Kơplah hơpơi wă kơ minh tơdrong kiơ noh, lu bơ̆n ngăl tơchĕng thoi âu: “Kăl kơ đei minh tơdrong ‘nâu, inh lăp đon bơih.” Dôm kơ tơdrong ‘maih wă noh ưh kơ đei glăi, kư̆m truh tơ lăp dêh păng trŏ kơ thoi noh. Mă lei kiơ̆ kơ khei ‘năr, lu bơ̆n gô mơn ‘bôh druh kiơ̆ kơ dôm tơdrong gah teh đak gô đei tơdrong ơh sơ’ngon păng hmach đĕch. Na lu bơ̆n rơih iŏk Kră Yang đĕch, lu bơ̆n chĕp kơjăp tơpă tơdrong hiôk hian khŏm khŏm.

Năr ‘nâu, ‘năr 31/07/2025, tơdrong tơdă Amăn Jơ Krao Khan Rim Năr, apĭnh krao wơ̆n‘bơngai mơ̆ng hơdai tơchĕng pơwao nơ̆r Kră Yang hăm bơngai Veda Thomas Lucas kơ̆l ‘bai RƠIH IŎK ARIH PĂ ĐEI HMACH.

Sơ̆p Hla Bơar ‘Bok Kei-Dei: “inh dan tơ’bôh ‘bơ̆t anăp iĕm rơih iŏk tơdrong arih păng tơdrong lôch, tơdrong pŭn hiôk păng tơdrong hiap pơtê̆. Thoi noh, rơih bĕ tơdrong arih, wă kơ iĕm păng lu kon sâu iĕm gơh arih.” (Bơtho Khôi Juăt 30:19-20)

Rim kơ kơtơ̆ng đei roi tơbăt đei gre anao pơm keh, inh ngăl mơ̆ng kơnhăm hloi. Minh pôm gre tih ‘lơ̆ng, đei tôm tơdrong – trŏ kơ thoi inh ngăl hơpơi. Tơmam lăm gre guăng ‘lơ̆ng, đei tôm tơmam kăl yua, lăng đĕch na hưch hanh bơih. Klo inh kư̆m ‘maih wă dêh, sư kơnhăm lăng tơ kơmăi, kơmăi kiơ noh – mă tơpă, inh ưh kơ đei hlôh wao gah dôm kơ tơmam noh. Tơdah gơh rơih iŏk minh pôm gre tih, noh jơ̆ gre mă ‘bar ‘nu nhi đei hơpơi wă. Na tơchĕng kơ đei gre noh đĕch inh ‘nă hal prăt năr bơih.

Klo akăn nhi hao gre so năm truh tơ anih tĕch gre noh, lăm jơhngơ̆m ‘nă hal wă pơm hla bơar răt gre ‘nao. Mă lei kơplah mơ̆ng tơ wă pơjao ăn jên ‘net ‘net rim khei, klo akăn nhi đei drut kơ jơhngơ̆m – jên ăn ‘net ‘net rim khei ‘nâu jơ̆ kơjung ‘biơ̆ kơ nhi đei pơđâu hơdrol. Mă thoi noh, nhi đei pơdrơ̆ng kơdih: nhi đei jang adrin dôm kơ sơnăm ‘nâu mă ưh kơ trŏ kơ đei tơmam mă ‘maih wă hă? Inh adrin pơlung kơdih akâu gre ‘nâu gô hơdai hnam dơnŏ nhi kơjăp kiơ̆ kơ khei sơnăm, trŏ kơjên tơmam.

Mă lei đơ̆ng rŏng kơ noh dôm khei- kơplah oei hloh kơ pă puăn sơnăm pơjao ăn jên ‘net ‘net dơ̆ng- inh hơdrôt kơplah mơ̆ng klo inh tơtok khan sư ưh pă lăp đon kơ gre mă hơpơi wă ‘nâu bơih. Sư lăng lu gre ‘nao lĕch plơ̆ng hloh dơ̆ng. jơhngơ̆m inh rơdu bơih. Pă minh ‘măng dơ̆ng, inh gô tơ’bơ̆p tơdrong tơpă: lu nhôn tơhiong lê̆ jơnăr, jên tơmam păng jơhngơ̆m đon tơchĕng ăn kơ tơmam mă ưh kơ đei ba ăn chơt hiôk đunh sơnăm, păng ưh kơ đei gĭt khŏm khŏm. Tơdrong oei đei ‘nâu ‘mêm hmach đĕch.

Đơ̆ng lơ kơ sơnăm, inh đei hŏk iŏk thoi âu, jơhngơ̆m ‘mêm hmach đei lơ tơdrong. Noh rŏ lăng sơ’ngon, jơhngơ̆m chhŭr nuih, jĭ jăn, ơh sơ’ngon, păng jơhngơ̆m ‘mêm hmach – mă đei lơ tơdrong nai dơ̆ng. lu bơ̆n hmach yua kơ trŏ kơ đei bơih ră mă ưh kơtam iŏk, dôm kơ tơdrong pơm ding truh tơ đei tơdrong kơnê̆, yua kơ dôm tơdrong hăt kơ drơ̆ng iŏk mă ưh kơ tơchĕng kơ tơdrong truh đơ̆ng rŏng kơ ‘nâu kơnh.

Kơplah ‘Bok-Kei-Dei hơmet jơhngơ̆m ăn kơ kon pơlei Sư mơ̆t tơ pơlei Kanaan Sư đei dan ‘bơ̆t anăp kon pơlei wă kơ lu sư rơih iŏk: iŏk tơdrong pŭn hiôk tih, dah tơ’bơ̆p tơdrong ‘mêm hmach tôch bơneh. Sơ̆p hla bơar ‘Bok-Kei-Dei chih thoi âu, Kră Yang dan ăn kơ lu sư rơih iŏk tơdrong arih dah tơdrong lôch, wă kơ adrĕch adrŭng păng kon sâu lu sư gơh arih; wă kơ lu sư ‘mêm kơ ‘Bok-Kei-Dei, chu yom nơ̆r Sư noh jơ̆ arih, păng Kră Yang gô ăn kơ lu sư arih sot tơ kơpăl teh ‘nâu ( Bơtho khôi Juăt 30: 19-20)

Rơih iŏk tơdrong arih noh jơ̆ rơih iŏk Kră Yang. ‘Bok-Kei-Dei hơngap krao kon pơlei Sư lui gơnang kơ Sư, păng pơdrơ̆ng ăn kơ đơ̆ng jơhngơ̆m đon lui noh. Hmach dêh, kon pơlei Isơrael ưh kơ rơih iŏk tơdrong trŏ ‘blep noh.

“Kră Yang khan kơ Môis: Ih gô pơdơh hăm lu ‘bok ih; kon pơlei ‘nâu gô kơkuh kơ yang nai lăm dêh lu sư wă năm mơ̆t lu sư gô achăng lê̆ Inh păng pơm glăi kơ tơdrong pơgơ̆p mă Inh đei pơgơ̆p boih hăm lu sư.” (Bơtho Khôi Juăt 31:16)

Tuch luch, lu sư pŭ iŏk tơdrong hiong răm mă ‘Bok-Kei-Dei đei roi tơbăt ăn bơih.
Hrei ‘nâu, Yang Yêsu kư̆m dan ăn kơ lu bơ̆n rơih iŏk tơdrong arih hăm tơdrong lôch:

“ ‘Bok Kei-Dei ‘mêm mơnat tơpă rim ‘nu bơngai jơ̆p ala teh âu na Sư mah ăn Kon pôm Sư lôch tang kon bơngai. Bơngai bu lui kơ Kon Sư huay kơ lôch hiong ôh. Bơngai ‘noh sư gô oei hơdai hăm ‘Bok Kei-Dei arih ling-lang.” (Yôhan 3:16)
“Bơngai bu lui kơ Kon Sư huay kơ pŭ tơdrong phak ôh. Bơngai bu ưh kơ chu lui kơ Kon Sư, ‘Bok Kei-Dei sek tơlang tơdrong sư boih păng wă phak sư tơpă yua kơ sư ưh kơ wă lui kơ Kon pôm Sư.” (Yôhan 3:18)

Yua kơ thoi noh ơ buăl, ‘nĕ kơ gô ding truh tơ tôm tơdrong kiơ oei đei noh jơ̆ ‘mêm hmach đĕch. Athei rơih iŏk tơdrong arih – rơih iŏk Yang Yêsu Krist đơ̆ng năr ‘nâu.

Apĭnh đĭ đăng krao khan hơdai:
Kră Yang ơi, jơhngơ̆m rơdu tơrăn kon ‘bônh kơ druh kiơ̆ dôm tơdrong ‘bôh ‘lơ̆ng lăm teh đak ‘nâu. Kon băt kơ dôm tơdrong ưh kơ đei gĭt kăl ‘bônh kơ hiong ưh kơ đei ba ăn tôm tơdrong ‘lơ̆ng mă minh ‘nu Ih đĕch đei ba ăn kơ kon. Apinh tơgŭm kon băt kơ hơngah kơ tôm tơdrong gah teh đak ‘nâu, rơih iŏk minh ‘nu Ih đĕch. Yua ưh kơ đei kiơ gĭt hloh kơ hiôk hian păng lăp đon khŏm khŏm mă Ih ăn kơ kon. Hơpơi kơ tôm tơdrong rơih iŏk đơ̆ng kon năr ‘nâu păng ning mônh đei tơ’bôh jơhngơ̆m ‘mêm kơ Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, teh đak ‘nâu kư̆m đei ăn kơ lu bơ̆n lăp đon tŏ sĕt đĕch, na tơdrong hiôk hian kơjăp tơpă đei chă ‘bôh lăm Kră Yang đĕch. Dôm kơ tơdrong nhen thoi “trŏ kơ đei” năr ‘nâu, rŏ lăng đơ̆ng rŏng kơ ‘nâu gô pơm kơ bơ̆n hul hơl. Mă ưh kơ đei bu rơih iŏk Kră Yang mă đei hmach. Năr ‘nâu, buăl gô rơih iŏk tơdrong kiơ? ‘Nĕ kơ arih minh chăl arih lăng ming tơ rŏng tă kơ ‘bôh hmach ngăl. Athei rơih iŏk Kră Yang păng yak kiơ̆ Sư!

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.