Đei layơ buăl mơn ‘bôh bơ̆l hăl kơ tơdrong arih kơdih? Dôm tơdrong nhen hơlơ̆k hơle đêl đăi, ưh kơ đei kiơ plơ̆ng ‘biơ̆, păng buăl kư̆m ưh kơ băt wă năm trong ayơ kơ chăl arih kơ kơdih noh kiơ, truh tơ buăl đei jet kơdih rŏ lăng Kră Yang ưh pă đei bơ̆jang tơ lăm chăl arih inh bơih. Mă lei lăm năr ‘nâu, athei lăng tơdrong hơ’mon kơ Abraham. Kơplah sư chu yom lĕch đơ̆ng anih hiôk hơđơ̆ng sư, Kră Yang chông anhăk sư tơ đaih wă kơ sư ngoi lăng tơ plĕnh păng lăng ‘bôh tơdrong tih hloh mă đơ̆ng ti Kră Yang đei dan ‘măn ăn kơ sư.

Năr ‘nâu, ‘năr 27/07/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai Susan M. Watkins kơ̆l ‘bai CHANG GÔ NƠ̆R PƠKĂ ‘LƠ̆NG TƠPĂT.

Sơ̆p Hla Bơar ‘Bok Kei-Dei: : “Lăm dôm nơ̆r ‘lơ̆ng mă Kră Yang đei hlôi khan boih kơ adrĕch bơngai Isơrael, ưh kơ đei minh nơ̆r pơkă pơkăm ayơ mă khan ưh kơ jing đĭ-đăng đei pơsĭt ngăl.” (Jôsuê 21:45)

Hrei âu buăl hăm đei lăng dôm kơ sơnglŏng tơ kơpal plĕnh? Buăl hăm đei ‘măn jơ ayơ ngoi lăng tơ lu sư ưh? Lu sơnglŏng noh oei rang pơchrang tơ kơpal plĕnh, oei dơ̆ng minh ‘bôt kiơ̆ kơ đơ̆ng Tơ’ngla Pơjing dan ăn. Plĕnh tih să jơ̆ anih ‘bĕnh kơ nơ̆r pơkă đơ̆ng ‘Bok-Kei-Dei, kư̆m jơ̆ anih tơ’bôh tơdrong ‘lơ̆ng rŏ đơ̆ng Sư. Inh ưh kơ băt buăl thoi yơ, “plĕnh kơ plah kơmăng” đei kơ năr hơmơ̆l klơ̆p găn lê̆. Kơplah tơdrong arih đei tơdrong kơnê̆, inh pă đei lăng ‘bôh hơđăl Kră Yang đei proh hơmet ăn kơ inh.

Măt lăng đơ̆ng Abraham kư̆m đei klơ̆p gom lê̆ thoi noh. Mă khan sư pơyơ̆r, pơjao đĭ tơdrong arih sư kơ Kră Yang, na truh tơ lơ khei sơnăm, kư̆m đei Abraham ngĭl ngŭl păng ưh kơ lui ngeh đĭ đăng. Nơ̆r ‘Bok-Kei-Dei đei chih ‘Bok Kei-Dei tơ’bôh dôm kơ tơdrong proh hơmet ăn đơ̆ng Sư kơ Abraham:

“Na Kră Yang chông sư tơ đaih păng khan: “Ih athei ngoi lăng tơ plĕnh. Dah ih kĕ jô̆ lu sơnglŏng jô̆ bĕ.” Kră Yang khan dơ̆ng: “Adrĕch adrung ih kư̆m gô thoi noh.” (Blŭng-a 15:5 )

Nhen thoi kơ phalê rang pơchrang tơ kơpal plĕnh gah kơ măng, dôm kơ lu sơnglŏng jing kơ tơ’bôh tơbăt ăn kơ teh đak băt gô jing đei adrĕch adrŭng plơ̆ng. Hlĭch tơpă, Abraham ngoi lăng tơ kơpal plĕnh păng mơ̆ng dôm kơ nơ̆r pơkă pơkăm đơ̆ng ‘Bok-Kei-Dei ăn kơ kon sâu sư. Adrĕch adrŭng Isơrael kư̆m đei nhen thoi kơ sơnglŏng tơ kơpal plĕnh, pơchrang hơdah lăm kơmăng mu.

Kư̆m đei, inh ngôi lăm hnam đunh dêh. Tơdrong arih đei lơ tơdrong jang pơm kơ inh hơwơ̆l hơwang păng kơ nhăm kơ dôm tơdrong wă bơ̆jang hloi. Inh lăng thoi noh na pơm kơ inh jing đei lơ tơdrong jang păng tơsŭl tơwŏk. Na thoi noh, nhen thoi Kră Yang đei bơ̆jang hăm Abraham, Kră Yang ăn kơ inh lĕch tơ đaih, wă kơ inh ngoi lăng tơ kơpal plĕnh păng sơng iŏk tơdrong ‘lơ̆ng rơgoh, wă kơ dui jơhngơ̆m mă tai. Măt inh kăl kơ jơ năr wă kơ juăt hăm măt lăng plơ̆ng, noh jơ̆ thoi kơ Kră Yang lăng. Inh đei krao iŏk wă kơ lĕch đơ̆ng dôm tơdrong teh đak păng rơngei yak năm lăm tơdrong tih hloh. Lăng đơ̆ng dôm tơdrong noh, dôm tơdrong đei tơplih hloi. Dôm tơdrong nhen ưh kơ đei wă kĕ hlôi jơ ‘nâu jing nhen thoi iĕ đĕch. Dôm kơ đon tơchĕng, hiơ̆k bơngơ̆t hiong đĭ bơih lăm tơdrong Kră Yang oei hơdai. Dôm tơdrong trăp trĭn nhen tơmo kŭk jing nhen thoi phyơl hơnhơl kơ plah tơdrong ‘lơ̆ng tơpăt Kră Yang krôp gom inh. Jơhngơ̆m inh đei tơplih jing ‘nao kơplah inh băt lăng tôm tơdrong thoi kơ Kră Yang păng pơdơh thĕng hreh ‘bơ̆t ‘nhĕt hơdrih Kră Yang.

Kư̆m đei năr, lu bơ̆n kăl kơ lĕch tơ đaih, weh đơ̆ng tơdrong juăt kơ arih, wă kơ đei ngơk lăng tơplih kơkŭp lăng tơ ala, păng chă dôm tơdrong hmă đĕch. Kră Yang gô tơplih jơhngơ̆m lu bơ̆n dang ei, păng pơthim ăn jơhngơ̆m pran kơ lu bơ̆n wă kơ dâu pơjei băl tơ anăp.

Dôm sơnăm đei yak năm hăm Kră Yang, inh đei lơ nơ̆r pơkă pơkăm đơ̆ng Sư. Mă khan măt lăng ưh kơ ‘bôh đĭ tôm kơ tơdrong Kră Yang gô bơ̆jang, mă lei inh lui ngeh kơ nơ̆r Sư pơkă. Noh nhen thoi kơplah buăl pơkă pơkăm wă răt tơmam, tơmam noh pơkăm ăn bơih, tơmam noh pơkă pơkăm wă iŏk tơpă, gô năr pơjao đĕch bơih. Buăl ưh kơ ‘bôh hloi tơmam kơplah noh, mă buăl lui ngeh tơmam oei rok trong gô truh tơ buăl. Nơ̆r pơkă pơkăm đơ̆ng Kră Yang kư̆m thoi noh, buăl kư̆m ưh kơ đei ‘bôh hloi, sĭt tơpă gô truh trŏ kơ jơ năr. Lăm kơplah jơ năr chang gô noh, lu bơ̆n đei wơ̆ ‘lŏ. Rim ‘nu lu bơ̆n đei tơdrong hơ’mon păng tơdrong arih kơdih kơdih, mă lei đĭ đăng đei chang gô nơ̆r pơkă ăn kơ kơdih gô pơsĭt tơpă. Lui ngeh kơ nơ̆r pơkă pơkăm jơ̆ ‘bônh, mă lei lu bơ̆n hăm đei jơhngơ̆m chơ̆n wă chang gô ưh? Athei ‘blŏk kơ dôm nơ̆r pơkă pơkăm đơ̆ng ‘Bok-Kei-Dei, ưh kơ đei tơdrong ayơ mă ưh kơ đei pơsĭt:

“Lăm dôm nơ̆r ‘lơ̆ng mă Kră Yang đei hlôi khan boih kơ adrĕch bơngai Isơrael, ưh kơ đei minh nơ̆r pơkă pơkăm ayơ mă khan ưh kơ jing đĭ-đăng đei pơsĭt ngăl.” (Jôsuê 21:45)

Nhen thoi Abraham, lu bơ̆n kư̆m kăl kơ lĕch tơ đaih, ngơk lăng tơ kơpăl plĕnh, păng jô̆ dôm kơ sơnglŏng mă pă kĕ jô̆. Yua kơ tơdah ưh kơ lĕch đơ̆ng anih mă kơ kơdih juăt noh păng lĕch tơ đaih, lu bơ̆n ưh kơ đei layơ ‘bôh sơ’nglŏng, tơdrong arih lu bơ̆n huay kơ ngôi minh dơnơ̆ng, yua kơ tơ anăp oei đei lơ tơdrong ‘lơ̆ng tơpăt mă ‘Bok-Kei-Dei đei hơmet ăn bơih. Mă kơplah lăm pơmat tat mă buăl oei yak năm kư̆m đei yua. ‘Bok-Kei-Dei ling lang tơ‘bôh pơchrang hơdah kơ lăm anih măng mu hloh. Ưh kơ đei bu ngơk lăng sơ’nglŏng gah kơ ‘năr, yua kơ hơdah kơ’năr pơklơ̆p lê̆ sơ’nglŏng. Kư̆m thoi noh, kơplah măng mu lăm chăl arih, lu bơ̆n ‘bôh Kră Yang hơđăl rơđah hloh. Tơdrong lu bơ̆n kăl kơ achăng lê̆ noh dôm kơ jơhngơ̆m đon tơchĕng pơm kơ lu bơ̆n ‘bônh kơ hlôh glăi kiơ̆ kơ trong yak năm đơ̆ng ‘Bok-Kei-Dei. Yua kơ dah ưh kơ pơm thoi noh, lu bơ̆n ưh kơ ‘bôh tơdrong kơnhăm kơ chăl arih bơ̆n, na ‘net ‘net gô jing sơ’ngon. Lŭch hloh dơ̆ng, lu bơ̆n tơchĕng khan Kră Yang ưh pă bơ̆jang tơ lăm chăl arih bơ̆n. Mă tơpă noh jơ̆ đĭ đăng kơ dôm tơdrong athei oei lăm tơdrong ‘lơ̆ng tơpăt Kră Yang.

Buăl hăm đei chih răk dôm nơ̆r pơkă pơkăm đơ̆ng Kră Yang tơ yơ ưh? Rŏ lăng kơplah ‘nâu buăl kăl kơ pơih dơ̆ng hla bơar noh păng đŏk lăng dơ̆ng. Păng truh tơ buăl kăl kơ lĕch tơ đaih păng ngơk lăng tơ kơpal plĕnh, lăng dôm tơdrong tih hloh đơ̆ng Kră Yang.

Apĭnh đĭ đăng krao khan hơdai:
Kră Yang ơi, lăm kơplah kon wơ̆l jrok dah jơhngơ̆m đon kon druh kiơ̆ dôm kơ tơdrong arih rim năr, apinh tơ ‘blŏk kơ kon, Ih ling lang đei tơdă ăn tơdrong ‘lơ̆ng ăn kơ chăl arih kon. Kư̆m đei kon ưh kơ ‘bôh đĭ tôm kơ tơdrong Ih oei bơ̆jang, mă lei apinh Ih ăn kơ kon bơwei kơjăp jơhngơ̆m chang gô nơ̆r pơkă pơkăm ‘lơ̆ng tơpăt đơ̆ng Ih. Apinh ăn kơ kon ‘bôh chăl arih kon tơ kơpal teh ‘nâu ưh kơ dơ̆ng ‘bơ̆t tôm tơdrong kon đei, mă noh jơ̆ trong yak năm đei pŭn hiôk kơplah kon băt kơ pơyơ̆r chăl arih kon ăn kơ Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, nơ̆r pơkă pơkăm ‘lơ̆ng tơpăt ayơ mă buăl oei gô Kră Yang tơl tơwih? Buăl hăm oei chăng gô nơ̆r pơkă noh ưh?

Năr ‘nâu, athei ngơk lăng tơ kơpal plĕnh păng lăng tơdrong tih hloh păng ‘lơ̆ng tơpăt đơ̆ng Kră Yang, pơyơ̆r nơ̆r bơnê păng băt kơ bơnê kơ Tơ’ngla pơjing plĕnh teh, tam mă đei layơ achăng lê̆ chăl arih buăl na oei tuh ăn pŭn hiôk păng yak năm hơdai buăl.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.