tơbăt hơđăl dêh: “Iĕm athei kơchăng tơdrong lui mă tơpă păng krao khan mă nŏng yua kơ iĕm ưh kơ băt tơdrong ei wă truh layơ.” (Markôs 13:33)

Kơplah Kră Yang đei pơkă khan “athei kơchăng”, Sư ưh kơ đei pơma kơ gah akâu sĕch akar ‘nâu. Nơ̆r “kơchăng” ‘nâu pơma jrŭ ‘biơ̆, wă khan arih kơchăng, hlôh băt păng ling lang kơnhăm kơ Kră Yang gô jur dơ̆ng.

Đei minh ‘măng bơngai pơ ma bơtho tơ’bôh pơtih gia hơ iă tơpă, pơm kơ inh ling lang kơ ‘blŏk truh tơ dang ei. Jơhngơ̆m đon kơchăng pơtih gia nhen thoi ‘long trĕng kơnhăm prăh phao. Tơlăm phao đei kơ ‘long nhăm iĕ wă tơgŭm bơ̆n trĕng kơnhăm lăng ‘bôh tŏk ‘bŏk tơmam bơ̆n wă prah. Bơngai bơtho tơ’bôh pơma ‘long kơnhăm noh kư̆m nhen thoi ‘long pơglang ‘Bok Dŏng Pơklaih Yang Yêsu. Tơdah buăl bơwei măt lăng tơ gah ‘long pơglang, kơnhăm kơ tơdrong arih ling lang, na buăl gô huay kơ hli kơ jrok trong, kư̆m huay kơ hiơ̆k buăl gô achăng lê̆ lăm năr Kră Yang jur.

Kră Yang Yêsu kư̆m đei pơtih gia kơ minh ‘nu bơngai yŏng năm tơ ataih, gah tơdrong ‘nâu. Sư pơma khan lăm Markôs 13: 34-37:

“Tơdrong ei thoi lĕ kơ minh ‘nu bơngai wă năm tơ dêh tơmoi ataih. Hơdrol kơ sư wă yak đơ̆ng hnam, sư pơkă kơ lu đĭch đam sư wei-lăng hnam păng rim ‘nu lu sư jang kiơ̆ kơ tơ’ngla sư pơkă păng khan kơ bơngai gak ‘măng athei kơchăng. Na iĕm athei kơchăng, kơlih kơ iĕm ưh kơ băt tơ’ngla hnam noh wă truh layơ: Til kơsơ̆, dah tŏk-bŏk măng, dah leng gong, dah ‘năr lĕch. Na iĕm athei kơchăng mă tơpă hli kơ tơ’ngla hnam iĕm truh kơplah iĕm ưh kơ lêng ê kơplah iĕm oei tep. Tơdrong Inh khan kơ iĕm âu, Inh khan kơ đĭ-đăng bơngai mơ̆n, ưh kơ sĭ kơdrô̆ iĕm ôh kơchăng.”

Pơtih gia buăl lu nhôn truh hrôih ‘biơ̆ dơ̆ng, kơplah 5 jơ minh puăt, yua kơ sư ngeh kơ klo akăn nhi juăt kơ iung đơ̆ng tep hrôih ngăl, juăt kơ thoi noh na liơ? Rŏ lăng tôm tơdrong gô kơdrăt tơpă yua kơ lu nhôn oei tep hiôk đĕch! Hơpơi kơ đĭ đăng lu bơ̆n huay kơ kơdrăt thoi noh kơplah Yang Yêsu jur, athei kơpu măt mă tĕnh wă kơ hlôi đơ̆ng tep hiơt gah bơhngol.

Hơpơi kơ đĭ đăng lu bơ̆n ling lang arih kơchăng, mơn băt kơ lu bơ̆n oei arih kơplah chăl ayơ. Athei lăng tơ tơmam apah khŏm khŏm, iŏk ‘long pơglang noh kơnhăm – wă kơ kơplah Kră Yang jur, lu bơ̆n huay kơ wing măt lăm tơdrong tep hiơt!

Apĭnh đĭ đăng krao khan hơdai:
Kơkuh kơ Kră Yang mă ‘mêm, đei dôm tơdrong pơm kơ jơhngơ̆m kon ‘bônh kơ ưh kơnhăm tŏk ‘bŏk teh đak ‘nâu, apinh Ih tơ’blŏk kơ kon ling lang kơchăng bơwei jơhngơ̆m. Apinh Kră Yang tơgŭm kon huay kơ kơdâu kiơ̆ kơ proh hơmet lơ tơdrong kơ chăl arih ‘nâu, mă hiơt kơ Ih wă wơ̆t jur jơ ayơ mă kon ưh kơ băt. Apinh Kră Yang râu krao bơhngol kon, ăn kơ măt kon lăng tơ ‘long pơglang Ih, wă kơ kon arih rim năr lăm chang hơmĕng păng rơhing kơ năr Ih wă wơ̆t jur. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, ‘nĕ kơ gô dĭng truh tơ Kră Yang wơ̆t jur, na lu bơ̆n hăt hot kơ kơpu măt, păng adrin wă kơpraih đơ̆ng tep hiơt noh. Athei arih rim năr thoi kơ năr ‘nâu jơ̆ năr Kră Yang jur truh. Athei bơwei jơhngơ̆m krăng, bơwei măt lăng tơ ‘long pơglang, wă kơ jơhngơ̆m rơhing năr Kră Yang truh jing kơ pơtrŭt đơ̆ng rim kơ trong yak năm lu bơ̆n. Lei buăl tam hơmet jơhngơ̆m wă sơng iŏk Kră Yang kơplah jơ ‘nâu? Athei ling lang jet kơdih kâu gah tơdrong ‘nâu, wă kơ lu bơ̆n ling lang kơchăng chang gô năr Kră Yang Yêsu Krist Jur.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.

bình luận

Trở thành người đầu tiên bình luận cho bài viết này