Bơngai lui kơ ‘Bok-Kei-Dei, lu bơ̆n đei hŏk pơhrăm păng truh tơ hlôh lơ gah Yang Bơhngol ‘Lơ̆ng. Lu bơ̆n băt kơ Sư oei bơ̆jang pran kơtang lăm chăl arih hrei ‘nâu. Mă lei yua kơ kiơ lăm tơdrong arih rim năr, đei lơ wơ̆t lu bơ̆n đei mơn bơhngol bơ̆n hrĕng kro păng gleh lap? mă khan đei hŏk pơhrăm lơ gah Yang Bơhngol ‘Lơ̆ng, mă lu bơ̆n hăm đei mơn đei tơdrong arih đơ̆ng Sư rim năr ưh?

Năr ‘nâu, ‘năr 29/07/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai Jennifer Slattery kơ̆l ‘bai ATHEI YAK NĂM KIƠ̆ YANG BƠHNGOL ‘LƠ̆NG.

Sơ̆p Hla Bơar ‘Bok Kei-Dei: “Yang Bơhngol ‘Lơ̆ng ăn kơ bơ̆n jing kon ‘Bok Kei-Dei, na bơ̆n kư̆m athei ăn kơ Sư pơgơ̆r bơ̆n khŏm khŏm mơ̆n.” (Galati 5:25)

Kơplah ‘nao đang kơ pơkong, klo akăn nhi đei chih anăn hŏk pơhrăm soang. Đei anih tơ pơlei đei pơjing hŏk pơhrăm huay kơ đei ăn jên, pơhrăm lăm gah kơsơ̆ lăm năr giĕng, yua kơ thoi noh giĕng ayơ nhi kư̆m đei năm adrin hŏk pơhrăm. Hăm nhi, tơdrong soang trŏ kơ nhip noh ‘lơ̆ng dêh bơih, dah ưh kơ wă pơma khan kơnê̆ dêh, yua kơ thoi noh inh pơhrăm kơdih tơhnam. Inh năm tơ hnam ‘măn sơ̆p hla bơar đei iŏk băng viđiô bơtho tơ’bôh gah soang. Kơplah klo inh brŏk đơ̆ng jang păng truh ‘bơ̆t ‘măng, inh gô lê̆ hơdrol ‘bơ̆t doh, chro ti trŏ kơ wă hơmet soang păng pơtơm kơ yak soang hloi.

Mă khan pơhrăm lơ hloh, mă inh ưh kơ đei ‘net ‘biơ̆ hloi. Inh ngăl juă kơpal jơ̆ng klo inh, dui tơ pah ‘ngiĕo mă klo inh wă kơ tơ pah ‘ma; nă ‘bar ‘nu nhi pơm tơ’bôh nhen thoi lu bơngai kơ ‘măi mă ưh kơ đei hơ-iă hloi. Tơdrong noh yua kơ inh lui ngeh kơdih dêh khan inh gơh soang, truh tơ hiơt kơ bơngai soang hơdai.

Đei lơ wơ̆t, inh kư̆m thoi noh kơplah pơgơ̆p hăm Kră Yang – Tơ’ngla oei hơdai inh. Inh kơnhăm dêh kơ tơdrong inh kăl kơ bơ̆jang: đŏk nơ̆r ‘Bok-Kei-Dei, bơtho lăm Hnam Trưng Năr Tơpơh, hăm lu tơdrong wă jang nai. Tŏk bŏk lu tơdrong jang noh, ‘bônh đĕch wă weh đơ̆ng Tơ’ngla mă inh bơ̆jang. Dôm kơ tơdrong noh rŏ kơ đơ̆ng tôm tơdrong đei đơ̆ng jơhngơ̆m ‘mêm mơnat păng chu yom hloh kơ dôm tơdrong jang hăm kơ măi dah đei dan ăn đĕch, yua kơ lu sư gô pơm ăn gleh lap păng ưh kơ đei yua kiơ. Mă lei, kơplah inh chu yom Kră Yang, pơjao tôm tơdrong tơchĕng păng dôm tơdrong proh hơmet hơdrol đơ̆ng kơdih inh ăn kơ Sư, wă kơ inh kơnhăm kơ Sư đĕch, na tôm tơdrong jing ‘lơ̆ng.

Buăl hăm đei layơ lăng lu bơngai juăt kơ soang dah lu hơgrop soang tơ kơpal prĕl tơsĕr bơih ưh? Lu sư hơdai băl ‘lơ̆ng dêh tơpă. Mă khan bơngai lăng ôr jreo, kơ măi phĭn ling lang, mă lu sư ưh kơ kơnhăm tơnoh. Sư kơnhăm tơ bơngai soang hơdai sư, hlôh băt băl đơ̆ng tơtĕp măt, tơ’bôh hlôh dih băl tĕnh tơpă, ‘lơ̆ng rŏ, păng tơproh ‘lơ̆ng.

Gô thoi yơ tơdah lu bơ̆n pơgơ̆p hơdai Kră Yang tơ’bưh ‘lơ̆ng thoi noh? Gô thoi yơ tơdah lu bơ̆n kơnhăm kơ Kră Yang đĕch, hlôh băt păng pơm kiơ̆ kơ thoi Kră Yang wă? Na tơdrong kiơ pơm kơ lu bơ̆n ưh kơ đei pơm thoi noh? Tơdrong kiơ pơm kơ lu bơ̆n tơtăm, bơ̆l hăl păng rơdu rơmơ̆n.

Đei minh năr Tơpơh noh, inh đei ‘măn prăt kơsơ̆ wă hŏk pơhrăm gah Yang Bơhngol ‘Lơ̆ng. Đơ̆ng ‘blŭng a truh tơ đĭ sơ̆p hla bơar ‘Bok-Kei-Dei, lu nhôn đei bơtho Yang Bơhngol ‘Lơ̆ng jơ̆ Tơ’ngla chông anhăk, oei hơdai, bơtho tơ’bôh, ‘bĕnh blai, krao khan tơgŭm păng wei lăng. ‘Bok Pôl đei krao khan thoi âu:

“Đĭ-đăng kơ lu kon ‘Bok Kei-Dei mă oei tơ nhôn kư̆m hơdai đei nơ̆r jet gia iĕm. Nhôn apinh Kră Yang Yêsu Krist, đon băt mơnat, wei-lăng iĕm lăm tôm tơdrong; ‘Bok Kei-Dei Kră Yang mă ‘mêm kơeng kơ bơ̆n, Sư gô tơgŭm iĕm ling-lang; Yang Bơhngol ‘Lơ̆ng, Sư kư̆m oei hơdai hăm iĕm khŏm khŏm.” (II Kôrintô 13:13)

Gah Yang Yêsu đei roi tơbăt tơdrong arih gah bơhngol ưh kơ đei adrin đơ̆ng kon bơngai, mă đei đơ̆ng Yang Bơhngol ‘Lơ̆ng.

“Dah jơhngơ̆m đon iĕm lui kiơ̆ tơdrong Inh, lei iĕm gô arih ling-lang. Dah iĕm kiơ̆ tơdrong akâu akar đĕch, lei ưh kơ đei yua kiơ ôh. Dôm nơ̆r Inh bơtho khan ăn kơ iĕm gah tơdrong sa sĕch akar Inh, Inh wă ră kơ jơhngơ̆m đon iĕm lui kiơ̆ kơ Inh na iĕm gô arih ling-lang.” (Yôhan 6:63)

Tơdah tơdrong arih lu bơ̆n arih ataih đơ̆ng Kră Yang păng ưh kơ chu yom Kră Yang tôm tơdrong, na tôm tơdrong lu bơ̆n adrin ưh kơ đei yua kiơ. Mă khan tơdrong jang lu bơ̆n tih dang yơ, mă khan hŏk pơhrăm nơ̆r ‘Bok-Kei-Dei lơ dang yơ, dah tơdrong pơnam truh tơ dang yơ, tơdah ưh kơ đơ̆ng Yang Bơhngol ‘Lơ̆ng pơih ăn, bơtho tơ’bôh păng bơwei, noh jơ̆ adrin đơ̆ng kon bơngai đĕch, kiơ̆ kơ đon gơh hơgei kon bơngai, bơ̆jang kiơ̆ kơ kon bơngai. Na lu bơ̆n đei krao iŏk tih hloh kơ noh, noh jơ̆ arih yak năm hăm Yang Bơhngol ‘Lơ̆ng, đei tôm tơdrong đơ̆ng Yang Bơhngol ‘Lơ̆ng păng arih hiôk hian lăm tơdrong mơsêh mơyang đơ̆ng Yang Bơhngol ‘Lơ̆ng.

“Yang Bơhngol ‘Lơ̆ng ăn kơ bơ̆n jing kon ‘Bok Kei-Dei, na bơ̆n kư̆m athei ăn kơ Sư pơgơ̆r bơ̆n khŏm khŏm mơ̆n.” (Galati 5:25)

Kơnhăm tuch luch kơ chăl arih Bơngai lui kơ ‘Bok-Kei-Dei noh jơ̆ jing ge ‘lơ̆ng rơgoh păng ăn kơ dôm tơdrong jang ‘lơ̆ng tơpăt, pơm kiơ̆ kơ thoi ‘Bok-Kei-Dei lăp đon, păng jing kơ lu ge chĕp ba tơdrong mơsêh păng ‘mêm mơnat đơ̆ng Kră Yang ăn kơ bơngai nai.

‘Maih wă kơ ‘bĕnh ‘blai Yang Bơhngol ‘Lơ̆ng, hơdrol hloh lu bơ̆n athei ôp rơgoh, ôp rơgoh tơdrong juăt kơpơm, đơ̆ng tơdrong yoch, lĕch đơ̆ng jơhngơ̆m ‘maih wă kơ tơdrong kơnê̆. Inh lui ngeh kơplah ayơ lu bơ̆n druh kiơ̆ tơdrong noh, mă khan noh tơdrong ‘lơ̆ng, mă lei noh ưh kơ đơ̆ng ‘Bok-Kei-Dei, na tơdrong noh kư̆m pơgăn tơdrong jang Yang Bơhngol ‘Lơ̆ng. Noh rŏ lăng tơdrong jang mă lu bơ̆n krê kơ hiong, mă tơdrong lu bơ̆n ‘maih wă bơwei, dah tôm tơdrong jang kiơ …

Kơplah wă hơdrin bơwei iŏk dôm tơdrong noh, noh lu bơ̆n pơm kiơ̆ kơ jơhngơ̆m đon kơdih. ‘Maih wă kơ Yang Bơhngol ‘Lơ̆ng oei hơdai păng bơjăng lăm chăl arih kơdih, lu bơ̆n kăl kơ chu yom păng gơnang kơ Sư tôm tơdrong – Tơ’ngla oei hơdai păng bơ̆jang hơdai lu bơ̆n. Tơdah ưh, inh lui ngeh tơdrong jang lu bơ̆n gô ưh kơ đei mơsêh mơyang. Yua kơ kiơ? Yua kơ lu bơ̆n ưh kơ dan Yang Bơhngol ‘Lơ̆ng hơdrol hloh.

Apĭnh đĭ đăng krao khan hơdai:
Kơkuh kơ Yang Bơhngol ‘Lơ̆ng! Bơnê kơ Ih yua kơ rim jơ phŭt lăm chăl arih kon đei Ih oei hơdai păng chông anhăk. Kră Yang ơi, đei lơ wơ̆t kon hăt kơ tơdrong jang păng bơ̆jang tôm tơdrong mă ưh kơ gơnang jơhngơ̆m pran đơ̆ng Ih. Apinh huay kơ jô̆ yo kơ kon, pơklaih kon thoi kơ đêl, păng tơ gŭm kon băt kơ yak năm kiơ̆ Ih đơ̆ng rim jơ phŭt lăm chăl arih kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, buăl oei dơ̆ng ‘bơ̆t “băt” dah yak năm tơ anih “arih” lăm tơdrong mơsêh Yang Bơhngol ‘Lơ̆ng? Buăl oei lăp đon kơ gơh hơgei băt kơ Yang Bơhngol ‘Lơ̆ng, mă ưh kơ rơhing kơ Sư? Năr ‘nâu, Kră Yang krao iŏk buăl wih brŏk đơ̆ng tơm jơhngơ̆m pran đơ̆ng Sư, wă kơ tôm tơdrong buăl bơ̆jang, măn tơdrong jang kơdih dah tơdrong jang kơ ‘Bok-Kei-Dei, buăl đei bơ̆jang đơ̆ng jơhngơ̆m pran Kră Yang. Yua kơ đơ̆ng Yang Bơhngol ‘Lơ̆ng noh Tơm kơ tuh ăn tơdrong mơsêh păng pơm kơ tơdrong jang buăl đei plei tơpă. Ưh kơ yua đơ̆ng đon gơh hơgei dah pơnam mă buăl pơm ăn kơ Kră Yang lăp đon, mă yua kơ đơ̆ng Sư oei hơdai păng bơ̆jang đơ̆ng Yang Bơhngol ‘Lơ̆ng.

Athei krao chơchă jơhngơ̆m pran ‘bĕnh blai đơ̆ng Kră Yang, pơjao tôm tơdrong jang buăl ăn kơ Sư păng yak năm lăm jơhngơ̆m lui gơnang. Lăm năr hrĕng kro păng bơ̆l hăl, ưh kơ đei kiơ ‘lơ̆ng hloh noh jơ̆ chơchă păng oei hơdai hăm Kră Yang. Rai jê̆ Yang Bơhngol ‘Lơ̆ng, buăl gô đei jơhngơ̆m pran păng đei tơdrong arih ‘nao đơ̆ng Sư.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.