‘Bâu phu jơ̆ tơmam ưh kơ gơh lăng ‘bôh, ưh kơ gơh pel ‘bơm, mă lei gơh mơn ‘bâu. Bơngai lui kơ Kră Yang Dŏng Pơklaih đei krao wă pơyơ̆r chăl arih kơdih nhen thoi mĭnh tơmam soi đei ‘bâu phu. ‘Bâu phu ‘noh ưh kơ gơh ‘bâu hăm tơdrong mơn hmă đĕch, mă lei tơ’bôh đơ̆ng mĭnh chăl arih “arih, ‘lơ̆ng rơgoh păng trŏ thoi ‘Bok Kei-Dei lăp đon.”

Năr ‘nâu, ‘năr 28/07/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Paul J. Palma kơ̆l ‘bai ‘BÂU PHU KRĂ YANG LĂP ĐON.

Sơ̆p Hla Bơar ‘Bok Kei-Dei: “Ơ lu ‘nhŏng oh, bơ̆n băt boih ‘Bok Kei-Dei ‘mêm kơ bơ̆n tôch bơneh dang noh, na bơ̆n athei pơjao akâu bơ̆n kơ Sư, ‘nĕ pă pơm yoch, pơm kiơ̆ kơ Sư đĕch, noh na Sư lăp đon kơ bơ̆n.” ( Rôm 12:1)

Đei layơ buăl ‘bâu mĭnh tơmam ‘bâu phu juăt truh tơ pơm kơ buăl ‘blŏk gah mĭnh tơdrong ‘blŏk dơ̆ng đơ̆ng lơ sơnăm adrol ưh? Rim kơ tơdrong phĕt, akăn inh juăt kơ dan dôm kơ ŭnh jrĕnh ‘bâu phu đơ̆ng ‘long quê̆ dăr kơ anih gơ’bang sŏng sa wă kơ tơ’blŏk dôm lu tơdrong ‘blŏk hơdơ̆r ‘mêm mơnat păng jơnăr hơdai đơ̆ng hnam dơnŏ. Dôm tơdrong chă wă kơ băt đei tơ’bôh tơdrong ‘nâu đei truh yua anih muh mơn kơ ‘bâu (hiơ̆k bơngơ̆t gah ‘bâu) anih jê̆ dêh lăm ‘ngok (hiơ̆k bơngơ̆t gah tơdrong ‘blŏk). Lăm pơđăm tơdrong mơn băt lăm akâu jăn kon bơngai: măt lăng ‘bôh, đon mơ̆ng kơtơ̆ng, muh mơn kơ ‘bâu, hơpiĕt mơn kơ tăng ‘ngam păng akar mơn kơ hơtŭt ‘bơm.

Lăm Jô̆ Bơngai 15, lu bơ̆n ‘bôh ‘Bok Kei-Dei khan bơtho Môis athei pơyơ̆r tơmam soi kơ Sư nhen thoi mĭnh pah đơ̆ng tơdrong kơkuh. Tơdrâu wơ̆t lăm chăl ‘nâu. Sư krao kon pơlei athei pơyơ̆r dôm kơ “ tơmam soi đei ‘bâu phu” (Jô̆ Bơngai 15:3, 7 , 10 , 13, 14 , 24). ‘Noh jơ̆ dôm lu tơmam soi ‘buh tơlĕch ‘bâu phu đei kơ năl; sư kŭm lĕi lăi thoi kơ ‘bâu phu đơ̆ng ‘nhĕm sem dơrong kơplah đei soh ‘buh. Mă lei, tơdrong gĭt kăl ưh kơ ‘bơ̆t lăm anih akâu ‘bâu phu, mă ‘bơ̆t lăm tơdrong tơm đơ̆ng sư: kơplah lu bơ̆n ư-ang kơ Kră Yang đơ̆ng lăm tơdrong pơm tơ’bôh akŭm kơkuh, tơdrong ‘noh Sư lăp đon.

Dang ei, ‘Bok Kei-Dei ưh pă athei kon pơlei Sư kơkuh đơ̆ng lăm tơdrong pơm soi tơmam bơih. Lu tơdrong juăt păng tơmam soi ưh kơ pă kăl bơih, yua kơ tơdrong dŏng pơklaih đei ăn kơ kon bơngai đơ̆ng lăm tơdrong lôch mĭnh wơ̆t tôm bơih đơ̆ng ‘Bok Krist:

“Thoi noh bơ̆n băt kơ Yêsu Krist jang trŏ thoi ‘Bok Kei-Dei pơkă tơpă, Sư soi akâu Sư kơ ‘Bok Kei-Dei minh ‘măng sơ̆ tôm boih, na lu bơ̆n dang ei jing bơngai ‘lơ̆ng tơpăt yua kơ Sư. Đĭ kơ lu ‘bok soi oei jang hơnơ̆ng rim năr soi kơ ‘Bok Kei-Dei, mă-lei tơdrong soi noh ưh kơ gơh pơklaih tơdrong yoch ôh. Gah Yêsu Krist, Sư soi akâu Sư kơ ‘Bok Kei-Dei wă pơklaih tơdrong yoch kon bơngai minh ‘măng sơ̆ tôm boih. Dang ei Sư tơoei gah ‘ma kơ ‘Bă Sư ‘Bok Kei-Dei.” (Hêbrơ 10-10-12)

Mă khan ưh pă pơyơ̆r dôm lu tơmam soi thoi sơ̆, mă lei rim ‘nu bơngai lui kơ Kră Yang dang ei đei krao pơyơ̆r kơdih tơdrong arih sư nhen thoi tơmam soi kơ ‘Bok Kei-Dei. Yua kơ thoi noh, ‘bok Pôl pơlung lu bơngai lui tơ Rôm:
“Ơ lu ‘nhŏng oh, bơ̆n băt boih ‘Bok Kei-Dei ‘mêm kơ bơ̆n tôch bơneh dang noh, na bơ̆n athei pơjao akâu bơ̆n kơ Sư, ‘nĕ pă pơm yoch, pơm kiơ̆ kơ Sư đĕch, noh na Sư lăp đon kơ bơ̆n.” (Rôm 12:1)

‘Bok Pôk đei yua nơ̆r pơma pơtih gia gah tơmam soi lăm Pah So wă pơlung lu bơngai lui chăl Pah ‘Nao. Yua kơ ‘Bok Krist đei lôch yua kơ lu bơ̆n, lu bơ̆n kŭm kăl kơ pơyơ̆r tơdrong arih bơ̆n kơ Sư.

Rim năr, lu bơ̆n đei jơnăr kơ kuh kơ Kră Yang păng tơl tơwih dôm tơdrong kiơ Yang Yêsu đei pơm kơ lu bơ̆n. Tơdrong kơ kuh ưh kơ sĭ lăp dôm tơdrong lăm dôm lu ‘bai hơri hiôk dah lu jơ akŭm. Tơdrong arih kơkuh tơpă tơ ‘bôh đơ̆ng lăm tơdrong arih păng dôm tơdrong rơih iŏk đơ̆ng lu bơ̆n.

Buăl păng inh dang ei ưh kơ kăl kơ pơyơ̆r tơmam soi bơih, yua kơ tơdrong lôch tang đơ̆ng ‘Bok Krist đei klơ̆p gom tôm tơdrong yoch păng tơdrong yoch glăi đơ̆ng lu bơ̆n. Pham Kră Yang Yêsu đei tôm mah kơ buăl lăm năr ‘nâu păng khŏm khŏm. Rok trong lăm tơdrong arih, lu bơ̆n oei đei kơplah pơ̆k huŏng păng pơm yoch glăi, mă lei ‘long pơglang đơ̆ng Sư đei tôm mah kơ lu bơ̆n.

Apĭnh đĭ đăng krao khan hơdai:
Bơnê kơ Kră Yang Yêsu yua kơ đơ̆ng tơdrong chu lôch tang đơ̆ng Ih kơpal ‘long pơglang na kon gơh klaih. Mă khan thoi noh, đei kơplah tơdrong arih kon ưh kơ krăng kơchăng, na jing rơdu păng ưh kơ pơm kơ Ih lăp đon. Apĭnh Kră Yang huay kơ jô̆ yo păng tơgŭm kon băt pơyơ̆r đĭ chăl arih kon thoi mĭnh tơmam soi arih păng ‘lơ̆ng rơgoh kơ Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, tơdrong kơkuh tơpă lăp pơtơm kơplah buăl băt kơdih ưh pă arih yua kơ akâu jăn kơdih bơih na gô ăn hloi jơhngơ̆m pơyơ̆r đĭ chăl arih thoi mĭnh tơmam soi arih păng ‘lơ̆ng rơgoh kơ Kră Yang.

Năr ‘nâu, athei lăng dơ̆ng chăl arih kơdih, lăng rim kơ dôm tơdrong pơm tơ’bôh, đơ̆ng rim tơdrong pơdrơ̆ng jê̆ dang ei đơ̆ng buăl hăm oei tơ’bôh mĭnh tơmam soi “arih păng ‘lơ̆ng rơgoh” ‘bơ̆t anăp Kră Yang ưh? Đei tơdrong juăt, tơdrong tơchĕng dah pơm tơ’bôh ayơ pơm kơ buăl ataih hăm tơdrong ‘lơ̆ng rơgoh mă Kră Yang wă đơ̆ng anih buăl? Athei chu iŏk đon hơla năm hăm Kră Yang dang ei hloi, tơbral tôm tơdrong yoch păng tơdrong yoch glăi đơ̆ng buăl, wă kơ tơdrong arih buăl tơ’bôh ‘bâu phu đơ̆ng Sư kơ dôm lu bơngai jum dăr.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.