Bu lăm lu bơ̆n kŭm ‘maih arih mĭnh chăl hiôk hian, weh ataih đơ̆ng dôm lu tơdrong ơh sơ’ngon păng pơjah pơjăng băl. Mă lei rok trong kiơ̆ Kră Yang ưh kơ đei pơkă tơdrong hiôk ‘lơ̆ng- tơplơ̆ dơ̆ng, ‘noh jơ̆ mĭnh tơdrong tơblah gah bơhngol ưh kơ pơdơh. Kiơ̆ Kră Yang ưh kơ trŏ dơ̆ng mĭnh dơnơ̆ng wă pŭ iŏk, mă lei iung blah tŏk bŏk lăm tơdrong truh, bơwei jơhngơ̆m tơnăp lăm tơdrong pơlong lăng, păng kơjăp kơplah teh đak ‘maih blah lu bơ̆n. Păng tơpă, ưh kơ đei bu yak hlôi đơ̆ng tơdrong tơblah ‘noh na ưh kơ chĕp ba dôm kơ rơka, Mă lei lăm dôm kơ rơka ‘noh tă kơ jơ̆ mĭnh tơdrong tơbăt tơ’bôh kơ lu bơ̆n đei tơblah păng kĕ jei!

Năr ‘nâu, ‘năr 26/07/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Jennifer E. Jones kơ̆l ‘bai DÔM KƠ ĐÊL RƠKA ĐƠ̆NG RŎNG KƠ TƠBLAH

Sơ̆p Hla Bơar ‘Bok Kei-Dei: “Athei adrin mă tơpă, lui mă kơjăp na jei ih, na ih gô đei iŏk tơdrong arih tơ plĕnh ling-lang. Hơtai ih lui tơm hmơm sơ̆, đe krao khan kơ ih đang boih, na ih pơma ‘bơ̆t anăp đe tơpôl lơ khan ih wă tơpă lui kơ Yêsu Krist. Đơ̆ng noh sơ̆ boih ‘Bok Kei-Dei ăn kơ ih arih ling-lang.” (I Timôthê 6:12)

Bơngai chih hơ’mon Chuck Palahniuk đei chih: “Pơm thoi yơ buăl gơh hlôh hơđăl akâu jăn tơdah buăl ưh tim mă đei tơblah layơ? Inh ưh kơ ‘maih lôch mă ưh kơ đei iŏk mĭnh rơka…”

Pơge ‘nâu, inh tơchĕng pơwao gah tơdrong tơm đơ̆ng mĭnh tơdrong tơblah tơpă thoi yơ. Jơ̆ bơngai drŏ-kăn, tơteh băl ưh kơ trŏ jơ̆ mĭnh “tơdrong juăt wơ̆ ‘lŏ” lĕi lăi thoi bơngai drŏkăn. Mă lei, inh kŭm đơ̆ng đei teh tôn truh tôch hăm lu oh drŏnglo kơplah oei hơ’lơ̆p, na mă lơ tŏ sĕt kŭm đei hlôh.

Gah lơ đĭ đăng kon bơngai đei pơdrơ̆ng khan: mĭnh tơdrong tơblah mă lăp đei mĭnh khŭl đei pŭ iŏk lei ưh kơ tơpă jơ̆ teh tôn băl. ‘Noh lăp jơ̆ mĭnh tơdrong pŭ iŏk. Bơngai pơm kơnê̆ yua iŏk bơngai rơdu tơrăn hloh kơ bơ̆n. Mĭnh tơdrong teh tôn băl trŏ jơ̆ kăl kơ đei ‘bar pah- bơngai ‘nâu teh, bơngai to teh plơ̆.

Tơdrong bơwei kơjăp đon lui kŭm thoi noh. Tơdah buăl wă kơ arih mĭnh chăl arih Bơngai Lui tơpă, dah lăp hmă đĕch arih thoi mĭnh ‘nu bơngai rơhing wă kơ gơh jê̆ hơdai hăm Kră Yang, lei tơpă tơdrong arih ‘nâu gô blah buăl dơ̆ng yua kơ tơdrong ‘noh. Sư gô teh tôn buăl!

Nhen thoi Rocky đei pơma: “Ưh kơ đei bu teh tôn buăl jĭ hloh kơdih tơdrong arih buăl.” Teh đak gô chă tôm tơdrong wă tơgar iŏk tơdrong hiôk chơt păng tơdrong hiôk hian đơ̆ng buăl, hlôi đơ̆ng dôm tơdrong truh ưh kơ wă, dôm tơdrong hiong răm blư truh, dôm lu hơlŭng jrŭ mă buăl ưh kơ gơh tơchĕng hơdrol.

Thoi noh buăl gô pơm kiơ?

Buăl gơh kơchôt akâu kơdih, pĕng măt păng pŭ iŏk. Tơpă, mưh lăp kơplah ‘noh jơ̆ đĭ đăng dôm lu tơdrong kiơ buăl gơh pơm. Đei dôm lu tơdrong pơlong lăng ưh kơ kăl kơ wă thoi âu dah thoi noh dah kĕ blah plơ̆, păng lăp hmă đĕch jơ̆ ‘bai pơm apĭnh gah jơhngơ̆m kĕ pŭ iŏk đĕch.

Buăl kŭm pơrơ̆ng tơgŭm kơ bơngai ayăt kiơ̆ hăm tơdrong pơm jĭ akâu kơdih. ‘Noh jơ̆ kơplah buăl pơdrơ̆ng ăn kơ dôm tơdrong tơchĕng ưh kơ ‘lơ̆ng chop mơ̆t tơlăm đon tơchĕng: “Ưh ưh kơ ‘lơ̆ng tôm”, “Inh ưh kơ đei gơh hơgei”, “Inh gô ưh kơ layơ gơh yak hlôi”…Kơplah ‘noh, ayăt ưh kơ kăl kơ pơm tơlĕch. Kơdih buăl gô blah kơdih akâu buăl.

Mă lei oei đei mĭnh tơdrong rơih iŏk dơ̆ng: buăl gơh iung păng tơblah. Tơblah gơnang tơ lăm nơ̆r pơkă đơ̆ng Kră Yang: “Mă dôm tơmam tơblah sư pơm wă pơrăm Ih gô ưh kơ kĕ păng dôm nơ̆r lu bơngai pơma jâu ih gô glăi đĭ.” (Êsai 54:17). Buăl gơh bơwei nơ̆r Kră Yang lăm jơhngơ̆m, păng gô tơ’bôh hloi tơdrong tơpăt ‘noh rim năr. Buăl gơh tơ’bơ̆p păng blah dôm nơ̆r pơma hơlĕnh oei chă trong blah tơmôch thŏng nan tơdrong arih buăl.

Trŏ bơih, tơdrong ‘noh gô ưh kơ ‘bônh. Buăl gô jĭ. Buăl gô wing măt. Ayăt ưh kơ pơm ‘lơ̆ng, păng sư băt hơđăl anih ayơ jơ̆ tơdrong buăl oei đei rơdu. ‘Nĕ kơ tơchĕng khan ayăt gô achăng- tơplơ̆ dơ̆ng, sư gô teh ‘bơ̆t anih jĭ hloh.

Ưh kơ đei gơh oei ‘lơ̆ng yak hlôi đơ̆ng tơdrong tơblah mă ưh kơ đei chĕp ba mĭnh jĭ rơka ayơ. Mă khan kơplah ‘Bok Dŏng Pơklaih Yang Yêsu kŭm đei đơ̆ng rơka. Đơ̆ng rŏng kơ iung arih, sư đei ăn kơ lu bơngai pơhrăm lăng dôm kơ rơka đơ̆ng kơđinh lăm akâu jăn Sư (Luka 24:39). Tơpă, trŏ kơ dôm lu đêl rơka ‘noh jơ̆ tơdrong tơ’bôh ưh kơ gơh wă pơjah khan Sư đơ̆ng đei lôch- păng dang ei đei iung arih. Inh lui khan dôm kơ đêl rơka đơ̆ng lu bơ̆n kŭm đei chĕp tơdrong tơm thoi noh: ‘noh jơ̆ tơdrong tơ’bôh lu bơ̆n đei yak hlôi kơ tơdrong tơblah.
Dôm kơ lu rơka ‘noh tơgŭm lu bơ̆n đei tôm tơdrong wă năm hơdai dôm lu bơngai oei jĭ ơh sơ’ngon, păng pơma hăm lu sư khan: “Inh đơ̆ng đei hlôi tơ’bơ̆p tơdrong thoi buăl. Inh hlôh kơ buăl!”

Yua kơ thoi noh, athei kư̆ kơ ngơk kơ̆l kơjung. Buăl ưh kơ kĕjei dôm wơ̆t tơblah, mă lei ‘nĕ kơ hiơt khan buăl trŏ đei kĕ jei lăm tơdrong tơblah bơih!

“Mă ih kư̆m lei-lăi athei adrin mă tơpă, lui mă kơjăp na jei ih, na ih gô đei iŏk tơdrong arih tơ plĕnh ling-lang. Hơtai ih lui tơm hmơm sơ̆, đe krao khan kơ ih đang boih, na ih pơma ‘bơ̆t anăp đe tơpôl lơ khan ih wă tơpă lui kơ Yêsu Krist. Đơ̆ng noh sơ̆ boih ‘Bok Kei-Dei ăn kơ ih arih ling-lang.” (I Timôthê 6:12)

Apĭnh đĭ đăng krao khan hơdai:
Kơkuh kơ Kră Yang ‘mêm mơnat, apĭnh tơgŭm kon ưh kơ klĕng ôn kơdâu tŏk bŏk tơdrong tơblah gah bơhngol. Kơplah đei pơ̆k huŏng, đei ơh sơ’ngon, apĭnh pơtho kơ kon băt gơnang tơ anih jơhngơ̆m pran đơ̆ng Ih păng ưh kơ achăng. Apĭnh tơ’blŏk kơ kon khan Ih đơ̆ng đei chĕp tơdrong jĭ yua kơ kon, păng Ih ‘bôh băt hlôh kơ kon tơpă. Hơpơi kơ Ih bơwei bơhngol kon, wă kơ kon kơjăp păng tơnăp dĭng truh tơ tôch. Wă kơ đơ̆ng dôm lu rơka kon, đĭ đăng bơngai đei gơh băt kơ Ih jơ̆ Tơ’nlga đei ‘măn kĕjei kơ kon. Kon kŭp kơ̆l krao khan hăm anăn Yang Yêsu Krisr, A-men.

Ơ lu bơngai mơ̆ng mă ‘mêm kơ-eng, buăl hăm đei chĕp dôm kơ lu đêl rơka đơ̆ng rŏng gah pơhngol ưh? Dôm lu đêl rơka ‘noh trŏ jơ̆ tơdrong tơbăt kơ tơ’bôh buăl đei dơ̆ng kơjăp, pơkă ưh kơ achăng, păng buăl đei kĕ jei lăm tơdrong mơsêh mơyang Kră Yang ăn. Lui gơnang ưh trŏ jơ̆ ưh kơ layơ pơ̆k huŏng; lui gơnang mă khan pơ̆k, lu bơ̆n oei pơ̆n nuih yak năm, mă khan kơplah akâu jăn chĕp ‘bĕnh jĭ rơka. Păng buăl athei hiôk chơt ling lang, yua kơ băt khan Kră Yang ling lang chơ chă dôm lu bơngai pơ̆n tơblah yua kơ anăn Sư, tơnăp dơ̆ng kơjăp dĭng truh tơ tuch luch.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.