Đei layơ buăl mơn ‘bôh lăp đon yua kơ đei mĭnh ‘nu bơngai buăl gơh hơgei? Đei layơ buăl mơn ‘bôh hơ iă kơ plah đei mĭnh ‘nu bơngai buăl đe ư-ang, phŏ kŭm bơngai buăl ‘noh jơ̆ bơngai pơgơ̆r tih lăm mĭnh anih jang dah pơgơ̆r đĭ kơ dêh char? Hăm đei layơ buăl ‘măn đunh jơ lăp wă ră roi hăm bơngai nai gah bơngai buăl đei lăp đon ‘noh?

Mă lei buăl hăm đei tơchĕng pơwao khan; Kră Yang Yêsu jơ̆ Tơ’ngla kơjung hloh, mơsêh mơyang păng ‘bĕnh tơdrong ‘mêm mơnat đei krao buăl jơ̆ “buăl juăt” kơ Sư? Mĭnh anih mă ưh kơ đei kiơ tơ kơpal chăl arih ‘nâu gơh pơtŏ pơting, păng hloh kơ đĭ đăng, buăl ưh kơ kăl kơ trŏ ‘mơ̆i na gơh đei tơdrong ‘noh. Sư đei rơih buăl, ‘mêm kơ buăl, păng ăn kơ buăl anih ‘noh.

Năr ‘nâu, ‘năr 30/07/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai RICH MILLER kơ̆l ‘bai BUĂL JUĂT PƠTAO

Sơ̆p Hla Bơar ‘Bok Kei-Dei: “Dah iĕm răk dôm tơdrong Inh pơkă lei iĕm buăl juăt Inh tơpă….Inh pơkă ăn kơ iĕm minh ‘măng âu dơ̆ng: Iĕm athei ‘mêm mơnat dih băl.” (Yôhan 15:14,17)

Đei dôm lu chăl lăm Sơ̆p Hla Bơar ‘Bok Kei-Dei tơpă pơm kơ lu bơ̆n ưh kơ hlôh dah lăp ‘maih đŏk lăng hlôi, kăl hloh jơ̆ lu chăl pơma gah khŭl lăm Jô̆ Bơngai dah lu tơdrong khôi juăt rơđah gah tơdrong jĭ kar ‘ngoaih lăm Lêwi na truh tơ tơdrong klah asong teh Kanaan lăm sơ̆p Yôsuê.

Yua kơ thoi noh, lơ bơngai gô rơih iŏk đŏk lu gah juăt dêh hloh thoi sơ̆p hla ar Pah ‘Nao, hơ’mon ‘bok Đawit blah kĕ jei ‘bok Gôliat dah hla ar kơthơ ‘bĕnh tơdrong pơlung đơ̆ng ‘bok Pôl gơih kơ Khŭl Bơngai Lui Êphêsô. Mă lei, Nơ̆r Kră Yang kơ lu bơ̆n băt khan đĭ kơ Sơ̆p Hla Bơar ‘Bok Kei-Dei đei ‘Bok Kei-Dei tơ’bôh ăn…(II Timôthê 3:16). Yua kơ thoi noh, mă khan dôm lu chăl lăm Sơ̆p Hla Bơar mă lu bơ̆n phŏ đei ưh kơ đei hiơ̆k bơngơ̆t đei gĭt kăl păng jơ̆ tơmam sa wei rong kơ tơdrong arih bơhngol lu bơ̆n.

Tơdrong ‘nâu đei truh hăm inh brei mơsơ̆ ‘nâu kơplah inh đŏk I Hơ’mon 21, Chăl ‘nâu kơnhăm kơ pơtao Đawit păng dôm lu bơngai đei sư pơjao tơdrong jang pơgơ̆r lăm khŭl lĭnh Isơrael, dôm lu bơngai wei lăng mŭk tơmam kơ pơtao păng lu bơngai pơma dơnuh hăm pơtao. ‘Noh jơ̆ mĭnh anăn chih hơmet kơjung, ưh kơ đei hơ iă tơpă wă đŏk. Mă lei, rim ‘nu bơngai lăm lu sư đei gĭt kăl lăm tơdrong jang wei lăng tơdrong jang păng bơ̆jang tơdrong jang tang măt kơ ‘bok pơtao.
Wă tuch luch hla ar ‘nâu bơih Husai bơngai Arkit. Husai đei tơ’blŏk truh ‘noh jơ̆ buăl kơ pơtao Đawit. Sơ̆p Hla Bơar ‘Bok Kei-Dei chih:”….Husai, bơngai Arkit, buăl juăt pơtao.” ( I Hơ’mon 27:33)

Tơdrong đei băt truh jơ̆ buăl juăt pơtao jơ̆ mĭnh tơdrong pŭn tih dêh lăm kơplah chăl sơ̆. Kơplah inh oei đŏk chăl lăm Sơ̆p Hla Bơar ‘Bok Kei-Dei ‘nâu, Kră Yang đei ăn kơ inh ‘bôh khan tơdrong pơgơ̆p kơ Husai hăm pơtao Đawit jơ̆ gĭt kăl thoi yơ. Păng pŭn hloh dơ̆ng jơ̆ tơdrong jing buăl juăt ‘bok pơtao đei roi tơ’bôh hơdai hăm lu bơngai pơgơ̆r khŭl lĭnh păng pơma dơnuh gah teh đak.

‘Bai hŏk jrŭ să ayơ mă lu bơ̆n sơng iŏk đơ̆ng chăl lăm Sơ̆p Hla Bơar ‘Bok Kei-Dei ‘nâu? Hăm trŏ đei kơplah lu bơ̆n ‘bônh dêh đei pơhlŭ lăm tơdrong jang bơwih bơwăn lăm hnam Kră Yang păng chơ chă tơdrong gĭt kăl đơ̆ng akâu jăn đơ̆ng lăm tơdrong bơ̆jang lu bơ̆n oei jang? Athei pơ’lơ̆ng, yua kơ tơdrong ‘noh gô pơm kơ lu bơ̆n hiơt kơ tơdrong gĭt kăl hloh ‘noh jơ̆ “buăl juăt” hăm Yang Yêsu jơ̆ ‘Bok pơtao tih hloh kơ lu bơ̆n.

Lăm măng đe wă rôp Kră Yang Yêsu sơ̆- ‘bơ̆t anăp kơplah pŭ iŏk pơmat tat, Yang Yêsu ưh đei kơnhăm truh tơ anăn tơdrong bơ̆jang, tơdrong jang kơ lu bơngai pơhrăm. Tơplih kơ ‘noh, Sư wă kơ lu bơngai pơhrăm băt mĭnh tơdrong đơ̆ng ‘Bok Kei-Dei: Sư krao lu bơngai ‘noh jơ̆ “buăl juăt”. Păng tơdrong tơ’bôh đơ̆ng “buăl juăt” ‘noh đơ̆ng tơdrong lu sư pơm tơ’bôh đơ̆ng lu sư kơdih.

“Dah iĕm răk dôm tơdrong Inh pơkă lei iĕm buăl juăt Inh tơpă…. Inh pơkă ăn kơ iĕm minh ‘măng âu dơ̆ng: Iĕm athei ‘mêm mơnat dih băl.” (Yôhan 15:14,17)

Lăm lơ anăn mă Sư gơh yua, Yang Yêsu đei rơih mĭnh nơ̆r tơ’bôh tơdrong jê̆ lăm tơdrong pơgơ̆p Sư păng lu bơ̆n. Sư krao lu bơ̆n jơ̆ “buăl juăt”. Đơ̆ng ‘noh, Kră Yang tơ’bôh mĭnh tơdrong jrŭ să tơpă: Sư lăng gĭt tơdrong pơgơ̆p hloh kơ anăn tơdrong jang dah kăl kơjang. ‘Bok Kei-Dei ưh kơ kơ‘bah kơ buăl juăt, mă lei Sư ‘măn ăn tơdrong pơgơ̆p ‘noh kơ lu bơ̆n đơ̆ng tơdrong ‘mêm mơnat păng tơdrong mơnat ăn đĕch rơkah rơkai đơ̆ng Sư. Mă lei, buăl juăt ‘noh ưh kơ trŏ tơdrong lu bơ̆n gơh lăng ưh kơ gĭt. Yang Yêsu oei jơ̆ Pơtao tih hloh, Tơ’ngla trŏ kơ lu bơ̆n chu yom păng bơ̆jang Tơdrong Ată Sư đei ăn.

Yang Yêsu krao lu bơ̆n jơ̆ buăl kơ Sư. Sư wă kơ lu bơ̆n ră roi hăm Sư đĭ đăng dôm lu tơdrong lăm jrŭ hlơp lăm jơhngơ̆m. Păng kơplah lu bơ̆n jơ̆ “buăl juăt” juăt dêh hăm Sư, kơdih tơdrong arih lu bơ̆n gô tơ’bôh Sư kơ dôm lu bơngai jum dăr. Inh pơlung buăl athei năm tơ Kră Yang lăm năr ‘nâu, apĭnh Kră Yang tơgŭm buăl ling lang yak năm lăm tơdrong pơgơ̆p hơdai hăm Sư thoi “buăl juăt” yua kơ ‘noh bơih tơm tơdrong mă Sư pơjing buăl.

Apĭnh đĭ đăng krao khan hơdai:
Kơkuh kơ Kră yang, mă khan Sư jơ̆ Pơtao kơ đĭ đăng pơtao, jơ̆ Tơ’ngla ‘bĕnh tơdrong mơsêh mơyang păng ư-ang, mă lei Ih oei ling lang jơ̆ bơngai buăl juăt kơ kon. Apĭnh tơgŭm kon ling lang oei lăm tơdrong pơgơ̆p kơjăp hăm Ih rim năr, wă kơ kon ưh kơ hiơt kơ anih gĭt kăl mă Ih đei ‘măn ăn kơ kon- ‘noh jơ̆ gơh pơm “buăl juăt kơ pơtao”. Hơpơi kơ tơdrong arih kon ling lang pơchrang ŭnh hơdah đơ̆ng Kră Yang, pơm pơ ư-ang anăn Ih păng ba tơdrong ‘mêm mơnat Ih truh kơ đĭ đăng bơngai jum dăr. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, kơplah tơdrong arih lu bơ̆n ‘bĕnh blai tơdrong ‘mêm mơnat păng arih lăm tơdrong pơgơ̆p kơjăp hăm Kră Yang thoi dôm lu bơngai buăl juăt kơ Sư. Kơplah rim năr lu bơ̆n mơn hlôi đei tơdrong pŭn hiôk hlĭch chrơp đơ̆ng anih Kră Yang, lei mĭnh tơdrong tơpă gô truh: lu bơ̆n gô ưh kơ gơh bơwei kơjăp tơdrong hiôk chơt ‘noh kơdih bơ̆n.

Mă khan tơ anih ayơ, tơ’bơ̆p dôm tơdrong kiơ, jơhngơ̆m lu bơ̆n gô ‘maih wă ră roi gah dôm tơdrong pŭn hiôk tih dêh mă Kră Yang đei pơm lăm tơdrong arih bơ̆n. Păng hloh kơ ‘noh dơ̆ng, kơdih lăm tơdrong juăt arih, nơ̆r pơma, tơdrong tơ’bôh đơ̆ng lu bơ̆n rim năr gô jơ̆ mĭnh tơdrong tơbăt arih gah Kră Yang. Bơngai nai gô lăng ‘bôh Sư đơ̆ng kơdih chăl arih đei tơplih păng ‘bĕnh tơdrong pŭn hiôk đơ̆ng lu bơ̆n.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.